How Jehovah Like Da Hui Treat Sinners

1. Wat Jehovah like fo erybody?

JEHOVAH wen make us fo be able fo make oua own choices. We make choices eryday. Da bigges choice anybody can make iz fo choose fo give dea life to Jehovah an be paht of his family. Jehovah like erybody do dat. How come? Cuz he love peopo an like da bes fo dem. He like erybody be frenz wit him an live foeva.​—Rules 30:19, 20; Gal 6:7, 8.

2. How Jehovah feel about da guys dat sin real bad an not sorry? (1 From John 2:1)

² Jehovah no force anybody fo serve him. He let erybody choose fo demself wat dey like do. Wat would happen if one baptize Christian sin real bad? If he no come sorry, he gotta be hemo from da local hui. (1 Cor 5:13) But even if da person stay hemo from da local hui, Jehovah really like him fo come sorry an come close frenz wit him again. Dass one importan reason how come Jehovah wen give da ransom, so dat he can fogive guys dat come sorry. (Read um 1 From John 2:1.) Jehovah iz so loving, he ask all da guys dat sin fo come sorry.​—Zek 1:3; Rome 2:4; Jam 4:8.

3. Wat we goin talk about in dis lesson?

³ Jehovah like us feel da same way az him wen come to sin an da guys who sin real bad. Dis lesson goin talk about how we can do dat. Wen you read um, try look fo (1) how da hui in Corint wen hando one braddah who wen sin real bad, (2) wat da aposal Paul wen tell da hui fo do wen da sinner wen come sorry, an (3) how Jehovah feel about da guys who sin real bad.

WAT DA HUI WEN DO WEN ONE BRADDAH HAD SIN REAL BAD

4. Wat wen happen in da hui in Corint? (1 Fo Da Corint Peopo 5:1, 2)

⁴ Read um 1 Fo Da Corint Peopo 5:1, 2.  Wen Paul wuz on his third preaching tour, he wen hea about someting real bad dat wuz happening in da new local hui in Corint. One braddah ova dea wuz fooling aroun wit his step maddah. Dat wuz pretty crazy an “da guy stay do one mo worse ting den da peopo dat donno God.” Da hui wen tink wuz auright fo da braddah who wuz acking lidat fo stay in da hui. Maybe some of dem wen tink dey wuz showing pity fo guys dat sin, jus like how Jehovah does. Jehovah fo shua not happy wen his peopo do dat bad kine stuff. Cuz of da wrong stuff he wuz doin, some of da peopo dat no worship Jehovah wuz shock an wen say bad tings about Jehovah’s peopo. An if he wen stay inside da hui, his tinking could rub off on odda Christians who wuz hanging out wit him. So wat Paul wen tell da hui fo do?

5. Wat Paul wen tell da hui fo do, an wat he wen mean? (1 Fo Da Corint Peopo 5:13) (Go look da picha.)

⁵ Read um 1 Fo Da Corint Peopo 5:13. Jehovah had Paul write one letta to da hui fo tell dem fo throw out, or hemo, da sinner dat no wuz sorry. How da braddahs an sistahs wuz suppose to treat him? Paul told dem, “betta not hang aroun” dat kine guy. Wat he wen mean? Paul wen tell, “no even eat wit um!” (1 Cor 5:11) Wen we grind wit somebody, we spen time wit dem an talk story wit dem. Wuz clear dat Paul wuz telling da hui fo no spen dea free time wit dat guy. Dis wen proteck dem from him rubbing off on dem. (1 Cor 5:5-7) An dis might help da guy fo see how he wen hurt Jehovah an feel shame an come sorry.

6. Wat da hui wen do wen dey had get Paul’s letta, an wat da guy wen do?

⁶ Afta Paul wen sen his letta to da braddahs in Corint, he wen wonda wat dey wuz goin do. Layta on, Titus wen come an tell him someting dat wen make him real happy. Da hui wen lissen to wat he wen tell in da letta, an dey wen hemo da guy from da congregation. (2 Cor 7:6, 7) Wass even betta iz dat, litto while afta Paul wen sen da letta, da guy wen come sorry. He wen change his attitude, change wat he wuz doin, an started fo do wat Jehovah like. (2 Cor 7:8-11) Wat Paul wen tell da hui fo do nex?

HOW DA HUI WUZ FO TREAT DA SINNER WHO WEN COME SORRY

7. Wat da guy wen do afta he wen get hemo from da hui? (2 Fo Da Corint Peopo 2:5-8)

⁷ Read um 2 Fo Da Corint Peopo 2:5-8. Paul sed, “mos a you guys wen punish him enuff awready wen you tell da guy he wen do wass wrong. Dat wen make um come sorry awready.” Dat mean dat afta da sinner wen get hemo from da hui, he wen realize he wen need fo come sorry. An cuz he wen come sorry, da local hui neva need discipline him anymoa.​—Heb 12:11.

8. Wat Paul wen tell da hui fo do nex?

⁸ Paul wen tell da hui fo “let um go an no stay mad at him. Talk nice to him.” An he wen tell dem fo “make shua da guy know how plenny love an aloha you get fo him.” So Paul wanted da hui fo do moa den jus let da guy back in to da hui. He wanted da braddahs fo show da guy, by da stuff dey wen say an do, dat dey wen fo real kine let um go an love him. Dey would make um clear to him dat dey wuz happy he wen come back.

