Ինչու պաշտամունքի մէջ մասունքներ կը գործածեն
ԵՐԵՒԱԿԱՅԵՑԷՔ թէ մեր հասարակ դարաշրջանի ԺԸ. դարու սկիզբը Իտալիոյ Նափոլի քաղաքը կը գտնուիք։ Անոր մայր եկեղեցիին մէջ, Իրլանտացի փիլիսոփայ՝ Ճորճ Պէրքըլէ հռչակաւոր կրօնական մասունքի մը դիմաց կայնած է։ Ան սկեպտիկութեամբ կը դիտէ «Սուրբ Ճէննարօ»ի՝ Կաթողիկէ «սուրբ» Գեննարիոսի արեան երեւութական հեղուկացումը։
Նափոլիս քաղաքը այս ուղղութեամբ շատ քիչ փոխուած է։ Օրինակի համար, վերջին տարիներուն, առիթով մը, հակառակ աննպաստ օդին, եկեղեցին խուռներամ բազմութիւն մը կար. երեւութապէս հրաշք մը տեղի ունեցած էր։ Կարտինալ արգեպիսկոպոսին կողմէ առաջնորդուած մասունքն ու թափօրը ջերմ ծափահարութեամբ ողջունուած էին։ Այո, ասիկա այդ բազմաթիւ անգամներէն մէկն էր, երբ «Սուրբ Ճէննարօ»ի արիւնը երեւութապէս հեղուկացած էր։ Ըստ տեղեկագրութեան, այս կրօնական մասունքին կապակցաբար հրաշքներ տեղի կ’ունենան ԺԴ. դարէն ի վեր։
Ըստ Կաթողիկէ աւանդութեան, մասունք մը (մասն արմատէն ծագում առած, որ կը նշանակէ կտոր, մաս) իր մըն է, որ մնացած է սուրբ նկատուած անհատէ մը։ Ինչպէս կրօնական բառարան մը (Dizionario Ecclesiastico) կը նշէ, մասունքները, «բառին բուն առումով, Սուրբին մարմինը կամ մարմնին եւ իր մոխիրներուն մէկ մաս[ն են,] իսկ աւելի լայն իմաստով, սուրբին մարմնին հետ շփման մէջ եկած իր մըն են եւ հետեւաբար պաշտամունքի արժանի են»։
Պապական Վաւերացում
Անկասկած, շատեր ակնածութեամբ կը վարուին մասունքներու նկատմամբ, անոնց ընկերակցած երեւութական հրաշքներուն համար։ Անոնց ժողովրդականութեան բացայայտօրէն նպաստած է պապական վաւերացումը։
Վերջին 70 տարիներու ընթացքին, առնուազն չորս պապեր մասնայատուկ ուշադրութիւն ընծայեցին մասունքներու։ Կաթողիկէ պարբերաթերթ մը կը յայտնէ թէ իր նախորդին՝ Պիոս ԺԱ.–ին նման, Պիոս ԺԲ. Պապը «Լիզիէօ–ի սուրբին մասունքները կը պահէր իր մարմնին վրայ»։ Պօղոս Զ.–ն «[Թովմաս] առաքեալին մէկ մատը կը պահէր իր ուսումնասիրութեան գրասեղանին վրայ»։ Իսկ Յովհաննէս–Պօղոս Բ. Պապը «իր անձնական յարկաբաժնին մէջ կը պահէ» «Սուրբ Բենեդիկտոս»ի եւ «Սուրբ Անդրէաս»ի «դիակներուն նշխարները»։—30 giorni, Մարտ 1990, էջ 50
Պապական վաւերացման ի տես, զարմանալի չէ որ թէ՛ անձնական եւ թէ հանրային պաշտամունքի համար մասունքներու պահանջը երթալով կ’աւելնայ։ Բայց կրօնական մասունքներ պաշտելը հաճելի՞ է Աստուծոյ։
[Նկար՝ էջ 3]
Մասնատուփ մը, որու մէջ կրօնական մասունքներ կը պահուին