Tings We Learn From Peter’s Two Lettas

1. Right befoa Peter wen mahke, wat Jehovah wen use him fo do?

DA APOSAL Peter was faithful to Jehovah fo long time. He wen preach wit Jesus, he wen open up da way fo preach to da guys who no was Jews, an layta on he wen come one of da luna guys. Wen his life was almos pau an he knew he was going mahke pretty soon, Jehovah wen give him some moa work fo do. Aroun 62-64 C.E., Jehovah wen use him fo write two lettas, da Bible books 1 an 2 From Peter. He wen hope dat dese lettas would help da Christians afta he wen mahke.​—2 Pet 1:12-15.

2. How come Peter’s lettas was perfeck timing?

² Peter wen write his lettas at one time wea his braddahs an sistahs was getting “all kine hard time.” (1 Pet 1:6) Had guys dat was no good who wen try fo bring in bulai kine teachings an pilau kine stuff inside da hui. (2 Pet 2:1, 2, 14) Da Christians living inside Jerusalem was going face “da time wen eryting goin come pau.” Pretty soon Jerusalem an da whole Jew world was going get smash by da Roman armies. (1 Pet 4:7) Peter’s lettas wen help da Christians stay faithful an know how fo be ready fo wat was going happen bumbye.b

3. Why we should check out Peter’s lettas?

³ Even tho Peter wen write dese lettas fo da firs Christians, Jehovah wen make shua it stay in da Bible so all us can learn from um. (Rome 15:4) Jalike da firs Christians, we live in one pilau world dat make um hard fo serve Jehovah. On top of dat, we going face troubles dass even moa hard den wen da Jewish world wen get smash. Get some importan remindas fo us in Peter’s two lettas. Dese going help us fo be ready fo Jehovah’s day, fo no be sked wat peopo tink o do to us, an fo have plenny love an aloha fo each odda. Dese remindas also going help da eldas fo see how fo take kea da braddahs an sistahs in dea huis fo stay strong.

STAY READY

4. Wat 2 From Peter 3:3, 4 say dat can shake up oua faith?

⁴ Get peopo all aroun us dat no moa faith in wat da Bible tell about da future. Da guys who go agains us might make fun of us cuz dey say we been saying da end going come fo long time awready. Some peopo say dat da end neva going come. (Read um 2 From Peter 3:3, 4.) If we hea dat kine talk from somebody we preach to, somebody we work wit, o somebody in oua ohana, dat can shake up oua faith. Peter wen say wat can help us.

5. Wen come to da end of dis pilau world, wat going help us look at tings da right way? (2 From Peter 3:8, 9)

⁵ Might seem like Jehovah is slow fo wipe out dis pilau world. Peter’s words can help us fo look at tings da right way, an remind us dat da way Jehovah look at time is diffren from us. (Read um 2 From Peter 3:8, 9.) To Jehovah, tousand years is jalike one day. Jehovah is patient cuz he no like nobody get cut off from him. But wen his day come, dis world going be pau. We get one spesho chance fo use da time dat get lef fo preach to peopo all ova da earth.

6. Wen come to Jehovah’s day, how we “go all out fo make dat happen mo fas”? (2 From Peter 3:11, 12)

⁶ Wen come to Jehovah’s day, Peter tell us fo “go all out fo make dat happen mo fas.” (Read um 2 From Peter 3:11, 12.) How we do dat? We gotta try tink hard eryday about all da unreal stuff dat going happen in da new world. Picha yoaself ova dea breathing fresh air, eating good food, seeing all da guys you love dat wen mahke come back alive, an teaching da peopo who wen live long time ago about all da stuff in da Bible dat wen come true. Tinking hard about dese tings going help you fo stay ready an fo know fo shua dat da end is coming pretty soon. Cuz we “know awready” wat going happen in da future, we not going let da bulai teachas make us “go da wrong way.”​—2 Pet 3:17.

