«Մեր կյանքը և ծառայությունը» հանդիպման ձեռնարկի հղումներ

Ապրիլի 2–8

ԳԱՆՁԵՐ ԱՍՏԾՈՒ ԽՈՍՔԻՑ | ՄԱՏԹԵՈՍ 26

«Պասեք և Հիշատակի երեկո. նմանություններն ու տարբերությունները»։

nwtsty Մթ 26։18-ի մուլտիմեդիան

Պասեքի ընթրիքը

Պասեքի ընթրիքի կարևոր բաղադրիչներից էին խորոված գառը (կենդանու ոչ մի ոսկորը չպետք է կոտրվեր) (1); անթթխմոր հացը (2); և դառը խոտերը (3) (Ելք 12։5, 8; Թվ 9։11)։ Դառը խոտերը, որոնք, համաձայն Միշնայի, թերևս եղել են կաթնուկը (մառոլ), եղերդակը, կոտեմը, աղցանային ճարճատուկը և խատուտիկը, ըստ ամենայնի, իսրայելացիներին հիշեցնում էին իրենց ստրկական դառը կյանքը Եգիպտոսում։ Հիսուսը անթթխմոր հացը գործածեց որպես իր կատարյալ մարդկային մարմնի խորհրդանիշ (Մթ 26։26)։ Իսկ Պողոս առաքյալը Հիսուսին անվանեց «մեր Պասեքի գառ» (1Կթ 5։7)։ Առաջին դարում արդեն Պասեքի ընթրիքի ժամանակ մատուցվում էր նաև գինի (4)։ Հիսուսը գինին գործածեց որպես իր արյան խորհրդանիշ, իր արյան, որը թափվելու էր որպես զոհաբերություն (Մթ 26։27, 28)։

nwtsty Մթ 26։26-ի լրացուցիչ տեղեկությունը

խորհրդանշում է. հունարեն էստին բառն է (բռց.՝ «է»), որն այստեղ նշանակում է՝ «խորհրդանշել, նշանակել, այսինչ իմաստն արտահայտել, ներկայացնել»։ Առաքյալները հենց այս իմաստով էլ հասկանում էին այդ բառը։ Տվյալ դեպքում անթթխմոր հացը, որ նրանք պատրաստվում էին ուտել, ինչպես նաև Հիսուսի կատարյալ մարմինը իրենց աչքի առաջ էին։ Ուստի այդ հացը չէր կարող բառացիորեն լինել նրա մարմինը։ Ուշագրավ է, որ հունարեն նույն բառն է գործածված Մթ 12։7-ում, և Աստվածաշնչի բազմաթիվ թարգմանություններում այդ բառը թարգմանված է՝ «նշանակում է»։

nwtsty Մթ 26։28-ի լրացուցիչ տեղեկությունը

արյունը ուխտի. նոր ուխտը, որը կապվեց Եհովայի և օծյալ քրիստոնյաների միջև, ուժի մեջ մտավ Հիսուսի զոհի միջոցով (Եբ 8։10)։ Այստեղ Հիսուսն օգտագործում է այն նույն արտահայտությունը, որը Մովսեսը օգտագործեց, երբ հանդես եկավ որպես միջնորդ և Սինա լեռան վրա Իսրայելի հետ կապեց Օրենքի ուխտը (Ելք 24։8; Եբ 9։19–21)։ Ինչպես որ ցլերի և այծերի արյունը վավերացրեց Աստծու և Իսրայել ազգի միջև կապված Օրենքի ուխտը, այնպես էլ Հիսուսի արյունը վավերացրեց նոր ուխտը, որը Եհովան կապելու էր հոգևոր Իսրայելի հետ։ Այդ ուխտը ուժի մեջ մտավ մ. թ. 33 թ. Պենտեկոստեին (Եբ 9։14, 15)։

