Wat Jehovah Wen Do Fo Save Us From Sin An Death

1-2. (a) Wat iz sin, an how we can fight agains um? (Go look “Wat Dis Mean.”)(b)  Wat we goin talk about in dis lesson an in da odda lessons inside dis magazine? (Go look “Note Fo Da Readas” in dis magazine.)

YOU like kno how much Jehovah love you? Fo find out, study about wat he wen do fo save you from sin an death. Sina iz one enemy dat you no can beat by yoaself. We all sin eryday, an cuz we sin, we die. (Rome 5:12) But get good news. Jehovah garantee dat he goin save us from sin an death!

² Fo about 6,000 years Jehovah been helping peopo fight agains sin. How come? Cuz he love all us. He wen love peopo from da start so he wen do plenny tings fo help dem fight agains sin. God kno dat cuz we sin, we goin die. An he no like none of us die. He like us live foeva. (Rome 6:23) Dass wat he like fo you. In dis lesson, we goin ansa three questions, (1) Wat hope Jehovah wen give to all us sinners? (2) Wat imperfeck peopo in Bible times wen do fo make Jehovah happy? (3) Wat Jesus wen do fo save peopo from sin an death?

WAT HOPE JEHOVAH WEN GIVE TO ERYBODY DAT SIN?

3. Wat wen happen in da Eden Garden?

³ Wen Jehovah wen make da firs man an wahine, he wanted dem fo be happy. He wen give dem one cherreh spot fo live, da gif of marriage, an good work fo do. Dey wuz suppose to fill da eart wit dea kids an make da whole place one paradise like da Eden Garden. He wen give dem ony one simpo rule. An he wen warn dem wat wuz goin happen if dey neva lissen an wen go agains him. Dey wuz goin mahke if dey wen sin. An we kno wat had happen nex. One bad angel who neva love God or dem, wen tempt Adam an Eve fo no lissen to God. Adam an Eve wen cave an wen lissen to da bad angel. Dey neva trus dea Faddah an wen sin. Cuz dey neva lissen, Adam an Eve wen suffa fo da res of dea lifes. Dey wen get old, an den wen mahke.​—Start 1:28, 29; 2:8, 9, 16-18; 3:1-6, 17-19, 24; 5:5.

4. How come Jehovah hate sin? (Fo Da Rome Peopo 8:20, 21)

⁴ Jehovah wen put wat wen happen in da Eden Garden inside da Bible so dat we can undastan someting importan. It help us fo undastan how come he hate sin so much. Sin split us up from Jehovah, an it make us mahke. (Isa 59:2) Satan hate Jehovah an peopo. Dass how come he wen get Adam an Eve fo sin, an he try make erybody sin today too. He probly wen tink he had come out da winna in da Eden Garden. But he neva undastan how much love Jehovah get. His goal fo erybody dat come from Adam an Eve neva change. He love peopo so much dat right dea on da spot, he wen give dem hope. (Read um Fo Da Rome Peopo 8:20, 21.) Jehovah wen kno would get peopo dat would choose fo love him an lissen to him. An Jehovah wen make one way fo dem come close to him an get save from sin an death. Wat Jehovah wen do fo make dat happen?

5. Wat hope Jehovah wen give peopo right afta Adam an Eve wen sin? (Da Start 3:15)

⁵ Read um Da Start 3:15. Tru dis prophecy, Jehovah wen give peopo hope. Right away Jehovah wen say dat Satan wuz goin get smash. God wen say dat would get one kid dat would save erybody. Dis kid would smash Satan an fix all da problems dat wen start in da Eden Garden. (1 John 3:8) But dat kid wuz goin suffa. Satan wuz goin “bite” him an make him mahke. Dat wuz goin hurt Jehovah da mos. But all dat pain would be wort it, cuz in da end plenny peopo would be save from sin an death!

HOW PEOPO DAT WEN SIN IN BIBLE TIMES HAD MAKE JEHOVAH HAPPY?

6. Wat Abel, Noah, an odda faitful guys wen do fo come close to Jehovah?

⁶ Ova da hundreds of years afta wat had happen in da Eden Garden, Jehovah wen make um moa clear how erybody dat sin can come close to him. Afta Adam an Eve wen go agains Jehovah, dea secon boy Abel, wuz da firs one dat wen put fait in Him. Cuz Abel wen love Jehovah an wanted fo make him happy an come close to Him, he wen sacrifice someting to Jehovah. Abel wuz one sheep guy so he wen take some of his bebe sheeps an sacrifice um to Jehovah. How Jehovah wen feel about dat? He wen “like wat Abel give him.” (Start 4:4) Jehovah wuz happy wit da sacrifices of odda peopo too, like Noah. (Start 8:20, 21) Dis show dat erybody who sin can make Jehovah happy an come close to him.b

7. Wat we learn from wat Abraham wuz willing fo do?

⁷ Abraham had strong fait an Jehovah wen ask him fo do someting supa hard. He wen tell Abraham fo sacrifice his boy Isaac. Garanz dis wuz supa stressful fo Abraham. Still yet, he wen lissen to Jehovah. Right wen Abraham wuz goin sacrifice his boy, God wen stop um. Dat exampo wen show wat Jehovah would do layta on. He would be willing fo give his own Boy dat he love so much az one sacrifice. Jehovah love peopo dat much.​—Start 22:1-18.

