LESSON 37

Wat Da Bible Tell About Work An Money

Printed Edition

You eva wen worry plenny about work o money? Can be hard fo take kea da tings we need an still yet give Jehovah da worship he deserve. Da Bible give us good kine words dat can help all us.

1. Wat da Bible tell about work?

God like us fo stay good inside wit oua work. Da Bible tell, fo “stay good inside bout hard work! No mo notting mo betta.” (Da Teacha 2:24) Jehovah work hard. Wen we copy Jehovah an work hard, we make him happy an we feel happy too.

Work is importan. But az no good if we make um moa importan den worshiping Jehovah. (John 6:27) He promise dat wen we make him numba one in oua life, he goin give us wat we need fo live.

2. Wat is one good way fo look at money?

Da Bible tell dat “money, az jalike one roof ova yoa head.” Same time, it tell too dat money by itself, no can make us happy. (Da Teacha 7:12) So den, we no like love money but we like “stay good inside bout da stuff [we] get awready.” (Read um Fo Da Hebrew Peopo 13:5.) Wen we stay good inside wit wat we get, we no goin be futless cuz we tink we no moa enuff stuffs. We no goin borrow money jus fo buy stuffs we no need. (Smart Guys 22:7) An we stay away from gambling o businesses dat promise we goin get rich fas.

3. How we can use money fo kokua oddas?

Jehovah is one God who give plenny, an we copy him wen we “share [oua] stuffs, an fo kokua da peopo.” (1 Fo Timoty 6:18) We can use oua money fo kokua oddas wen we give to da local hui an help peopo who need um, speshly oua braddhas an sistahs. Jehovah no kea about how much we give but how come we give. Wen we give plenny from da heart, we goin be happy an we goin make Jehovah happy too.—Read um Jesus Guys 20:35.

DIG MOA DEEP

Try look how da right attitude about work an stayin good inside about wat you get awready, is good fo you.

4. Show respeck fo Jehovah by how you work

Being frenz wit Jehovah should affeck how we feel about work. Play um da VIDEO, an den talk story about da questions afta.

VIDEO: Go All Out Fo Jehovah (4:39)

Inside da video, wat you wen like about da way Jason wen tink an ack at work?
Wat he wen do fo tink da right way about work?

Read um Fo Da Colosse Peopo 3:23, 24, an den talk story about dis question:

How come da way we feel about work stay importan?

Picha: Work stay da mos importan ting fo one guy. 1. He work in one office daytime. 2. He stay working night time. 3. He still yet stay working afta da odda guys pau hana. 4. He eat dinna by himself at home.

Work, az importan. But is no good if we make um moa importan den worshiping Jehovah

Picha: Da same guy make odda tings da mos importan ting. 1. He work in one office daytime. 2. He pau work an go home. 3. He put his hand up fo ansa at da local hui meeting. 4. He eat dinna wit his wife an his two kids.

5. Stayin good inside about da stuff we get awready is good fo us

Plenny peopo like try fo get az much money az can. But da Bible tell us fo do someting else. Read um 1 Fo Timoty 6:6-8, an den talk story about dis question:

Wat da Bible tell is good fo us do?

Even if we no moa too much, we still can be happy. Play um da VIDEO, an den talk story about da question afta.

VIDEO: “Stay Good Inside About Da Stuff You Get Awready” (3:20)

Even tho dese ohanas had litto bit money, wat wen make dem happy?

But wat if we get plenny an still like some moa? Jesus wen tell one story fo help us watch out. Read um Luke 12:15-21, an den talk story about dis question:

Wat you wen learn from wat Jesus tell?—Go look verse 15.

Read um Smart Guys 10:22 an 1 Fo Timoty 6:10. Den talk story about dese questions:

Wat you tink is moa importan? Being frenz wit Jehovah o having plenny money? How come?
Wat kine pilikia you can get from goin afta money?

6. Jehovah goin take kea wat we need

Wen we get problems wit work o we no moa enuff money, dat can help us fo know if we trus Jehovah. Play um da VIDEO fo see wat we can do wen we get dese kine problems, an den talk story about da questions afta.

VIDEO: Jehovah Goin Take Kea Wat We Need (6:21)

Inside da video, wat kine hard stuffs da braddah had fo go thru?
Wat he wen do fo hando um good?

Read um Matthew 6:25-34, an den talk story about dis question:

Fo da guys dat make Jehovah da main ting, wat Jehovah promise he goin do fo dem?

WAT SOME PEOPO TELL: “I gotta work hard fo take kea my family, you know wat I mean? I no can go meeting ery week.”

Wat scripcha help you know fo shua dat Jehovah goin take kea wat we need if we make worshiping him da numba one ting?

WAT WE WEN TALK ABOUT

We gotta work an have money, but dat should neva get in da way of us serving Jehovah.

Wat You Wen Learn

Wat can help you fo look at work da right way?
How stayin good inside about da stuff you get awready can be good fo you?
How you can show yoa trus in Jehovah’s promise dat he goin take kea his peopo?

Wen da lesson pau:

Someting Fo Do

Try look if yoa work wen make you miss plenny meetings ova da pas few months. If yeah, try plan um out wea you can come meetings.

Wat else you like do:

Wat else you like do

LEARN SOME MOA

Try look if da Bible tell dat money stay bad.

“Is Money the Root of All Evil?” (Web article)

Try learn how we can use oua money fo make God happy.

“What Does the Bible Say About Giving?” (Web article)

Gambling, dat can hurt you o wat?

“The Bible’s Viewpoint—Gambling” (Awake!, March 2015)

Try look wat wen make one guy no gamble o steal anymoa.

“I Was Passionate About Racehorses” (The Watchtower, November 1, 2011)