Վկայություն տվեք՝ որպես լավ դրացի

¹ Հիսուսը պատվիրեց ‘սիրել ընկերոջը, ինչպես սեփական անձը’ (Մատթ. 22։39)։ Ինչ խոսք, դուք ‘բարին եք գործում’ ձեր հավատակիցների հանդեպ, բայց կարո՞ղ եք սեր դրսևորել մոտակայքում բնակվող մարդկանց հանդեպ (Գաղ. 6։10)։ Ի՞նչ կերպերով կարելի է դա անել։

² Ձեզ ճանաչեցնելով։ Ձեր հարևանները գիտե՞ն, որ դուք Եհովայի վկա եք։ Եթե ոչ, ապա ինչո՞ւ չայցելել նրանց քարոզչական ծառայության ժամանակ։ Դա կարող է անսպասելի արդյունքներ տալ։ Կամ եթե ձեզ համար ավելի հարմար է, փորձեք քարոզել նրանց՝ ոչ պաշտոնական վկայություն տալով։ Հնարավոր է՝ տանտիրոջը տեսնեք դրսում տնամերձ հողամասում աշխատելիս կամ փողոցում զբոսնելիս։ Այդպիսի դեպքերում ողջունեք նրան՝ ջերմորեն ժպտալով։ Փորձեք պատմել ձեր հավատալիքների մասին, նաև այն մասին, թե ինչ է տեղի ունենում Թագավորության սրահում, և նշեք, թե հարևանությամբ բնակվող մարդկանցից է՛լ ով է հաճախում այդ հանդիպումներին։ Հրավիրեք նրան նույնպես ներկա գտնվել։ Վճռական եղեք, որպեսզի բարի լուրը պատմեք բոլոր նրանց, ում ճանաչում եք (Գործք 10։42; 28։23)։

³ Ձեր օրինակելի վարքով։ Ընկերական վերաբերմունքը շատ բան կարող է ասել ձեր անձի մասին և գուցե առիթ տա քարոզելու։ Այն նաև ‘զարդարում է Աստծո վարդապետությունը’ (Տիտ. 2։7, 10)։ Անկեղծ հետաքրքրություն ցույց տվեք ձեր հարևանների նկատմամբ։ Եղեք բարեկամական և հասկացող։ Հարգեք առանձին մնալու նրանց իրավունքը և աշխատեք չխանգարել նրանց հանգիստը։ Եթե նրանցից որևէ մեկը հիվանդանում է, ուշադիր եղեք և ձեր օգնությունն առաջարկեք։ Երբ նոր ընտանիք է տեղափոխվում՝ ձեր հարևանությամբ բնակվելու, այցելեք այդ ընտանիքին՝ նրանց «բարի գալուստ» ասելու նպատակով։ Այդպիսի բարի գործերը լավ տպավորություն են թողնում մարդկանց վրա և հաճեցնում Եհովային (Եբր. 13։16)։

⁴ Ձեր տունուտեղի արտաքին տեսքով։ Եթե ուզում եք լավ հարևան լինել, պետք է հոգ տանեք ձեր տան մասին, որպեսզի այն միշտ վայելուչ վիճակում լինի։ Մաքուր և կոկիկ տունն ու բակը ինքնին վկայություն տալու միջոցներ են։ Սակայն կեղտոտ տունը և ամենուրեք թափթփված, անպետք իրերը կարող են պատճառ դառնալ Թագավորության բարի լուրը նսեմացնելու։ Այսպիսով՝ շատ կարևոր է տունը, բակը և փոխադրամիջոցները մաքուր և կարգին վիճակում պահելը։

⁵ Քրիստոնեական ժողովից դուրս գտնվող մարդկանց ուշադրություն ցույց տալը նշանակում է՝ սեր դրսևորել դրացու հանդեպ։ Իսկ ինչպիսի՞ արդյունքներ կարող է դա բերել։ Կարող է այնպես պատահել, որ, «տեսնելով ձեր բարի գործերը», նրանցից ոմանք «փառաւորեն Աստծուն» (Ա Պետ. 2։12)։