Հեռատեսիլը՝ լաւ մանկապահուհի՞ մըն է
ԵՐԲԵՄՆ, թերեւս կը նախընտրես զաւակներդ զբաղեցնել՝ թոյլ տալով որ հեռատեսիլը դիտեն, մինչ այլ պարտականութիւններու հոգ կը տանիս։ Բայց ասիկա ի՞նչ ազդեցութիւն կրնայ ունենալ զաւակներուդ վրայ։
«Նոյնիսկ մանկիկները կրնան ազդուիլ հեռատեսիլի միջոցով հաղորդուած զգացական պատգամներէն», կը տեղեկագրէ լրագիր մը (The New York Times)։ Վերջերս կատարուած ուսումնասիրութեան մը մէջ, միամեայ մանկիկներ հեռատեսիլի վրայ դիտեցին կարճ ներկայացումներ, որոնց մէջ դերասանուհին խաղալիքի մը հանդէպ տարբեր հակազդեցութիւններ ցոյց տուաւ։ Լրագիրը կ’ըսէ. «Երբ դերասանուհին վախով ու դողով խաղալիքին ընդառաջեց, մանկիկները այդ խաղալիքով խաղալէ խուսափեցան եւ աւելի հակում ունեցան շփոթելու, խոժոռելու, դժգոհելու կամ լալու։ Իսկ երբ դերասանուհին խանդավառութեամբ վարուեցաւ, մանկիկները դիւրաւ խաղալիքով խաղցան»։
Բացայայտ է որ հեռատեսիլը կրնայ մանկիկներուն ազդել։ Ի՞նչ կրնանք ըսել անոր երկարատեւ ազդեցութեան մասին։ Քուրաշիքի քաղաքին մէջ, Ճափոն, Բժ. Նաօքի Քաթաօքա՝ որ Քաուասաքիի Բժշկական Քոլէճի մէջ մանկաբուժութեան փրոֆէսոր է, քննած է բազմաթիւ երախաներ, որոնք չափազանց հանդարտ են եւ իրենց դէմքին վրայ արտայայտութիւն չկայ։ Բոլորն ալ երկար ժամեր հեռատեսիլ կամ տեսաերիզներ դիտած էին։ Երկու տարեկան տղեկ մը չէր կրնար խօսակցիլ եւ սահմանափակ բառամթերք ունէր։ Ան մէկ տարեկանէն սկսեալ, ամէն օր՝ առտուընէ մինչեւ իրիկուն տեսաերիզներ դիտած էր։ Բժիշկին խրատին անսալով, մայրը տեսաերիզ դիտելը դադրեցուց եւ սկսաւ տղեկին հետ խաղալ։ Արդի՞ւնքը։ Տղեկին բառամթերքը աստիճանաբար աւելցաւ։ Արդարեւ ծնողները իրենց զաւակներուն հետ պէտք է հաղորդակցին։
Եհովա Աստուած, ընտանեկան կարգադրութեան Հեղինակը, լաւագոյն ազդեցութեան կարեւորութիւնը ընդգծեց։ Ան վաղուց իր ժողովուրդին ըսաւ. «[Աստուծոյ խօսքերը] կրկնելո՛վ սորվեցուր քու որդիներուդ։ Անոնց մասին խօսէ՛ երբ տունդ նստած ես, երբ ճամբան կը քալես, երբ կը պառկիս կամ երբ կ’ելլես»։ (Բ. Օրինաց 6։7, ԱՎ) Ո՛չ թէ հեռատեսիլը, այլ՝ ծնողքը կրնան խօսքով ու օրինակով զաւակները կրթել լաւագոյն ճամբային մէջ։—Առակաց 22։6