Շարունակ երախտագիտություն զարգացրու քո մեջ

«Քանի՜ պատուական են ինձ համար քո խորհուրդները, ով Աստուած. քանի՜ մեծ է նորանց թիւը» (ՍԱՂՄՈՍ 139:17)։

1, 2. Ինչո՞ւ պետք է գնահատենք Աստծու Խոսքը, և ինչպե՞ս սաղմոսերգուն արտահայտեց իր երախտագիտությունը։

ԱՅԴ հայտնագործությունը պարզապես հրաշք էր։ Երուսաղեմում Եհովայի տաճարի վերանորոգման ժամանակ Քեղկիա քահանայապետը գտավ «Մովսէսի ձեռքով եղած Տիրոջ օրէնքի գիրքը»։ Անշուշտ, դա այն բնագիր օրինակն էր, որը գրվել էր դրանից ավելի քան 800 տարի առաջ։ Կարո՞ղ ես պատկերացնել, թե ինչ զգաց աստվածավախ Հովսիա թագավորը, երբ գիրքը բերեցին նրա մոտ։ Նա շատ բարձր գնահատեց այն և պատվիրեց, որ Սափան դպիրը անմիջապես բարձրաձայն կարդա (Բ Մնացորդաց 34:14–18)։

² Այսօր Աստծու Խոսքը մասամբ կամ ամբողջությամբ մատչելի է միլիարդավոր մարդկանց։ Բայց արդյո՞ք դրա պատճառով Սուրբ Գրությունները պակաս արժեքավոր ու կարևոր են դառնում։ Իհարկե ո՛չ։ Չէ՞ որ Աստվածաշունչը պարունակում է Ամենակարող Աստծու մտքերը, որոնք արձանագրվել են մեր օգտի համար (Բ Տիմոթէոս 3:16)։ Արտահայտելով իր զգացմունքները Աստծու Խոսքի հանդեպ՝ սաղմոսերգու Դավիթը գրեց. «Քանի՜ պատուական են ինձ համար քո խորհուրդները, ով Աստուած. քանի՜ մեծ է նորանց թիւը» (Սաղմոս 139:17)։

3. Ի՞նչն է ցույց տալիս, որ Դավիթը հոգևոր առումով խորը անձնավորություն էր։

³ Դավթի երախտագիտությունը Եհովայի հանդեպ երբեք չխամրեց։ Նա շատ բարձր էր գնահատում նրա Խոսքը և այն ամենը, ինչ կապված էր ճշմարիտ երկրպագության հետ։ Նրա զգացմունքները երևում են իր կազմած բազմաթիվ գեղեցիկ սաղմոսներից։ Օրինակ՝ Սաղմոս 27։4–ում Դավիթը գրեց. «Մէկ բան եմ խնդրում Տէրիցը. եւ այն շատ կ’փափաքէի, որ Տիրոջ տանը բնակուիմ իմ կեանքի բոլոր օրերը, որ Տիրոջ գեղեցիկ փառքը տեսնեմ եւ նորա տաճարին զննելով մտիկ տամ»։ «Զննելով մտիկ տամ» թարգմանված արտահայտությունը եբրայերեն բնագրում նշանակում է առանց շտապելու խորհրդածել, վերլուծել. նայել հաճույքով, ուրախությամբ և հիացմունքով, երախտագիտությամբ լցված։ Հստակ է, որ Դավիթը հոգևոր առումով խորը անձնավորություն էր։ Նա իսկապես գնահատում էր հոգևոր բաները և ըմբոշխնում Եհովայի բացած ամեն մի հոգևոր ճշմարտության յուրաքանչյուր պատառիկը։ Գնահատանք դրսևորելու նրա օրինակը արժանի է ընդօրինակման (Սաղմոս 19:7–11)։

