Շրջապատի ճնշումը և քարոզելու մեր առանձնաշնորհումը
1 Շրջապատի ճնշումը մեծ ազդեցություն է բանեցնում մարդու վրա կամ լավ, կամ վատ առումով։ Մեր հավատակիցների դրսևորած դրական ազդեցությունը մեզ հորդորում է՝ բարի գործեր կատարելու (Եբր. 10։24)։ Սակայն, մեր հավատը չկիսող ընտանիքի անդամները, աշխատակիցները, համադասարանցիները, հարևանները, կամ ծանոթները կարող են ճնշում գործադրել մեզ վրա, որպեսզի ընթանանք քրիստոնեական սկզբունքներին հակառակ ուղիով։ Նրանք կարող են ‘պախարակել Քրիստոսով եղած մեր բարի վարքը’ (Ա Պետ. 3։16, Արևմտ. Աստ.)։ Ինչպե՞ս կարելի է վճռականություն պահպանել և, հակառակ շրջապատի բացասական ճնշմանը, հարատևել քարոզչության մեջ։
2 Ընտանիքի անդամները։ Երբեմն ամուսինը կամ հայրը, որը Եհովայի վկա չէ, գուցե չցանկանա, որ իր կինը կամ երեխաները մասնակցեն քարոզչությանը։ Այդպիսին էին հանգամանքները Մեքսիկայում բնակվող մի ընտանիքում։ Մի մեքսիկացու կինն ու յոթը երեխաներն ընդունում են ճշմարտությունը։ Սկզբում նա հակառակվում է, քանի որ իրեն դուր չի գալիս, որ իր ընտանիքի անդամները, գնալով տնից տուն, քարոզում են և աստվածաշնչային գրականություն տարածում։ Նա գտնում էր, որ դա անպատվություն էր իրենց ընտանիքի համար։ Կինն ու երեխաներն, այնուամենայնիվ, հաստատակամ են մնում Եհովային ծառայելու իրենց որոշման մեջ և կանոնավորաբար մասնակցում են քարոզչությանը։ Ժամանակի ընթացքում ամուսինը տեսնում է, որ քարոզչությանը մասնակցելու Աստծո պատվերին հնազանդվելը արժեքավոր գործ է, ուստի նա ևս որոշում է Եհովային ծառայել։ Անցնում է 15 տարի, մինչ նա ընդունում է ճշմարտությունը։ Բայց արդյո՞ք նա կդառնար դեպի Եհովան, եթե իր ընտանիքի անդամները հավատարիմ չմնային քարոզչության իրենց առանձնաշնորհմանը (Ղուկ. 1։74; Ա Կորնթ. 7։16)։
3 Աշխատակիցները։ Հնարավոր է, որ աշխատավայրում վկայություն տալու համար գործադրած ջանքերդ ոմանց դուր չգան։ Մի քույր պատմում է, որ երբ գրասենյակում աշխարհի վերջի մասին խոսակցություն էր բացվել, նա առաջարկել էր ընթերցել Մատթէոս 24–րդ գլուխը. ի պատասխան՝ աշխատակիցները ծաղրել էին նրան։ Այդուհանդերձ, մի քանի օր հետո քրոջ հետ աշխատող կանանցից մեկն ասել էր, որ ընթերցել է այդ գլուխը և տպավորվել իր կարդացածից։ Քույրը գրականություն էր առաջարկել նրան և հետագա քայլեր ձեռնարկել նրա և նրա ամուսնու հետ Աստվածաշնչի ուսումնասիրություն սկսելու համար։ Առաջին ուսումնասիրությունը տևել էր մինչև գիշերվա ժամը 2–ը։ Երրորդ անգամից հետո, ամուսինները սկսել էին հաճախել հանդիպումներին, կարճ ժամանակ անց թողել էին ծխախոտի գործածությունը և սկսել էին մասնակցել ծառայությանը։ Արդյոք նման փոփոխություն տեղի կունենա՞ր, եթե քույրը չջանար իր ունեցած հույսը հաղորդել մարդկանց։
