Հույժ կարևոր մարգարեություն

«Թագավորության այս բարի լուրը կքարոզվի ամբողջ երկրով մեկ՝ բոլոր ազգերին վկայություն լինելու համար, և այդ ժամանակ կգա վերջը» (ՄԱՏԹԵՈՍ 24։14)։

ԳԻՏՆԱԿԱՆՆԵՐԸ համաձայն են, որ վերը նշված խոսքերը անչափ կարևոր են։ Ինչո՞ւ։ Կարևոր են, քանի որ այս համարում նկարագրվող աշխատանքը պետք է կատարվի գլոբալ մասշտաբով։ Կարևոր են, քանի որ ընդգծում են, թե ինչով պետք է զբաղված լինեն քրիստոնյաները. քարոզչական մի գործով, որը պետք է նախորդեր այն վճռորոշ և համաշխարհային իրադարձությանը, որի մասին նրանք պետք է ազդարարեին։ Հիսուսը այն կոչեց «վերջը»։

Մարգարեական այս խոսքերն իրենց կատարումն են ունենում այսօր։ Դրանք վերաբերում են նաև ձեզ, քանի որ բարի լուրը թե՛ հրավեր է, թե՛ նախազգուշացում։ Այն ընտրության հնարավորություն է տալիս՝ կա՛մ ընդունել Աստծու Թագավորությունը, կա՛մ մերժել այն։ Սակայն ձեր ընտրությունից կախված է ձեր կյանքը։

Նկատի առնենք վերոհիշյալ համարի համատեքստը։ Հիսուսի՝ ցցին գամվելուց մի քանի օր առաջ աշակերտները մոտեցան նրան և հարցրին ապագայի մասին։ Նրանց հետաքրքրում էր, թե երբ է հաստատվելու Աստծու Թագավորությունը, որի մասին Հիսուսը շատ հաճախ էր խոսում։ Նրանք նաև ուզում էին իմանալ, թե որն է լինելու «աշխարհի վախճանի նշանը» կամ ինչպես որոշ թարգմանություններում է գրված՝ «աշխարհի վերջը» (Մատթեոս 24։3, American Standard Version, King James Version)։

Ի պատասխան՝ Հիսուսը կանխագուշակեց, որ լինելու են մեծամասշտաբ պատերազմներ, սովեր, համաճարակներ և մեծ երկրաշարժեր։ Նա նաև ասաց, որ անօրենությունը կշատանա, կեղծ կրոնական ուսուցիչները կմոլորեցնեն շատերին, իսկ ճշմարիտ քրիստոնյաները ատված ու հալածված կլինեն։ Ինչ խոսք, այս բոլորը վատ լուրեր էին (Մատթեոս 24։4–13; Ղուկաս 21։11)։

Սակայն կար նաև բարի լուր։ Հիսուսի հաջորդ խոսքերը, որոնք մեջբերված են վերևում, դարեր շարունակ մտածելու տեղիք են տվել մարդկանց, լցրել են նրանց հույսով և մղել գործերի։ Թեև մարդիկ համաձայն են, որ Հիսուսի խոսքերը կարևոր են, բայց չեն հասկանում այդ խոսքերի իմաստը։ Ի՞նչ է իրականում բարի լուրը։ Ի՞նչ է Թագավորությունը։ Ե՞րբ է կատարվելու այս մարգարեությունը և ո՞ւմ միջոցով։ Ի՞նչ է «վերջը»։ Եկեք տեսնենք։

[նկար 2-րդ և 3–րդ էջերի վրա]

ՎԱՇԻՆԳՏՈՆԻ ՁԵՌԱԳՐԻ ՉՈՐՍ ԱՎԵՏԱՐԱՆՆԵՐԻ ՖԱՔՍԻՄԻԼԵՆ։ ՄԱՏԹԵՈՍ 24։14-Ն ԸՆԴԳԾՎԱԾ Է

[թույլտվությամբ]

From the book Facsimile of the Washington Manuscript of the Four Gospels in the Freer Collection 1912