Գնահատիր աստվածաշնչյան ճշմարտությունն իմանալու առանձնաշնորհումը

4. Ի՞նչը մղեց Հիսուսին ‘հոգով ցնծալ’։

⁴ Աստծու Խոսքից խոր հասկացողություն ունենալը կախված չէ մեծ խելք կամ աշխարհային կրթություն ունենալուց, որը մարդու մեջ հպարտություն է ծնում։ Դա կախված է Եհովայի անարժան բարությունից, որը նա դրսևորում է խոնարհ, անկեղծ մարդկանց հանդեպ, ովքեր գիտակցում են իրենց հոգևոր կարիքները (Մատթէոս 5:3; Ա Յովհաննէս 5:20)։ Երբ Հիսուսը խորհեց այն մասին, որ անկատար մարդկանցից ոմանց անունները գրվում են երկնքում, նա «Հոգովը ցնծաց եւ ասեց. Գոհանում եմ քեզանից, հայր, երկնքի եւ երկրի Տէր, որ իմաստուններից եւ գիտուններից այս բաները ծածկեցիր եւ մանուկների յայտնեցիր» (Ղուկաս 10:17–21)։

5. Հիսուսի աշակերտներն ինչո՞ւ չպետք է թեթևամտորեն վերաբերվեին Թագավորության վերաբերյալ ճշմարտություններին, որոնք Եհովան բացել էր նրանց համար։

⁵ Սրտանց աղոթելուց հետո Հիսուսը դիմեց իր աշակերտներին և ասաց. «Երանի այն աչքերին՝ որ տեսնում են այն որ դուք էք տեսնում: Որովհետեւ ասում եմ ձեզ, թէ շատ մարգարէներ ու թագաւորներ կամեցան տեսնել այն որ դուք էք տեսնում, եւ չ’տեսան. եւ լսել այն որ դուք էք լսում, եւ չ’լսեցին»։ Այդպիսով Հիսուսը քաջալերեց իր հավատարիմ հետևորդներին թեթևամտորեն չվերաբերվել Աստծու Թագավորության վերաբերյալ այն թանկագին ճշմարտություններին, որ Աստված բացում էր նրանց համար։ Այդ ճշմարտությունները Աստված չէր հայտնել իր ծառաներին անցյալում և, անշուշտ, չհայտնեց Հիսուսի օրերի ‘իմաստուններին և գիտուններին’ (Ղուկաս 10:23, 24)։

6, 7. ա) Ի՞նչ պատճառներ ունենք՝ գնահատելու Աստվածաշնչի ճշմարտությունները։ բ) Ի՞նչ տարբերություն է նկատվում ճշմարիտ և կեղծ կրոնի միջև։

⁶ Մեր օրերում Եհովան «հավատարիմ և իմաստուն ծառայի» միջոցով իր ժողովրդին ավելի խոր հասկացողություն է տվել իր Խոսքի վերաբերյալ, ուստի մենք ավելի շատ պատճառներ ունենք գնահատելու Աստվածաշնչի ճշմարտությունները (Մատթէոս 24:45; Դանիէլ 12:10)։ Վերջին ժամանակի մասին Դանիել մարգարեն գրեց. «Շատերը պիտի քննեն, եւ գիտութիւնը պիտի շատանայ» (Դանիէլ 12:4)։ Համաձայն չե՞ս, որ Աստծու մասին գիտելիքներն այսօր ‘շատացել’ են, և Եհովայի ծառաները առատ հոգևոր սնունդ են ստանում։

⁷ Որքա՜ն է տարբերվում Աստծու ժողովրդի հոգևոր բարեկեցությունը Մեծ Բաբելոնի կրոնական խառնաշփոթությունից։ Կեղծ կրոնից հիասթափված և հոգնած՝ շատերը դառնում են դեպի ճշմարիտ երկրպագությունը։ Նրանք հեզ ու խոնարհ անհատներ են, որոնք չեն ուզում ‘մասնակից լինել Մեծ Բաբելոնի մեղքերին’ և ‘դրա պատուհասից ընդունել’։ Եհովան ու նրա ծառաները այդպիսի անհատներին հրավիրում են ճշմարիտ քրիստոնեական ժողով (Յայտնութիւն 18:2–4; 22:17)։