Փնտրենք հոգևոր գանձեր

nwtsty Մթ 26։17-ի լրացուցիչ տեղեկությունը

Անթթխմոր հացերի տոնի առաջին օրը. Անթթխմոր հացերի տոնը սկսվում էր նիսանի 15-ին՝ Պասեքից (նիսանի 14) մեկ օր հետո, և տևում էր յոթ օր (տես sgd, մաս 19)։ Սակայն Հիսուսի օրերում Պասեքը այնքան սերտորեն էր կապված այս տոնին, որ բոլոր ութ օրերը, ներառյալ նիսանի 14-ը, երբեմն կոչում էին «Անթթխմոր հացերի տոն» (Ղկ 22։1)։ Այս համատեքստում «առաջին օրը» արտահայտությունը կարելի է թարգմանել «նախորդ օրը» (հմմտ. Հվ 1։15, 30-ի հետ, որտեղ նույն հունարեն պրոտոս բառը, որը թարգմանվում է «առաջին», նմանատիպ կառույցում թարգմանվել է «առաջ»՝ «նա ինձանից առաջ [պրոտոս] գոյություն ուներ»)։ Ուստի հաշվի առնելով բնագրային հունարենը, ինչպես նաև հրեաների սովորույթը՝ կարելի է եզրակացնել, որ աշակերտները հնարավոր է Հիսուսին տված լինեին այդ հարցը նիսանի 13-ին։ Նիսանի 13-ի ցերեկը աշակերտները Պասեքի պատրաստությունները տեսան, որը նշեցին ավելի ուշ՝ «երբ երեկոն իջավ», այսինքն՝ նիսանի 14-ի սկզբին (Մկ 14։16, 17)։

nwtsty Մթ 26։39-ի լրացուցիչ տեղեկությունը

թող այս բաժակն անցնի. Աստվածաշնչում «բաժակ» բառը հաճախ փոխաբերական իմաստով է գործածվում ցույց տալու համար մարդու հետ կապված Աստծու կամքը, կամ՝ Աստծու կողմից նրա համար նշանակված բաժինը (տես Մթ 20։22-ի լրացուցիչ տեղեկությունը)։ Հիսուսին, անկասկած, շատ էր մտահոգում այն, որ եթե իրեն մահապատժի ենթարկեն որպես Աստծուն հայհոյողի և խռովություն հրահրողի, դա նախատինք կբերի Աստծուն։ Դա էր պատճառը, որ նա աղոթում էր, որ այդ «բաժակն» անցնի իրենից։

Ապրիլի 9–15

ԳԱՆՁԵՐ ԱՍՏԾՈՒ ԽՈՍՔԻՑ | ՄԱՏԹԵՈՍ 27, 28

«Գնացեք և աշակերտներ պատրաստեք. ինչո՞ւ, որտե՞ղ և ինչպե՞ս»

nwtsty Մթ 28։19-ի լրացուցիչ տեղեկությունները

աշակերտներ պատրաստեք. հունարեն մաթետեուո բայը կարող է թարգմանվել «սովորեցնել»՝ աշակերտ դարձնելու նպատակով (հմմտ. Մթ 13։52-ի հետ, որտեղ այս բառը թարգմանվել է «կրթություն ստացած»)։ «Մկրտելով» և «սովորեցնելով» բայերը ցույց են տալիս, թե ինչ է ներառում «աշակերտներ պատրաստելու» պատվերը։

