ԵՐԿԻՐ ՄՈԼՈՐԱԿԸ ԿԱՊՐԻ՞
ՕԴ
ՕԴԸ միայն շնչելու համար չէ, որ անհրաժեշտ է մեզ։ Այն պաշտպանում է մեր մոլորակը արևի վնասակար ճառագայթների մեծ մասից։ Առանց օդի ողջ աշխարհում ջերմաստիճանը զրոյից էլ ցածր կլիներ։
Օդին սպառնացող վտանգներ
Օդի աղտոտման պատճառով երկրի վրայից կյանքը կարող է վերանալ։ Բնակչության ընդամենը մեկ տոկոսն է շնչում այն օդը, որը, ըստ Առողջապահության համաշխարհային կազմակերպության ստանդարտների, անվնաս է։
Օդի աղտոտվածությունը հանգեցնում է թոքերի քաղցկեղի, շնչառական և սիրտ-անոթային հիվանդությունների։ Ամեն տարի օդի աղտոտվածությունը մոտ 7 000 000 մարդու վաղաժամ մահվան պատճառ է դառնում։
Երկիրը ստեղծված է ինքնավերականգնվելու կարողությամբ
Մեր երկիրը այնպես է ստեղծված, որ կարող է ցանկացած շնչավոր էակի ապահովել բավականաչափ մաքուր օդով։ Սակայն դա հնարավոր է միայն այն դեպքում, երբ մարդածին աղտոտումը չափավոր է։ Նկատի առնենք մի քանի օրինակ։
Անտառները հայտնի են օդից ածխաթթու գազը կլանելու կարողությամբ։ Սակայն քչերը գիտեն, որ ծովի ջրերով պարբերաբար ողողվող ափերում աճող մանգրերը այդ պրոցեսն ավելի լավ են անում։ Դրանք հինգ անգամ ավելի շատ են ածխաթթու գազ կլանում օդից, քան արևադարձային անտառները։
Վերջին հետազոտությունները ցույց են տալիս, որ որոշ մեծ ջրիմուռներ, ինչպիսին, օրինակ, գորշ ջրիմուռն է, ոչ միայն մթնոլորտից կլանում են ածխաթթու գազը, այլև վերացնում են այն։ Տերևանման գորշ ջրիմուռները ունեն օդով լցված պարկեր, ինչը հնարավորություն է տալիս լողալ երկար տարածություններ։ Երբ ափից բավականին հեռանում են, պարկերը պայթում են, իսկ ածխաթթու գազով լի ջրիմուռները սուզվում են դեպի օվկիանոսի հատակ, որտեղ էլ դարերով թաղված են մնում։
Մեր մթնոլորտը կարող է ինքնավերականգնվել տարբեր աստիճանի աղտոտվածությունից։ Նման բան տեղի ունեցավ COVID-19 համավարակի ժամանակ։ Երբ 2020 թվականին աշխարհի գործարանները և մեքենաները գրեթե ամբողջությամբ դադարեցին աղտոտող նյութեր արտանետելուց, օդի որակը արագ բարելավվեց։ «2020 թ. օդի որակի համաշխարհային զեկույցի» համաձայն՝ ուսումնասիրված երկրների ավելի քան 80 տոկոսը հայտնել է, որ արգելափակումից անմիջապես հետո օդի որակը ավելի է լավացել։
Ինչ է արվում խնդիրը լուծելու համար
Հեծանվով տեղաշարժվելը կնպաստի, որ օդը մաքուր մնա
Կառավարությունները ճնշում են բանեցնում արդյունաբերական ընկերությունների վրա, որ նվազեցնեն օդի աղտոտումը։ Բացի այդ՝ գիտնականները շարունակում են աղտոտված օդը մաքրելու ելքեր փնտրել։ Օրինակ՝ նրանք մշակել են մի գործընթաց, որի ժամանակ մանրէները օդը աղտոտող նյութերը վերածում են ոչ թունավոր նյութերի։ Նաև խորհուրդ են տալիս մեքենա վարելու փոխարեն քայլել կամ հեծանիվ քշել և կառուցել այնպիսի տներ, որոնք էներգախնայող են։
Որոշ կառավարություններ օդի աղտոտվածությունը նվազեցնելու համար իրենց քաղաքացիներին տրամադրում են նորագույն վառարաններ, բայց շատերի համար դրանք դեռևս անհասանելի են
Բայց ինչպես երևում է 2022 թ. մի զեկույցից, որը կազմել էին միջազգային կազմակերպությունները, այդ թվում՝ Առողջապահության համաշխարհային կազմակերպությունը և Համաշխարհային բանկը, ավելին է հարկավոր անել։
Զեկույցում նշվում է, որ 2020 թվականին աշխարհի բնակչության մոտ մեկ երրորդը կերակուր պատրաստելիս օգտագործել է այնպիսի վառելիք և տեխնոլոգիաներ, որոնք աղտոտում են օդը։ Բայց փաստն այն է, որ շատ տարածքներում քչերը նոր վառարաններից կամ այլընտրանքային վառելիքներից օգտվելու հնարավորություն ունեն։
Իրական հույս. ինչ է ասում Աստվածաշունչը
«Այսպես է ասում ճշմարիտ Աստվածը՝ Եհովան, երկնքի Արարիչը.... Նա, ով տարածել է երկիրն ու ամեն բան, ինչ կա նրանում, Նա, ով շունչ է տալիս նրա վրա եղող մարդկանց» (Եսայիա 42։5)։
Աստված է ստեղծել օդը, որ մենք շնչում ենք, և բնական շրջապտույտները, որ մաքրում են օդը։ Աստված անսահման զորություն ունի և սիրում է մարդկանց։ Ուստի մի՞թե տրամաբանական չէ, որ նա քայլեր կձեռնարկի օդի աղտոտվածությունը վերացնելու համար։ Կարդացեք «Աստված խոստանում է, որ մեր մոլորակը կապրի» հոդվածը։