Մոտեցեք Աստծուն

Նա զգում է մեր ցավը

Հովհաննես 11։33–35

«ԿԱՐԵԿՑԱՆՔԸ քո ցավն է իմ սրտում»։ Ահա թե ինչպես Եհովայի վկա մի տարեց միսիոներ նկարագրեց այս արժեքավոր հատկությունը։ Եհովա Աստված կարեկցանք դրսևորելու հարցում մեծագույն օրինակն է։ Նա զգում է իր ծառաների կրած ցավը։ Ինչպե՞ս կարող ենք համոզված լինել դրանում։ Եհովայի սիրառատ կարեկցանքը թե՛ խոսքերով, թե՛ գործերով կատարելապես արտացոլեց Հիսուսը, երբ երկրի վրա էր (Հովհաննես 5։19)։ Քննենք այն դեպքը, որն արձանագրված է Հովհաննես 11։33–35 համարներում։

Երբ Ղազարոսը վաղաժամ մահացավ, Հիսուսը գնաց նրանց գյուղ։ Հասկանալի է, որ Ղազարոսի քույրերը՝ Մարիամն ու Մարթան, սգում էին։ Հիսուսը շատ էր սիրում այս ընտանիքին (Հովհաննես 11։5)։ Ինչպե՞ս նա կարձագանքեր։ Աստվածաշնչում կարդում ենք. «Հիսուսն էլ, տեսնելով, որ [Մարիամը] լաց է լինում, և նրա հետ եկած հրեաներն էլ են լաց լինում, իր հոգու խորքում հառաչեց և հուզվեց, ապա ասաց. «Որտե՞ղ եք դրել նրան»։ Նրանք էլ ասացին. «Տե՛ր, ե՛կ և տե՛ս»։ Եվ Հիսուսի աչքերից արցունքներ հոսեցին» (Հովհաննես 11։33–35)։ Ինչո՞ւ նա լաց եղավ։ Հիսուսի սիրելի ընկերը՝ Ղազարոսը, մահացել էր, սակայն նա պատրաստվում էր հարություն տալ նրան (Հովհաննես 11։41–44)։ Ուրիշ ի՞նչը Հիսուսի մեջ այդպիսի զգացումներ առաջացրեց։

Կրկին անդրադառնանք վերևում մեջբերված խոսքերին։ Նկատեք, որ երբ Հիսուսը տեսավ, որ Մարիամը և նրա հետ եղողները լաց են լինում, «հառաչեց» և «հուզվեց»։ Բնագիր լեզվում այստեղ օգտագործված բառերը մատնանշում են ուժգին հույզերa։ Հիսուսը խորապես հուզվեց իր տեսածից։ Այն, որ նրա աչքերը լցվեցին արցունքներով, ցույց է տալիս, որ նա խոր հույզեր ապրեց։ Հստակ է, որ ուրիշների ցավը խորապես ազդեց Հիսուսի վրա։ Երբևիցե արտասվե՞լ եք, երբ տեսել եք, որ ձեր սիրելիներից մեկը լաց է լինում (Հռոմեացիներ 12։15)։

Հիսուսի ցույց տված կարեկցանքից սովորում ենք նրա Հոր՝ Եհովայի հատկությունների և ճանապարհների մասին։ Հիշենք, որ Հիսուսը կատարելապես արտացոլեց իր Հոր հատկությունները, ուստի կարող էր ասել. «Ով որ ինձ տեսավ, Հորը տեսավ» (Հովհաննես 14։9)։ Հետևաբար, «Հիսուսի աչքերից արցունքներ հոսեցին» խոսքերը մեզ վստահեցնում են, որ Եհովան զգում է իր երկրպագուների ցավը։ Աստվածաշնչի գրողները հաստատում են դա (Եսայիա 63։9; Զաքարիա 2։8)։ Ի՜նչ սիրող Աստված է Եհովան։

Կարեկցանքը գրավիչ հատկություն է։ Երբ մենք հուսահատված և ընկճված ենք լինում, մոտենում ենք այնպիսի մարդու, որը կարող է հասկանալ մեր հանգամանքները և ցավակից լինել մեզ։ Որքա՜ն ենք մոտենում Եհովային, որը կարեկից Աստված է և զգում է մեր ցավը ու հասկանում է, թե ինչու ենք լաց լինում (Սաղմոս 56։8)։

[ծանոթագրություն]