Երախտապարտ անհատները գալիս են դեպի Աստված

8, 9. Մեր օրերում ինչպե՞ս են կատարվում Անգէ 2։7 խոսքերը։

⁸ Եհովան իր հոգևոր տաճարի՝ ‘տան’ վերաբերյալ կանխագուշակեց. «Կ’շարժեմ բոլոր ազգերը, եւ կ’գան բոլոր ազգերի ցանկալիքը, եւ կ’լցնեմ այս տունը փառքով» (Անգէ 2:7)։ Այս զարմանալի մարգարեությունը կատարվեց Անգեի ժամանակներում, երբ Աստծու՝ գերությունից վերադարձած ժողովուրդը վերակառուցեց Երուսաղեմի տաճարը։ Այսօր Անգեի խոսքերը կատարվում են Եհովայի մեծ հոգևոր տաճարի առնչությամբ։

⁹ Միլիոնավոր մարդիկ արդեն եկել են այդ հոգևոր տաճարը, որպեսզի երկրպագեն Աստծուն «հոգով եւ ճշմարտութիւնով», և ամեն տարի հարյուր հազարավորներ՝ ‘ազգերի ցանկալիքը’, շարունակում են գալ դեպի ճշմարիտ կրոնը (Յովհաննէս 4:23, 24)։ Օրինակ՝ 2006 ծառայողական տարվա համաշխարհային հաշվետվությունը ցույց է տալիս, որ 248 327 մկրտվել են՝ խորհրդանշելով իրենց նվիրումը Եհովային։ Դա նշանակում է, որ ամեն օր միջին հաշվով 680 մարդ է մկրտվել։ Այն, որ նրանք սիրում են ճշմարտությունը և ցանկանում են ծառայել Եհովային որպես Թագավորության քարոզիչներ, վկայում է, որ իսկապես Եհովան է նրանց ‘քաշել’ իր մոտ (Յովհաննէս 6:44, 66)։

10, 11. Պատմիր մի դեպք, որը ցույց է տալիս, թե ինչպես են մարդիկ սկսում գնահատել աստվածաշնչյան ճշմարտությունը։

¹⁰ Այս անկեղծ անհատներից շատերը եկել են դեպի ճշմարտությունը, որովհետև տեսել են «արդարի ու ամբարշտի տարբերութիւնը. Աստուծոյ ծառայութիւն անողին եւ ծառայութիւն չ’անողին տարբերութիւնը» (Մաղաքիա 3:18)։ Ահա Ուեյնի և Վիրջինիայի օրինակը։ Այս ամուսինները բողոքական եկեղեցու անդամներ էին և բազմաթիվ հարցեր ունեին, որոնց պատասխանները չէին գտնում։ Նրանք ատում էին պատերազմը և երբ տեսնում էին, որ հոգևորականներն օրհնում են զինվորներին ու զենքերը, շփոթմունքի մեջ էին ընկնում ու մտահոգվում։ Երբ նրանք ծերացան, զգացին, որ եկեղեցու անդամներն անտեսում են իրենց, թեև տարիներ շարունակ Վիրջինիան դասավանդել էր եկեղեցու կիրակնօրյա դպրոցում։ Նրանք պատմում են. «Ոչ ոք մեզ չէր այցելում կամ հետաքրքրվում մեր հոգևոր բարեկեցությամբ։ Եկեղեցուն միայն մեր փողն էր հետաքրքրում։ Մենք հիասթափված էինք»։ Նրանց հիասթափությունն ավելի ուժեղացավ, երբ եկեղեցին հանդուրժողական դիրք բռնեց համասեռամոլության հարցում։