բոլոր ազգերի մեջ. սա բառացի թարգմանությունն է, սակայն համատեքստը ցույց է տալիս, որ խոսքը բոլոր ազգերից առանձին անհատների մասին է։ Բանն այն է, որ նրանց մկրտելով արտահայտության մեջ «նրանց» դերանունը հունարենում արական սեռով է դրված և չի կարող վերաբերել «ազգերին», քանի որ «ազգերին» բառը չեզոք սեռի է։ Հետևաբար «նրանց» դերանունը վերաբերում է առանձին մարդկանց։ «Բոլոր ազգերի մեջ» քարոզելու այս պատվերը նոր էր։ Աստվածաշունչը ցույց է տալիս, որ Հիսուսի ծառայությունից առաջ ոչ հրեաներին ընդունում էին Իսրայելում, եթե նրանք գալիս էին Եհովային ծառայելու (1Թգ 8։41–43)։ Սակայն այս պատվերը տալով՝ Հիսուսն իր աշակերտներին հանձնարարեց քարոզչությունը ծավալել ոչ միայն հրեաների, այլև ուրիշ ժողովուրդների մեջ և այդպիսով ընդգծեց, որ քրիստոնյաներին հանձնարարված աշակերտներ պատրաստելու գործը ծավալվելու էր աշխարհով մեկ (Մթ 10։1, 5–7; Հտն 7։9; տես Մթ 24։14-ի լրացուցիչ տեղեկությունը)։

nwtsty Մթ 28։20-ի լրացուցիչ տեղեկությունը

սովորեցնելով նրանց. «սովորեցնել» թարգմանված հունարեն բառը ներառում է հետևյալ իմաստները՝ ուսուցանել, բացատրել, տրամաբանական փաստարկներ բերել և ապացույցներ ներկայացնել (տես Մթ 3։1 և 4։23-ի լրացուցիչ տեղեկությունները)։ Քրիստոնյաները պետք է սովորեցնեին մարդկանց պահել այն ամենը, ինչ Հիսուսն էր պատվիրել։ Դա շարունակական պրոցես էր լինելու, որն իր մեջ ներառելու էր ուսուցանել մարդկանց այն, ինչ Հիսուսն էր սովորեցրել, օգնել նրանց կիրառելու այդ ամենը և հետևելու նրա օրինակին (Հվ 13։17; Եփ 4։21; 1Պտ 2։21)։

Փնտրենք հոգևոր գանձեր

nwtsty Մթ 27։51-ի լրացուցիչ տեղեկությունները

վարագույրը. այս գեղեցիկ նախշազարդ վարագույրը տաճարի Սրբությունների Սրբությունը բաժանում էր Սրբությունից։ Ըստ հրեական ավանդության՝ այս ծանր վարագույրի երկարությունը մոտ 18 մ (60 ֆտ) էր, լայնությունը՝ 9 մ (30 ֆտ), իսկ հաստությունը՝ 7,4 սմ (2,9 դյմ)։ Վարագույրը պատռելով և այն երկու մասի բաժանելով՝ Եհովան ոչ միայն իր զայրույթն արտահայտեց իր Որդուն սպանողների հանդեպ, այլև ցույց տվեց, որ այժմ երկինք մտնելու ճանապարհը բաց է (Եբ 10։19, 20; տես բառարանը)։

սրբարանի. հունարեն նաոս բառը այստեղ վերաբերում է կենտրոնական շինությանը՝ Սրբությունների Սրբություն և Սրբություն բաժանմունքներով հանդերձ։

nwtsty Մթ 28։7-ի լրացուցիչ տեղեկությունը

ասեք նրա աշակերտներին, որ նա հարություն է առել. այս կանայք աշակերտներից առաջինն էին, ում ասվեց Հիսուսի հարության մասին։ Նրանց նաև պատվեր տրվեց այդ մասին տեղեկացնել մյուս աշակերտներին (Մթ 28։2, 5, 7)։ Ըստ սուրբգրային հիմք չունեցող հրեական ավանդության՝ կանանց չէր թույլատրվում վկայություն տալ դատարանում։ Ի տարբերություն դրա՝ Եհովայի հրեշտակը պատվի արժանացրեց կանանց՝ նրանց տալով ուրախություն պատճառող այս հանձնարարությունը։

