Կա՞ն ֆիլմեր, գրքեր կամ երգեր, որ արգելքի տակ են Եհովայի վկաների համար

Ոչ։ Մեր կազմակերպությունը չի քննում կոնկրետ ֆիլմեր, գրքեր կամ երգեր՝ սահմանելու համար, թե որոնցից պետք է հեռու մնան Եհովայի վկաները։ Պատճառները հետևյալն են՝

Աստվածաշունչը հորդորում է, որ յուրաքանչյուր ոք մարզի իր «ըմբռնողականությունը»՝ որոշելու համար, թե ինչն է ճիշտ, ինչը՝ սխալ (Եբրայեցիներ 5:14)։

Աստվածաշնչում կան սկզբունքներ, որոնք օգնում են քրիստոնյային կողմնորոշվել ժամանց ընտրելիս։a Կյանքում տարբեր հարցերի հետ կապված մեր նպատակն է շարունակ «հավաստիանալ, թե ինչն է ընդունելի Տիրոջը» (Եփեսացիներ 5:10)։

Աստվածաշնչի համաձայն՝ ընտանիքի գլուխը որոշակի իշխանություն ունի և կարող է արգելել իր ընտանիքի անդամներին կոնկրետ որոշ բաներ դիտել, կարդալ կամ լսել (1 Կորնթացիներ 11:3; Եփեսացիներ 6:1–4)։ Սակայն ընտանիքից դուրս՝ Վկաների համար, ոչ ոք իրավասու չէ սահմանելու, որ կոնկրետ ֆիլմեր, գրքեր կամ երգեր անընդունելի են (Գաղատացիներ 6:5)։