Նա պատմեց իր համոզմունքների մասին դասընկերներին

ԿՑԱՆԿԱՆԱՅԻ՞Ր օգնել դասընկերներիդ ավելի լավ հասկանալու Աստվածաշնչի վրա հիմնված քո համոզմունքները։ 18–ամյա Մագդալենան ապրում է Լեհաստանում և սովորում է դպրոցում։ Նա Եհովայի վկա է և հաճախ է զրուցում իր համոզմունքների մասին դասընկերների հետ։ Նրան բազմիցս այսպիսի հարցեր են տալիս. «Ի՞նչ է նշանակում լինել Եհովայի վկա», «Դուք չե՞ք հավատում Հիսուս Քրիստոսին»։ Ինչպե՞ս կարող էր նա օգնել իր դասընկերներին։ Մագդալենան աղոթքով Եհովայից առաջնորդություն խնդրեց և ապա գործեց իր աղոթքների համաձայն (Յակոբոս 1։5)։

Մի օր Մագդալենան հարցրեց իր ուսուցչուհուն, որը հարգանքով է վերաբերվում նրա համոզմունքներին, թե կարող է արդյոք դասարանին ցույց տալ «Եհովայի վկաներ. կազմակերպություն՝ կանգնած այդ անվան ետևում» տեսաֆիլմը։a Ուսուցչուհին համաձայնվեց։ Ուստի Մագդալենան ասաց իր դասընկերներին. «Ես պայմանավորվել եմ ընկերներիցս մեկի հետ, որ նա 90 րոպեանոց ծրագիր ներկայացնի մեր դասարանին։ Ծրագրի մեջ ընդգրկված է մի տեսաֆիլմ և հարց ու պատասխան Եհովայի վկաների մասին։ Կուզենայի՞ք մասնակցել»։ Բոլորը համաձայնվեցին։ Մագդալենան և Վոյցեխը, որը մի փորձառու լիաժամ քարոզիչ է, սկսեցին պատրաստել ծրագիրը։

Նախատեսված էր ծրագիրը սկսել 20 րոպեանոց ելույթով՝ հիմնված «Եհովայի վկաներ. ովքե՞ր են, ինչի՞ն են հավատում» գրքույկի վրա։ Դրանից հետո նրանք պատասխանելու էին տրված հարցերին։ Այնուհետև դպրոցի գրադարանում դիտելու էին տեսաֆիլմը։ Դասարանի յուրաքանչյուր աշակերտի նվեր էր տրվելու՝ մի մեծ ծրար, որի մեջ դրվելու էին մի քանի գրքույկներ, «Երիտասարդների հարցերը. գործնական խորհուրդներ»b գիրքը, որոշ թերթիկներ և պարբերագրեր։

Պայմանավորված օրը ներկա էին Մագդալենայի 14 դասընկերները, ուսուցչուհին և այդ պահին գրադարանում գտնվող 4 ուրիշ դպրոցականներ։ Բացման խոսքում Վոյցեխն ասաց, որ մի շարք լեհ բանաստեղծներ և գրողներ իրենց ստեղծագործություններում օգտագործել են Աստծո անունը՝ Եհովա։ Նա նաև նշեց, որ Աստծո անունը հանդիպում է կաթոլիկական որոշ հին գրքերում (կատեխիզիսներում)։ Եհովայի վկաների ժամանակակից գործունեությունը բացատրելիս նա ցույց տվեց տարբեր մասնաճյուղերի մասին գրքույկներ և մի շարք Համաժողովների սրահների լուսանկարներ։

Դրան հաջորդեց մի աշխույժ քննարկում։ Մագդալենան և Վոյցեխը հարցերին պատասխանելիս օգտվում էին Աստվածաշնչից։ Սա մեծ տպավորություն գործեց ունկնդիրների վրա և վստահեցրեց այն բանում, որ Եհովայի վկաները չեն քարոզում իրենց սեփական գաղափարները։ Որո՞նք էին այն հարցերից մի քանիսը, որ տվեցին ներկաները, և ի՞նչ պատասխաններ ստացան։

Հարց։ Աստվածաշնչում կան շատ փոխաբերություններ և անորոշ արտահայտություններ, որոնք կարելի է տարբեր կերպերով մեկնաբանել։ Հնարավո՞ր է արդյոք ապրել Աստվածաշնչի սկզբունքների համաձայն։

Պատասխան։ Ոմանք ասում են, թե Աստվածաշունչը նման է ջութակի, որի վրա ամեն մարդ կարող է նվագել իր ուզած մեղեդին։ Բայց եկեք մտածենք. եթե ցանկանում ենք իմանալ, թե ինչ է նկատի ունեցել գրողը իր խոսքերում, ամենից ճիշտ տարբերակը չի՞ լինի հենց նրանից հարցնել։ Ի տարբերություն գրքերի հեղինակների, որոնք արդեն մահացել են՝ Աստվածաշնչի հեղինակը՝ Եհովա Աստված, կենդանի է (Հռովմայեցիս 1։20; Ա Կորնթացիս 8։5, 6)։ Համատեքստը կարող է ցույց տալ տվյալ համարի ճիշտ բացատրությունը։ Բացի դրանից, Աստվածաշնչում հաճախ միևնույն բանի մասին մի քանի տեղերում է խոսվում, ուստի այդ հատվածները իրար հետ համեմատելը կօգնի հասկանալու տվյալ միտքը։ Այսպիսով՝ կարող ենք թույլ տալ, որ Աստված առաջնորդի մեր մտքերը և պատկերացնենք, որ անձամբ նա է բացատրում այդ համարը մեզ։ Այդպես վարվելով՝ մենք կիմանանք, թե ըստ Աստվածաշնչի՝ որն է նրա կամքը, և կկարողանանք ապրել այդ կամքի համաձայն։ Այնպես չէ՞։

