Յիսուս Քրիստոս ինչպէ՞ս Մովսէսի նման մարգարէ մըն էր

ԵՀՈՎԱ ԱՍՏՈՒԱԾ չի ստեր։ (Տիտոս 1։2. Եբրայեցիս 6։18) Հետեւաբար, իր Խօսքին՝ Աստուածաշունչին մարգարէութիւնները վստահելի եւ ճշմարիտ են։ Անոնց կատարումը աներկբայելի է։

Աստուածային ներշնչման ներքեւ գրուած այս մարգարէութիւններէն մէկն է Մեսիայի նկատմամբ Եբրայեցի Մովսէս մարգարէին գրածը։ Եհովայի խօսքերը մէջբերելով, Մովսէս նշեց. «Քեզի պէս [Մովսէսի նման] մարգարէ մը պիտի հանեմ անոնց [Իսրայելացիներուն] իրենց եղբայրներուն մէջէն եւ իմ խօսքերս անոր բերանը պիտի դնեմ ու ինչ որ անոր պատուիրեմ, անոնց պիտի ըսէ»։—Բ. Օրինաց 18։17, 18

Պետրոս առաքեալ այս մարգարէութիւնը Յիսուս Քրիստոսի կիրառեց, երբ ըսաւ. «Մովսէս ... ըսաւ թէ՝ ‘Ձեր Տէր Աստուածը ձեր եղբայրներէն ինծի պէս մարգարէ մը պիտի հանէ ձեզի։ Անոր մտի՛կ ըրէք՝ ամէն ինչ որ ձեզի խօսի’»։ (Գործք 3։22) Իրականութեան մէջ, Յիսուս անձամբ նշած էր. «Եթէ դուք Մովսէսին հաւատայիք, ինծի ալ պիտի հաւատայիք, քանզի անիկա ինծի համար գրեց»։ (Յովհաննու 5։46) Յիսուս եւ Մովսէս ո՞ր մարզերուն մէջ իրար կը նմանէին։

Նմանութիւն՝ Իրենց Ասպարէզին Սկիզբը

Թէ՛ Մովսէս եւ թէ Յիսուս արու երախաներու սպանդէն ազատուեցան։ Մանուկ Մովսէսը Նեղոս Գետին ափին վրայ շամբին մէջ պահուեցաւ եւ այսպիսով ազատուեցաւ Իսրայելացի արու մանուկներու սպանդէն զոր Եգիպտոսի Փարաւոնը հրամայեց։ Յիսուս ալ, իր մանկութեան, Բեթլէհէմի եւ անոր նահանգներուն մէջ երկու տարեկան եւ անկէ վար եղող արու մանուկներուն սպանդէն ազատուեցաւ։ Այս ջարդին հրամանը տուաւ Մեծն Հերովդէս Թագաւորը որ, Փարաւոնին նման, Աստուծոյ եւ անոր ժողովուրդին թշնամի էր։—Ելից 1։22–2։10. Մատթէոս 2։13–18

Թէ՛ Մովսէս եւ թէ Յիսուս հեզ, կամ խոնարհ, հոգի մը ցուցաբերեցին։ Թէեւ Եգիպտոսի հզօր թագաւորի մը տանը մէջ որպէս որդի մը մեծցաւ, Մովսէս «շատ հեզ մարդ մըն էր՝ երկրի վրայ եղած բոլոր մարդոցմէ աւելի»։ (Թուոց 12։3) Բաղդատաբար, Յիսուս երկնքի մէջ ծառայած էր որպէս հզօր Միքայէլ Իշխանը, բայց հեզութիւն ցուցաբերելով երկիր եկաւ։ (Դանիէլ 10։13. Փիլիպպեցիս 2։5–8) Ասկէ զատ, Յիսուս կարեկցութիւն ունէր մարդոց հանդէպ. ուստի ան կրնար ըսել. «Իմ լուծս ձեր վրայ առէք եւ ինծմէ սորվեցէք՝ որ հեզ եմ ու սրտով խոնարհ եւ ձեր անձերուն հանգստութիւն պիտի գտնէք»։—Մատթէոս 11։29. 14։14

