ՍԱՂՄՈՍ

126 Երբ Տէրը Սիօնին գերութիւնը դարձուց,

Երազ տեսնողներու* պէս եղանք։

 2 Այն ժամանակ մեր բերանը խնդութիւնով լեցուեցաւ

Ու մեր լեզուն՝ ցնծութիւնով։

Այն ժամանակ հեթանոսներուն մէջ ըսին.

«Տէրը մեզի համար մեծ բաներ ըրաւ»։

 3 Տէրը մեզի համար մեծ բաներ ըրաւ

Ու մենք ուրախացանք։

 4 Ո՛վ Տէր, դարձուր մեր գերութիւնը

Հարաւի առուներուն պէս։

 5 Անոնք որ արցունքով կը ցանեն,

Ցնծութիւնով պիտի հնձեն։

 6 Ան որ լալով կ’երթայ,

Ցանելու սերմը տանելով,

Անշուշտ ցնծութեամբ ետ պիտի դառնայ,

Իր ցորենի խուրձերը բերելով։