Երբ ողբերգութիւն մը հարուածէ

Թէեւ ամէն ջանք կը թափես որ ուրախ ամուսնութիւն եւ ընտանիք մը ունենաս, բայց թերեւս ծագին անակնկալ դէպքեր, որոնք ուրախութիւնդ նուազեցնեն (Ժողովող 9։11)։ Երբ դժուարութիւններու առջեւ գտնուինք, Աստուած սիրալիրօրէն մեզի կ’օգնէ։ Եթէ հետեւեալ սուրբ գրային սկզբունքները կիրարկես, դուն եւ ընտանիքդ պիտի կարենաք ամէնէն դժուար պարագաներուն հետ իսկ գլուխ ելլել։

1 ԵՀՈՎԱՅԻՆ ԱՊԱՒԻՆԷ

ԱՍՏՈՒԱԾԱՇՈՒՆՉԸ Կ’ԸՍԷ. «Ձեր ամէն հոգը անոր վրայ ձգեցէ՛ք, վասն զի անիկա ձեզի համար կը հոգայ» (Ա. Պետրոս 5։7)։ Միշտ յիշէ թէ փորձութիւններուդ պատճառը Աստուած չէ (Յակոբոս 1։13)։ Մինչ իրեն կը մօտենաս, ան լաւագոյն կերպով քեզի պիտի օգնէ (Եսայի 41։10)։ Սուրբ Գիրքը կ’ըսէ. «Անոր առջեւ սրտերնիդ բացէք» (Սաղմոս 62։8)։

Նաեւ, Աստուածաշունչը ամէն օր կարդալով եւ ուսումնասիրելով մխիթարութիւն պիտի գտնես։ Առ ի արդիւնք, պիտի զգաս թէ Եհովան ինչպէ՛ս «մեզ կը մխիթարէ մեր բոլոր նեղութիւններուն մէջ» (Բ. Կորնթացիս 1։3, 4. Հռովմայեցիս 15։4)։ Աստուած կը խոստանայ քեզի տալ իր «խաղաղութիւնը, որ ամէն մտքէ վեր է» (Փիլիպպեցիս 4։6, 7, 13)։

ՀԵՏԵՒԵԱԼԸ ՓՈՐՁԷ.

• Հանդարտ մնալու եւ յստակ կերպով մտածելու համար, աղօթքով Եհովայէն օգնութիւն խնդրէ

• Բոլոր հաւանականութիւնները առջեւդ դիր եւ յարմարագոյն քայլը առ

2 ԴՈՒՆ ՔԵԶԻ ԵՒ ԸՆՏԱՆԻՔԻԴ ՀՈԳ ՏԱՐ

ԱՍՏՈՒԱԾԱՇՈՒՆՉԸ Կ’ԸՍԷ. «Խոհեմին սիրտը գիտութիւն կը վաստկի եւ իմաստուններուն ականջը գիտութիւն կը փնտռէ» (Առակաց 18։15)։ Բոլոր իրողութիւնները ունեցիր. տես թէ ընտանիքիդ իւրաքանչիւր անդամին կարիքները ի՛նչ են։ Անոնց հետ խօսակցէ եւ անոնց մտիկ ըրէ (Առակաց 20։5)։

Ի՞նչ կարելի է ըսել, եթէ սիրելի մը մահանայ։ Մի՛ վախնար զգացումներդ արտայայտելու։ Յիշէ թէ նոյնիսկ «Յիսուս լացաւ» (Յովհաննէս 11։35. Ժողովող 3։4)։ Բաւարար չափով հանգստանալն ու քնանալն ալ կարեւոր են (Ժողովող 4։6)։ Այսպէս, նեղացուցիչ պարագայի մը հետ դիւրաւ գլուխ պիտի ելլես։

ՀԵՏԵՒԵԱԼԸ ՓՈՐՁԷ.

• Ընտանիքիդ հետ հաղորդակցիլը սովորութիւն դարձուր առաջ որ ողբերգութիւն մը պատահի, որպէսզի երբ խնդիրներ ծագին, քեզի հետ խօսելու հանգիստ զգան

• Խօսէ ուրիշներու հետ, որոնք թերեւս նման պարագայ մը դիմագրաւած են

3 ՀԱՐԿ ԵՂԱԾ ՕԳՆՈՒԹԻՒՆԸ ՍՏԱՑԻՐ

ԱՍՏՈՒԱԾԱՇՈՒՆՉԸ Կ’ԸՍԷ. «Բարեկամը ամէն ատեն կը սիրէ ու եղբայրը նեղութեան ատենուան համար ծնած է» (Առակաց 17։17)։ Բարեկամներդ կ’ուզե՛ն քեզի օգնել, բայց թերեւս չգիտնան ի՛նչ ընել։ Ուստի մի՛ վարանիր անոնց ըսելու թէ ճիշդ ինչ բանի պէտք ունիս (Առակաց 12։25)։ Նաեւ հոգեւոր օգնութիւն խնդրէ անոնցմէ, որոնք Աստուածաշունչը կը հասկնան։ Անոնց տուած սուրբ գրային ուղղութիւնը քեզի պիտի օգնէ (Յակոբոս 5։14)։

Երբ կանոնաւորաբար ընկերակցիս անոնց հետ, որոնք իսկապէս Աստուծոյ կը հաւատան եւ անոր խոստումներուն կը վստահին, հարկ եղած օգնութիւնը պիտի ստանաս։ Նաեւ, երբ դո՛ւն քաջալերութեան պէտք ունեցողներուն օգնես, մեծապէս պիտի մխիթարուիս։ Անոնց ըսէ թէ ինչո՛ւ Եհովային եւ իր խոստումներուն կը հաւատաս։ Աջակցութեան պէտք ունեցողներուն օգնելով զբաղէ, եւ մի՛ մեկուսանար անոնցմէ, որոնք քեզ կը սիրեն եւ քեզմով հետաքրքրուած են (Առակաց 18։1. Ա. Կորնթացիս 15։58)։

ՀԵՏԵՒԵԱԼԸ ՓՈՐՁԷ.

• Մտերիմ բարեկամի մը հետ խօսէ եւ թոյլ տուր անոր որ քեզի օգնէ

• Կարիքներդ մասնայատուկ կերպով եւ անկեղծօրէն նշէ