STUDY LESSON 32
SONG 44 A Prayer of the Lowly One
Jehovah Like Erybody Fo Come Sorry
“[Jehovah] like erybody fo come sorry an no do all da bad kine stuff no moa. He no like nobody get cut off from him!”—2 PET 3:9.
MAIN TING WE GOIN LEARN
We goin see wat somebody gotta do fo come sorry, why erybody need fo come sorry, an how Jehovah wen help his peopo fo come sorry fo da bad tings dey wen do.
1. Wat mean fo come sorry?
WEN we do someting bad, we gotta come sorry, or repent. Da Bible tell dat wen somebody come sorry, dey hate da bad ting dey wen do, stop doin um, an make up dea mind fo no do um again.—Go look da Glossary, “Repentance.”
2. Why all us need fo learn fo come sorry? (Nehemiah 8:9-11)
2 Erybody gotta learn fo come sorry. How come? Cuz all us do bad tings eryday. We all come from Adam an Eve an sin an death wen get pass down to us. (Rome 3:23; 5:12) No moa nobody stay free of dis. Even guys wit strong fait, like da aposal Paul, wen have hard time fo no do bad tings. (Rome 7:21-24) Dis mean we should be bum out all da time cuz of da bad tings we wen do? Jehovah no hold tings agains us an he like us be happy. Try look wat wen happen to da Jews in Nehemiah’s day. (Read um Nehemiah 8:9-11.) Jehovah neva like dem be supa bum out cuz of da bad tings dey wen do befoa. But he wen like dem be happy worshipping him. Jehovah kno dat wen we come sorry, dat goin help us fo feel happy. So he teach us about um. If we come sorry fo da bad tings we do, we can kno fo shua dat Jehovah goin fogive us.
3. Wat we goin talk about in dis lesson?
3 In dis lesson, we goin learn some moa about wat mean fo come sorry. We go look at three tings. Firs, we goin go ova how Jehovah wen teach da Israel peopo fo come sorry. Den, we goin learn about how Jehovah reach out to sinners an try fo help dem fo come sorry. An den, we goin talk about wat Jesus wen teach his followas about how fo come sorry.
WAT JEHOVAH WEN TEACH DA ISRAEL PEOPO ABOUT HOW FO COME SORRY
4. Wat Jehovah wen teach da Israel peopo about how fo come sorry?
4 Wen Jehovah wen give da Israel peopo his rules, dey wen promise fo lissen to dem. An Jehovah wen promise dat if dey lissen, he would proteck an bless dem. He wen tell dis about his rules, “Wat I stay tell you guys fo do now, az not too hard fo you guys, an not too far from you guys.” (Rules 30:11, 16) But if dey no lissen to his rules, like dey go worship odda gods, den he no wuz goin proteck dem anymoa an dey wuz goin suffa. But still yet, dey could make tings good wit Jehovah again. Dey could “come back by [dea] God . . . an go all out fo lissen him.” (Rules 30:1-3, 17-20) So dat mean dey could come sorry fo wat dey wen do. If dey did, Jehovah would come tight wit dem an bless dem again.
5. How Jehovah wen show he neva give up on his peopo? (2 Kings 17:13, 14)
5 Jehovah’s peopo ova an ova wen go agains him. Dey wen worship idols an wen do odda real pilau kine stuff. Cuz of dat, dey had suffa. But Jehovah neva give up trying fo help dem. Plenny times he wen sen prophets fo try help his peopo fo come sorry an come back to him.—Read um 2 Kings 17:13, 14.
6. How Jehovah wen use his prophets fo teach his peopo how come dey gotta come sorry? (Go look da picha.)
6 Plenny times Jehovah wen use his prophets fo warn an correck his peopo. God wen tell Jeremiah fo say to da Israel peopo, “Go come back by me, you Israel peopo dat wen tell “Laytas” to me. I no goin give you guys stink eye no moa. Cuz I like give you guys chance, I no goin stay huhu all da time . . . You gotta tell wat you wen do az wrong, an dat you guys wen go agains me, yoa God.” (Jer 3:12, 13) Jehovah wen tell Joel fo say to da peopo, “Change how you feel inside . . . Go come back to yoa God.” (Joel 2:12, 13) He had Isaiah tell, “Go come clean inside! Throw out all da bad kine stuff you stay do. No do wass wrong no moa.” (Isa 1:16-19, NWT.) An Jehovah wen use Ezekiel fo ask, “You guys tink I stay good inside wen somebody dat do bad kine stuff get cut off from me, o wat?! . . . [I] stay good inside wen dey walk away from da way dey wen live befo time . . . throw out da bad kine stuff an get da real kine life!” (Eze 18:23, 32) Jehovah stay real happy fo see peopo come sorry cuz he like dem live foeva. But Jehovah no jus wait fo somebody change befoa he try help dem. We go look some exampos.