Ապրիլի 16–22

ԳԱՆՁԵՐ ԱՍՏԾՈՒ ԽՈՍՔԻՑ | ՄԱՐԿՈՍ 1, 2

«Քո մեղքերը ներված են»

nwtsty Մկ 2։9-ի լրացուցիչ տեղեկությունը

Ո՞րն է ավելի հեշտ. ինչ-որ մեկի համար շատ հեշտ կլիներ պարզապես ասել, թե կարող է մեղքեր ներել, քանի որ ոչ մի տեսանելի ապացույցի կարիք չէր լինի այդ պնդումը հիմնավորելու համար։ Բայց քանի որ Հիսուսն ասաց՝ վեր կաց.... ու քայլիր, անհրաժեշտ էր, որ հրաշք տեղի ունենար, որպեսզի բոլորը հստակ տեսնեին, որ Հիսուսը մեղքեր ներելու իշխանություն ունի։ Այս արձանագրությունը, ինչպեսև Ես 33։24-ը ցույց են տալիս, որ հիվանդությունները մեր մեղավոր լինելու հետևանքն են։

Փնտրենք հոգևոր գանձեր

nwtsty Մկ 1։11-ի լրացուցիչ տեղեկությունները

մի ձայն լսվեց երկնքից. սա առաջինն է Ավետարաններում հիշատակվող այն երեք դեպքերից, երբ նշվում է, որ Եհովան ուղղակիորեն խոսել է մարդկանց հետ (տես Մկ 9։7-ի և Հվ 12։28-ի լրացուցիչ տեղեկությունները)։

Դո՛ւ ես իմ սիրելի Որդին. Հիսուսը Աստծու Որդին էր, երբ ոգեղեն արարած էր (Հվ 3։16)։ Որպես մարդ ծնվելուց հետո էլ Հիսուսը «Աստծու Որդի» էր, ճիշտ ինչպես որ կատարյալ մարդ Ադամը (Ղկ 1։35; 3։38)։ Սակայն տրամաբանական է մտածել, որ այդ խոսքերով Աստված չէր ուզում պարզապես ասել, թե ով է Հիսուսը։ Այդ հայտարարությունն անելով և Հիսուսի վրա սուրբ ոգին թափելով՝ Աստված, ըստ ամենայնի, ցույց տվեց, որ այդ պահին Հիսուսը, մարդ լինելով հանդերձ, ծնվեց որպես իր հոգևոր Որդի։ Նա, այսպես ասած, «դարձյալ ծնվեց»՝ ձեռք բերելով կրկին երկնային կյանք ստանալու հույս, և օծվեց ոգով, որ դառնա Աստծու կողմից նշանակված Թագավոր և Քահանայապետ (հմմտ. Հվ 3։3–6; 6։51; Ղկ 1։31–33; Եբ 2։17; 5։1, 4–10; 7։1–3)։

Ես քեզ հավանել եմ. կամ՝ «ես գոհ եմ քեզնից, ուրախանում եմ քեզնով»։ Այս նույն արտահայտությունն է օգտագործվում Մթ 12։18-ում։ Այստեղ ուղղակիորեն մեջբերվում է Ես 42։1 համարը, որը վերաբերում է խոստացված Մեսիային, կամ՝ Քրիստոսին։ Այն, որ Աստված սուրբ ոգին թափեց Հիսուսի վրա և ասաց այդպիսի խոսքեր իր Որդու մասին, հստակ ցույց էին տալիս, որ Հիսուսն է խոստացված Մեսիան (տես Մթ 3։17-ի և 12։18-ի լրացուցիչ տեղեկությունները)։

