Մտերմություն զարգացնենք Եհովայի հետ
1 «Մոտավորապես 20 տարի ես պարզապես գոյություն եմ ունեցել ճշմարտության մեջ՝ զուտ հաճախելով հանդիպումներին և մասնակցելով քարոզչական ծառայությանը»,— խոստովանում է քրիստոնյա մի քույր։ Սակայն նա շարունակում է. «Ես եկել եմ այն եզրակացության, որ թեև այդ բաները շատ կարևոր են, սակայն միայն դրանք չեն կարող պաշտպանել ինձ, երբ հանգամանքները գնալով բարդանում են։ ....Այժմ ես գիտակցում եմ, որ պետք է փոխեմ մտածելակերպս և ուսումնասիրության իմաստալից ծրագիր հաստատեմ ինձ համար, որպեսզի կարողանամ իսկապես ճանաչել Եհովային, սիրել նրան ու գնահատել այն ամենը, ինչ որ նրա Որդին արել է մեզ համար»։
2 Եհովայի հետ անձնական, մտերիմ փոխհարաբերություններ զարգացնելը ջանքեր է պահանջում։ Այն պահանջում է ավելին, քան պարզապես քրիստոնեական գործունեության գրաֆիկ ունենալը։ Եթե մենք թերանանք կանոնավորաբար հաղորդակցվել Եհովայի հետ, ժամանակի ընթացքում նա մեզ համար կդառնա մեկը, որը մի ժամանակ մեր ընկերն է եղել, սակայն նրա հետ վաղուց արդեն չենք հաղորդակցվում (Յայտն. 2։4)։ Եկեք քննենք, թե Աստվածաշնչի անձնական ուսումնասիրությունն ու աղոթքը ինչպես կարող են օգնել մեզ մտերմանալ Եհովայի հետ (Սաղ. 25։14)։
3 Աղոթելն ու խորհրդածելը կարևոր են։ Անձնական ուսումնասիրությունը, որ սնում է մեր սիրտը, ավելին է ընդգրկում, քան պարզապես ուսումնասիրվող նյութի մեջ կարևոր մտքերն ընդգծելը և սուրբգրային համարները բաց անելը։ Անձնական ուսումնասիրություն անել նշանակում է՝ խորհրդածել այն բանի շուրջ, թե տվյալ նյութը ինչ է բացահայտում Եհովայի ուղիների, չափանիշների և անձնավորության մասին (Ել. 33։13)։ Հոգևոր բաները հասկանալը ազդում է մեր զգացմունքներին և մղում մեզ խորհել մեր կյանքի մասին (Սաղ. 119։35, 111)։ Անձնական ուսումնասիրություն անելիս մեր նպատակը պետք է լինի Եհովայի հետ մտերմանալը (Յակ. 4։8)։ Լուրջ ուսումնասիրությունը ժամանակ, ինչպես նաև պատշաճ միջավայր է պահանջում, և կանոնավոր ուսումնասիրության համար ինքնահսկում է հարկավոր (Դան. 6։10)։ Նույնիսկ եթե շատ զբաղված կյանքով ես ապրում, ամեն օր ժամանակ հատկացնո՞ւմ ես Եհովայի հրաշալի հատկությունների շուրջ խորհրդածելուն (Սաղ. 119։147, 148; 143։5)։
4 Սրտաբուխ աղոթքը իմաստալից ուսումնասիրության կարևոր մասն է կազմում։ Որպեսզի Աստվածաշնչի ճշմարտությունները ազդեն մեր սրտին և մղեն մեզ երկրպագելու «Աստուծուն, ահով եւ երկիւղածութեամբ», մենք Աստծո սուրբ ոգու կարիքն ունենք (Եբր. 12։28)։ Հետևաբար յուրաքանչյուր ուսումնասիրություն պետք է սկսենք Եհովայից նրա ոգին խնդրելով (Մատթ. 5։3, ՆԱ)։ Երբ խորհրդածում ենք Գրությունների շուրջ և օգտվում ենք Եհովայի կազմակերպության կողմից տրված ուսումնասիրության օժանդակ միջոցներից, մենք մեր սիրտը բաց ենք անում Եհովայի առջև (Սաղ. 62։8)։ Նման կարգով ուսումնասիրություն անցկացնելը երկրպագության մաս է կազմում, որով ցույց ենք տալիս մեր նվիրումը Եհովային և ավելի ենք մտերմանում նրա հետ (Յուդա 20, 21)։
5 Ինչպես ցանկացած փոխհարաբերության դեպքում է, Եհովայի հետ մեր հարաբերությունները ևս պետք է կանոնավորաբար սնուցվեն, որպեսզի շարունակ ամրանան։ Եկեք, ուրեմն, ամեն օր գնենք ժամանակը, որպեսզի մոտենանք Աստծուն, և հիշենք, որ նա էլ իր հերթին կմոտենա մեզ (Սաղ. 1։2, 3; Եփես. 5։15, 16)։
[Հարցեր ուսումնասիրության համար]
1. Ի՞նչ եզրակացության եկավ մի քույր իր հոգևորի հետ կապված գործերի առնչությամբ։
2. Ինչո՞ւ է կարևոր Եհովայի հետ մտերմություն զարգացնելը։
3. Անձնական ուսումնասիրության հանդեպ ինչպիսի՞ վերաբերմունքը կօգնի մեզ մոտենալ Եհովային։
4. Աղոթքով անձնական ուսումնասիրություն սկսելն ինչպե՞ս է օգնում մեզ մտերմություն զարգացնել Եհովայի հետ։
5. Ինչո՞ւ է մեզ համար կարևոր ամեն օր խորհրդածել Աստծո Խոսքի շուրջ։