¹¹ Միևնույն ժամանակ Ուեյնի ու Վիրջինիայի թոռնուհին, իսկ ավելի ուշ նաև նրանց դուստրը Եհովայի վկա դարձան։ Թեև Ուեյնն ու Վիրջինիան սկզբում ուրախ չէին դրա համար, սակայն հետագայում փոխեցին իրենց մտածելակերպը ու համաձայնվեցին Աստվածաշունչ ուսումնասիրել։ Ուեյնը ասում է. «Ընդամենը երեք ամսում մենք ավելի շատ բան սովորեցինք Աստվածաշնչի մասին, քան անցած 70 տարիներին։ Երբեք չէինք լսել, որ Աստծու անունը «Եհովա» է և ոչինչ չէինք իմացել Թագավորության և դրախտային երկրի մասին»։ Շուտով այս անկեղծ ամուսինները սկսեցին հաճախել քրիստոնեական հանդիպումներին և մասնակցել քարոզչությանը։ «Մենք ուզում ենք բոլորին պատմել ճշմարտության մասին»,— ասում է Վիրջինիան։ 2005 թ.–ին 80–ն անց այս ամուսինները մկրտվեցին։ Նրանք ասում են. «Մենք գտե՛լ ենք իսկական քրիստոնյաներին»։

Գնահատիր այն, որ «ամեն բարի գործերի համար պատրաստուած» ես

12. Ինչո՞վ է Եհովան միշտ ապահովում իր ծառաներին, և ի՞նչ պետք է անենք, որպեսզի հաջողության հասնենք։

¹² Եհովան միշտ օգնում է իր ծառաներին, որ իր կամքը կատարեն։ Օրինակ՝ Նոյը ստացավ հստակ, կոնկրետ հրահանգներ տապանը կառուցելու վերաբերյալ։ Այն պետք է հենց սկզբից ճիշտ կառուցվեր։ Նոյը այդպես էլ արեց։ Ինչո՞ւ։ Քանի որ նա «արաւ բոլորը ինչպէս Աստուած պատուիրել էր նորան, այնպէս արաւ» (Ծննդոց 6:14–22)։ Նմանապես այսօր՝ Եհովան ապահովում է իր ծառաներին անհրաժեշտ ամեն բաներով, որպեսզի կարողանան իր կամքը կատարել։ Իհարկե, մեր գլխավոր աշխատանքը Աստծու արդեն հաստատված Թագավորության մասին բարի լուրը քարոզելն է և արժանի անհատներին օգնելը, որ դառնան Հիսուս Քրիստոսի աշակերտներ։ Ինչպեսև Նոյը, մենք հաջողության կհասնենք, եթե հնազանդվենք Աստծուն։ Մենք պետք է հետևենք այն առաջնորդությանը, որը Եհովան տալիս է իր Խոսքի ու կազմակերպության միջոցով (Մատթէոս 24:14; 28:19, 20)։

13. Ինչի՞ միջոցով է Եհովան մեզ կրթում։

¹³ Մեզ տրված առաջադրանքը կատարելու համար պետք է սովորենք ճիշտ գործածել մեր հիմնական գործիքը՝ Աստծու Խոսքը, որն «օգտակար [է], վարդապետութեան, եւ յանդիմանութեան, եւ ուղղելու, եւ արդարութեան խրատելու համար. որ Աստուծոյ մարդը կատարեալ լինի ամեն բարի գործերի համար պատրաստուած» (Բ Տիմոթէոս 2:15; 3:16, 17)։ Ինչպեսև առաջին դարում, այսօր Եհովան արժեքավոր կրթություն է տալիս մեզ քրիստոնեական ժողովի միջոցով։ Աշխարհով մեկ 99 770 ժողովներում ամեն շաբաթ անցկացվում են Աստվածապետական ծառայության դպրոց և Ծառայողական հանդիպում, որոնք մեզ պատրաստում են ծառայությանը։ Ցույց տալի՞ս ես քո գնահատանքը այս կարևոր հանդիպումների համար՝ կանոնավորաբար հաճախելով դրանց, ինչպես նաև կիրառելով քո սովորած բաները (Եբրայեցիս 10:24, 25)։

