4 Գտեք կասկած հարուցող հարցերի պատասխանները

«Ո՛վ դու թերահավատ, ինչո՞ւ կասկածեցիր» (Մատթեոս 14։31)

Ո՞ՐՆ է ԽՆԴԻՐԸ։ Հիսուսի աշակերտների մեջ նույնպես ժամանակ առ ժամանակ կասկածներ էին առաջանում (Մատթեոս 14։30; Ղուկաս 24։36–39; Հովհաննես 20։24, 25)։ Աստվածաշնչում հավատի պակասը կոչվում է «մեղք, որը հեշտությամբ խճճում է մեզ» (Եբրայեցիներ 12։1)։ Պողոս առաքյալը գրեց. «Բոլորը չէ, որ հավատ ունեն» (2 Թեսաղոնիկեցիներ 3։2)։ Դա չի նշանակում, որ հնարավոր չէ հավատ ունենալ։ Իրականում շատերը ջանք չեն թափում ամուր հավատ ձեռք բերելու համար։ Մի մոռացեք, սակայն, որ Աստված օրհնում է միայն նրանց, ովքեր ջանք են թափում։

Ո՞ՐՆ է ԼՈՒԾՈՒՄԸ։ Նախ պարզիր, թե ինչն է քո մեջ կասկած հարուցում։ Օրինակ՝ Թովմաս աշակերտը չէր հավատում, որ Հիսուսը հարություն է առել, թեև աշակերտները ասել էին նրան, որ տեսել են Տիրոջը։ Թովմասը ապացույցներ էր ուզում։ Հիսուսը ներկայացրեց նրան ապացույցները, ինչն էլ ամրացրեց վերջինիս հավատը (Հովհաննես 20։24–29)։

Աստվածաշնչի միջոցով Եհովա Աստված բավարար փաստարկներ է բերում մեր կասկածները փարատելու համար։ Օրինակ՝ շատերը պատերազմների, բռնության, տառապանքի համար Աստծուն են մեղադրում, այդ պատճառով էլ աստիճանաբար կորցնում են իրենց հավատը։ Իսկ ի՞նչ է ասում Աստվածաշունչը այս մասին։

Աստված չի ղեկավարում մարդկային իշխանությունների միջոցով։ Հիսուսը նշեց, որ անտեսանելի ոգեղեն մի արարած, որը կոչվում է Սատանա, «այս աշխարհի իշխանն է» (Հովհաննես 14։30)։ Իրեն երկրպագելու դիմաց Սատանան Հիսուսին առաջարկեց աշխարհի բոլոր թագավորությունները՝ ասելով. «Այս ամբողջ իշխանությունը և սրանց փառքը քե՛զ կտամ, որովհետև ինձ է տրված, և ում որ ուզում եմ, տալիս եմ այն»։ Հիսուսը չհերքեց, որ այդ չար արարածը իրոք իշխանություն ունի, այլ պարզապես ասաց. «Գրված է. «Եհովայի՛ն՝ քո Աստծո՛ւն պետք է երկրպագես և միմիայն նրան սրբազան ծառայություն մատուցես»» (Ղուկաս 4։5–8)։ Փաստորեն, Սատանան և մարդկային կառավարություններն են չարության ու տառապանքի պատճառը և ոչ թե Աստված (Հայտնություն 12։9, 12)։

Շուտով Եհովա Աստված կվերացնի տառապանքը։ Աստված երկնքում հաստատել է մի Թագավորություն, որի թագավորը՝ Հիսուս Քրիստոսը, կիշխի մարդկության վրա (Մատթեոս 6։9, 10; 1 Կորնթացիներ 15։20–28)։ Աստվածաշնչի մարգարեության համաձայն՝ այս Թագավորության մասին բարի լուրը այժմ քարոզվում է ողջ աշխարհում (Մատթեոս 24։14)։ Մոտ ապագայում Թագավորությունը կվերացնի բոլոր նրանց, ովքեր հակառակվում են Աստծուն, և այլևս ցավ ու տառապանք չի լինի (Դանիէլ 2։44; Մատթեոս 25։31–33, 46; Հայտնություն 21։3, 4)։

Ո՞ՐՆ է ՎԱՐՁԱՏՐՈՒԹՅՈՒՆԸ։ Նրանք, ովքեր տեղիք են տալիս կասկածներին, նման են տարուբերվող ալիքների, որոնք «ուսմունքների ամեն քամուց այս ու այն կողմ են քշված՝ մարդկանց խորամանկությամբ» (Եփեսացիներ 4։14; 2 Պետրոս 2։1)։ Սակայն նրանք, ովքեր գտնում են իրենց անհանգստացնող հարցերի պատասխանները, «հավատի մեջ հաստատ կկանգնեն» (1 Կորնթացիներ 16։13)։

Եհովայի վկաները կարող են օգնել ձեզ գտնելու ձեզ հուզող հարցերի պատասխանները։ Դուք կարող եք ուսումնասիրել, թե ինչին են նրանք հավատում։ Աստվածաշնչի ուսումնասիրությունը խորապես կամրացնի ձեր հավատը Աստծու հանդեպ։

Լրացուցիչ տեղեկությունների համար տե՛ս «Ի՞նչ է սովորեցնում Աստվածաշունչը իրականում» գրքի ութերորդ գլուխը, որը վերնագրված է՝ «Ի՞նչ է Աստծու Թագավորությունը» և տասնմեկերորդ գլուխը՝ «Ինչո՞ւ է Աստված թույլատրում տառապանքը»a։

[ծանոթագրություն]

[նկար 9–րդ էջի վրա]

Նրանք, ովքեր գտնում են իրենց անհանգստացնող հարցերի պատասխանները, ամուր հիմք են դնում իրենց հավատի համար