Ժողովի հանդիպումներն օգտակար են երիտասարդների համար

¹ Մի դեռահաս աղջիկ այսպիսի խոսքեր ասաց. «Երբեմն ինձ թվում է, թե երիտասարդությունը կյանքի ամենադժվար շրջանն է։ Ամենուրեք մեզ շրջապատում են մարդիկ, որոնք պոռնկություն են գործում, թմրանյութեր օգտագործում ու հարբեցողությամբ զբաղվում»։ Դո՞ւ էլ ես այդպես մտածում։ Եթե այո, քո կարծիքով, ինչպե՞ս կարելի է պայքարել այդպիսի վատ ազդեցությունների դեմ։ Դրա համար քեզ հավատ է հարկավոր, ամուր հավատ՝ Եհովայի ճանապարհների ճշմարտացիության հանդեպ, քանի որ առանց հավատի «անհնար է հաճելի լինել Աստծուն» (Եբր. 11։6)։ Ժողովի հանդիպումներին հաճախելը կօգնի քեզ ամրապնդել քրիստոնեական համոզմունքներդ ու հաստատակամ լինել, որպեսզի խուսափես սխալ արարք գործելուց։

² Հանդիպումները շատ բաներում են օգտակար։ Ե՞րբ ենք մենք մտերիմ ընկերների հետ ճաշելիս բավականություն ստանում։ Արդյոք դա հանգստավետ մթնոլորտում առողջարար կերակուրի և հաճելի ընկերակցության հետ համատեղումը չէ՞։ Այո՛, մեր հանդիպումները համանման հաճույք են պատճառում, բայց՝ հոգևոր իմաստով։

³ Հանդիպումների ժամանակ քննարկվող նյութերը օգտակար են և տարբեր հարցեր են իրենց մեջ ընդգրկում՝ սկսած ամենօրյա խնդիրներից ու վերջացրած աստվածաշնչային ուշագրավ մարգարեությունների ուսումնասիրություններով։ Հանդիպումներին գործնական հրահանգներ են տրվում, որոնք սովորեցնում են մեզ լավագույնս կենցաղավարել և դիմակայել կյանքի դժվարություններին։ Ժողովում հաճելի ու անվնաս հոգևոր մթնոլորտ է տիրում, և հենց այստեղ կարելի է հիանալի ընկերներ գտնել (Սաղ. 133։1)։ Ահա թե ինչպես արտահայտվեց մի երիտասարդուհի. «Ես ամբողջ օրը դպրոցում եմ անցկացնում, և դա շատ հոգնեցուցիչ է ինձ համար։ Իսկ հանդիպումները նման են անապատում գտնվող օազիսի. այդ ժամանակ ես թարմանում և ուժ եմ հավաքում հաջորդ օրվա համար»։ Իսկ մեկ ուրիշն ասաց. «Ես հասկացա, որ Եհովային սիրողների հետ սերտ ընկերակցությունն օգնում է ինձ մտերիմ փոխհարաբերություններ պահպանել Աստծո հետ»։

⁴ Անդամագրվելով Աստվածապետական ծառայության դպրոցին՝ դու կսովորես սուրբգրային տեղեկություններ փնտրել, դրանցից կազմել ելույթ և խոսակցական ոճով այն ներկայացնել Թագավորության սրահում՝ ունկնդիրների առջև։ Միայն պատկերացրու՝ որքան հաճելի կլինի կիրթ և պատրաստված լինել Աստծո Խոսքի փրկարար ճշմարտությունները հմտորեն սովորեցնելու համար։ Էլ ուրիշ որտե՞ղ կարող են երիտասարդները այսպիսի արժեքավոր ուսուցում ստանալ։

⁵ Ինչպե՞ս լավագույնս օգուտ քաղել հանդիպումներից։ Հանդիպումներից լավագույն կերպով օգուտ քաղելու համար անհրաժեշտ են հետևյալ երեք կարևոր ազդակները՝ նախապատրաստությունը, մասնակցությունը և գործնական կիրառությունը։