4 Համադասարանցիները։ Վկա պատանիների համար անծանոթ չէ դպրոցականների գործադրած ճնշումը և քարոզչության համար նսեմացվելու վախը։ Միացյալ Նահանգներից մի քրիստոնյա պատանուհի ասում է. «Ես վախենում էի քարոզել հասակակիցներիս, քանի որ վախենում էի, որ նրանք ինձ կծաղրեն»։ Ուստի, նա խուսափում էր իր տարիքի երեխաներին վկայություն տալուց դպրոցում կամ տնետուն ծառայության ժամանակ։ Ինչպե՞ս կարող ես խիզախություն ձեռք բերել, որպեսզի դիմակայես հասակակիցներիդ ճնշմանը։ Ապավինիր Եհովային, փնտրիր նրա հավանությունը (Առակ. 29։25)։ Հպարտ եղիր, որ կարող ես Աստծո Խոսքը գործածել ծառայությանդ մեջ (Բ Տիմոթ. 2։15)։ Այդ պատանուհին աղոթքներում սկսում է օգնություն խնդրել Եհովայից, որ իր մեջ համադասարանցիների հետ զրուցելու ցանկություն առաջանա։ Ապա նա փորձում է ոչ պաշտոնական վկայություն տալ դպրոցում, լավ արդյունքների է հասնում և շուտով սկսում զրուցել բոլոր նրանց հետ, ում ճանաչում է։ Նա եզրակացնում է. «Այդ պատանիները ապագայի հույսի մասին լսելու կարիք և ցանկություն ունեն, և Եհովան մեր միջոցով օգնում է նրանց»։
5 Հարևանները։ Հնարավոր է, որ քո հարևաններին կամ ծանոթներին բարկություն պատճառի այն, որ դու Եհովայի վկա ես և որ այդպիսի հավատալիքներ ունես։ Եթե քեզ վախեցնում է նրանց կարծիքը, խորհիր այս հարցերի շուրջ. «Նրանք գիտե՞ն այն ճշմարտության մասին, որը հավիտենական կյանքի է առաջնորդում։ Ի՞նչ կարելի է անել նրանց սրտերին հասնելու համար»։ Մի շրջանային վերակացու նկատեց, որ լավ արդյունքներ է տալիս հարևաններին տված քիչ, բայց հաճախակի վկայությունը։ Սրտանց խնդրիր Եհովայից անհրաժեշտ ուժ և իմաստություն՝ անկեղծ սիրտ ունեցող անհատների փնտրելու համար (Փիլիպ. 4։13)։
6 Եթե մենք տեղի տանք շրջապատի բացասական ճնշումներին, դա դուր կգա հակառակորդներին, բայց արդյոք դա նրանց կամ մեզ օգուտ կտա՞։ Հիսուսը հակառակության էր հանդիպում իր իսկ շրջապատի մարդկանց կողմից։ Նա նույնիսկ իր եղբայրներից սուր դիտողություններ ստացավ։ Բայց նա գիտեր, որ կարող էր օգնել նրանց, եթե միայն ընթանար Աստծո հաստատած ճշմարիտ ուղիով։ Հիսուսը «համբերեց իր հանդէպ մեղաւորների ունեցած հակառակութեանը՝ [«ուղղված իրենց իսկ դեմ», ՆԱ]» (Եբր. 12։2, 3)։ Մենք ևս պետք է նույնպես վարվենք։ Վճռական եղիր, որպեսզի հնարավորություններիդ ներածին չափով օգտվես Թագավորության պատգամը քարոզելու առանձնաշնորհումից։ Այդպես վարվելով՝ «կը փրկես ե՛ւ քեզ, ե՛ւ նրանց, որ լսում են քեզ» (Ա Տիմոթ. 4։16)։