Եհովայի ծառայութեան համար թէ՛ Մովսէս եւ թէ Յիսուս իրենց ետին ձգեցին կարկառուն դիրք մը եւ մեծ հարստութիւն։ Եհովայի եւ Իր ժողովուրդին ծառայելու համար, Մովսէս, Եգիպտոսի մէջ, իր ետին ձգեց հարստութիւն եւ երեւելի դիրք մը։ (Եբրայեցիս 11։24–26) Նմանապէս, Յիսուս, երկնքի մէջ, իր ետին ձգեց շատ նպաստաւոր դիրք մը եւ հարստութիւն երկրին վրայ Աստուծոյ եւ Իր ժողովուրդին ծառայելու համար։—Բ. Կորնթացիս 8։9

Թէ՛ Մովսէս եւ թէ Յիսուս Աստուծոյ օծեալները եղան։ Մովսէս մարգարէն որպէս Եհովայի օծեալը ծառայեց Իսրայէլ ազգին։ Ինչպէս Պօղոս առաքեալ ըսաւ, Մովսէս «աւելի մեծ հարստութիւն սեպեց Քրիստոսին [օծեալը ըլլալուն] նախատինքը՝ քան թէ Եգիպտոսին գանձերը»։ (Եբրայեցիս 11։26. Ելից 3։1–4։17) Յիսուս ե՞րբ Քրիստոսը կամ Օծեալը եղաւ։ Մկրտուած ատեն, երբ ան Աստուծոյ սուրբ հոգիով, կամ գործօն ոյժով, օծուեցաւ։ Սուքարի մէջ Յակոբի ջրհորին քով Սամարացի կնկան եւ հարցաքննութեան ատեն Իսրայէլի քահանայապետին դիմաց, Յիսուս դաւանեցաւ որ ինք Մեսիան կամ Քրիստոսն էր։—Մարկոս 14։61, 62. Յովհաննու 4։25, 26

Թէ՛ Մովսէս եւ թէ Յիսուս 40 օր ծոմ պահեցին։ Որպէս Աստուծոյ բանբերը ծառայելու իր ասպարէզին սկիզբը, Մովսէս Սինա լերան վրայ 40 օր ծոմ պահեց։ (Ելից 34։28) Յիսուս ալ անապատին մէջ 40 օր ծոմ պահեց եւ ապա սատանայական փորձութիւններուն դէմ դրաւ, որպէս խոստացեալ Մեսիան իր ասպարէզին սկիզբը։—Մատթէոս 4։1–11

Երկուքն ալ Եհովան Փառաւորեցին

Եհովա թէ՛ Մովսէսը եւ թէ Յիսուսը գործածեց Իր սուրբ անունը մեծարելու համար։ Աստուած ըսաւ Մովսէսին որ Իսրայելացիներուն երթայ ‘իրենց հայրերուն Եհովա Աստուծոյն’ անունով։ (Ելից 3։13–16) Մովսէս Աստուած ներկայացուց Փարաւոնին առջեւ, որ ողջ պահուած էր, որպէսզի Եհովայի զօրութիւնը ցոյց տրուէր եւ Իր անունը բոլոր երկրի վրայ ծանուցուէր։ (Ելից 9։16) Յիսուս ալ Եհովայի անունովը եկաւ։ Օրինակի համար, Քրիստոս ըսաւ. «Ես իմ Հօրս անունովը եկայ ու զիս չէք ընդունիր»։ (Յովհաննու 5։43) Յիսուս իր Հայրը փառաւորեց, Եհովայի անունը յայտնի ըրաւ ա՛յն մարդոց զորոնք Աստուած իրեն տուած էր եւ զայն լաւ կերպով ճանչցուց երկրի վրայ։—Յովհաննու 17։4, 6, 26

