Աշխարհն իրո՞ք անկառավարելի է դարձել

2017 ԹՎԱԿԱՆԸ սկսվեց մի չարագույժ հայտարարությամբ. հունվար ամսին գիտնականների մի խումբ հայտարարեց, որ աշխարհը ավելի է մոտեցել իր սարսափելի վախճանին։ Ցույց տալու համար, թե մարդկությունը որքան է մոտեցել գլոբալ աղետի շեմին նրանք կես րոպեով առաջ տվեցին Դատաստանի օրը խորհրդանշող ժամացույցի րոպեի սլաքը։ Ներկայումս այդ ժամացույցը ցույց է տալիս կեսգիշերից ընդամենը 2,5 րոպե պակաս. նախորդ ավելի քան 60 տարիների ընթացքում սլաքը երբևէ այդքան մոտ չի եղել համաշխարհային աղետի սկիզբն ազդարարող կեսգիշերին։

Գիտնականները ծրագրում են 2018 թ.-ին կրկին հաշվարկել, թե որքան մոտ ենք, այսպես ասած, աշխարհի վերջին։ Դատաստանի օրվա ժամացույցը այդ ժամանա՞կ էլ կազդարարի, որ նախադեպը չունեցող այդ աղետը շատ մոտ է։ Իսկ դուք ի՞նչ եք կարծում. մի՞թե աշխարհի վիճակը դուրս է եկել վերահսկողությունից։ Գուցե դժվարանաք պատասխանել այս հարցին։ Վերջիվերջո, նույնիսկ մասնագետները հակասական կարծիքներ ունեն այս թեմայի վերաբերյալ։ Ոչ բոլորն են հավատում, որ Ահեղ դատաստանի օրն անխուսափելիորեն գալու է։

Միլիոնավոր մարդիկ էլ հավատում են, որ մեզ լավ ապագա է սպասում։ Նրանք ասում են, որ կան փաստեր, որ մարդկությունն ու մեր երկրագունդը միշտ գոյություն են ունենալու, և մարդիկ ավելի լավ կյանքով են ապրելու։ Արդյոք այդ փաստերը վստահարժա՞ն են և հնարավո՞ր է, որ նման բան լինի, թե՞ աշխարհն իրոք անկառավարելի է դարձել։