Օգնիր երեխաներիդ քարոզիչ դառնալու
1. Սաղմոս 148։12, 13 համարները ի՞նչ են հորդորում անել ծնողներին։
1 Եհովան հրավիրում է երեխաներին փառաբանելու իրեն (Սաղ. 148։12, 13)։ Հետևաբար քրիստոնյա ծնողները ավելին են անում, քան պարզապես աստվածաշնչյան ճշմարտություններն ու Աստծու բարոյական չափանիշները իրենց երեխաներին սովորեցնելը։ Նրանք նաև սովորեցնում են լինել բարի լուրի արդյունավետ քարոզիչներ։ Իսկ ինչպե՞ս կարող են ծնողները այդ հարցում հաջողության հասնել։
2. Ինչպե՞ս կարող է ծնողի լավ օրինակը ազդել իր երեխաների վրա։
2 Լավ օրինակ։ Գեդեոն դատավորը իր 300 մարդկանց ասաց. «Նայե՛ք, թե ես ինչ եմ անում» (Դատ. 7։17)։ Բնական է, որ երեխաները նայում և ընդօրինակում են իրենց ծնողներին։ Մի հայր գիշերային աշխատանք է կատարում, և երբ շաբաթ առավոտյան տուն է վերադառնում, քնելու փոխարեն՝ իր երեխաների հետ ծառայության է գնում՝ չնայած հոգնածությանը։ Այդպիսով նա առանց խոսքերի սովորեցնում է իր երեխաներին, որ ծառայությանը պետք է առաջնահերթություն տալ (Մատթ. 6։33)։ Իսկ քո երեխաները տեսնո՞ւմ են, թե ինչպես ես ուրախությամբ մասնակցում հոգևոր տարբեր գործերի, ինչպիսիք են աղոթքը, Աստվածաշնչի ընթերցանությունը, ժողովի հանդիպումներին մեկնաբանություն տալը և քարոզելը։ Ինչ խոսք, դու չես կարող կատարյալ օրինակ լինել։ Բայց երեխաներդ ավելի շատ հակված կլինեն հետևելու քո տված հոգևոր կրթությանը, եթե տեսնեն, թե ինչ եռանդով ես ծառայում Աստծուն (2 Օրենք 6։6, 7; Հռոմ. 2։21, 22)։
3. Որո՞նք են այն հասանելի հոգևոր նպատակները, որ ծնողները պետք է օգնեն երեխաներին դնելու և հասնելու։
3 Հասանելի նպատակներ։ Ծնողները մեծ ջանքեր են թափում, որպեսզի իրենց փոքրիկներին սովորեցնեն քայլել, խոսել, ինքնուրույն հագնվել և այլն։ Տարիների ընթացքում նոր նպատակներ են առաջ գալիս։ Քրիստոնյա ծնողները նաև օգնում են, որ երեխաները իրենց տարիքի և կարողությունների համապատասխան հոգևոր նպատակներ դնեն և հասնեն դրանց (1 Կորնթ. 9։26)։ Իսկ դու սովորեցնո՞ւմ ես երեխաներիդ իրենց բառերով մեկնաբանություններ տալ և ինքնուրույն պատրաստել Աստվածապետական ծառայության դպրոցում ստացած առաջադրանքները (Սաղ. 35։18)։ Մղո՞ւմ ես նրանց մասնակցելու ծառայության տարբեր ձևերին։ Օգնո՞ւմ ես, որ նպատակ դնեն մկրտվելու և լիաժամ ծառայություն սկսելու։ Առիթներ ստեղծո՞ւմ ես, որ շփվեն կենսուրախ ու եռանդուն քարոզիչների հետ, ովքեր քաջալերանքի աղբյուր կլինեն նրանց համար (Առակ. 13։20)։
4. Ի՞նչ օգուտներ են քաղում այն երեխաները, որոնց ծնողները վաղ հասակից են օգնում նրանց հմտանալու ծառայության մեջ։
4 Սաղմոսերգուն ասաց. «Ո՛վ Աստված, դու սովորեցրել ես ինձ դեռևս իմ մանկությունից. մինչև հիմա ես քո զարմանահրաշ գործերի մասին եմ պատմում» (Սաղ. 71։17)։ Վաղ հասակից սկսիր կրթել երեխաներիդ, որ հետո դառնան քարոզիչ։ Եթե օգնես նրանց հոգևոր հիմք դնելու այսօր, նրանք, անկասկած, օգուտներ կստանան նաև չափահաս տարիքում (Առակ. 22։6)։