Ճշմարտութիւնը փնտռողները կ’ընդառաջեն անպաշտօն վկայութեան

ԱՍՏՈՒԱԾԱՇՈՒՆՉԸ մեզի կը տեղեկացնէ թէ ոչխարանման անհատներ պիտի ընդառաջեն Բարի Հովիւի ձայնին։ (Յովհաննու 10։27) Պարագան այս եղած է շատ մը երկիրներու մէջ՝ մէջը ըլլալով՝ Բրիտանիան։

◻ Օրինակի համար, 1988–ին, Ծնունդէն առաջ, Փամելան՝ Եհովայի Վկայ մը՝ իր աշխատած գրասենեակին մէջ հեռաձայնի մը պատասխանեց եւ Անգլիոյ ուրիշ մասին մէջ նոյն ընկերութեան համար աշխատող վաճառորդի մը հետ խօսեցաւ։ Խօսակցութեան վերջաւորութեան, մարդը հարցուց. «Ծնունդին համար պատրա՞ստ էք»։ Փամելան ըսաւ. «Ո՛չ»։ «Ուշ չէ՞ք մնացած», հարցուց հեռաձայնողը։ «Ես Ծնունդ չեմ տօներ», պատասխանեց Փամելան։ Մարդը զարմացաւ եւ պատճառը հարցուց։ Փամելան ըսաւ որ ինք Եհովայի Վկայ մըն էր եւ սկսաւ բացատրել թէ Աստուածաշունչին մէջ պատուիրուած չէր Յիսուսի Ծննդեան տարեդարձը տօնել եւ թէ անկէ զատ, Յիսուս Դեկտեմբեր 25–ին ծնած չէր։ Մանաւանդ որ Ծնունդը հեթանոսական տօն մըն էր։ Հեռաձայնողը ըսաւ որ այս բոլորը շատ հետաքրքրական էին։

Երեք ամիս ետք, Փամելան դարձեալ հեռաձայնին պատասխանեց եւ հեռաձայնողը ըսաւ. «Կը յիշէ՞ք որ Ծնունդէն առաջ ինծի հետ խօսեցաք եւ ըսիք որ դուք Ծնունդ չէք տօներ։ Այո, ճշմարտութիւնը գտայ»։ Նոյն անհատն էր. ան բացատրեց որ Ծնունդէն երկու շաբաթ ետք, երկու Վկաներ իրեն այցելած էին։ Ան ներս հրամցուցած էր զանոնք եւ Աստուածաշունչի ուսումնասիրութիւն մը սկսած էր։ Ան պատմեց որ շատ արագ կերպով յառաջդիմած էր իր ուսումնասիրութեան մէջ։ Իրեն հետ կենակցած ընկերուհիին ըսած էր թէ իրենց ապրելակերպը հաճելի չէր Եհովայի, ուստի իրարմէ բաժնուած էին, իսկ հիմա երկուքն ալ ժողովներու կը յաճախէին Թագաւորութեան Սրահին մէջ։

Տարուան վերջաւորութեան, անոնք որպէս չմըկրտուած հրատարակիչներ ընդունուեցան եւ 1990–ի սկիզբը, ամուսնացան։ Ապա երկուքն ալ մկրտուեցան։ Հեռաձայնով հակիրճ անպաշտօն վկայութեան հոյակապ արդիւնք մը։

◻ Եհովա Անգլիոյ մէջ անպաշտօն վկայութիւն տուող ուրիշ քրոջ մըն ալ օրհնեց։ Երբ ապահովագրութեան պաշտօնեայ մը իր դուռը զարկաւ, քոյրը հարցուց անոր թէ կ’ուզէ՞ր ապահովագրուիլ լաւ առողջութեան, ուրախութեան եւ յաւիտենական կեանքի համար։ Մարդը այո պատասխանեց եւ հարցուց թէ ո՞ր ապահովագրութեան պայմաններուն մասին կը խօսէր։ Երբ իրեն ցոյց տրուեցաւ Աստուածաշունչէն երկրի վրայ Դրախտի մէջ յաւիտենական կեանքի մասին Աստուծոյ խոստումը, ան ընդունեց՝ Դուք Կրնաք Յաւիտեան Ապրիլ Երկրային Դրախտի մը մէջ գիրքէն օրինակ մը եւ մէկ գիշերուան մէջ ամբողջ գիրքը կարդաց։ Երբ ան դարձեալ քրոջ այցելեց, ըսաւ անոր որ տրուած տեղեկութիւնը հոյակապ էր, բայց բաւարար հաւատք չունէր հաւատալու համար։ Քոյրը բացատրեց որ Աստուածաշունչը ուսումնասիրելու եւ Թագաւորութեան Սրահը ժողովներու յաճախելու կարիքը ունէր։ Աստուածաշունչի ուսումնասիրութիւն մը կարգադրուեցաւ եւ ան սկսաւ ժողովներու յաճախել։ Այդ նոյն տարուան աշնան, ան մկրտուեցաւ։ Տարի մը ետք, ան իրեն առաջին վկայութիւն տուած քրոջ աղջկան հետ ամուսնացաւ։ «Այսպիսով», կ’ըսէ քոյրը, «թէ՛ եղբայր մը եւ թէ փեսայ մը շահեցայ անպաշտօն վկայութեան շնորհիւ»։

Իրաւ է որ ճշմարտութիւնը փընտռողները կ’ընդառաջեն երբ անպաշտօն վկայութեամբ իրենց Աստուածաշունչի ճշմարտութիւնը մատուցանուի։ Ինչպէս Յիսուս ըսաւ, իր ոչխարները իր ձայնը կը լսեն։