Կիրակի օրերը կրնա՞ս ծառայութեան մասնակցիլ
1. Փիլիպպէի մէջ Պօղոսի եւ իր ուղեկիցներուն գործունէութենէն ի՞նչ կրնանք սորվիլ։
1 Շաբաթ էր,– այն օրը որ Փիլիպպէի մէջ հրեաներուն մեծամասնութիւնը կը հանգստանար։ Պօղոս եւ իր ուղեկիցները քաղաքը կ’այցելէին, իրենց միսիոնարական մէկ ճամբորդութեան ընթացքին։ Ո՛չ ոք զիրենք պիտի քննադատէր, եթէ այդ օրը իրենք ալ իրենց ծառայութենէն արժանի արձակուրդ առնէին։ Սակայն անոնք գիտնալով որ հրեաները աղօթք ընելու համար քաղաքէն դուրս կը հաւաքուին, պատեհութիւնը օգտագործեցին անոնց քարոզելու։ Պօղոս եւ իր ուղեկիցները ո՜րքան ուրախ ըլլալու էին, երբ Լիդիա մտիկ ըրաւ եւ ինք ու իր ընտանիքը մկրտուեցան (Գործք 16։13-15)։ Որովհետեւ այսօր շատեր կիրակի օրը կը հանգստանան, ինչո՞ւ այդ օրուան մէկ մասը չգործածես անոնց քարոզելու համար։
2. Եհովայի ծառաները ի՞նչ մարտահրաւէրներ յաղթահարած են, որպէսզի կարենան կիրակի օրը առանց նեղութեան քարոզել։
2 Կիրակի օրը քարոզելու համար՝ մղուած պայքարը։ Եհովայի ժողովուրդին քաջալերութիւն տրուեցաւ 1927–ի ընթացքին, որ իւրաքանչիւր կիրակի ծառայութեան մասնակցին։ Այս քայլը անմիջական հակառակութիւն դիմագրաւեց։ Միացեալ Նահանգներուն մէջ շատեր ձերբակալուեցան, ըսուելով որ անոնք կիրակի օրուան Շաբաթի օրէնքները կը խախտէին, խաղաղութիւնը կը խանգարէին եւ առանց արտօնագրի կը ծախէին։ Բայց Եհովայի ծառաները ձեռնթափ չեղան։ Անոնք 1930–ական թուականներուն «խմբային արշաւներ» կազմակերպեցին, ուր մօտակայ ժողովքներու հրատարակիչներ կը հաւաքուէին, որպէսզի թաղամաս մը ծածկեն։ Երբ հրատարակիչներէն ոմանք կը ձերբակալուէին, անոնց թիւը շատ ըլլալով՝ իշխանութիւնները չէին կրնար զանոնք կասեցնել։ Իրապէս կը գնահատե՞ս այս եղբայրներուն ըրած զոհողութիւնները, որ կարենանք կիրակի օրը առանց նեղութեան քարոզել։
3. Կիրակի օրը ինչո՞ւ ծառայութեան մասնակցելու լաւ օր մըն է։
3 Քարոզելու ընտիր օր մը։ Կիրակի օրը շատեր գործի չեն երթար, հապա տունը կը մնան։ Անոնք սովորաբար լաւ տրամադրութիւն կ’ունենան։ Կարգ մը եկեղեցասէրներ թերեւս այդ օրը աւելի հակամէտ են Աստուծոյ մասին խօսելու։ Եթէ կիրակի օրը ժողով ունինք, մեր դրսերեւոյթը արդէն դաշտի ծառայութեան համար պատշաճ է, ուստի ինչո՞ւ չծրագրենք ծառայութեան մասնակցիլ ժողովէն առաջ կամ ետք։ Ի պահանջել հարկին, թեթեւ ճաշ մը քու հետդ ունեցիր։
4. Եթէ կիրակի օրէն մաս մը գործածենք ծառայութեան համար, ի՞նչ ուրախութիւն կրնանք վայելել։
4 Եթէ կիրակի օրէն մաս մը գործածենք ծառայութեան համար, տակաւին պիտի ունենանք ժամանակ, որ մենք հանգստանանք։ Իսկ մեր հանգստութեան պիտի ընկերակցի այն գոհունակութիւնը, որ սրբազան ծառայութեան մասնակցելէն յառաջ կու գայ (Առ. 19։23)։ Աւելին, թերեւս Լիդիայի նման մէկը գտնելու ուրախութիւնը վայելենք։