Թէ՛ Մովսէս եւ թէ Յիսուս աստուածային զօրութեամբ հրաշքներ գործեցին, որոնք Աստուած կը փառաւորէին։ Մովսէս հրաշքներ գործեց փաստելու համար որ ինք Եհովա Աստուծոյ կողմէ յանձնարարուած էր։ (Ելից 4։1–31) Մովսէս Աստուծոյ կողմէ գործածուեցաւ Կարմիր Ծովը բաժնելու համար եւ իր ասպարէզին բոլոր տեւողութեան, ան շարունակեց հրաշքներ գործել, որոնք Եհովան կը փառաւորէին։ (Ելից 5։1–12։36. 14։21–31. 16։11–18. 17։5–7. Սաղմոս 78։12–54) Յիսուս, նմանապէս, Աստուած փառաւորեց բազմաթիւ հրաշքներ գործելով։ Այնքան շատ էին անոնք որ Յիսուս կրցաւ ըսել. «Հաւատացէ՛ք ինծի, թէ ես Հօրը մէջն եմ ու Հայրը իմ մէջս է. ապա թէ ոչ՝ գոնէ գործերուն համար ինծի հաւատացէք»։ (Յովհաննու 14։11, 12) Ան հրաշքով մեծ փոթորիկ մը հանդարտեցուց, խաղաղեցնելով Գալիլիոյ Ծովը։—Մարկոս 4։35–41. Ղուկաս 7։18–23

Ուրիշ Կարեւոր Նմանութիւններ

Թէ՛ Մովսէս եւ թէ Յիսուս հրաշքով կերակուր հայթայթեցին։ Մովսէս Եհովայի մարգարէն էր երբ հրաշքով Իսրայելացիներուն կերակուր հայթայթուեցաւ։ (Ելից 16։11–36) Նոյնանման կերպով, Աստուածաշունչին մէջ երկու անգամ արձանագրուած է որ Յիսուս հրաշքով բազմութիւններ կերակրեց։—Մատթէոս 14։14–21. 15։32–38

Երկնքէն եկած մանանան թէ՛ Մովսէսի եւ թէ Յիսուսի մատուցած ծառայութեան հետ կապ ունէր։ Մովսէս Իսրայելացիները կ’առաջնորդէր, երբ կերպով մը երկնքէն մանանան հայթայթուեցաւ անոնց։ (Ելից 16։11–27. Թուոց 11։4–9. Սաղմոս 78։25) Նոյնանման բայց շատ աւելի կարեւոր կերպով մը, Յիսուս իր մարմինը տուաւ որպէս երկնքէն եկած մանանան, հնազանդ մարդկութեան կեանքին համար։—Յովհաննու 6։48–52

Թէ՛ Մովսէս եւ թէ Յիսուս մարդիկը ազատագրեցին գերութեան կապանքէն։ Աստուծոյ կողմէ Մովսէսը գործածուեցաւ Իսրայելացիները Եգիպտոսի կապանքէն ազատագրելու համար որպէս Իր ազատ ժողովուրդը։ (Ելից 12։37–42) Նոյն կերպով, Յիսուս Քրիստոս իր հետեւորդները կ’ազատագրէ եւ տակաւին հնազանդ մարդկութիւնը պիտի ազատագրէ Բանսարկու Սատանայի կազմակերպութեան կապանքէն, ինչպէս նաեւ մեղքէն ու մահէն։—Ա. Կորնթացիս 15։24–26. Կողոսացիս 1։13. Ա. Յովհաննու 5։19

Թէ՛ Մովսէս եւ թէ Յիսուս ուխտերու միջնորդները եղան։ Մովսէս՝ Եհովա Աստուծոյ եւ Իսրայելացիներուն միջեւ կնքուած Օրէնքի ուխտին միջնորդը եղաւ։ (Ելից 19։3–9) Յիսուս Աստուծոյ եւ հոգեւոր Իսրայելացիներուն միջեւ կնքուած նոր ուխտին Միջնորդը եղաւ։—Երեմեայ 31։31–34. Ղուկաս 22։20. Եբրայեցիս 8։6–13

