Մենք կարող ենք հաղթահարել ցանկացա՛ծ փորձություն
ՓՈՐՁՈՒԹՅԱՆ մե՞ջ ես։ Հուսալքվա՞ծ ես։ Այնպիսի զգացում ունես, թե չե՞ս կարող տոկալ։ Գուցե երբեմն մտածում ես, թե միայն դու ես բախվել նման խնդրի, և թե այն լուծում չունի։ Եթե այդպես է, մի՛ հուսահատվիր։ Ինչպիսի փորձություններ էլ դիմագրավելու լինենք, Աստվածաշունչը հավաստիացնում է, որ Աստված կզորացնի մեզ, որպեսզի կարողանանք տոկալ։
Սուրբ Գրություններում ասվում է, որ Աստծու ծառաները կընկնեն «կերպ կերպ» փորձությունների մեջ (Յակոբոս 1։2)։ Ուշադրություն դարձրու «կերպ–կերպ» (հունարեն՝ պիկի՛լոս) բառին։ Հին ժամանակներում այն ունեցել է «բազմապիսի» կամ «բազմերանգ» իմաստը և ընդգծել է «տարբեր տեսակի փորձություններ» ունենալու միտքը։ Առօրյա խոսքում հունարեն այս բառը հիմնականում նշանակում է «բազմագույն»։ «Կերպ կերպ» փորձությունները կարծես արտահայտվում են բազում գույներով։ Բայց Եհովան աջակցում է մեզ, որպեսզի կարողանանք հաղթահարել յուրաքանչյուր դժվարություն։ Ինչո՞ւ կարող ենք վստահ լինել դրանում։
Աստծու անարժան բարությունը, որն արտահայտվում է բազում կերպերով
Պետրոս առաքյալը նույնպես նշեց, որ քրիստոնյաները ‘տրտմում են կերպ–կերպ փորձությունների’ պատճառով (Ա Պետրոս 1։6)։ Սուրբ ոգու ներշնչմամբ գրված իր նամակի շարունակության մեջ նա ասաց, որ «Աստծու անարժան բարությունը» արտահայտվում է «բազում կերպերով» (Ա Պետրոս 4։10, ՆԱ)։ «Բազում կերպերով» արտահայտության մեջ օգտագործված է նույն հունարեն բառի քերականական ձևերից մեկը։ Մեկնաբանելով այս արտահայտությունը՝ Աստվածաշնչի մի վերլուծաբան նշում է. «Սա անչափ խորը միտք է։ .... Աստծու շնորհը [կամ՝ անարժան բարությունը] մատնանշելու համար օգտագործված պիկի՛լոս բառը ցույց է տալիս, որ ինչ «գույնի» դժվարության էլ մարդը բախվի, այն հնարավոր է հաղթահարել Աստծու շնորհի օգնությամբ»։ Ապա նա ասում է. «Ինչպիսին էլ որ լինեն հանգամանքները, ինչպիսի ճգնաժամ, ծայրահեղ իրավիճակ կամ հրատապ խնդիր էլ առաջանա, անհնար է, որ Աստծու շնորհի միջոցով ելք չգտնվի կամ փառավոր հաղթանակ չտարվի։ Կյանքում չկա այնպիսի բան, որը հնարավոր չլինի հաղթահարել Աստծու շնորհի օգնությամբ։ Այս արտահայտիչ բառը՝ պիկի՛լոս, անմիջապես հիշեցնում է Աստծու «բազմագույն» շնորհի մասին, որն իրոք բավարար է ամեն բանի համար»։
Փորձությունները կարող ենք հաղթահարել Աստծու բարությամբ
Համաձայն Պետրոսի խոսքերի՝ կերպերից մեկը, որով արտահայտվում է Աստծու անարժան բարությունը, այն տարբեր անհատներն են, որոնցից կազմված է քրիստոնեական ժողովը (Ա Պետրոս 4։11)։ Աստծու յուրաքանչյուր ծառա ունի հոգևոր պարգևներ, կամ՝ ունակություններ, որոնցով կարող է քաջալերանքի աղբյուր լինել այն փորձության մեջ գտնվող մարդկանց համար (Հռովմայեցիս 12։6–8)։ Օրինակ՝ ժողովի որոշ անդամներ Աստվածաշնչի հոյակապ ուսուցիչներ են։ Նրանց խորաթափանց խոսքերը ուժ են տալիս՝ տոկալու (Նէեմիա 8։1–4, 8, 12)։ Ոմանք էլ կանոնավորաբար հովվական այցելություններ են կատարում՝ գնալով աջակցության կարիք ունեցող անհատի տուն։ Այս այցելությունները հնարավորություն են տալիս քաջալերել վհատվածներին և նրանց ‘սրտերը մխիթարել’ (Կողոսացիս 2։2)։ Երբ վերակացուները հավատ ամրացնող այդպիսի այցելություններ են կատարում, նրանք կիսվում են հոգևոր պարգևներով (Յովհաննէս 21։16)։ Ժողովի անդամներից ոմանք էլ հայտնի են իրենց ջերմ, կարեկից և նուրբ վերաբերմունքով այն հավատակիցների հանդեպ, ովքեր տրտմել են փորձությունների պատճառով (Գործք 4։36; Հռովմայեցիս 12։10; Կողոսացիս 3։10)։ Կարեկցանքն ու գործնական օգնությունը, որ ցույց են տալիս նման սիրառատ եղբայրներն ու քույրերը, Աստծու անարժան բարության կարևոր դրսևորումներից, կամ՝ «գույներից» են (Առակաց 12։25; 17։17)։
«Ամեն մխիթարութեան Աստուածը»
Ամենակարևորը, մեզ մխիթարություն է տալիս Եհովան։ Նա է «ամեն մխիթարութեան Աստուածը, որ մխիթարում է մեզ մեր ամեն նեղութիւնումը» (Բ Կորնթացիս 1։3, 4)։ Իմաստությունը, որ ստանում ենք Աստծու ներշնչյալ Խոսքից, ինչպես նաև զորությունը, որ նա տալիս է իր սուրբ ոգու միջոցով, գլխավոր կերպերն են, որոնցով Եհովան պատասխանում է մեր աղոթքներին (Եսայիա 30։18, 21; Ղուկաս 11։13; Յովհաննէս 14։16)։ Մենք կարող ենք սրտապնդվել Աստծու ներշնչմամբ գրված այն խոստումից, որ տրվել է Պողոս առաքյալի միջոցով. «Աստուած հաւատարիմ է, որ չի թողիլ ձեզ ձեր կարողութիւնիցը վեր փորձուելու, այլ փորձութեան հետ ելքն էլ կ’պատրաստէ, որ կարողանաք համբերել» (Ա Կորնթացիս 10։13)։
Այո՛, ինչ «գույնի», կամ՝ բնույթի փորձություն էլ որ ունենանք, միշտ կլինի Աստծու անարժան բարության այնպիսի «գույն», կամ՝ դրսևորում, որը «կհամապատասխանի» մեր փորձությանը և կօգնի հաղթահարել այն (Յակոբոս 1։17)։ Եհովայի աջակցությունը, որ նա պատեհ ժամանակին և հարկ եղած կերպով ցույց է տալիս իր ծառաներին՝ անկախ այն բանից, թե որքան տարբեր են նրանց փորձություններն ու դժվարությունները, ‘Աստծու բազմատեսակ իմաստության’ ընդամենը մի ապացույցն է (Եփեսացիս 3։10, ԱԱ)։ Համաձայն չե՞ք։
[նկարներ 31–րդ էջի վրա]
Եհովան օգնում է մեզ հաղթահարել փորձությունները