14. Ինչպե՞ս են Եհովայի ծառաները ցույց տալիս իրենց երախտագիտությունը այն բանի համար, որ առանձնաշնորհում ունեն ծառայելու Աստծուն (ընդգրկիր մեկնաբանություններ 27–30 էջերում գտնվող աղյուսակից)։

¹⁴ Ամբողջ աշխարհում Աստծու միլիոնավոր ծառաներ երախտագիտություն են ցույց տալիս իրենց ստացած կրթության համար նրանով, որ ջանք չեն խնայում քարոզչական ծառայության մեջ։ Օրինակ՝ 2006 ծառայողական տարվա ընթացքում 6 741 444 քարոզիչներ 1 333 966 199 ժամ նվիրել են ծառայությանը և անցկացրել 6 286 618 Աստվածաշնչի ուսումնասիրություն։ Բացի այս թվերից, համաշխարհային հաշվետվության մեջ բերվում են շատ ուրիշ ոգևորիչ տվյալներ։ Մենք հրավիրում ենք քեզ մոտիկից ծանոթանալ այս հաշվետվությանը և քաջալերվել, ճիշտ ինչպես որ առաջին դարի մեր եղբայրները, անկասկած, մեծ քաջալերանք ստացան քարոզչական գործի ընդլայնման մասին հաշվետվություններից (Գործք 1:15; 2:5–11, 41, 47; 4:4; 6:7)։

15. Ինչո՞ւ հիմքեր չունես վհատվելու, եթե ամբողջ սրտով ես ծառայում Եհովային։

¹⁵ Այս մեծ փառաբանությունն արտացոլում է Եհովայի ծառաների խոր երախտագիտությունն այն բանի համար, որ նրանք առանձնաշնորհում ունեն ճանաչելու Եհովային և վկայություն տալու նրա մասին (Եսայիա 43:10)։ Իհարկե, մեր տարեց եղբայրներից ու քույրերից ոմանց կատարած փառաբանությունը կարելի է նմանեցնել այրի կնոջ երկու լումային։ Սակայն եկեք չմոռանանք, որ Եհովան և նրա Որդին իսկապես գնահատում են բոլոր նրանց, ովքեր ծառայում են Աստծուն ամբողջ սրտով՝ անելով իրենց ձեռքից եկած ամեն բան (Ղուկաս 21:1–4; Գաղատացիս 6:4)։

16. Ի՞նչ ուսուցողական ձեռնարկներ է Աստված տրամադրել մեզ վերջին ժամանակներս։

¹⁶ Բացի այն, որ Եհովան մեզ նախապատրաստում է ծառայությանը, նա նաև իր կազմակերպության միջոցով մեզ «զինում» է հրաշալի ուսուցողական ձեռնարկներով։ Օրինակ՝ վերջին տասնամյակներին լույս են տեսել հետևյալ գրքերը. «Ճշմարտություն, որ հավիտենական կյանքի է առաջնորդում», «Դուք կարող եք հավիտյան ապրել երկրային Դրախտում», «Հավիտենական կյանքի առաջնորդող գիտություն», իսկ ներկայումս մենք օգտվում ենք «Ի՞նչ է սովորեցնում Աստվածաշունչը իրականում» գրքից։ Նրանք, ովքեր իսկապես գնահատում են այս պարգևները, լայնորեն օգտագործում են դրանք ծառայության մեջ։

Օգտագործի՛ր «Աստվածաշունչը սովորեցնում է» գիրքը

17, 18. ա) «Աստվածաշունչը սովորեցնում է» գրքի ո՞ր մասերի վրա ես սիրում հրավիրել մարդկանց ուշադրությունը ծառայության ժամանակ։ բ) Ի՞նչ է ասել այդ գրքի վերաբերյալ մի շրջանային վերակացու։