8. Wat da sacrifices unda da Law wen show? (Da Prieses 4:27-29; 17:11)

⁸ Hundreds of years layta wen Jehovah wen give da Law to da Israel peopo, he wen tell dem fo make animal sacrifices fo dea sins. (Read um Da Prieses 4:27-29; 17:11.) Dese sacrifices wen show dat Jehovah would give one moa betta sacrifice dat would save erybody from sin. God’s prophets wen write about how da kid, who wuz God’s spesho Boy, wuz goin suffa an mahke. He would be like one sheep dat would get sacrifice. (Isa 53:1-12) So Jehovah wen promise dat he would give his Boy fo be one sacrifice fo save peopo from sin an death. Dass one unreal ting dat Jehovah wen do, an he wen do um fo you too!

WAT JESUS WEN DO FO SAVE ERYBODY?

9. Wat John da Baptiza wen say about Jesus? (Fo Da Hebrew Peopo 9:22; 10:1-4, 12)

⁹ In da year 29 C.E., John da Baptiza wen spock Jesus an wen say, “Try look da guy ova dea! . . . He jalike God bebe sheep fo da sacrifice. He hemo da shame fo da bad kine stuff dat erybody inside da whole world stay do!” (John 1:29) Dese words wen show dat Jesus wuz da spesho kid dat God had promise. Jesus wuz goin sacrifice his life. Now had solid hope fo save erybody from sin.​—Read um Fo Da Hebrew Peopo 9:22; 10:1-4, 12.

10. How Jesus wen show he wen come fo help da peopo dass sinners?

¹⁰ Jesus wen focus on guys dat wen feel bad cuz dey wuz sinners an wen ask dem fo follow him. He wen kno dat da real reason peopo suffa wuz cuz of sin. Jesus speshly wen help da guys dat erybody wen kno wuz sinners. He wen use one word picha an wen tell, “Da guys dat not sick no need docta, ony da sick guys need docta.” Den he wen say, “I neva come fo tell da guys dat erytime do wat God tell um fo do, fo come my guys, but I wen come fo da peopo dat get one bad rep.” (Mat 9:12, 13) An dass wat Jesus wen do. Wen one wahine had wash his feet wit her tears, he wen talk nice to her an fogive her sins. (Luk 7:37-50) Jesus wen teach da trut to one wahine from Samaria even tho he knew dat she wuz living wit one guy dat wuzn’t her husban. (John 4:7, 17-19, 25, 26) Peopo mahke cuz of sin, but God wen give Jesus da powa fo bring guys, wahine, an keiki back to life.​—Mat 11:5.

11. How come peopo who wen do bad tings wuz comfortable aroun Jesus?

¹¹ Can undastan how come peopo who wuz doin bad tings wen feel comfortable aroun Jesus. He wen kno how dey wen feel an wuz nice to dem. Dey no wuz sked fo talk to him. (Luk 15:1, 2) Wen peopo wen show fait in him, he neva hold back from telling dem an doin good tings fo dem. (Luk 19:1-10) Jesus wen show how much his Faddah wen feel fo peopo. (John 14:9) By wat he wen say an do, he wen show how much Jehovah love peopo an wanted fo help dem win da fight agains sin. Jesus wen help peopo dat sin fo change dea lifes an follow him.​—Luk 5:27, 28.

12. Wat Jesus wen teach about his death?

¹² Jesus knew wat wuz goin happen to him. Moa den one time, he wen tell his followas dat he wuz goin get stab in da back an killed on top one pos. (Mat 17:22; 20:18, 19, New World Translation.) He knew dat his sacrifice wuz goin take away erybody’s sin, like John an da prophets wen say. Jesus wen say dat afta he mahke, “I goin bring erybody by me.” (John 12:32) Da guys who put fait in Jesus an try fo copy him could make Jehovah happy. If dey wen do dat, dey would get let go from sin. (Rome 6:14, 18, 22; John 8:32) So Jesus wen show courage an wen suffa plenny an die fo save all us.​—John 10:17, 18.

13. How Jesus wen mahke, an wat dat teach us about Jehovah? (Go look da picha.)

¹³ One of Jesus guys wen backstab um. Den Jesus wen get arrested, wuz told anykine stuff, wen get accused of tings he neva do, an wuz tortured. Afta all dat, soldiers wen nail um to one pos fo kill him. Jesus wuz faitful an wen suffa tru all dat pain, but Jehovah wen suffa even moa watching Jesus go tru dat. Jehovah had da powa fo stop his Boy from suffaring, but he neva. Jehovah wen love his Boy so much, so how come he wen let him suffa an mahke? Cuz he love us. Jesus wen say, “God get plenny love an aloha fo da peopo inside da world. Dass why he sen . . . his one an ony Boy. Cuz a dat, erybody dat trus [him] no goin get cut off from God foeva! Dey goin get da real kine life dat goin stay to da max foeva!”​—John 3:16.

14. Wat Jesus sacrifice prove?

¹⁴ Jesus sacrifice iz da mos bigges proof dat Jehovah love erybody dat come from Adam an Eve. It prove dat Jehovah love you plenny. He wen sacrifice his Boy dat he love so much, an wen go tru so much pain fo save you from sin an death. (1 John 4:9, 10) Jehovah like ery one of us fo win da fight agains sin!

15. Wat we gotta do fo benefit from God’s gif of da ransom?

¹⁵ God’s gif of da ransom sacrifice of his one an ony Boy make um so dat oua sins can get let go. But fo God let us go, we gotta do someting. Wat we gotta do? John da Baptiza an den Jesus wen give us da ansa, “Come sorry fo all da kine bad stuff you stay do now, an no do um no moa.” (Mat 3:1, 2; 4:17) So we gotta come sorry if we like be close to Jehovah an get oua sins let go. But wat dat mean fo come sorry, an how dat help us fo make Jehovah happy even tho we sin? Da nex study lesson goin ansa dat.