Որտե՞ղ կարող ես ապահովվածություն գտնել

Իր ընտանիքի անդամներին ու ընկերներին հրաժեշտ տալով՝ երիտասարդ Ժոզյենa աֆրիկյան փոքր մի գյուղից մեկնեց մեծ քաղաք՝ ֆինանսական ապահովություն գտնելու նպատակով։ Սակայն, տեղ հասնելուց կարճ ժամանակ անց նրա հույսերը հօդս ցնդեցին, քանզի հասկացավ, որ քաղաքի փողոցներում ոսկի չի թափված...

ՔԱՂԱՔԻ կյանքին հարմարվելու համար պայքար մղելով՝ Ժոզյեն մեծ հիասթափություն ապրեց. մեծ քաղաքի մասին իր պատկերացումները շատ հեռու էին իրականությունից։ Նա անչափ փափագում էր վերադառնալ այն աղքատիկ գյուղը, որ թողել էր, և նորից միանալ իր ընտանիքին ու ընկերներին, բայց վախենում էր, որ գյուղացիներից ոմանք կծիծաղեն իր վրա։ «Նրանք ինձ կանվանեն ձախորդ,— անհանգստանում էր նա,— քանի որ քաղաքում հաջողությունների չհասա»։

Սակայն հատկապես ծանր էր նրա համար այն հիասթափությունը, որ կարող էր պատճառել իր ծնողներին։ Չէ՞ որ նրանք հույս ունեին, թե Ժոզյեն ֆինանսական օգնություն ցույց կտա իրենց։ Իր այդ ճնշվածությունը հաղթահարելու համար ջանքեր թափելուց բացի, նա ամբողջ օրը ստրուկի նման աշխատում էր, սակայն ստանում իր ակնկալածից անհամեմատ քիչ։ Արտաժամյա աշխատանքից ուժասպառ՝ նա շաբաթեշաբաթ ստիպված էր ավելի քիչ ժամանակ տրամադրել քրիստոնեական գործունեությանը, որն այնքան գնահատում էր։ Իր ընտանիքից ու հին ընկերներից հեռու, նրանց ջերմությունից զրկված՝ Ժոզյեն իրեն դժբախտ ու մենակ էր զգում։ Նա հասկացավ, որ քաղաքում չի գտել այն ապահովվածությունը, որին ձգտում էր։

Թեև անուններն ու վայրերը տարբերվում են, Ժոզյեի տխուր պատմությունը մեկն է այն բազում դեպքերից, որ հաճախ են պատահում։ Ժոզյեն, իհարկե, էգոիստական մղումներից չէ, որ քաղաք էր տեղափոխվել. նա պարզապես ցանկանում էր ապահովվածություն գտնել։ Նա իսկապես կարծում էր, որ քաղաքում ավելի մեծ հնարավորություններ կունենա, քան իրենց փոքրիկ գյուղում։ Ինչ խոսք, երբեմն ոմանք կարողանում են բարելավել իրենց նյութական վիճակը, սակայն դա չի նշանակում, որ նրանք իսկական ապահովվածության են հասել։ Ինչ վերաբերում է Ժոզյեին, ապա նրա հետ տեղի ունեցավ այն, ինչ մեծամասամբ է տեղի ունենում նման դեպքերում. նա հաջողության չհասավ։ Ուստի հարց է առաջանում. «Ի՞նչ է ապահովվածությունը»։

Տարբեր մարդիկ տարբեր ձևով են հասկանում, թե ինչ է նշանակում ապահովված լինել։ Մի բառարանում ասվում է, որ ապահով նշանակում է՝ «վտանգից» կամ «վախից և անհանգստությունից զերծ»։ Շատերն են հասկանում, որ այսօր անհնար է ամբողջովին «վտանգից զերծ» լինել։ Ուստի բավարարվում են նրանով, որ իրենց ապահովված զգում են՝ չնայած այն վտանգներին, որ կարող են իրենց սպառնալ։

Իսկ ի՞նչ կարելի է ասել քո մասին։ Որտե՞ղ ես ապահովվածություն փնտրում։ Քաղաքո՞ւմ, ինչպես Ժոզյեն։ Գուցե մեզ ապահովվածություն կարող է պարգևել փո՞ղը՝ անկախ այն բանից, թե որտեղ և ինչպես այն կվաստակենք։ Կամ գուցե այն կարելի է գտնել հասարակության մեջ բարձր դիրքի հասնելո՞վ։ Բացի այդ, դու և քո ընտանիքը որքա՞ն կվայելեք այն։

Եկեք քննենք երեք ասպարեզներ, որոնցում շատերը փորձում են ապահովվածություն գտնել՝ աշխարհագրական դիրք, փող և հասարակության մեջ գրաված դիրք։ Իսկ դրանից հետո կքննենք այն հարցը, թե որտեղ կարելի է գտնել իսկական, հարատև ապահովվածություն։

[ծանոթագրություն]