«Քո ճանապարհի մեջ դու հաջողակ» եղիր. ինչպե՞ս

«ՀԱՋՈՂՈՒԹՅՈՒՆ». որքա՜ն գրավիչ բառ է։ Որոշ մարդիկ առաջ են գնում աշխատանքի մեջ և մեծ հաջողությունների են հասնում, հարստանում են և անվանի մարդ դառնում։ Մյուսներն էլ երազում են հաջողակ լինելու մասին, սակայն ձախողությունների են հանդիպում։

Մեծմասամբ հաջողությունը կախված է այն բանից, թե քո կյանքում ինչն է առաջին տեղում։ Երկու կարևոր գործոններ էլ կան՝ ինչպես ես ծախսում ժամանակդ և ուժերդ ու արդյոք նախաձեռնություն վերցնող մարդ ես։

Բազմաթիվ քրիստոնյաներ մեծ բավարարվածություն են ստանում ծառայությանը լիարժեքորեն մասնակցելուց։ Լիաժամ ծառայությունը կյանքի գլխավոր նպատակը դարձնելը օգնել է և՛ երիտասարդներին, և՛ տարեցներին հաջողակ լինելու։ Այնուհանդերձ, ոմանք գուցե ծառայությունը ձանձրալի համարեն, իրենց կյանքում երկրորդ տեղում դնեն այն և ուրիշ նպատակներ հետապնդեն։ Ո՞րն է պատճառը։ Ի՞նչ կարող ես անել, որ քո տեսադաշտից չկորցնես այն, ինչն իսկապես արժեքավոր է։ Եվ ինչպե՞ս կարող ես «քո ճանապարհի մեջ հաջողակ» լինել (Հեսու 1։8)։

Այլ զբաղմունքներ և հոբբիներ

Քրիստոնյա պատանիները պետք է հավասարակշռեն ճշմարիտ Աստծուն ծառայելն ու այլ բաներով զբաղվելը։ Նրանք, ովքեր այսպես են վարվում, արժանի են գովասանքի։ Այդ պատանիները կյանքում հաջողությունների կհասնեն։

Սակայն որոշ քրիստոնյա պատանիներ տարվում են այլ զբաղմունքներով և հոբբիներով։ Այսպիսի զբաղմունքներն ինքնին դատապարտելի չեն։ Այնուհանդերձ, նրանք պետք է հարցնեն իրենց. «Որքա՞ն ժամանակ կխլեն ինձնից դրանք։ Ովքե՞ր կլինեն ընկերներս։ Ի՞նչ ոգի կդրսևորեմ դրանցով զբաղվելիս։ Ի՞նչը կդառնա իմ կյանքի նպատակը»։ Հավանաբար, հասկանում ես, որ անհատը կարող է այնքան տարվել դրանցով, որ քիչ ժամանակ և ուժ կունենա Աստծու հետ ամուր հարաբերություններ զարգացնելու համար։ Ուստի առաջնահերթություններ դնելը շատ կարևոր է (Եփես. 5։15–17)։

Քննենք Վիկտորի օրինակըa։ Նա պատմում է. «Երբ 12 տարեկան էի, վոլեյբոլի թիմի անդամ էի։ Ժամանակի ընթացքում շատ մրցանակներ ու պարգևներ ստացա։ Իմ առջև բացվել էր աստղ դառնալու հեռանկարը»։ Բայց հետո Վիկտորին անհանգստացրեց այն, որ սպորտի հետ կապված նպատակներն անդրադառնում էին իր հոգևոր վիճակի վրա։ Մի օր նա նույնիսկ քնեց Աստվածաշունչ կարդալիս։ Վիկտորը նաև քիչ ուրախություն էր ստանում ծառայությունից։ «Սպորտը խլում էր ուժերս, և շուտով հասկացա, որ նաև խլում է հոգևորի հանդեպ եռանդս։ Հասկանում էի, որ չեմ անում այն, ինչ կարող էի անել»,— ասում է նա։

Բարձրագույն կրթություն

Քրիստոնյաները իրենց ընտանիքներին հոգ տանելու պարտականություն ունեն, և դրա մեջ է մտնում նրանց նյութական կարիքները հոգալը (1 Տիմոթ. 5։8)։ Բայցևայնպես, պե՞տք է դրա համար համալսարանական կրթություն ունենալ։

Լավ կլինի քննել, թե ինչ ազդեցություն կարող է բարձրագույն կրթությունը թողնել անհատի՝ Եհովայի հետ ունեցած փոխհարաբերությունների վրա։ Եկեք այս հարցին պատասխանենք աստվածաշնչյան օրինակով։