NO SKED WAT PEOPO TINK O DO

7. How bein sked of peopo can affeck us?

⁷ Cuz we know dat Jehovah’s day is coming pretty soon, we like do oua bes fo share da trut wit odda peopo. Still yet, get some times wea we sked fo speak up. How come? Cuz we sked wat some peopo might tink about us, o even do to us. Dass wat wen happen to Peter. Da night of Jesus trial, Peter was sked fo say he was one of Jesus followas, an ova an ova he wen say he neva know him. (Mat 26:69-75) But Peter wen get ova bein sked an he wen write, “No sked da same tings dat make odda peopo come sked, an no worry.” (1 Pet 3:14) Wat Peter wen say show us dat we no need be sked wat peopo tink, o wat dey can do to us.

8. Wat can help us no be sked of peopo? (1 From Peter 3:15)

⁸ Wat can help us no be sked of peopo? Peter tell us, “Get choke respeck fo Christ in yoa heart.” (Read um 1 From Peter 3:15, NWT.) Dat mean we gotta rememba Jesus Christ is oua ali‘i an he get choke powa. If you feel nervous o sked wen get chance fo preach to oddas, tink about Jesus. Picha him az rula in heaven wit uku million angels all aroun him. Rememba dat he get “all da powa . . . all ova da world an inside da sky” an he “goin stay tight wit you guys ery day, till da world come pau.” (Mat 28:18-20) Peter tell us we gotta be ready fo tell oddas wat we believe. You like preach to somebody at work, school, o someplace else? Tink about wen you can do dat an den make ready wat you going say. Pray fo courage an trus Jehovah going help you no be sked of peopo.​—Jesus Guys 4:29.

“GET PLENNY LOVE AN ALOHA”

9. Wat was one time Peter neva show love? (Go look da picha.)

⁹ Peter wen learn how fo show love an aloha. He was dea wen Jesus wen tell, “I give you guys one new ting you gotta do: Show love an aloha fo each odda! Jus like I show love an aloha fo you guys, dass how you guys gotta show love an aloha fo each odda.” (John 13:34) Still yet layta on, Peter wen cave to da presha fo no eat wit his braddahs an sistahs who no was Jews. Da aposal Paul wen tell dat Peter “tell one ting an do anodda.” (Gal 2:11-14) Peter wen lissen an learn wen Paul had correck him. In his two lettas, he wen say az not enuff fo ony feel love fo oua braddahs an sistahs, but we gotta show um too.

10. How you get “da kine love an aloha dat show you no jus ack”? (1 From Peter 1:22)

¹⁰ Peter tell dat we gotta have “da kine love an aloha dat show you no jus ack,” fo oua braddahs an sistahs. (Read um 1 From Peter 1:22.) We get dat kine love from doing “wat stay pono.” Part of dat is lissening to wat God tell wen he sed fo “treat erybody same same.” (Jesus Guys 10:34, 35) We no can follow wat Jesus tell about love if we ony love some in da local hui. Az true we going be moa close to some den oddas, an Jesus was lidat too. (John 13:23; 20:2) But Peter help us fo see dat we like love all oua braddahs an sistahs cuz dey part of oua ohana.​—1 Pet. 2:17.

11. Wat gotta do fo “show even mo plenny love an aloha fo each odda”?

¹¹ Peter wen tell us fo “show even mo plenny love an aloha fo each odda cuz you get one good heart.” Dat mean fo get plenny love an aloha, we gotta love somebody even if az hard fo show love to dem. Like wat if one braddah say o do someting dat hurt you? Maybe firs ting we like do is get um back, radda den show love. But Peter wen learn from Jesus dat Jehovah no like us be lidat. (John 18:10, 11) Peter wen write, “no do bad kine tings back . . . but ask God fo do good kine stuff fo da guy.” (1 Pet 3:9) Dat kine love going make you show love to da guys dat maybe wen hurt you.

12. (a) Wat else having plenny love an aloha going make us like do? (b) How you like copy da braddahs an sistahs in da video Preserve the Precious Gift of Unity?