9. Why maybe wuz hard fo some guys fogive da braddah who wen come sorry?

⁹ Maybe some wuzn’t happy at firs wen dey wen hea dat da guy wuz paht of da hui again. Why we say dat? Maybe some wuz still mad cuz he wen make plenny problems fo da hui. An fo oddas, da stuff he wen do maybe wen hurt dem. Some maybe wen feel no wuz fair dat da guy dat wen do someting real bad could come back to da hui, speshly if dey demself wen work so hard fo lissen to Jehovah. (Go check Luke 15:28-30.) How come wuz so importan fo da hui show real love to da braddah who wen come sorry?

10-11. Wat could happen if da eldas neva like let da guy go?

¹⁰ How da guy would feel if da eldas neva let him back into da hui afta he wen come sorry? Or how he would feel if afta he come back, da braddahs an sistahs no show him love? He could come “real sad” an like give up. Maybe he feel like he could neva serve Jehovah again an be paht of da hui. He might tink dat Jehovah neva goin let him go an dat he wen change fo notting.

¹¹ Even moa worse den dat, if da braddahs an sistahs in da local hui neva let da guy go, dey would hurt dea own frenship wit Jehovah. How come? Cuz dey wouldn’t be copying Jehovah who fogive guys who come sorry, but dey would be copying Satan who no show pity to nobody. Dey would let da Devil use dem fo stop da guy from serving Jehovah.​—2 Cor 2:10, 11; Efe 4:27.

12. How da hui can copy Jehovah?

¹² How da hui in Corint wen copy Jehovah an not Satan? By treating da guys dat come sorry da same way Jehovah does. Try look wat some Bible writas wen say about Jehovah. “You get one good heart. You stay ready erytime fo let me go,” David wen say. (Songs 86:5) Micah wen write, “No mo anodda god jalike you! You let go da peopo . . . no matta dey wen do bad kine stuff. You hemo all da shame dey get cuz dey wen go agains you.” (Mic 7:18) An Isaiah wen say, “Fo da bad kine peopo, da ones dat stay make trouble, az good dey bag from da stuff dey do befo time, an no tink bad kine stuff no moa. Mo betta dey turn back to Da One In Charge, cuz he goin show pity fo dem. Wen dey turn back to oua God, he goin do plenny fo let dem go fo wat dey wen do befo time, an hemo dea shame.”​—Isa 55:7.

13. Why da guy who wen come sorry wuz let back into da hui? (Go look da box “Wen Da Guy In Corint Wuz Let Back Into Da Hui?”)

¹³ Fo copy Jehovah, da hui in Corint had fo fogive da guy an show him dat dey love him. Paul wen say dat if dey wen fogive da guy, dey would be doin “eryting I tell you fo do.” (2 Cor 2:9) Even tho da guy wuz hemo from da hui fo ony few monts, he wen come sorry. So da eldas neva need fo wait fo let him come back into da hui.

HOW WE CAN COPY HOW JEHOVAH IZ FAIR AN SHOW PITY

14-15. Wat we can learn from wat wen happen in Corint? (2 From Peter 3:9) (Go look da picha.)

¹⁴ Da way stuff wuz handled long time ago in Corint wuz put in da Bible “fo teach us guys.” (Rome 15:4) From dat, we learn dat da guys who sin real bad an not sorry no can stay inside da hui. Some might tink dat cuz Jehovah show pity, he goin let somebody who not sorry stay in da hui, but dass not how Jehovah show pity. Jehovah show pity, but he no jus let peopo ack anykine. He no change wat he tink az right an wrong. (Jude 4) If Jehovah wen let da guys who wuzn’t sorry stay in da hui, dat wouldn’t show pity cuz dat could put da braddahs an sistahs in danger.​—Smart Guys 13:20; 1 Cor 15:33.

¹⁵ Still yet we learn dat Jehovah no like anybody get cut off. Weneva can, he like save peopo. He show pity to da guys dat change da way dey tink an ack an like come frenz wit him again. (Eze 33:11; read um 2 From Peter 3:9.) So wen da guy in Corint wen come sorry an change da way he wen ack, Jehovah wen have Paul tell da hui fo fogive da guy an welcome him back.

16. How you feel about Jehovah afta you wen find out wat wen happen in Corint?

¹⁶ Wat wen happen in Corint help us fo see Jehovah’s love, dat he always do wat iz right, an he fair. (Songs 33:5) Knowing dis make us like tell how awesome him. We so tankful dat he show pity cuz all us sin an need him fo let us go. We also tankful to Jehovah dat he wen give us da ransom so dat he can fogive us. Make us feel so good fo kno dat Jehovah love all his peopo an like da bes fo dem!

17. Wat we goin talk about in da nex lessons?

¹⁷ Today if somebody do one real bad sin, how da eldas can copy Jehovah an help him come sorry? How da braddahs an sistahs should ack if somebody get hemo from, or come back to da hui? Da nex lessons goin ansa dese questions.