¹⁷ «Ի՞նչ է սովորեցնում Աստվածաշունչը իրականում» գիրքը մեծ օրհնություն է Աստծու ծառաների համար։ Այն ունի 19 գլուխ, մանրամասն հավելված և գրված է պարզ ու հասկանալի լեզվով։ Օրինակ՝ 12–րդ գլխում՝ «Ապրել այնպիսի կյանքով, որն Աստծուն է հաճելի», բացատրվում է, թե ինչպես ուսումնասիրողը կարող է դառնալ Աստծու ընկերը, մի բան, որը շատերի մտքով անգամ չի անցել կամ հնարավոր չի թվացել (Յակոբոս 2:23)։ Ինչպե՞ս են մարդիկ ընդունում ուսումնասիրության այս ձեռնարկը։

¹⁸ Ավստրալիայում ծառայող մի շրջանային վերակացու հայտնում է, որ «Աստվածաշունչը սովորեցնում է» գիրքը «անմիջապես գրավում է մարդկանց և նրանց տրամադրում զրուցելու»։ Նա ավելացնում է, որ գիրքն այնքան հեշտ է օգտագործել, որ այն «Թագավորության շատ քարոզիչների մեծ վստահություն է հաղորդել և ուրախություն տվել ծառայության մեջ»։ Ուստի զարմանալի չէ, որ ոմանք այդ գիրքն անվանում են «ոսկու կտոր»։

19–21. Պատմիր մի քանի դեպք, որոնք ցույց են տալիս «Աստվածաշունչը սովորեցնում է» գրքի արժեքավոր լինելը։

¹⁹ «Հաստատ Աստված է ձեզ ուղարկել»,— ասաց Գայանայում ապրող մի կին դռան մոտ կանգնած ռահվիրային։ Այդ կնոջ կենակիցը վերջերս լքել էր նրան և իրենց երկու փոքրիկ երեխաներին։ Ռահվիրան բացեց «Աստվածաշունչը սովորեցնում է» գրքի 1–ին գլուխը և բարձրաձայն կարդաց 11–րդ պարբերությունը, որը գտնվում է «Ինչ է զգում Աստված, երբ մենք անարդարության ենք բախվում» ենթավերնագրի տակ։ Ռահվիրան պատմում է. «Այնտեղ գրված մտքերը հուզեցին այդ կնոջը։ Նա վեր կացավ, գնաց իր խանութի ետնամասը և հոնգուր–հոնգուր լաց եղավ»։ Այդ կինը համաձայնվեց Աստվածաշունչ ուսումնասիրել տեղի քույրերից մեկի հետ և այժմ հոգևորապես առաջադիմում է։

²⁰ Խոսեն, որն ապրում է Իսպանիայում, ավտովթարի հետևանքով կորցրել էր իր կնոջը։ Նա փորձեց մխիթարություն գտնել թմրադեղերի մեջ, բացի այդ, դիմեց հոգեբանների օգնությանը։ Խոսեին շատ էր անհանգստացնում այն հարցը, թե ինչու Աստված թույլ տվեց, որ իր կինը մահանա։ Սակայն հոգեբանները չէին կարողացել պատասխանել այդ հարցին։ Մի օր Խոսեն զրույցի բռնվեց Ֆրանչեսկի հետ, որն աշխատում էր նույն ձեռնարկությունում։ Ֆրանչեսկը առաջարկեց, որ նրանք միասին քննարկեն «Ի՞նչ է սովորեցնում Աստվածաշունչը իրականում» գրքի 11–րդ գլուխը՝ «Ինչո՞ւ է Աստված թույլատրում տառապանքը»։ Սուրբգրային բացատրությունները և ուսուցչի ու աշակերտի օրինակը խորապես տպավորեցին Խոսեին։ Նա սկսեց ջանադրաբար ուսումնասիրել Աստվածաշունչը, ներկա եղավ շրջանային համաժողովին և այժմ հաճախում է Թագավորության սրահում անցկացվող հանդիպումներին։