Plenny times Jehovah wen use his prophets fo help his peopo fo come sorry (Go look numba 6-7)
7. Wat Jehovah wen teach his peopo from da exampo of da prophet Hosea an his wife?
7 Try look wat Jehovah teach his peopo by using da exampo of da prophet Hosea, an his wife Gomer. Afta she wen fool aroun on Hosea, she wen leave him fo odda guys. Wat Jehovah wen do? Jehovah, who kno wat stay in ery persons heart, wen tell Hosea, “Go show yoa wife one mo time dat you get love an aloha fo her, no matta anodda guy love her an she stay fool aroun wit him. Go love her, jalike me Da One In Charge still love da Israel peopo, no matta dey turn away an go wit odda gods.” (Hos 3:1; Smart Guys 16:2) Hosea’s wife wuz still doin one real bad sin. But still yet, Jehovah wen tell Hosea fo fogive her an take her back.a From dis, Jehovah wanted fo teach his peopo about how he wen feel about him. Even tho dey wuz still doin real bad stuff, he wen still love dem. He wen keep sending his prophets fo help dem come sorry an make changes in dea lifes. Dis teach us dat Jehovah kno eryting about a person an he goin try help somebody dat doin real bad stuff fo come sorry. (Smart Guys 17:3) We go see how Jehovah do dis.
HOW JEHOVAH TRY HELP PEOPO FO COME SORRY
8. Wat Jehovah wen do fo help Cain come sorry? (Da Start 4:3-7) (Go look da picha.)
8 Adam an Eve’s firs boy wuz Cain. Wanting fo do bad stuff wen get pass down to him from his parents. But Cain no could control dose feelings. Da Bible wen say dat, “Cain stay do bad kine tings.” (1 John 3:12) Maybe dass how come Jehovah wen “like Abel mo den Cain, an he neva kea fo da present Cain wen give him” az one sacrifice. Instead of changing, “Cain come plenny huhu, an look mad.” Wat Jehovah wen do afta? He wen talk to Cain. (Read um Da Start 4:3-7.) Jehovah wen talk nice to Cain an wen tell um dat he would bless him if he do wass good. An He wen warn um dat if he no control himself, he would end up doin someting bad. Sad fo say, Cain neva lissen. He neva let Jehovah help him fo come sorry. Cuz Cain neva lissen, Jehovah wen say dass it, I not goin help anybody else fo come sorry? No ways!
Jehovah wen try fo help Cain fo come sorry an wen tell him dat he wuz goin get blessed if he did (Go look numba 8)
9. How Jehovah wen help David fo come sorry?
9 Jehovah wen love King David plenny. He wen call him “da kine guy dat make me stay good inside.” (Jesus Guys 13:22) But David wen do some real bad tings like fool aroun one guy’s wife an den have dat guy killed. Unda da Rules From Moses, David wuz suppose to mahke fo dat. (Pries 20:10; Cens 35:31) But Jehovah wanted fo help David fo come sorry.b Even tho David no wuz sorry yet, Jehovah wen sen Nathan da prophet fo visit him. Nathan wen use one word picha fo help David see he wen do someting real bad. David wen realize he wen hurt Jehovah an wen come sorry. (2 Sam 12:1-14) He had write one song fo show how sorry he wuz. (Songs 51, da words befoa da song) Dat song wen help plenny peopo dat wen sin fo feel betta an come sorry. We so tankful dat Jehovah wen love David an help him fo come sorry.
10. How make you feel fo kno dat Jehovah iz patient wit us an let us go?
10 Jehovah hate all kine sin. (Songs 5:4, 5) But he love us an wen we sin, he like help us. He always trying fo help da worstes sinners fo come sorry an stay tight wit him. Iz so good fo kno dat Jehovah like fogive us! Wen we tink about how Jehovah iz patient an he let us go, we try do oua bes fo stay faitful to him an come sorry fas wen we sin. Now we go learn wat Jesus wen teach his followas about how fo come sorry.
WAT JESUS FOLLOWAS HAD LEARN ABOUT HOW FO COME SORRY
11-12. Wat story Jesus wen tell fo show how Jehovah like let us go wen we sin? (Go look da picha.)
11 Wen wuz time fo da Messiah come to da eart, Jehovah had John Da Baptiza preach to his peopo an try get dem fo come sorry. An wen Jesus started preaching, he wen teach peopo how importan iz fo come sorry.—Mat 3:1, 2; 4:17.
