Օգնեք երեխաներին ծանոթանալու Եհովայի կազմակերպության հետ

ԵՐԵԽԱՆԵՐԸ սովորելու ցանկություն ունեն։ Պատկերացրու, թե իսրայելացի երեխաները ինչ հարցեր տված կլինեին առաջին Պասեքը Եգիպտոսում նշելու գիշերը. «Ինչո՞ւ պիտի գառը սատկի»։ «Ինչո՞ւ է հայրիկը արյունը քսում շեմքին»։ «Ո՞ւր ենք գնում»։ Այն, որ Եհովան ողջունում էր այսպիսի հարցերը, երևում է իսրայելացի հայրերին տված նրա պատվերից։ Աստված Պասեքը հետագայում նշելու վերաբերյալ հետևյալն էր ասել. «Եթե ձեր որդիները հարցնեն ձեզ, թե՝ «այս ծառայությունը ի՞նչ է նշանակում ձեզ համար», այն ժամանակ ասացեք. «Սա Պասեքի զոհն է Եհովայի համար, որը եգիպտացիներին պատուհասելիս Եգիպտոսում անցավ Իսրայելի որդիների տների կողքով և ազատեց մեր տները»» (Ելք 12։24–27)։ Ավելի ուշ Եհովան հիշեցրեց իսրայելացի ծնողներին, որ կարևոր է պատասխանել երեխաների հարցերին, որոնք վերաբերում են իր տված «կանոններին ու դատավճիռներին» (2 Օրենք 6։20–25)։

Իսկապես, Եհովան ցանկանում էր, որ երեխաները ստանան ճշմարիտ երկրպագության վերաբերյալ իրենց հարցերի բավարար պատասխանները, որոնք էլ կմղեին նրանց սիրելու և ընդունելու իրեն որպես իրենց Աստված և Փրկիչ։ Այսօր էլ Եհովան նույնն է ցանկանում։ Միջոցներից մեկը, որով ծնողները կարող են սեր սերմանել երեխաների սրտում Եհովայի և իր ժողովրդի հանդեպ, նրանց օգնելն է ծանոթանալու նրա կազմակերպության հետ և հասկանալու, թե ինչ օգուտներ նրանք կարող են ստանալ դրանից։ Ուստի եկեք քննենք մի քանի միջոցներ, որոնք երեխաներին կօգնեն մանրամասն տեղեկություններ իմանալու Աստծու կազմակերպության մասին։

Տեղի ժողովը

Երեխաները պետք է ճանաչեն այն ժողովը, ուր հաճախում են։ Այդ նպատակով պետք է ձեր երեխաներին ձեզ հետ միասին տանեք քրիստոնեական բոլոր հանդիպումներին։ Այդպիսով կհետևեք իսրայելացիների օրինակին, որոնց Եհովան պատվիրել էր. «Ժողովիր ժողովրդին՝ տղամարդկանց, կանանց, երեխաներին.... որպեսզի լսեն ու սովորեն, քանի որ նրանք պետք է վախենան ձեր Աստված Եհովայից և զգուշորեն կատարեն այս օրենքի բոլոր խոսքերը։ Եվ նրանց որդիները, ովքեր չգիտեն այս ամենը, պետք է լսեն ու սովորեն վախենալ ձեր Աստված Եհովայից» (2 Օրենք 31։12, 13)։

Երեխաները կարող են դեռ վաղ մանկությունից սովորել Եհովայի Խոսքը։ Պողոս առաքյալը Տիմոթեոսի մասին գրեց. «Վաղ մանկությունից գիտես սուրբ գրքերը» (2 Տիմոթ. 3։15)։ Թագավորության սրահում անցկացվող հանդիպումների ժամանակ նույնիսկ շատ փոքր երեխաներն են սկսում հասկանալ ներկայացվող տեղեկությունը և ծանոթանալ Թագավորության երգերին։ Այնտեղ են նրանք սովորում օգտագործել և հարգանքով վերաբերվել Աստվածաշնչին ու դրա վրա հիմնված գրականությանը։ Ավելին, մեր հանդիպումների ժամանակ է, որ նրանք կարող են զգալ Քրիստոսի ճշմարիտ հետևորդներին բնորոշող հատկությունը՝ անկեղծ սերը։ Հիսուսն ասել է. «Նոր պատվիրան եմ տալիս ձեզ. սիրե՛ք իրար։ Ինչպես ես ձեզ սիրեցի, այնպես էլ դուք սիրեք իրար։ Սրանով բոլորը կիմանան, որ դուք իմ աշակերտներն եք, եթե սիրեք իրար» (Հովհ. 13։34, 35)։ Ջերմ սերը և իրական ապահովության զգացումը, որոնք ակնհայտ են Թագավորության սրահում, կհրապուրեն երեխաներին և կօգնեն, որ քրիստոնեական հանդիպումներին հաճախելը իրենց կյանքի անբաժանելի մասը դարձնեն։

