Երկրագունդը «հիվանդ» է. կա՞ արդյոք «բուժում»
ԱԽՏԱՆՇԱՆՆԵՐԸ ցույց են տալիս, որ ջերմաստիճանը բարձրանում է։ Օրինակ՝ Ալյասկայի գյուղերից մեկը՝ Նյուտոկը, գտնվում է մերձբևեռային շրջանում։ Այն կառուցված է սառած հողի ստորին շերտի՝ հավերժական սառցույթի վրա, որը հալվում է։ «Ես [այլևս] չեմ ուզում ապրել հավերժական սառցույթի վրա,— բողոքում է Ֆրենկ անունով մի բնակիչ,— չեք պատկերացնում, թե որքան ցեխոտ է»։ Ուսումնասիրությունները ցույց են տալիս, որ տասը տարի հետո ափամերձ այս գյուղից ոչինչ չի մնա։
«Կլիմայի տաքացումը ակնհայտ է»,— նման եզրահանգման է եկել կլիմայական փոփոխությունների միջկառավարական հանձնաժողովը։ Ջերմաստիճանի գլոբալ բարձրացումը այդ մասին է վկայում։ Այն, ինչ գիտնականները կոչում են կլիմայի փոփոխություն, իրականում եղանակի ծայրահեղ տատանումն է՝ մեծ մասշտաբով երաշտներ, ուժգին տեղումներ, տաք հոսանքներ և փոթորիկներ։ Ի՞նչ կպատահի մեր մոլորակին։ Կա՞ արդյոք լուծում։
Երկրագնդի «ախտորոշումը»
Ինչպես հիվանդանոցում կախտորոշեին հիվանդին, այնպես էլ օդերևութաբանները ախտորոշում են երկրի առողջական վիճակը։ Արբանյակը տեղեկացնում է սառցադաշտերի վերացման մասին, օդերևութաբանական կայանները ազդարարում են տեղումների մեծ քանակի մասին, ստորջրյա հաղորդալարերը չափում են խոր օվկիանոսների ջերմությունը, օդային սարքավորումները ստուգում են մթնոլորտային գազերի մակարդակը։ Կլիմայի վերաբերյալ այս բոլոր տեղեկությունները ներմուծվել են գերհզոր համակարգիչներ։ Կլիման կարգավորող համակարգը այնպես է գործում, որ կարելի է կանխագուշակել, թե ինչ տեղի կունենա տասնամյակներ, նույնիսկ հարյուրամյակներ հետո։
Իսկ ախտորոշո՞ւմը։ Ոմանք կարծում են, որ ջերմոցային գազերը ծանրաբեռնել են մթնոլորտը։ Ինչպես նշվում է «Թայմ» հանդեսում, միայն 2006 թ.–ին աշխարհի ածխաթթու գազի արտահանումը «հասել է ցնցող ցուցանիշի՝ 32 միլիարդ տոննայի»։ Ինչպես ջերմոցի ապակիներն են պահում տաքությունը, այնպես էլ այդ գազերն են փակում ճանապարհը՝ թույլ չտալով, որ տաքությունը երկրից դուրս գա տիեզերք, և այսպիսով նպաստում են երկրագնդի գլոբալ տաքացմանը։ Իսկ մեր ապագա՞ն։ Կլիմայական փոփոխությունների միջկառավարական հանձնաժողովի համաձայն՝ եթե գազերի արտանետումը շարունակվի այնպես, ինչպես ներկայումս է, ապա արդյունքում «կլիմայական մեծ փոփոխություններ» առաջ կգան, և երկրի վիճակը, ամենայն հավանականությամբ, ավելի կվատանա։ Այսօր շատերն են համաձայն, որ խնդրի լուծումը ածխաթթու գազի արտանետման սահմանափակումն է։ Սակայն նույնիսկ եթե ինչ–որ ձևով կանոնավորվի գազերի արտանետումը, համակարգչում արված փորձերը ցույց են տալիս, որ հավանաբար «տաքացումը և [դրա արդյունքում առաջացած] ծովի մակարդակի բարձրացումը կշարունակվեն հարյուրավոր տարիներ»։