Թէ՛ Մովսէսի եւ թէ Յիսուս Քրիստոսի դատելու զօրութիւն տրուեցաւ։ Մովսէս որպէս դատաւոր եւ օրինատու ծառայեց մարմնաւոր Իսրայէլին։ (Ելից 18։13. Մաղաքեայ 4։4) Յիսուս կը ծառայէ որպէս Դատաւոր եւ «Աստուծոյ [հոգեւոր] Իսրայէլին» օրէնքներ եւ պատուիրաններ տուած է։ (Գաղատացիս 6։16. Յովհաննու 15։10) Քրիստոս անձամբ ըսաւ. «Հայրը մէ՛կը չի դատեր, հապա ամէն դատաստան Որդիին տուաւ. որպէսզի ամէնքը պատուեն Որդին, ինչպէս Հայրը կը պատուեն։ Ան որ Որդին չի պատուեր, զանիկա ղրկող Հայրը չի պատուեր»։—Յովհաննու 5։22, 23

Թէ՛ Մովսէսի եւ թէ Յիսուսի վստահուեցաւ Աստուծոյ տան առաջնորդութիւնը։ Վաղեմի Իսրայէլի մէջ, Մովսէս որպէս Աստուծոյ տան գլուխը հաւատարիմ էր։ (Թուոց 12։7) Նմանապէս, Յիսուս Եհովայի հոգեւոր տան որդիներու վրայ Գլուխ նշանակուեցաւ եւ անոր մէջ հաւատարիմ գտնուեցաւ։ Արդարեւ, Յիսուս «հաւատարիմ է[ր] Աստուծոյ, որ զինք դրաւ, ինչպէս Մովսէս ալ՝ անոր բոլոր տանը մէջ։ Վասնզի ինք Մովսէսէն այնչափ աւելի փառքի արժանացաւ, որչափ աւելի պատիւ կ’ունենայ տանը շինողը քան՝ տունը։ ... Մովսէս անոր բոլոր տանը մէջ հաւատարիմ էր ծառայի մը պէս՝ ըսուածներուն վկայ ըլլալու համար. բայց Քրիստոս՝ որդիի մը պէս իր տանը վրայ, որուն տունը մենք ենք, միայն թէ այն համարձակութիւնը եւ յոյսին պարծանքը մինչեւ վերջը հաստատ բռնենք»։—Եբրայեցիս 3։2–6

Նմանութիւններ կային նոյնիսկ Մովսէսի եւ Յիսուսի մահուան միջեւ։ Ինչպէ՞ս։ Այո, Եհովա Մովսէսի մարմինը մէջտեղէն վերցուց, արգելք հանդիսանալով որ մարդիկ զանիկա պղծեն կամ պաշտեն։ (Բ. Օրինաց 34։5, 6. Յուդա 9) Նոյն կերպով, Աստուած անյայտացուց Յիսուսի մարմինը, թոյլ չտալով որ անիկա ապականի եւ հաւատքի գայթակղութեան պատճառ ըլլայ։—Սաղմոս 16։10. Գործք 2։29–31. Ա. Կորնթացիս 15։50

Մարգարէութիւններուն Ուշադրութիւն Ընծայենք

Տեսանք կարգ մը կերպեր որոնք փաստեցին որ Յիսուս Քրիստոս Մովսէսի նման մարգարէ մըն էր։ Այդ գալիք մարգարէին մասին Մովսէսի ուղղուած Աստուծոյ խօսքերը ի՜նչ հոյակապ կերպով կատարուեցան։

Կասկած չկայ թէ Եհովա Մովսէսի նման մարգարէ մը հանելու իր մարգարէական խոստումը կատարեց։ Բ. Օրինաց 18։18–ի խօսքերը իրենց կատարումը ունեցան Յիսուս Քրիստոսի կեանքով եւ փորձառութեամբ։ Այս կատարումը մեզի պատճառ կու տայ վստահութիւն ունենալու Աստուծոյ Խօսքին ուրիշ մարգարէական երեսակներու կատարման վրայ։ Ուստի, միշտ ուշադրութիւն ընծայենք Աստուածաշունչի մարգարէութիւններուն։