Եթե Թագավորության սրահ շուտ գալու և հանդիպման ավարտից հետո մի որոշ ժամանակ մնալու սովորություն ունեք, ապա ձեր երեխաները ընկերներ գտնելու հնարավորություն կունենան։ Փոխարենը թույլ տալու, որ ընկերություն անեն միայն երեխաների հետ, կարող եք ծանոթացնել նրանց բոլոր տարիքի եղբայրների ու քույրերի հետ։ Եթե երեխաները ճանաչեն իրենցից տարիքով մեծերին, կբացահայտեն, որ նրանք շատ հրաշալի դեպքեր գիտեն և իմաստուն են։ Ինչպես հին ժամանակներում ապրած Զաքարիան, որը երիտասարդ Օզիային՝ Հուդայի թագավորին, «սովորեցրել էր.... վախենալ ճշմարիտ Աստծուց» և լավ ազդեցություն էր թողել նրա վրա, այնպես էլ այսօր նրանք, ովքեր երկար տարիներ հավատարմորեն ծառայում են Եհովային, լավ ազդեցություն են թողնում երեխաների վրա (2 Տար. 26։1, 4, 5)։ Թագավորության սրահում կարող եք նաև բացատրել երեխաներին գրադարանի, հայտարարությունների տախտակի և այլ բաների նշանակությունը։

Համաշխարհային կազմակերպություն

Երեխաները պետք է հասկանան, որ իրենց ժողովը համաշխարհային կազմակերպության ավելի քան 100000 ժողովների մի մասն է կազմում։ Բացատրեք կազմակերպության առանձնահատկությունները, թե ինչ գործունեություն է ծավալում և ինչ դեր կարող են երեխաներն ունենալ դրան աջակցելու հարցում։ Ասեք, թե ինչու եք անհամբերությամբ սպասում շրջանային և մարզային համաժողովներին, ինչպես նաև շրջանային վերակացուի այցին (տե՛ս «Թեմաներ, որ կարող եք քննարկել ընտանեկան երկրպագության ժամանակ» շրջանակը, էջ 28)։

Եթե հնարավորություն ունեք, ձեր տուն ճաշի հրավիրեք շրջագայող վերակացուների, միսիոներների, Բեթելի ընտանիքի անդամների և ուրիշ լիաժամ ծառայողների։ Մի՛ մտածեք, թե նրանք ժամանակ չունեն երեխաների համար։ Լիաժամ ծառայողները ձգտում են ընդօրինակել Հիսուսին, որը միշտ ողջունում էր երեխաներին և խոսում էր նրանց հետ (Մարկ. 10։13–16)։ Լսելով Եհովայի այս ծառաների պատմած դեպքերը և տեսնելով սուրբ ծառայությունից ստացած նրանց ուրախությունը՝ ձեր երեխաները թերևս նույնպես նպատակ դնեն ծառայելու լիաժամ։

Ուրիշ ի՞նչ կարող եք անել որպես ընտանիք, որ օգնեք ձեր երեխաներին ավելի լավ ճանաչելու Եհովայի կազմակերպությունը։ Ահա մի քանի առաջարկ։ Նպատակ դրեք ամբողջ ընտանիքով քննարկելու «Եհովայի վկաներ. Աստծու Թագավորությունը հռչակողները» գիրքը։ Ընդգծեք Եհովայի ծառաների դրսևորած անձնվիրությունը, խոնարհությունը և նվիրվածությունը։ Ցույց տվեք, թե ինչպես է Եհովան նրանց միջոցով բարի լուրը տարածել ողջ երկրով մեկ։ Օգտագործեք Եհովայի կազմակերպության տեսաֆիլմերը, որ կարևոր դասեր սովորեցնեք անցյալի և ներկայիս դեպքերից։ Եթե հնարավորություն ունեք, այցելեք ձեր կամ նույնիսկ այլ երկրների Բեթել։ Այդպիսի այցերը մեծ տպավորություն կթողնեն երեխաների վրա, երբ նրանք տեսնեն, թե Եհովայի կազմակերպության երկրային մասը հավատարիմ ծառա դասակարգի ղեկավարությամբ ինչպես է հոգևոր սնունդ և առաջնորդություն տալիս համաշխարհային եղբայրությանը, ինչպես որ արել է առաջին դարում (Մատթ. 24։45–47; Գործ. 15։22–31)։