Որտեղ գտնել պատասխանները
Ինչ խոսք, կլիմայագիտությունը բարդ գիտություն է։ «Երկրագնդի դիտակետ» էլեկտրոնային պարբերագրում հետևյալ հարցն է տրվում. «Ինչպե՞ս կանդրադառնա ամպերի վրա Երկրագնդի տաքացումը։ Ավելի կշատանան բարձր շերտերում գտնվող ջերմակլանի՞չ ամպերը, որոնք նպաստում են լրացուցիչ տաքացմանը, թե՞ այն խիտ ամպերը, որոնք թույլ չեն տալիս, որ արևի ճառագայթները ներթափանցեն Երկրի մակերևույթ»։ Պատասխա՞նը։ «Ներկա պահին գիտնականները չեն կարողանում պատասխանել այս հարցերին»։
Սակայն Աստվածաշունչը հաստատում է, որ Եհովա Աստված «երկնքի եւ երկրի», նաև «վերի ամպերի» Արարիչն է (Ծննդոց 14։19; Առակաց 8։28)։ Նա բանաստեղծական ոճով նկարագրել է իրեն որպես մեկը, որ «իմաստություն է դրել ամպերի շերտերում»։ Այո՛, Եհովան լիովին հասկանում է այն, ինչ չեն կարողանում հասկանալ գիտնականները (Յոբ 38։36, ՆԱ)։
Ուշադրություն դարձրեք, թե 2 700 տարի առաջ ինչ է Աստված ասել երկրագնդի մթնոլորտի վերաբերյալ։ Աստվածաշնչում կարդում ենք. «Ինչպէս որ իջնում է անձրեւը.... երկնքից եւ ետ չէ դառնում այնտեղ, այլ ոռոգում է երկիրը» (Եսայիա 55։10)։ Ահա այսպիսի համառոտ կերպով է նկարագրվում ջրի շրջապտույտը։ Ամպերում գտնվող ջրային գոլորշիները թանձրանում են և անձրևի տեսքով թափվում, որը «ոռոգում է երկիրը»։ Արևի ջերմության հետևանքով խոնավությունը գոլորշիանում է և վերադառնում է «այնտեղ»՝ մթնոլորտ, որպեսզի շրջապտույտը նորից սկսի։ Եհովայի Խոսքը զարմանալի մանրամասնություններ է հայտնել երկրի կլիմայական համակարգի մասին դեռ դարեր առաջ, նույնիսկ նախքան այդ մասին կգրվեր ուրիշ աղբյուրներում։ Մի՞թե դա ձեր մեջ վստահություն չի առաջացնում Արարչի հանդեպ։ Ուստի երբ մտածում ենք, թե ինչ կլինի ներկայիս կլիմայական ճգնաժամի վերջը, խելամիտ չի՞ լինի արդյոք դիմել քամի Ստեղծողին՝ անձրևի Հորը, նրան, ով գիտի ամեն ինչ մեր մոլորակի մասին (Ամովս 4։13; Յոբ 38։28)։
Ինչու է ստեղծվել երկիրը
Թեև երկիր մոլորակի ապագայի վերաբերյալ տարբեր կարծիքներ կան, մի բան ակնհայտ է. Երկրագունդն անզուգական է։ Ի տարբերություն մյուս մոլորակների՝ երկիրը լի է կյանքի բազմազան տեսակներով։ Ինչի՞ շնորհիվ է այդ ամենը։ Գիտնականները մի շարք գործոններ են նշում։ Օրինակ՝ երկիրը հարուստ է ջրով, այն գտնվում է արևից ճիշտ հեռավորության վրա և պարունակում է մթնոլորտային գազերի անհրաժեշտ խառնուրդ, որի մեջ կա մեծ քանակությամբ թթվածին։