¹² In da firs letta he wen write, Peter sed dat having “plenny love an aloha” going help us let go, not jus litto bit stuff, but “plenny bad kine stuff da odda guy wen do.” (1 Pet 4:8) Probly Peter wen rememba wat Jesus wen teach him befoa about letting peopo go. Dat time, Peter probly wen tink he was bein one good guy wen he sed he would let his braddahs go “seven times.” But Jesus wen teach him an us fo let dem go “seventy times seven” times, o no moa limit. (Mat 18:21, 22) If az hard fo you do dat, no give up! Erybody who serve Jehovah not perfeck an sometimes az hard fo let peopo go. Da importan ting fo you do now is do yoa bes fo let yoa braddah go an make peace wit him.c

ELDAS, TAKE KEA DA SHEEPS

13. Wat make um hard fo eldas take kea dea braddah an sistahs?

¹³ Garans Peter neva foget wat Jesus wen tell him afta he wen come back alive, “Take kea my sheeps.” (John 21:16) If you one elda, you know you gotta do dat too. Can be hard fo one elda find nuff time fo take kea dis kuleana. Firs, eldas gotta make shua dea ohana get nuff fo live, dat dey all feel loved, an dey gotta help dea ohana fo come moa tight wit Jehovah. Dey also gotta be one exampo in preaching to oddas an fo make ready an give dea parts at da meetings an big kine meetings. Some of dem get kuleana as part of da Hospital Liaison Committee o wit da Local Design/Construction Department. Eldas get choke fo do!

14. Wat going help make eldas like take kea da sheeps? (1 From Peter 5:1-4, NWT)

¹⁴ Peter wen tell da eldas fo “take kea da peopo God wen give you.” (Read um 1 From Peter 5:​1-4.) If you one elda, we know you love yoa braddahs an sistahs an like take kea dem. But maybe sometimes you so busy o tired you feel like you no can do um. Wat you going do? Tell Jehovah all da tings you worried about an how much you like help yoa braddas an sistahs. Peter wen write, “If anybody get da gif fo help anodda guy, he gotta help um wit da powa dat God give um.” (1 Pet 4:11) Maybe da problems yoa braddahs an sistahs get no going go away befoa dis world pau. But rememba, da Main Sheep Guy Jesus Christ can help dem way moa betta den you. He can do dat now an bumbye in da new world. Jehovah jus ask da eldas fo love dea braddahs, fo take kea dea braddahs, an fo “show dem how fo live.”

15. How one elda take kea da sheeps? (Go look da picha.)

¹⁵ William was one elda fo long time so he know az importan fo take kea da sheeps. Wen da COVID-19 pandemic wen start, him an da odda eldas in his hui wen make shua dey was in touch wit erybody in dea group ery week. He tell why, “Plenny of oua braddahs dat was home by demselfs had plenny time fo tink, an ony fas dey could start fo tink negative.” Wen one braddah o sistah get pilikia, William lissen real good fo try figga out wat dey need an how come dey stay worry. Den he go find someting on oua website fo try help um. He tell, “taking kea da sheep is moa importan now den eva befoa. We work hard fo help peopo dass not oua braddahs fo learn about Jehovah. We gotta work jus az hard fo take kea oua braddahs an help dem stay in da trut.”

LET JEHOVAH PAU YOA TRAINING

16. From wat we wen learn from Peter’s lettas, wat we can try do?

¹⁶ We wen talk about ony some tings dat we can learn from da two lettas Peter wen write. Maybe you wen see someting you like do betta. Fo exampo, you like tink moa about da good kine tings dat going happen in da new world? You like preach to somebody at work, at school, o someplace else? You see ways you can show moa love an aloha fo yoa braddahs an sistahs? Eldas, you going go all out fo take kea Jehovah’s sheeps, cuz you like do um? If you honest wit yoaself, you might see some stuff you can be betta at, but no give up. Da Lord “get one good heart” an he going help you fo do betta. (1 Pet 2:3) Peter tell us, “God . . . goin make you guys stan up mo strong an come real solid inside so notting shake you up.”​—1 Pet 5:10.

17. If we no give up an let Jehovah train us, wat going happen?

¹⁷ At firs Peter wen feel like he neva deserve fo be wit Jesus. But wit help from Jehovah an Jesus, Peter neva give up bein one followa of Christ. Cuz of dat, Peter was pick fo go heaven an rule wit Jesus Christ. (2 Pet 1:11) Ho dass mean aah? If you no give up like Peter an let Jehovah train you, you going get one reward too, life dat las foeva.—1 Pet 1:9.