«Ինչ որ Աստուած կ’ակնկալէ մեզմէ, դուք այդպէս կը վարուիք»
«ՏԷՐՈՋԸ համար» աշխարհային հեղինակութեանց հետ համագործակցելով, Քրիստոնեաները կրնան գովաբանուիլ որպէս «բարեգործներ»։ (Ա. Պետրոս 2։13-15) Հարաւային Ափրիկէի մէջ Եհովայի Վկաները վերջերս համալսարանի մը լսարանին մէջ ունեցած նահանգային համաժողովի մը ընթացքին այս փորձառութիւնը ունեցան։
Համաժողովին առաջին օրը, համալսարանի ապահովութեան ոստիկանութիւնը գօտեւորուեցաւ, որպէսզի ինչպէս ուրիշ համագումարներուն, այս անգամ ալ զայրացկոտ եւ չհամագործակցող պատուիրակներու հետ գլուխ ելլէ։ Սակայն, քանի որ Եհովայի Վկաներուն հետ նախապէս բնաւ գործ չէին ունեցած, մե՛ծ անակնկալ մը կը սպասէր անոնց։
Դռներուն առջեւ իր սովորական ապահովութեան խուզարկութեան որպէս մէկ մասը, ապահովութեան ոստիկանութիւնը հաստատութենէն ներս մտնող ու դուրս ելլող իւրաքանչիւր օթոպիւս սկսաւ խուզարկել։ Անոնք զարմացան, երբ տեսան բարեկամական բարեւները, անոնց համբերութիւնը եւ յարգանքը, նոյնիսկ երբ խուզարկութիւնը պատուիրակները կ’ուշացնէր։ Անոնք իրենց սովորաբար տեսած ընդդիմութեան, առարկութեան եւ անվայել արտայայտութիւններու չհանդիպեցան։ Ապահովութեան պաշտօնեաներէն մէկը ըսաւ. «Ուրիշ այցելուներու հակառակը, բոլորս նկատեցինք որ դուք հեզ ու հանդարտ էք»։
Երբ ապահովութեան սպասարկութեան մեծաւորը իմացաւ որ Եհովայի Վկաները այսքան կը համագործակցին, ան որոշեց օթոպիւսներու խուզարկումը դադրեցնել, «քանի որ», ըսաւ ան, «դուք շատ բարեկիրթ էք»։ Հետեւաբար, այդ օթոպիւսները որոնց վրայ «ԵՎ» պիտակները կային, առանց խուզարկուելու ներս կը մտցուէին։
Համաժողովի վերջաւորութեան, ապահովութեան սպասարկութեան մեծաւորը ըսաւ, որ ինք կը յուսար դարձեալ տեսնել Եհովայի Վկաները։ «Մենք բնաւ այսքան քաղաքավար մարդիկ չենք տեսած», ըսաւ ան։ «Ինչ որ Աստուած կ’ակնկալէ մեզմէ, դուք այդպէս կը վարուիք»։ Այսպիսի գովասանք մը ճշմարիտ Քրիստոնեաներուն յաւելեալ մղում կու տայ որ ‘բարի վարք մը պահեն’, որպէսզի մարդիկ ‘իրենց գործերը տեսնելով Աստուած փառաբանեն’։—Ա. Պետրոս 2։12