Գուցե զարմանաք, երբ իմանաք, որ Աստվածաշնչի «Ծննդոց» գիրքը խոսում է ստեղծագործության հենց այս առանձնահատկությունների մասին։ Օրինակ՝ Ծննդոց 1։10–ում նկարագրվում է, թե ինչպես Աստված հավաքված ջրերը կոչեց ծովեր, ինչը ցույց է տալիս, որ երկիրը առատ է ջրերով։ Իսկ Ծննդոց 1։3–ում կարդում ենք. «Աստուած ասեց, Լոյս լինի»։ Մեր մոլորակը գտնվում է արևից այն հեռավորության վրա, որ նրա ջրերի մեծ մասը մնում է հեղուկ վիճակում, սակայն այնքան էլ մոտ չէ, որ ջրերը գոլորշիանան։
Ծննդոց 1։6–ում ասվում է, որ Աստված «հաստատություն» դրեց, կամ՝ մթնոլորտ ստեղծեց։ Իսկ 11 և 12 համարներում նկարագրվում է, որ նա ստեղծեց խոտերը, բույսերը և ծառերը։ Այս ամենը մատնանշում է թթվածնի գոյությունը, որի շնորհիվ հետագայում մարդիկ և կենդանիները կկարողանային պահպանել իրենց կյանքը՝ շնչելով։
Ուստի ի՞նչ եզրակացության կարող ենք գալ։ Երբ Աստված ստեղծեց երկիրը՝ ջրի մեծ քանակությամբ, արևից ճիշտ հեռավորության վրա և մթնոլորտային գազերի անհրաժեշտ խառնուրդով, անկասկած, նա ինչ–որ նպատակ ուներ։ Աստվածաշնչում կարդում ենք. «[Աստված] չ’ստեղծեց [երկիրը] դարտակ, այլ բնակուելու համար ստեղծեց նորան» (Եսայիա 45։18)։ Իսկ Սաղմոս 115։16–ում ասվում է. «Երկինքների երկինքը Տիրոջն է, եւ նա երկիրը մարդկանց որդիներին տուաւ»։ Այո՛, երկիրը ստեղծվեց մարդկանց բնակության համար։
Ինչպես Գրություններում է ասվում, Աստված ստեղծեց առաջին զույգին և նրանց բնակեցրեց Եդեմի պարտեզում՝ գեղեցիկ դրախտում։ Նրանք պետք է «մշակեին և պահեին» այն (Ծննդոց 2։15)։ Աստված նաև պատվիրեց նրանց. «Աճեցէք եւ շատացէք, եւ լցրէք երկիրը, եւ տիրեցէք նորան» (Ծննդոց 1։28)։ Խորհեք, թե ինչ հրաշալի ապագա էր սպասում նրանց։ Նրանք պետք է ընդարձակեին Դրախտը և ապրեին հավիտյան։ Ի՜նչ հիասքանչ հեռանկար։
Ցավալի է, սակայն, առաջին զույգը ընտրեց բացարձակ անկախության ուղին, որով առ այսօր ընթանում է մարդկանց մեծ մասը, և չհնազանդվեց Աստծուն (Ծննդոց 3։1–6)։ Իսկ ի՞նչ եղավ արդյունքը։ Երկիրը մշակելու և հոգ տանելու փոխարեն՝ մարդիկ «կործանում են երկիրը» աննախադեպ արագությամբ (Հայտնություն 11։18)։ Այդուհանդերձ, մենք կարող ենք մխիթարվել. երկրի առնչությամբ Աստծու նպատակը չի փոխվել։ Աստվածաշունչը հավաստիացնում է մեզ. «[Աստված] հաստատեց երկիրն իր հիմունքի վերայ, որ տեղիցը չ’շարժուի բնաւ եւ յաւիտեան» (Սաղմոս 104։5)։ Հիսուսը նույնպես Լեռան քարոզում խոստացավ. «Երջանիկ են նրանք, ովքեր հեզ են, որովհետև նրանք կժառանգեն երկիրը» (Մատթեոս 5։5)։ Ինչպե՞ս դա կիրականանա։
Պայծառ ապագա է սպասվում
