«Մեկ բաժակ էլ ու վերջ»

ԱԼԵՆԸa սկսեց չարաշահել խմիչքը, երբ դեռ 11 տարեկան էր։ Նա ու իր ընկերները խաղալիս ընդօրինակում էին ֆիլմերի հերոսներին։ Հերոսները մտացածին էին, իսկ ահա խմիչքը, որ խմում էին երեխաները, իսկական էր։

Իսկ Թոնին 40 տարեկան էր, երբ աստիճանաբար ամեն երեկո մեկ կամ երկու բաժակ խմելու փոխարեն՝ սկսեց խմել հինգից վեց բաժակ։ Հետո նա նույնիսկ չէր էլ հիշում, թե քանի բաժակ է խմել օրվա ընթացքում։

Ալենը ալկոհոլի հետ կապված իր խնդիրը լուծելու համար օգնության դիմեց։ Թոնին, սակայն, մերժեց այն օգնությունը, որ առաջարկում էին ընտանիքի անդամներն ու ընկերները։ Ալենը այսօր կենդանի է և կարող է պատմել իր մասին, բայց Թոնին մի քանի տարի առաջ մահացավ ավտովթարից. այդ օրը նա շատ էր խմել։

Բանն այն է, որ նույնիսկ եթե անհատը մենակ է խմում, հետևանքները կարող են ազդել նաև շրջապատի մարդկանց վրա, իսկ երբեմն էլ դրանք կարող են ողբերգական լինելb։ Ալկոհոլի չարաշահումը հաճախ պատճառ է դառնում, որ անհատը անվայել խոսքեր ասի, բռնության դիմի, կռիվ անի և նույնիսկ մարդ սպանի։ Այն կարող է վթարների կամ աշխատավայրում դժբախտ պատահարների պատճառ դառնալ, ինչպես նաև վատ անդրադառնալ անհատի առողջության վրա։ Ալկոհոլի չարաշահման պատճառով հասարակությունը ամեն տարի միլիարդավոր դոլարներ է ծախսում։ էլ չենք խոսում այն մասին, թե էմոցիոնալ ինչ ծանր ցավ են ապրում շրջապատի մարդիկ, ընտանիքի անդամները և երեխաները։

Ահա թե ինչ է նշում ԱՄՆ–ի Առողջապահության ազգային ինստիտուտը. «Կանոնավոր ալկոհոլ օգտագործողներից ոչ բոլորն ունեն ալկոհոլի հետ կապված խնդիր։ Եվ հակառակը՝ ոչ բոլոր խնդիր ունեցողներն են ամեն օր խմում» (U.S. National Institutes of Health)։ Շատերը, թեև հարբեցողներ չեն, առանց գիտակցելու շատ են խմում։ Մյուսներն էլ, թեև հազվադեպ են խմում, սակայն միանգամից խմում են հինգ բաժակից ավել։

Ուստի գուցե մտածես. «Որքա՞ն պիտի խմեմ։ Ինչպե՞ս կարող եմ իմանալ, թե արդյոք չափն անցնում եմ։ Ո՞րերորդ բաժակը պիտի լինի իմ վերջի՛ն բաժակը (Առակաց 23։29, 30)։ Հաջորդ հոդվածներում գործնական խորհուրդներ են տրվում։

[Ծանոթագրություններ]