Հարց։ Ո՞րն է քրիստոնյաների և Եհովայի վկաների միջև եղած տարբերությունը։

Պատասխան։ Եհովայի վկաները քրիստոնյաներ են։ Սակայն նրանք ոչ միայն ասում են, թե քրիստոնյաներ են, այլև ձգտում են ապրել իրենց համոզմունքների համաձայն և այն ամենի, ինչ որ Աստված սովորեցնում է իրենց օգտի համար (Եսայիա 48։17, 18)։ Քանի որ նրանց բոլոր ուսուցումները հիմնված են Աստվածաշնչի վրա, նրանք վստահ են, որ գտել են ճշմարտությունը (Մատթէոս 7։13, 14, 21–23)։

Հարց։ Ինչո՞ւ եք մոտենում անծանոթ մարդկանց և համառորեն փորձում զրուցել նրանց հետ։ Արդյո՞ք այդպես վարվելով՝ չեք պարտադրում ձեր հավատը ուրիշներին։

Պատասխան։ Ըստ ձեզ՝ սխա՞լ է, երբ փողոցում ինչ–որ մեկը քաղաքավարությամբ զրուցում է ձեզ հետ և որևէ թեմայի մասին հարցնում ձեր կարծիքը (Երեմիա 5։1; Սոփոնիա 2։2, 3)։ (Այնուհետև Վոյցեխն ու Մագդալենան ցուցադրեցին, թե ինչպես էին անցորդներին հարցնում. «Աստված հոգ տանո՞ւմ է արդյոք այն մարդկանց մասին, ովքեր տուժել էին Լեհաստանում վերջերս տեղի ունեցած ջրհեղեղից»։) Լսելով այդ անձնավորության կարծիքը՝ մենք նրա ուշադրությունը հրավիրում ենք Աստվածաշնչի վրա։ Եվ եթե որևէ մեկը չի ցանկանում զրուցել մեզ հետ, ցտեսություն ենք ասում և հեռանում (Մատթէոս 10։11–14)։ Արդյոք սա նշանակո՞ւմ է, թե մենք ստիպում ենք մարդկանց խոսել մեզ հետ։ Կամ մի՞թե մարդիկ խոսելու իրավունք չունեն։

Հարց։ Ինչո՞ւ դուք տոներ չեք նշում։

Պատասխան։ Մենք նշում ենք այն միակ իրադարձությունը, որը Աստվածաշունչը պատվիրում է մեզ։ Դա Հիսուս Քրիստոսի մահվան Հիշատակի երեկոն է (Ա Կորնթացիս 11։23–26)։ Ինչ վերաբերում է տոներին, նրանց ծագման մասին կարող եք կարդալ հանրագիտարաններում և այլ արժանահավատ աղբյուրներում։ Այդ դեպքում կհասկանաք, թե ինչու նման իրադարձություններ չենք նշում (Բ Կորնթացիս 6։14–18)։

Ներկաները ուրիշ շատ հարցեր էլ տվեցին և ստացան դրանց պատասխանները։ Քննարկումն այնքան երկար տևեց, որ նրանք ստիպված եղան հետաձգել տեսաֆիլմի ցուցադրումը։

Արդյունքում ի՞նչ արձագանքներ եղան։ Թող որ այդ մասին պատմի Մագդալենան. «Ես ապշած էի մնացել, որ դասընկերներիցս ոմանք, ովքեր սովորաբար իրենց վատ են դրսևորում և ծաղրում են ուրիշներին, լուրջ հարցեր էին տալիս։ Թեպետ նրանք միշտ ասում էին, թե աթեիստ են, բայց հանդիպման ընթացքում նրանց խոսքերից երևաց, որ հավատում են Աստծուն։ Ներկաները երախտագիտությամբ ընդունեցին իրենց տրված նվերները՝ ընդհանուր առմամբ 35 գիրք, 63 գրքույկ և 34 պարբերագիր»։

Ի՜նչ հրաշալի արդյունքներ տվեց այս ծրագիրը։ Այն ոչ միայն օգնեց Մագդալենայի դասընկերներին ավելի լավ ճանաչել ու հասկանալ Եհովայի վկաներին, այլև քաջալերեց շատ երիտասարդների խորհելու կյանքի իմաստի շուրջ։ Գուցե դո՞ւ էլ ջանաս օգնել քո դասընկերներին ավելի շատ բան իմանալ համոզմունքներիդ մասին։

[ծանոթագրություն]

[նկար 31–րդ էջի վրա]

Մագդալենան և Վոյցեխը պատրաստվում են քննարկմանը