Աղքատութեան դէմ պայքարը աննուաճելի՞ պայքար մըն է
ՆԻՒ Եորք Սիթիի մէջ Միացեալ Ազգերը այցելող զբօսաշրջիկները Տնտեսական եւ Ընկերային Խորհրդասրահին դահլիճի առաստաղին նայելով, կը նշմարեն չծածկուած խողովակներ եւ փողրակներ։ Շրջապտոյտի ուղեցոյցը կը բացատրէ. «‘Չամբողջացած’ առաստաղը սովորաբար կը նկատուի որպէս խորհրդանշական յիշեցում՝ թէ Միացեալ Ազգերու տնտեսական եւ ընկերային գործը երբեք չի վերջանար. աշխարհի բնակչութեան կենսապայմանները բարելաւելու համար միշտ ընելիք բաներ պիտի ըլլան»։
Թէեւ այս Խորհուրդը բոլորին համար աւելի բարձր կենսամակարդակ մը ապահովելու վեհ նպատակին նուիրուած է, բայց այս գործը անվերջ կը թուի ըլլալ։ Հետաքրքրականօրէն, Հ.Դ. առաջին դարուն իր երկրային ծառայութեան ընթացքին, Յիսուս Քրիստոս ըսաւ. «Տէրոջը Հոգին իմ վրաս է. վասն զի զիս օծեց աղքատներուն աւետարան [«բարի լուր», ՆԱ] քարոզելու»։ (Ղուկաս 4։18) Իր քարոզած «բարի լուր»ը ի՞նչ էր։ Անիկա՝ ‘չքաւորին իր նեղութեան ատենը ապաւէն եղող’ Եհովա Աստուծոյ հաստատելիք Թագաւորութեան մասին տրուած պատգամն էր, որու Թագաւորը Յիսուս Քրիստոս պիտի ըլլար։ Այդ Թագաւորութիւնը ի՞նչ պիտի իրագործէ։ Եսայի մարգարէացաւ. «Զօրքերու Տէրը . . . բոլոր ազգերուն կոչունք մը պիտի ընէ, պարարտ բաներու եւ հին գինիներու, ծուծով լեցուած պարարտ բաներու ու զտուած հին գինիներու կոչունք։ Մահը յաւիտեան բնաջինջ պիտի ընէ ու Տէր Եհովան ամէն աչքէ արցունքը պիտի սրբէ»։—Եսայեայ 25։4-6, 8
Կ’ուզէ՞ք աւելին գիտնալ թէ Աստուծոյ Թագաւորութիւնը ի՛նչպէս ‘աշխարհի բնակչութեան կենսապայմանները պիտի բարելաւէ’, այնպէս որ այլեւս չքաւորութիւն չըլլայ։ Տեսէք ստորեւ՝ գիտնալու համար թէ ի՛նչպէս որակելի ուսուցիչ մը կրնայ ձեզի այցելել, ցոյց տալու համար թէ այս հարցերուն մասին Աստուածաշունչը ուրիշ ի՛նչ կ’ըսէ։