nwtsty Մկ 2։28-ի լրացուցիչ տեղեկությունը

շաբաթի Տերն է. Հիսուսը այս արտահայտությունը կիրառեց իր առնչությամբ (Մթ 12։8; Ղկ 6։5)՝ ցույց տալով, որ Շաբաթն իր տրամադրության տակ է իր երկնային Հոր հանձնարարած գործն անելու համար (հմմտ. Հվ 5։19; 10։37, 38)։ Հիսուսը Շաբաթ օրն է արել իր ուշագրավ հրաշքներից մի քանիսը, այդ թվում հիվանդներին բուժելը (Ղկ 13։10–13; Հվ 5։5–9; 9։1–14)։ Ըստ ամենայնի, դա նախապատկերն էր այն բանի, թե Հիսուսը ինչպիսի թեթևացում կբերի, երբ որպես Թագավոր ղեկավարի երկիրը. դա շաբաթ օրվա պես հանգստի ժամանակ կլինի (Եբ 10։1)։

Ապրիլի 23–29

ԳԱՆՁԵՐ ԱՍՏԾՈՒ ԽՈՍՔԻՑ | ՄԱՐԿՈՍ 3, 4

«Շաբաթ օրը բուժում անելը»

nwtsty Մկ 3։5-ի լրացուցիչ տեղեկությունը

բարկացած նայելով՝ խորապես տրտմեց. միայն Մարկոսն է արձանագրել, թե այդ ժամանակ ինչպես է արձագանքել Հիսուսը՝ տեսնելով կրոնական առաջնորդների սրտերի անզգայությունը (Մթ 12։13; Ղկ 6։10)։ Հիսուսի ապրումների մասին այդպիսի մանրամասներ հավանաբար Պետրոսն էր պատմել, ով ինքն էլ ջերմ ու խոր զգացմունքների տեր անձնավորություն էր (տես ««Մարկոս» գրքի ներածություն» տեսանյութը)։

Փնտրենք հոգևոր գանձեր

nwtsty Մկ 3։29-ի լրացուցիչ տեղեկությունները

սուրբ ոգու դեմ է հայհոյում. հայհոյել թարգմանված հունարեն բլասֆեմիա բառը վերաբերում է Աստծու կամ սուրբ բաների դեմ ուղղված վարկաբեկիչ, վիրավորական, կամ անարգական խոսքերին։ Աստված ինքն է սուրբ ոգու աղբյուրը, ուստի երբ մարդ գիտակցաբար դրժում է, որ սուրբ ոգին գործում է, դա հավասարազոր է Աստծու դեմ հայհոյելուն։ Ինչպես երևում է Մթ 12։24, 28 և Մկ 3։22 համարներից, հրեա կրոնական առաջնորդները տեսնում էին, թե ինչպես է Աստծու ոգին գործում Հիսուսի միջոցով, երբ վերջինս հրաշքներ էր անում, սակայն այդ զորությունը վերագրում էին Սատանային։

հանցավոր է հավիտենական մեղքով. ըստ երևույթին, վերաբերում է դիտավորյալ գործված մեղքին, որը մշտնջենական հետևանք է ունենում, այսինքն՝ մահ, որից հարություն չկա։ Ոչ մի զոհ չի կարող քավել նման մեղքը (տես այս համարի՝ սուրբ ոգու դեմ է հայհոյում արտահայտության մասին լրացուցիչ տեղեկությունը և զուգահեռ արձանագրության՝ Մթ 12։31-ի լրացուցիչ տեղեկությունը)։

nwtsty Մկ 4:9-ի լրացուցիչ տեղեկությունը

Ով լսելու ականջ ունի, թող լսի. սերմնացանի մասին առակը պատմելուց առաջ Հիսուսն ասաց. «Լսեցե՛ք» (Մկ 4:3)։ Նա եզրափակեց առակը՝ տալով այս հորդորը, ինչով էլ ընդգծեց, թե որքան կարևոր է, որ իր հետևորդները լուրջ ուշադրություն դարձնեն իր խորհուրդներին։ Նմանատիպ հորդորներ կարելի է գտնել նաև հետևյալ համարներում՝ Մթ 11:15; 13:9, 43; Մկ 4:23; Ղկ 8:8; 14:35; Հտն 2:7, 11, 17, 29; 3:6, 13, 22; 13:9։