Հարմարեցրեք տեղեկությունը յուրաքանչյուր երեխային

Երեխաներին կրթելիս հիշեք, թե ինչպես էր Հիսուսը սովորեցնում իր առաքյալներին։ Մի անգամ նա ասաց. «Դեռ շատ բաներ ունեմ ձեզ ասելու, բայց հիմա դուք ի վիճակի չեք դրանք հասկանալու» (Հովհ. 16։12)։ Հիսուսը չէր ծանրաբեռնում նրանց տեղեկություններով։ Հակառակը՝ աստիճանաբար էր կարևոր ճշմարտությունները սովորեցնում, որ կարողանային յուրացնել։ Դուք էլ այդպես վարվեք։ Եթե կանոնավորաբար և աստիճանաբար սովորեցնեք երեխաներին Եհովայի կազմակերպության մասին, կզարգացնեք նրանց հետաքրքրությունը, և նրանք հաճույքով կսովորեն քրիստոնեական ժողովի մասին։ Մինչ ձեր երեխաների կարիքները փոխվում են, կարող եք կրկնել նրանց սովորածը և դրա վրա ավելացնել նոր գիտելիքներ։

Քրիստոնեական ժողովը հոգևոր ամրոց է, որն օգնում է ամուր փոխհարաբերություններ հաստատելու Աստծու հետ, իսկ այն երեխաները, որոնք եռանդորեն մասնակցում են ժողովի գործունեությանը, ավելի լավ են պատրաստված դիմադրելու Սատանայի աշխարհի ազդեցությանը (Հռոմ. 12։2)։ Մենք վստահ ենք, որ մեծ ուրախություն կգտնեք, եթե օգնեք ձեր երեխաներին ծանոթանալու Եհովայի կազմակերպության հետ։ Թող Աստված օրհնի իրենց ջանքերը, և թող նրանք նվիրված մնան մեր սիրառատ Աստծուն, ում ծառայում ենք, և նրա կազմակերպությանը։

[շրջանակ/​նկար 28-րդ էջի վրա]

Թեմաներ, որ կարող եք քննարկել ընտանեկան երկրպագության ժամանակ

Ահա Եհովայի կազմակերպության հետ կապված որոշ թեմաներ, որ կարող եք քննարկել ընտանեկան երկրպագության երեկոյի ժամանակ։

▪ Քննեք տեղի ժողովի պատմությունը։ Ե՞րբ և ինչպե՞ս է այն հաստատվել։ Ի՞նչ տարբեր Թագավորության սրահներից է օգտվել։ Այս հարցերը քննելու համար կարող եք ձեր տուն հրավիրել ժողովի անդամներից մեկին, ով երկար ժամանակ է ծառայում այնտեղ, որպեսզի նա պատասխանի երեխաների հարցերին։

▪ Բացատրեք ժողովի տարբեր հանդիպումների և ավելի մեծ հավաքույթների նպատակը և թե ինչպես երեխաները կարող են օգուտներ քաղել դրանցից։

▪ Ուշադրություն դարձրեք, թե ինչ նպատակով են Եհովայի կազմակերպության մեջ տարբեր դպրոցներ հաստատվել։ Պատմեք դեպքեր, որոնք ցույց են տալիս, թե ինչ լավ պտուղներ են բերել այդ դպրոցների շրջանավարտները։

▪ Օգնեք երեխաներին տեսնելու, թե որքան կարևոր է բարի լուրի կանոնավոր քարոզիչ դառնալը։ Ցույց տվեք նրանց, թե ինչպես կարող են իրենց լուման ներդնել համաշխարհային հաշվետվության մեջ, որը տպագրվում է «Եհովայի վկաների տարեգրքում»։

▪ Քննեք լիաժամ ծառայության տարբեր ձևերը, որոնց երեխաները կարող են մասնակցել։ Օգտակար տեղեկություններ կարող եք գտնել «Կազմակերպված ենք՝ կատարելու Եհովայի կամքը» գրքի 10-րդ գլխում։

▪ Օգնեք երեխաներին տեսնելու, թե ինչու են ժողովում հետևում որոշակի ընթացակարգի։ Բացատրեք, թե ինչու նույնիսկ փոքր բաներում նրանք չպետք է Եհովայի կազմակերպությունից անկախ գործեն։ Ցույց տվեք նրանց, թե հետևելով երեցների տված առաջնորդությանը՝ ինչպես կարող են նպաստել, որ ժողովում կարգուկանոն լինի։

[նկար]

Ձեր երեխաները օգուտներ կքաղեն, եթե ընկերություն անեն երկար տարիներ ծառայող քրիստոնյաների հետ

[նկարներ 26-րդ էջի վրա]

Ինչպես հին Իսրայելում էր, այսօր էլ ծնողները ձգտում են բավարար պատասխաններ տալ Եհովայի կազմակերպության վերաբերյալ երեխաների հարցերին