²¹ Ռոմանը՝ Լեհաստանում ապրող 40–ամյա մի գործարար, մեծ հարգանք ուներ Աստծու Խոսքի հանդեպ։ Սակայն նա միշտ զբաղված էր իր աշխատանքով, ուստի հոգևորապես շատ չառաջադիմեց։ Այնուամենայնիվ, Ռոմանը ներկա եղավ մարզային համաժողովին և ստացավ «Աստվածաշունչը սովորեցնում է» գրքի մի օրինակ։ Դրանից հետո նա զգալի փոփոխություններ կատարեց իր կյանքում։ Ռոմանը ասում է. «Կարդալով այս գիրքը՝ զգացի, որ Աստվածաշնչի հիմնական ուսմունքները միասին ամբողջական պատկեր են կազմում, ճիշտ ինչպես որ խճանկար–գլուխկոտրուկի կտորները»։ Այժմ Ռոմանը կանոնավորաբար ուսումնասիրում է Աստվածաշունչը և լավ առաջադիմություն է կատարում։

Շարունակիր խորացնել գնահատանքդ

22, 23. Ինչպե՞ս կարող ենք շարունակ երախտագիտություն ցույց տալ մեր առջև դրված հեռանկարի համար։

²² Ինչպես բացատրվեց «Ազատագրումը մո՛տ է» մարզային համաժողովներում, ճշմարիտ քրիստոնյաները փափագում են հասնել այն ‘հավիտենական փրկությանը [«ազատագրմանը», ՆԱ]’, որ խոստացել է Աստված, և ինչը հնարավոր է դարձել Հիսուս Քրիստոսի թափած արյան շնորհիվ։ Այս թանկագին հույսի հանդեպ երախտագիտություն ցույց տալու լավագույն ձևը կլինի այն, որ շարունակենք մաքրվել «մեռած գործերից որ կենդանի Աստուծուն պաշտ[ենք]» (Եբրայեցիս 9:12, 14)։

²³ Իսկապես հրաշք է այն, որ Թագավորության ավելի քան վեց միլիոն քարոզիչներ հավատարմորեն ծառայում են Աստծուն, այն դեպքում երբ բոլոր մարդկանց վրա մեծ ճնշում է գործադրվում ծառայելու սեփական «ես»–ին։ Դա ապացույց է այն բանի, որ Եհովայի ծառաները խորապես գնահատում են Աստծուն ծառայելու պատիվը՝ իմանալով, որ իրենց «աշխատանքը զուր չէ Տէրումը»։ Ուրեմն՝ եկեք ամեն ժամանակ երախտագիտություն զարգացնենք մեր մեջ (Ա Կորնթացիս 15:58; Սաղմոս 110:3)։

Ինչպե՞ս կպատասխանեիք

• Ի՞նչ ենք սովորում սաղմոսերգուից Աստծուն, ինչպես նաև նրա տված հոգևոր բարիքների համար երախտագետ լինելու մասին։

• Ինչպե՞ս են այսօր կատարվում Անգէ 2։7–ի մարգարեական խոսքերը։

• Ինչպե՞ս է Եհովան իր ծառաներին «զինում», որ իրեն ծառայեն արդյունավետորեն։

• Ի՞նչ կարող ես անել, որպեսզի ցույց տաս երախտագիտությունդ Եհովայի բարության համար։

[Աղյուսակ 27–30-րդ էջերի վրա]

ԵՀՈՎԱՅԻ ՎԿԱՆԵՐԻ 2006–Ի ԾԱՌԱՅՈՂԱԿԱՆ ՏԱՐՎԱ ՀԱՄԱՇԽԱՐՀԱՅԻՆ ՀԱՇՎԵՏՎՈՒԹՅՈՒՆԸ

(Տե՛ս միահյուսված հատորը)

[նկարներ 25–րդ էջի վրա]

Եհովան ապահովում է մեզ անհրաժեշտ ամեն բաներով, որպեսզի կարողանանք իր կամքը կատարել