Questions Readas Get

2 Fo Da Tessalonika Peopo 3:14 tell us fo “watch out” fo certain peopo. Az da eldas telling us fo do dat, or dass up to ery person in da hui?

Dis wat da aposal Paul wen tell da Christians in Tessalonika, “If get one guy dat no like lissen da stuff we stay telling you in dis letta, watch out fo dat guy.” (2 Tess 3:14) Befoa time, we sed dis wuz fo da eldas do. In da pas, da eldas would give one talk fo warn erybody in da local hui wen somebody neva lissen afta getting counsel ova an ova about wat da Bible tell. Afta dat, da braddahs an sistahs no would hang out wit da one who wuz marked outside da meetings an field service.

But we gotta make one change to dat. Now we undastan dat Paul wuz talking about one choice dat ery Christian gotta make depending on certain stuff dat stay happening. So da eldas no need give one talk fo warn us. How come dis wen change? Try look wat Paul wuz talking about wen he had tell dis.

Paul wen say dat get some in da local hui dat “no stay acking da right way.” Dey neva like lissen wat da Bible tell. He wen tell dem befoa, if you “no work, no eat.” Some guys neva like work fo take kea demselfs even if dey could. An dey wuz bein niele in odda peopos bizness. How Christians wuz suppose to treat dese guys?​—2 Tess 3:6, 10-12, NWT.

Paul tell, “Watch out fo dat guy.” Da Greek word give da idea fo spock out somebody lidat an be keaful dat dey no affeck da way you ack. Paul wuz telling dis to da whole hui, not jus da eldas. (2 Tess 1:1; 3:6, NWT.) So ery Christian who wen spock out one braddah or sistah not doin wat da Bible tell would choose fo “stay away from” um.

Dis mean dat you goin treat da person like dey stay hemo from da hui? No, cuz Paul wen tell, “He yoa braddah.” So ery Christian would still spen time wit dem at da meetings an field service, but would choose fo no hang out wit dem at get togeddas or wen doin odda stuff fo fun. How come? Paul wen tell, “Bumbye he goin come shame.” Wen we stop hanging out wit one braddah or sistah lidat, den maybe dey goin come shame an change da way dey ack.​—2 Tess 3:14, 15.

How Christians today goin kno wen fo watch out fo somebody? Firs, we goin make shua dat wat dey stay doin iz wat Paul tell, “no stay acking da right way.” He no wuz talking about peopo who stay diffren from us wen come to conscience kine stuff or peopo who choose diffren stuff from us. An he not talking about da guys dat wen hurt oua feelings eidda. But Paul wuz talking about dose dat wen get counsel from da Bible an wen still choose fo no lissen.

Today, if we spock out one braddah or sistah who still yet no lissen wat da Bible tell,a we goin make oua own choice fo no hang out wit dem at get togeddas or wen doin odda stuff fo fun. Cuz dis one choice we gotta make on oua own, we not goin talk about um wit anybody except oua ohana dat live in da same house wit us. But still yet we goin spen time wit da person at da meetings an in field service. Wen he change his attitude an how he ack, den we can hang out wit dem again.