Երբեմն մինակ կը զգա՞ս եւ կը վախնա՞ս

Նկարին մէջի տղային նայէ։ Կարծես թէ ան մինակ է եւ կը վախնայ, այդպէս չէ՞։ Դուն ալ այդպէս զգացա՞ծ ես։— Ամէն մարդ երբեմն այդպէս կը զգայ։ Սուրբ Գիրքին մէջ կան կարգ մը մարդիկ, որոնք Եհովայի ընկերներն էին, բայց երբեմն մինակ զգացին եւ վախցան։ Անոնցմէ մէկը Եղիան էր։ Եկուր իր մասին սորվինք։

Եղիան Իսրայէլի մէջ կ’ապրէր շա՜տ տարիներ առաջ. . . Յիսուսի ծնելէն ալ առաջ։ Իսրայէլի թագաւորին անունը Աքաաբ էր։ Աքաաբ իրական Աստուածը՝ Եհովան չէր պաշտեր։ Ան եւ իր կինը, Յեզաբէլ թագուհին, սուտ աստուածը՝ Բահաղը կը պաշտէին։ Անոր համար գրեթէ բոլոր իսրայէլացիները Բահաղը սկսան պաշտել։ Յեզաբէլ թագուհին շատ չար էր, եւ կ’ուզէր Եհովան պաշտող բոլոր մարդիկը մեռցնել, մէջը ըլլալով Եղիան։ Գիտե՞ս Եղիան ի՛նչ ըրաւ։—

Եղիան փախա՛ւ։ Ան հեռո՜ւ տեղեր գնաց եւ ժայռի մը մէջ պահուըտեցաւ։ Ան ինչո՞ւ այդպէս ըրաւ։— Այո՛, քանի որ վախցաւ։ Բայց Եղիան պէտք չէր վախնար։ Ինչո՞ւ։ Քանի որ գիտէր որ Եհովան կրնար իրեն օգնել։ Եհովան ասկէ առաջ Եղիային ցուցուցած էր թէ որքան ոյժ ունի։ Անգամ մը, Եհովան երկինքէն կրա՛կ իջեցուց որ Եղիային աղօթքին պատասխանէ։ Ուրեմն Եհովան ա՛նշուշտ կրնար հիմա ալ Եղիային օգնել։

Երբ Եղիան ժայռին մէջ էր, Եհովան իրեն հարցուց. «Ի՞նչ կ’ընես հոս»։ Եղիան պատասխանեց. «Միայն ես եմ որ դեռ քեզ կը պաշտեմ։ Ես մինակ եմ, եւ կը վախնամ որ զիս մեռցնեն»։ Եղիան կը կարծէր թէ Եհովան պաշտող բոլոր մարդիկը մեռեր են։ Բայց Եհովան Եղիային ըսաւ. «Ո՛չ, ըսածդ ճիշդ չէ։ Դեռ 7000 հոգի զիս կը պաշտէ։ Քա՛ջ եղիր։ Քեզի աւելի՛ գործ պիտի տամ որ ընես»։ Ի՞նչ կ’ըսես. Եղիան ուրախացա՞ւ երբ ասիկա լսեց։—

Եղիային պատմութենէն ի՞նչ կը սորվիս։ Պէտք չէ՛ մինակ զգաս եւ վախնաս, քանի որ մինակ չես։ Դուն ունիս ընկերներ, որոնք թէ՛ Եհովան եւ թէ քեզ կը սիրեն։ Ասկէ զատ, ունիս Եհովա՛ն, որ շատ զօրաւոր է եւ քեզի մի՛շտ պիտի օգնէ։ Հիմա որ գիտցար որ մինակ չես, ուրախացա՞ր։—