Բարուքը Երեմիա մարգարեի քարտուղարն էր։ Նրա կյանքում մի պահ եղավ, որ Եհովային ծառայելու առանձնաշնորհման վրա կենտրոնանալու փոխարեն՝ փառասեր դարձավ։ Եհովան նկատեց դա և Երեմիայի միջոցով զգուշացրեց նրան. «Դու քեզ համար մեծամեծ բաներ ես փնտրում։ Մի՛ փնտրիր» (Երեմ. 45։5)։

Ի՞նչ «մեծամեծ բաներ» էր փնտրում Բարուքը։ Հնարավոր է՝ նա կանգնել էր հրեական համակարգում անուն ստեղծելու գայթակղության առաջ։ Կամ գուցե նյութական բարեկեցիկ կյանքով ապրելու ցանկություն էր առաջացել նրա մեջ։ Ամեն դեպքում, նա իր տեսադաշտից կորցրել էր ավելի կարևոր, հոգևոր արժեք ունեցող բաները (Փիլիպ. 1։10)։ Այնուհանդերձ, Բարուքը ականջ դրեց Երեմիայի միջոցով Եհովայի տված նախազգուշացմանը և այդպիսով իր հոգին ավարի տեղ ստացավ (Երեմ. 43։6)։

Ի՞նչ ենք սովորում այս արձանագրությունից։ Բարուքի ստացած խորհուրդը ցույց է տալիս, որ նա սխալ ընթացք էր բռնել. նա մեծամեծ բաներ էր փնտրում իր համար։ Եթե քո կարիքները բավարարելու համար անհրաժեշտ միջոցներ ունես, ապա հարկավո՞ր է, որ ժամանակ, փող ծախսես, նաև ջանքեր ներդնես միայն նրա համար, որ իրականացնես քո, ծնողներիդ, հարազատներիդ նպատակները։

Քննենք ծրագրավորող Ժեգոշի օրինակը։ Գործընկերների ճնշման տակ նա սկսեց հաճախել մասնագիտական լրացուցիչ դասընթացների, ինչի պատճառով հոգևոր նպատակների համար ժամանակ չէր ունենում։ Նա հիշում է. «Անընդհատ լարված էի։ Խիղճս տանջում էր, քանի որ չէի կարողանում հասնել հոգևոր նպատակներիս»։

Տարվել աշխատանքով

Աստծու Խոսքը ճշմարիտ քրիստոնյաներին հորդորում է լինել ջանասեր, պատասխանատու աշխատողներ ու գործատերեր։ Պողոս առաքյալը գրեց. «Ինչ որ անում եք, ամբողջ հոգով արեք, ինչպես Եհովայի համար և ոչ թե մարդկանց» (Կող. 3։22, 23)։ Թեև ջանադրաբար աշխատելը գովելի է, բայց ավելի կարևոր են Ստեղծչի հետ ունեցած լավ փոխհարաբերությունները (Ժող. 12։13)։ Եթե քրիստոնյան տարվի աշխատանքով, նրա հոգևոր նպատակները կարող են երկրորդ պլան մղվել։

Աշխատանքով տարվելու դեպքում քրիստոնյան չի ունենա այն ուժը, որն անհրաժեշտ է հոգևոր հավասարակշռություն պահելու և ընտանիքին հոգ տանելու համար։ Սողոմոն թագավորն ասաց, որ «երկու բուռ տքնաջան աշխատանքը» հաճախ «վազք է քամու հետևից»։ Եթե քրիստոնյան ամբողջովին տարվի կարիերայով, կարող է երկարատև, խոր սթրեսի մեջ ընկնել։ Նույնիսկ հնարավոր է, որ դառնա կարիերայի գերին, ինչը ուժասպառ կանի իրեն։ Այդ դեպքում մի՞թե նա «կուրախանա... և բարիք կտեսնի իր ողջ աշխատանքից» (Ժող. 3։12, 13; 4։6)։ Իսկ որն ավելի կարևոր է, կունենա՞ բավական ֆիզիկական ու էմոցիոնալ ուժ, որ հոգ տանի իր ընտանիքին և մասնակցի հոգևոր գործերին։

Յանուշը, որն ապրում է Արևելյան Եվրոպայում, տարվել էր այգեգործությամբ։ Նա հիշում է. «Մարդիկ հիանում էին ինձնով, քանի որ միշտ նախաձեռնություն էի վերցնում և կատարում էի իմ բոլոր հանձնարարությունները։ Բայց իմ հոգևորը տուժում էր, ու ես դադարեցի ծառայությանը մասնակցելուց։ Կարճ ժամանակ անց այլևս չէի հաճախում ժողովի հանդիպումներին։ Այնքան հպարտ էի դարձել, որ չընդունեցի երեցների խորհուրդը և հեռացա ժողովից»։