Ապրիլի 30–մայիսի 6

ԳԱՆՁԵՐ ԱՍՏԾՈՒ ԽՈՍՔԻՑ | ՄԱՐԿՈՍ 5, 6

«Հիսուսը ի զորու է հարություն տալու մեր մահացած հարազատներին»

nwtsty Մկ 5։39-ի լրացուցիչ տեղեկությունը

չի մահացել, այլ քնած է. Աստվածաշնչում մահը հաճախ նմանեցվում է քնի (Սղ 13։3; Հվ 11։11–14; Գրծ 7։60; 1Կթ 7։39; 15։51; 1Թղ 4։13)։ Հիսուսը պատրաստվում էր աղջկան վերակենդանացնել։ Նա թերևս այսպես ասաց, քանի որ պատրաստվում էր հստակ ցույց տալ, որ ճիշտ ինչպես հնարավոր է քնած մարդուն արթնացնել խոր քնից, այդպես էլ հնարավոր է կյանքի բերել մահացածներին։ Աղջկան հարություն տալու համար անհրաժեշտ զորությունը Հիսուսը ստացել էր իր Հորից, ով «կենդանացնում է մահացածներին և գոյություն չունեցող բաներին կանչում է այնպես, ասես գոյություն ունեն» (Հռ 4։17)։

Փնտրենք հոգևոր գանձեր

nwtsty Մկ 5։19-ի լրացուցիչ տեղեկությունը

պատմիր նրանց. սովորաբար Հիսուսը պատվիրում էր, որ իր հրաշքների մասին չպատմեն (Մկ 1։44; 3։12; 7։36), սակայն այս մարդուն պատվիրեց, որ տեղի ունեցածի մասին պատմի իր ազգականներին։ Պատճառը թերևս այն էր, որ Հիսուսին խնդրել էին հեռանալ այդ տարածքից, և նա անձամբ չէր կարողանալու վկայություն տալ նրանց։ Բացի դրանից՝ այդ մարդու տված վկայությունը կարող էր վերջ դնել ցանկացած բացասական խոսակցության, որ գուցե լիներ խոզերի կորստի պատճառով։

nwtsty Մկ 6։11-ի լրացուցիչ տեղեկությունը

թափ տվեք ձեր ոտքերի տակի հողը. այս ժեստը անելով՝ առաքյալները ցույց էին տալու, որ պատասխանատվություն չեն կրում մարդկանց արձագանքի համար, և որ դատաստանը թողնում են Աստծուն։ Նմանատիպ արտահայտություն հանդիպում է Մթ 10։14 և Ղկ 9։5 համարներում։ Մարկոսն ու Ղուկասը իրենց արձանագրության մեջ գործածել են նաև նրանց [կամ՝ նրանց դեմ] վկայություն լինելու համար արտահայտությունը։ Պողոսն ու Բառնաբասը Պիսիդիայի Անտիոքում վարվեցին այս պատվերի համաձայն (Գրծ 13։51)։ Իսկ Կորնթոսում Պողոսը նմանատիպ ժեստ արեց. նա թափ տվեց իր հանդերձները՝ ասելով հետևյալ խոսքերը. «Ձեր արյունը ձեր գլխին լինի։ Ես մաքուր եմ» (Գրծ 18։6)։ Հավանաբար, նման ժեստերն արդեն իսկ ծանոթ էին աշակերտներին. բանն այն է, որ կրոնասեր հրեաները այլազգիների տարածքով անցնելուց հետո կրկին հրեական տարածք մտնելիս իրենց սանդալների վրայից թափ էին տալիս նրանց երկրի հողը, որն անմաքուր էին համարում։ Սակայն Հիսուսը, ըստ ամենայնի, սա նկատի չուներ, երբ իր աշակերտներին տվեց վերոհիշյալ պատվերը։