«Կլիմայի փոփոխությունը համաշխարհային խնդիր է,— ասել է ԱՄՆ–ի նախկին նախագահներից մեկը»։ Համաձայն չե՞ք, ուրեմն, որ համապատասխան լուծում էլ պիտի փնտրել։ Հիսուս Քրիստոսը մատնանշեց լուծումը՝ Աստծու Թագավորությունը։ Նա սովորեցրեց իր աշակերտներին աղոթել. «Թող գա՛ քո թագավորությունը» (Մատթեոս 6։9, 10)։ Աստվածաշնչի մարգարեության համաձայն՝ այս երկնային Թագավորությունը համաշխարհային կառավարություն է, որը շուտով «պիտի փշրէ եւ վերջացնէ այս բոլոր թագաւորութիւնները [ներկայիս կառավարությունները]» (Դանիէլ 2։44)։ Դեռ ավելին, այն «կկործանի նրանց, ովքեր կործանում են երկիրը» (Հայտնություն 11։18)։ Հստակ է, որ նրանք, ովքեր վատնում են երկրի ռեսուրսները, հաշիվ պիտի տան։ Նրանք կդատապարտվեն կործանման։
Ուրեմն ի՞նչ կպատահի մեր ապականված երկրին։ Ուշագրավ է այն փաստը, որ Հիսուսը իշխանություն ուներ տարերային ուժերի, օրինակ՝ քամու և ծովի վրա։ Նա հանդարտեցրեց ուժգին փոթորիկը՝ ընդամենը մի քանի խոսք ասելով (Մարկոս 4։35–41)։ Երկնքում իշխելով որպես «տերերի Տեր և թագավորների Թագավոր»՝ Հիսուսը ավելի մեծ իշխանություն կունենա երկրի և նրա տարրերի վրա (Հայտնություն 17։14)։ Իրականում, Հիսուսը ասաց, որ իր իշխանությունը «վերաստեղծման ժամանակ» է (Մատթեոս 19։28)։ Մի այլ թարգմանության մեջ այս արտահայտությունը հետևյալ կերպ է ձևակերպված՝ «բոլոր բաների վերանորոգում» («New International Version»)։ Հիսուսը երկրի վրա կվերաստեղծի այն պայմանները, որոնք գոյություն էին ունեցել Եդեմի պարտեզում։ Դրախտը կվերահաստատվի (Ղուկաս 23։43)։ Երկրագունդը «կբուժվի» իր «հիվանդությունից» Աստծու Թագավորության միջոցով։
Նույնիսկ այսօր դուք կարող եք օգուտներ ստանալ Թագավորության իշխանությունից։ Ինչպե՞ս։ Հիսուսը կանխագուշակել էր. «Թագավորության այս բարի լուրը կքարոզվի ամբողջ բնակեցված երկրով մեկ՝ բոլոր ազգերին վկայություն լինելու համար» (Մատթեոս 24։14)։ Միլիոնավոր մարդիկ արձագանքում են բարի լուրին և փոխում են իրենց կյանքերը՝ հրաժարվում են կործանարար սովորություններից, բարելավվում են իրենց ընտանեկան կյանքը։ Ինչպես նաև վերջ է դրվում ռասայական ատելությանը։ Տարբեր ազգերի մարդիկ սկսում են սիրել իրար։ Փաստորեն, Աստծու Թագավորությունը իրագործում է այն, ինչ ի զորու չեն անելու մարդկային կառավարությունները։ Այն ավելի քան 235 երկրներից մոտ յոթ միլիոն մարդկանց միավորել է միջազգային եղբայրության մեջ։ Այո՛, որպես Աստծու Թագավորության հպատակներ՝ նրանք պատրաստվում են հավիտյան ապրելու Դրախտում՝ այս երկրի վրա։
Երկրագնդի ապագան երաշխավորված է։ Թող որ ձեր ապագան էլ խոստումնալից լինի։
[նկար 27–րդ էջի վրա]
Աստվածաշունչը նկարագրել է ջրի շրջապտույտը դեռ դարեր առաջ, նախքան այդ մասին կգրվեր ուրիշ աղբյուրներում
[նկար 28–րդ էջի վրա]
Հիսուսը «սաստեց քամուն ու ծովին՝ ասելով. «Լռի՛ր։ Հանդարտվի՛ր»։ Եվ քամին դադարեց, ու մեծ հանդարտություն տիրեց»
[նկար 29–րդ էջի վրա]
Երբ դրախտը վերականգնվի, երկրագունդը «կբուժվի» իր «հիվանդությունից»
[նկար 26–րդ էջի վրա]
Godo-Foto