Դու կարող ես հաջողակ լինել

Մենք քննեցինք երեք ոլորտ, որոնցով քրիստոնյան կարող է տարվել և որոնց պատճառով կարող է վնասել իր հոգևոր վիճակը։ Դրանցից որևէ մեկով տարվա՞ծ ես։ Եթե այո, ապա հետևյալ հարցերը, աստվածաշնչյան համարները և մեկնաբանությունները կարող են օգնել քեզ որոշելու, թե արդյոք հաջողության ճանապարհին ես։

Այլ զբաղմունքներ և հոբբիներ։ Որքա՞ն ես տարվել դրանցով։ Դրանք խլո՞ւմ են այն ժամանակը, որը նվիրում էիր հոգևոր գործերին։ Հավատակիցներիդ հետ շփվելը քեզ համար անհետաքրքի՞ր է։ Եթե այո, ապա ընդօրինակիր Դավիթ թագավորին, որն աղերսեց Եհովային. «Իմացրո՛ւ ինձ այն ճանապարհը, որով պետք է գնամ» (Սաղ. 143։8)։

Շրջագայող վերակացուն օգնեց Վիկտորին, որի մասին արդեն խոսել ենք։ Վերակացուն ասաց նրան. «Դու այնքան խանդավառությամբ ես խոսում վոլեյբոլի մասին»։ «Այդ խոսքերը ցնցեցին ինձ,— ասում է Վիկտորը։— Ես հասկացա, որ շատ եմ խորացել։ Շուտով խզեցի կապերս թիմակիցներիս հետ և սկսեցի ընկերներ փնտրել ժողովում»։ Այսօր Վիկտորը նախանձախնդրաբար ծառայում է Եհովային։ Նա խորհուրդ է տալիս. «Հարցրու ընկերներիդ, ծնողներիդ կամ ժողովի երեցներին՝ արդյոք նրանց կարծիքով այլ զբաղմունքները մոտեցրել են քեզ Եհովային, թե հեռացրել են նրանից»։

Լավ կլինի, որ ասես ժողովիդ երեցներին, որ ուզում ես ծառայության մեջ ավելի շատ առանձնաշնորհումներ ստանալ։ Նաև նպատակ դիր օգնելու տարեցներին, որոնք ընկերակցության, աջակցության, գուցեև գնումներ կատարելու կամ տան գործեր անելու համար օգնության կարիք ունեն։ Քանի տարեկան էլ լինես, կարող ես լիաժամ ծառայել՝ պատմելով ուրիշներին քո ուրախության աղբյուրի մասին։

Բարձրագույն կրթություն։ Հիսուսը զգուշացրեց, որ քո «սեփական փառքը» չփնտրես (Հովհ. 7։18)։ Անկախ այն բանից՝ կշարունակես կրթություն ստանալ, թե ոչ, «հավաստիացիր, թե ինչն է ավելի կարևոր» (Փիլիպ. 1։9, 10)։

Ժեգոշը փոփոխություններ արեց իր կյանքում։ Նա ասաց. «Լրջորեն վերաբերվելով երեցների խորհրդին՝ պարզեցրի կյանքս։ Հասկացա, որ լրացուցիչ կրթություն ստանալու հարկ չկա։ Դա միայն կխլի իմ ժամանակն ու ուժերը»։ Ժեգոշը սկսեց ավելի շատ ժամանակ տրամադրել ժողովի գործերին։ Որոշ ժամանակ անց ավարտեց Ծառայության կատարելագործման դպրոցը, որն այժմ կոչվում է Աստվածաշնչյան դպրոց ամուրի եղբայրների համար։ Այո՛, նա «գնեց.... ժամանակը»՝ ավելի շատ աստվածային կրթություն ստանալու համար (Եփես. 5։16)։

Աշխատանք։ Արդյոք այնքա՞ն ես տրվել աշխատանքիդ, որ հոգևոր գործերը մի կողմ են մղվել։ Բավարար ժամանակ հատկացնո՞ւմ ես ընտանիքիդ հետ հաղորդակցվելու համար։ Բարելավո՞ւմ ես ելույթներիդ որակը։ Շինիչ զրույցներ վարո՞ւմ ես։ «Վախեցիր ճշմարիտ Աստծուց և պահիր նրա պատվիրանները» ու կվայելես Եհովայի առատ օրհնություններն ու հաճույք կստանաս «տքնաջան աշխատանքից» (Ժող. 2։24; 12։13)։