⁶ Նախապատրաստվիր հանդիպումներին։ Ժամանակ հատկացրու հանդիպումներին կանոնավորաբար նախապատրաստվելուն։ Թույլ մի տուր, որ դպրոցում ստացած տնային հանձնարարությունները, աշխատանքը կամ ժամանցները խլեն այն ժամանակը, որն անհրաժեշտ է տրամադրել յուրաքանչյուր հանդիպմանը քննարկվելիք նյութը նախօրոք ուսումնասիրելուն։ Դրա համար օգտակար է լավ գրաֆիկ ունենալը։ Նախևառաջ, հետևիր Աստվածապետական ծառայության դպրոցի Աստվածաշնչի շաբաթական ընթերցանության ծրագրին։ Այդ ծրագրում տրված գլուխների ընթերցանության և կարդացածի շուրջ խորհրդածելու համար բավական է օրական ընդամենը մի քանի րոպե տրամադրելը։ Նաև, ժամանակ հատկացրու ժողովի Գրքի ուսումնասիրության և «Դիտարանի» ուսումնասիրության հանդիպումներին նախապատրաստվելուն։ Ոմանք դա անում են այդ հանդիպումներից ամենաքիչը մեկ–​երկու օր առաջ։ Հնարավորության դեպքում ամեն շաբաթ նախապատրաստվիր Ծառայողական հանդիպմանը նմանապես։

⁷ Մասնակցիր հանդիպումներին։ Աստվածաշնչում կարդում ենք Հիսուսի մասին, որը 12 տարեկան հասակում ունկնդրում էր, հարցեր և պատասխաններ էր տալիս տաճարում նստած (Ղուկ. 2։46, 47)։ Այլ խոսքով ասած՝ նա ակտիվորեն մասնակցում էր զրույցին։ Եթե ջանաս մասնակցել հանդիպումներին, ավելի շատ օգուտներ կստանաս (Առակաց 15։23)։

⁸ Նախ՝ անհրաժեշտ է կենտրոնանալ հանդիպումներին շոշափվող նյութերի վրա։ Երբեմն ելույթը լսելն ավելի դժվար է, քան այն ներկայացնելը։ Ինչո՞ւ։ Երբ խոսում է ուրիշը, մեր մտքերը կարող են թափառել։ Իսկ ինչպե՞ս կանխել դա. գրառումներ կատարելով։ Հակիրճ գրի առ այն գլխավոր մտքերը, որոնց շուրջ կցանկանայիր խորհրդածել ավելի ուշ։ Գրառումներն օգնում են մտքերը սևեռել ծրագրի վրա։ Նաև, սուրբգրային համարներ ընթերցվելիս բաց արա Աստվածաշունչը և հետևիր։

⁹ Բացի այդ, նպատակ դիր մասնակցել յուրաքանչյուր հարց ու պատասխանով քննարկմանը։ Ավելի օգտակար կլինի, եթե նախօրոք մտածված մեկնաբանություններ տաս. չէ՞ որ Առակաց 15։28–ում կարդում ենք. «Արդարի սիրտը մտածում է թէ ինչ պատասխանէ»։

¹⁰ Կիրառիր սովորածդ։ Վերջին ազդակը՝ համոզվածությունն է նրանում, որ այն ամենը, ինչ որ սովորել ես, ‘քո մեջ է ներգործում’ (Ա Թեսաղ. 2։13)։ Հանդիպումներից սովորած ճշմարտությունները կիրառելով՝ դու ավելի կմտերմանաս Եհովա Աստծու հետ։ Եթե շարունակես ‘ընթանալ ճշմարտության մեջ’՝ ամրապնդվելով նրանում, Եհովան իրական կլինի քեզ համար, և դու մեծ ուրախություն ու բավարարվածություն կզգաս (Գ Յովհ. 4)։

¹¹ Երիտասարդ եղբայրնե՛ր ու քույրե՛ր, ժողովի հանդիպումներից մեծ բավականություն կստանաք, եթե կանոնավորաբար նախապատրաստվեք, մասնակցեք և գործնականում կիրառեք ձեր սովորածը։ Միևնույն ժամանակ, շատ օգուտներ կքաղեք այդ հանդիպումներից, իսկ ձեր հավատը կզորանա, ինչպես նաև ավելի վճռական կլինեք ձեր երկնային Հայր Եհովային հավատարիմ մնալու մեջ (Սաղ. 145։18)։