12 Wen Jesus wuz on eart, he wen teach peopo dat his Faddah like let us go wen we sin. One way he wen do dis wuz by telling da story about da los boy. Da boy wen choose fo leave da house an do pilau tings. Afta a while, he wen “wise up” an go home. Wat his faddah wen do? Jesus wen say dat while da boy wuz “still far from da house wen his faddah spock him. His faddah heart stay fill wit pity an he run to his boy. He hug his boy an kiss him.” Da boy neva expeck his faddah fo fogive him, so he wen ask if he could be one worka in da house. But his faddah wanted fo fogive him an he wen say, “dis my boy” an wen take him back. Da faddah wen say “he was lost, but now we find um!” (Luk 15:11-32) Wen Jesus wuz in heaven, garanz he wen see plenny times wen his Faddah wen show pity to peopo an wuz fas fo let dem go wen dey had come sorry. Dis story Jesus wen tell really touch oua heart an it show how much love an pity oua Faddah, Jehovah, get!
Da faddah in Jesus story about da los boy run fo go hug his boy, who wen come back home (Go look numbas 11-12)
13-14. Wat da aposal Peter wen learn about how fo come sorry, an wat he wen teach oddas about um? (Go look da picha.)
13 Da aposal Peter wen learn plenny from Jesus about how Jehovah fogive da guys dat come sorry. Peter made plenny mistakes an Jesus wanted fo fogive him. Like wen Peter wen say he neva kno Jesus three times, Peter wen feel all bus up inside afta. (Mat 26:34, 35, 69-75) But afta Jesus wen come back alive, he wen go find Peter wen he wuz by himself so dat he could talk to him. (Luk 24:33, 34; 1 Cor 15:3-5) Jesus wen kno dat Peter had come sorry an wanted fo let him kno dat he wen let um go fo dat.
14 Peter wen kno how feel fo come sorry an be let go, an he wuz able fo teach oddas about um. Afta Pentecos, Peter wen talk to da crowd of Jews, telling dem dat dey had kill da Messiah. He wen tell dem “you guys gotta change how you tink an no do all da bad kine stuff you stay do befo time. You gotta stay tight wit God. Den he goin hemo yoa shame fo all da bad kine stuff you guys wen do.” (Jesus Guys 3:14, 15, 17, 19) So Peter wen teach dat wen somebody who sin come sorry, he gotta turn aroun. Dat mean he gotta change his bad tinking, stop wat he doin, an start doin wat make Jehovah happy. Peter wen teach dem dat Jehovah wen full on wipe out dea sins jus like wuz neva dea. An even long time afta dat, Peter wen tell da Christians dat Jehovah “hang in dea an wait . . . he like erybody fo come sorry an no do all da bad kine stuff no moa. He no like nobody get cut off from him.” (2 Pet 3:9) Wen we come sorry fo da sins we wen do, even da mayjah kine, iz so nice fo kno dat Jehovah full on let us go fo dem!
Jesus wen fogive his aposal who wen come sorry (Go look numbas 13-14)
15-16. (a) Wat da aposal Paul wen learn about how fo fogive from wat wen happen to him? (1 Fo Timoty 1:12-15) (b) Wat we goin talk about in da nex lesson?
15 Saul of Tarsus wen do plenny bad tings. He wen make Christ’s followas suffa. Mos of da Christians probly wen tink he neva wuz goin change. But Jesus knew dat Saul could change an come sorry. Him an his Faddah wen see good tings inside Saul. Jesus wen say, “I wen pick dis guy fo tell who me.” (Jesus Guys 9:15) Jesus wen even use one miracle fo help Saul come sorry. (Jesus Guys 7:58–8:3; 9:1-9, 17-20) Saul, who dey wen layta on call da aposal Paul, wen come sorry an come one Christian. (Read um 1 Fo Timoty 1:12-15.) Plenny times Paul wen say how tankful he wuz dat Jehovah an Jesus wuz good to him an wen show him plenny pity. Paul wen teach his braddahs an sistahs dat “God get plenny good heart fo you . . . he like you come sorry an no do da bad kine stuff no moa.”—Rome 2:4.
16 One time Paul wen hea dat da hui in Corint wen let one guy who wen do pilau kine sex stuff stay in da hui. Wat Paul wen tell dem fo do? From wat he wen say, we learn how Jehovah show love wen he discipline his peopo an show pity wen dey come sorry. An we goin learn how we can copy him. In da nex lesson, we goin look real good wat wen happen in da hui in Corint.
SONG 33 Turn Um Ova To Jehovah
a Dis situation wuz someting diffren. Today, Jehovah no force somebody fo stay wit dea mate who wen fool aroun. Jehovah wen have his Boy explain dat one husban or wife can choose fo divorce dea odda half if dey wen fool aroun.—Mat 5:32, NWT; 19:9.
b Go look da lesson “What Does Jehovah’s Forgiveness Mean for You?” in da Novemba 15, 2012, magazine of The Watchtower, pp. 21-23, pars. 3-10.