Անկեղծությունը մեծ արժեք ունի, բայց արդյո՞ք միայն դա բավարար է
ԱՆԿԵՂԾՈՒԹՅՈՒՆԸ իրո՞ք ցանկալի հատկություն է։ Ա. Սուքիասյանի «Հայոց լեզվի հոմանիշների բառարան»–ում այս բառի կողքին որպես հոմանիշներ բերված են հետևյալ բառերը՝ շիտակություն, ազնվություն, պարզամտություն, սրտաբացություն, աննենգություն, անխարդախություն։ Ինքնին հասկանալի է, որ նման հատկությունը պետք է որ մեծապես նպաստի ուրիշների հետ լավ փոխհարաբերություններ ունենալուն։ Պողոս առաքյալը հետևյալ զգուշացումը տվեց. «Ամէն ինչում հնազա՛նդ եղէք ձեր մարմնաւոր տէրերին, ոչ թէ մարդահաճոյ կերպով, ցուցադրական ծառայութեամբ, այլ սրտի անկեղծութեամբ՝ երկիւղ կրելով Տիրոջից [Աստծուց]» (Կողոսացիս 3։22, ԷԹ)։ Ո՞վ չէր ցանկանա, որ իր հիմնարկում աշխատողը լիներ այդպիսի անձնավորություն։ Այսօր ազնիվ ու անկեղծ մարդկանց համար ավելի մեծ հնարավորություններ կան՝ աշխատանք գտնելու կամ իրենց ունեցած աշխատանքը չկորցնելու հետ կապված։
Սակայն անկեղծության արժեքը հատկապես պայմանավորված է այն կարևոր դերով, որ նա խաղում է Աստծո հետ ունեցած մեր փոխհարաբերություններում։ Հնում Իսրայել ազգը Աստծո օրհնությանն էր արժանանում միայն այն ժամանակ, երբ ուշադրությամբ հետևում էր նրա տված օրենքներին ու նշում սահմանված տոնակատարությունները։ Պողոսը, խոսելով ժողովի մաքրության մասին, քրիստոնյաներին հորդորում էր. «Տօն կատարենք ո՛չ թէ հին խմորով եւ ո՛չ թէ չարութեան ու անզգամութեան խմորով, այլ անկեղծութեան, ճշմարտութեան անխմոր հացովը» (Ա Կորնթացիս 5։8, Արևմտ. Աստ.)։ Ինչ խոսք, Աստծուն ընդունելի երկրպագություն մատուցելու հարցում անկեղծությունը ոչ միայն ցանկալի է, այլև անհրաժեշտ։ Նկատենք սակայն, որ միայն անկեղծությունը չի կարող բավարար լինել. ճշմարտությունը պետք է լինի նրա ուղեկիցը։
«Տիտանիկ» հսկայական մարդատար նավը կառուցողները, ինչպես նաև ուղևորները, հավանաբար անկեղծորեն հավատում էին, որ այն անխորտակելի է։ Սակայն 1912 թվականին՝ առաջին իսկ ուղևորության ժամանակ, այն բախվեց մի սառցաբեկորի, ու 1 517 մարդ զրկվեցին իրենց կյանքից։ Առաջին դարում ապրած որոշ հրեաներ ամենայն հավանականությամբ անկեղծորեն կարծում էին, թե իրենք ճիշտ ձևով են երկրպագում Աստծուն, սակայն նրանց նախանձախնդրությունը ճշգրիտ գիտությամբ չէր (Հռովմայեցիս 10։2)։ Եթե մենք ցանկանում ենք Աստծուն հաճելի լինել, ապա այն, ինչին մենք անկեղծորեն հավատում ենք, պետք է հիմնված լինի ճշգրիտ տեղեկությունների վրա։ Ձեր բնակավայրում ապրող Եհովայի վկաները սիրով կօգնեն ձեզ պարզել, թե ինչ է նշանակում երկրպագել Աստծուն անկեղծությամբ ու ճշմարտությամբ։