Յանուշը մեծ հաջողությունների չհասավ այգեգործության մեջ, հակառակը՝ նրա բիզնեսը ձախողվեց։ Առանց եկամտի ու պարտքերի մեջ խրված՝ նա դարձավ դեպի Եհովան։ Յանուշը կարգավորեց գործերը և հիմա ծառայում է որպես ռահվիրա ու երեց։ Նա ասում է. «Երբ սկսեցի բավարարվել անհրաժեշտ բաներով և միևնույն ժամանակ իմ եռանդն օգտագործեցի հոգևոր գործունեության մեջ, միտքս խաղաղվեց, ու սիրտս հանդարտվեց» (Փիլիպ. 4։6, 7)։

Ժամանակ տրամադրիր մղումներիդ ու առաջնահերթություններիդ անկեղծ գնահատական տալու համար։ Եհովային ծառայելը երկարատև հաջողության ուղին է։ Այն քո կյանքի գլխավոր նպատակը դարձրու։

Գուցե որոշ փոփոխություններ անես, նույնիսկ հրաժարվես անկարևոր բաներից, որպեսզի «հավաստիանաս, թե որն է Աստծու բարի, ընդունելի և կատարյալ կամքը» (Հռոմ. 12։2)։ Սակայն դու կարո՛ղ ես «քո ճանապարհի մեջ հաջողակ» լինել՝ ամբողջ հոգով Եհովային ծառայելով։

[ծանոթագրություն]

[շրջանակ/նկար 31-րդ էջի վրա]

Ինչպե՞ս կարող ես ճանապարհդ հաջողակ դարձնել

Թեև շատ բաներ կան, որ կարող են շեղել ուշադրությունդ, ի՞նչը կօգնի քեզ տեսադաշտից չկորցնելու իսկապես արժեքավոր բաները։ Ժամանակ տրամադրիր, որ քննես մղումներդ ու առաջնահերթություններդ՝ խորհրդածելով հետևյալ հարցերի շուրջ։

ԱՅԼ ԶԲԱՂՄՈՒՆՔՆԵՐ ՈՒ ՀՈԲԲԻՆԵՐ

▪ Ի՞նչ ազդեցության ես ենթարկվում, երբ զբաղվում ես դրանցով։

▪ Որքա՞ն ժամանակ են խլում։

▪ Հնարավո՞ր է, որ դրանք դառնան կյանքիդ ամենակարևոր բաները։

▪ Այդ հետաքրքրությունները խլո՞ւմ են այն ժամանակը, որը նվիրում էիր հոգևոր գործերին։

▪ Ինչպիսի՞ մարդկանց հետ ես շփվում։

▪ Նրանց հետ շփումը քեզ համար ավելի՞ հետաքրքիր է, քան հավատակիցներիդ հետ շփումը։

ԲԱՐՁՐԱԳՈՒՅՆ ԿՐԹՈՒԹՅՈՒՆ

▪ Եթե քո կարիքները բավարարելու համար անհրաժեշտ միջոցներ ունես, ապա հարկավո՞ր է, որ ժամանակ, փող ծախսես, նաև ջանքեր ներդնես ավելի շատ կրթություն ստանալու համար։

▪ Կարիքներդ հոգալու համար անհրաժե՞շտ է, որ համալսարանական կրթություն ունենաս։

▪ Ինչպե՞ս դա կազդի ժողովի հանդիպումներին հաճախելու վրա։

▪ Հավաստիացե՞լ ես, «թե ինչն է ավելի կարևոր»։

▪ Կարի՞ք ունես ամրացնելու հավատդ այն բանի հանդեպ, որ Եհովան կարող է հոգ տանել քո մասին։

ԱՇԽԱՏԱՆՔ

▪ Քո կատարած ընտրությունը հնարավորություն տալի՞ս է քեզ «ուրախանալու.... և բարիք տեսնելու քո ողջ աշխատանքից»։

▪ Կունենա՞ս բավական ֆիզիկական ու էմոցիոնալ ուժ, որ հոգ տանես ընտանիքիդ և մասնակցես հոգևոր գործերին։

▪ Բավարար ժամանակ հատկացնո՞ւմ ես ընտանիքիդ հետ հաղորդակցվելու համար։

▪ Արդյոք այնքա՞ն ես տրվել աշխատանքիդ, որ հոգևոր գործերը մի կողմ են մղվել։

▪ Այն ազդե՞լ է ելույթներիդ որակի վրա։

[նկար 30-րդ էջի վրա]

Եհովան զգուշացրեց Բարուքին, որ փառասեր չլինի