Երիտասարդ մը քունի կը տարուի

Ի՞ՆՉ տեղի կ’ունենայ հոս։ Գետին ինկած երիտասարդը ծանր վիրաւո՞ր է։ Ահաւասիկ, տունէն դուրս եկող մարդոցմէ մէկը Պօղոսն է։ Իրեն հետ Տիմոթէոսն ալ կը տեսնէ՞ք։ Երիտասարդը պատուհանէ՞ն վար ինկաւ։

Այո, ան պատուհանէն վար ինկաւ։ Հոս Տրովադայի մէջ Պօղոս աշակերտներուն դասախօսութիւն մը կու տար։ Ան գիտէր թէ երկար ատեն զիրենք պիտի չտեսնէր քանի որ յաջորդ օրը նաւով պէտք էր ճամբորդէր։ Ուստի ան շարունակեց խօսիլ մինչեւ կէս գիշեր։

Այս երիտասարդը որուն անունն է Եւտիքոս, պատուհանը նստած էր եւ քունի կը տարուի։ Ան երեք յարկէն վար կ’իյնայ։ Անոր համար է որ մարդիկ այսքան մտահոգ կ’երեւնան։ Երբ անոնք երիտասարդը կը գրկեն, ճիշդ իրենց մտքէն անցածն է՝ ‘Ան մեռած է’։

Երբ Պօղոս կը տեսնէ թէ երիտասարդը մեռած է, անոր վրայ կը պառկի եւ զայն իր թեւերուն մէջ կ’առնէ։ Ապա ան կ’ըսէ. ‘Մի՛ մտահոգուիք, տղան առողջ է’։ Իրապէս հրաշքով մը Պօղոս զինք ետ կեանքի կը բերէ։ Ամբողջ ամբոխը ուրախութեամբ կը լեցուի։

Անոնք դարձեալ վերնայարկ սենեակը կ’երթան ընթրելու համար։ Պօղոս կը շարունակէ խօսիլ մինչեւ արշալոյս։ Բայց վստահ կրնաք ըլլալ որ Եւտիքոս անգամ մը եւս քունի չի տարուիր։ Ապա Պօղոս, Տիմոթէոս եւ իրենց հետ ճամբորդողները նաւ կը մտնեն։ Գիտէ՞ք անոնք ո՛ւր կ’երթան։

Պօղոս տակաւին նոր վերջացուցած է իր երրորդ քարոզչական շրջապտոյտը եւ տուն կը վերադառնայ։ Այս շրջապտոյտին Պօղոս երեք տարի մինակ Եփեսոս քաղաքին մէջ մնաց։ Ուրեմն իր երրորդ շրջապտոյտը՝ երկրորդէն աւելի երկար էր։

Տրովադայէն մեկնելէ ետք, նաւը քիչ ժամանակ մը կանգ կ’առնէ Մելիտոսի մէջ։ Քանի որ Եփեսոս Մելիտոսէն մի քանի քիլոմեթր հեռու է, Պօղոս մարդ կը ղրկէ որպէսզի Եփեսոսի ժողովքին երեցները Մելիտոս գան, որպէսզի անոնց հետ վերջին խօսակցութիւն մը ունենայ։ Անկէ ետք, երբ ժամանակը կու գայ որ նաւը ճամբայ ելլէ, բոլորն ալ շա՜տ կը տխրին տեսնելով Պօղոսի մեկնիլը։

Վերջապէս նաւը Կեսարիա կը հասնի։ Մինչ Պօղոս Կեսարիոյ մէջ կը կենայ Փիլիպպոս աշակերտին տան մէջ, Ագաբոս մարգարէն կը զգուշացնէ Պօղոսը։ Ան կ’ըսէ թէ Պօղոս պիտի բանտարկուի երբ Երուսաղէմ երթայ։ Իրապէս ալ այդպէս կը պատահի։ Յետոյ երկու տարի Կեսարիոյ մէջ բանտ մնալէն ետք, Պօղոս Հռովմ կը ղրկուի որպէսզի Հռովմէացի կառավարիչ Կայսրին առջեւ դատուի։ Տեսնենք թէ դէպի Հռովմ ճամբորդութեան ընթացքին ի՛նչ կը պատահի։