Գլուխ 26
Վերադառնում է տուն՝ Կափառնայում
ՀԻՍՈՒՍԻ համբավն արդեն տարածվել է ամենուրեք, և շատ ժողովուրդներ գնում են այն մեկուսի վայրերը, որտեղ մնում է Հիսուսը։ Սակայն մի քանի օր հետո Գալիլեայի ծովով նա վերադառնում է Կափառնայում։ Լուրն այն մասին, որ Հիսուսը վերադարձել է, արագորեն տարածվում է քաղաքում, և շատերը գալիս են այն տունը, որտեղ գտնվում է նա։ Նույնիսկ հեռավոր Երուսաղեմից գալիս են փարիսեցիներ և Օրենքի ուսուցիչներ։
Դռան մոտ այնքան շատ ժողովուրդ է խռնվել, որ հնարավոր չէ ներս մտնել։ Ամեն ինչ վկայում է այն մասին, որ մի առանձնահատուկ բան է կատարվելու։ Այն, ինչ այժմ տեղի է ունենալու, շատ կարևոր է, որովհետև օգնում է մեզ հասկանալ, որ Հիսուսը զորություն ունի վերացնելու մարդկանց տառապանքի պատճառը և վերականգնելու բոլոր նրանց առողջությունը, ում որ նա ցանկանա։
Մինչ Հիսուսն ուսուցանում է ներկաներին, չորս տղամարդ պատգարակի վրա պառկած մի անդամալույծ են բերում։ Նրանք ցանկանում են, որ Հիսուսը բուժի իրենց ընկերոջը, բայց մարդկանց շատության պատճառով չեն կարողանում ներս մտնել։ Իրոք որ հուսահատեցնող իրավիճակ է։ Սակայն նրանք չեն հանձնվում. բարձրանում են տանիք, այնտեղից անցք են բացում և անդամալույծին պատգարակով իջեցնում են ցած՝ Հիսուսի մոտ։
Արդյոք Հիսուսը զայրանո՞ւմ է, որ իրեն ընդհատում են։ Բոլորովի՛ն։ Նրան խորապես տպավորում է այդ մարդկանց հավատը։ Նա ասում է անդամալույծին. «Քո մեղքերը ներված են»։ Բայց կարո՞ղ է արդյոք Հիսուսը մեղքեր ներել։ Փարիսեցիների ու դպիրների կարծիքով՝ ոչ։ Նրանք իրենց մտքում ասում են. «Ինչո՞ւ է այս մարդը այսպես խոսում։ Նա հայհոյում է։ Ո՞վ կարող է մեղքեր ներել՝ բացի մեկից՝ Աստծուց»։
Իմանալով, թե ինչ են խորհում՝ Հիսուսն ասում է նրանց. «Ինչո՞ւ եք այդ բաները խորհում ձեր սրտերում։ Ո՞րն է ավելի հեշտ՝ անդամալույծին ասել՝ «քո մեղքերը ներվա՛ծ են», թե՞ ասել՝ «վե՛ր կաց, վերցրո՛ւ պատգարակդ ու քայլի՛ր»։
Ապա Հիսուսը ժողովրդին, այդ թվում նաև իրեն քննադատողներին հրաշալի կերպով ցույց է տալիս, որ ինքը իշխանություն ունի երկրի վրա մեղքեր ներելու և որ իրոք երբևէ ապրած մեծագույն մարդն է։ Դառնալով անդամալույծին՝ նա ասում է. «Վե՛ր կաց, վերցրո՛ւ պատգարակդ ու տո՛ւնդ գնա»։ Անդամալույծը իսկույն բոլորի աչքի առաջ վեր է կենում, առնում է պատգարակն ու գնում։ Զարմանքից քարացած՝ մարդիկ սկսում են փառավորել Աստծուն և ասել. «Այսպիսի բան երբեք չէինք տեսել»։
Նկատեցի՞ր՝ Հիսուսը ցույց տվեց, որ մեղքերի և հիվանդությունների միջև կապ գոյություն ունի, և որ ֆիզիկական առողջության վերականգնումը կախված է մեղքերի ներումից։ Աստվածաշունչը բացատրում է, որ մեր առաջին ծնողը՝ Ադամը, մեղք գործեց, և մենք բոլորս նրանից ժառանգեցինք մեղքի հետևանքները՝ հիվանդությունն ու մահը։ Սակայն Աստծու Թագավորության ներքո Հիսուսը ներելու է բոլոր նրանց մեղքերը, ովքեր սիրում և ծառայում են Աստծուն։ Միայն պատկերացրո՛ւ. այդ ժամանակ մարդիկ այլևս երբեք չեն հիվանդանա։ Մարկոս 2։1–12; Ղուկաս 5։17–26; Մատթեոս 9։1–8; Հռոմեացիներ 5։12, 17–19։
▪ Ի՞նչ իրավիճակ էր տիրում Հիսուսի շուրջ։
▪ Ինչպե՞ս են անդամալույծ մարդուն Հիսուսի մոտ բերում։
▪ Ինչո՞ւ ենք բոլորս մեղավոր, և ինչպե՞ս Հիսուսը հույս տվեց, որ հնարավոր է մեղքերի ներում ստանալ և կատարյալ առողջություն ունենալ։