Թագաւորութեան հրատարակիչներ գործի լծուած՝ ամբողջ երկրի վրայ

«Ինծի համար վկաներ պիտի ըլլաք ... մինչեւ երկրին ծայրերը»։—ԳՈՐԾՔ 1։8

1. Ըստ Յիսուսին, իր հետեւորդները ի՞նչ պատգամ պիտի ծանուցանէին մեր օրերուն։

ՆԿԱՐԱԳՐԵԼՈՎ այն գործունէութիւնը որու համար Եհովա իր Որդին երկիր ղրկած էր, Յիսուս ըսաւ. «Պէտք է ինծի որ ուրիշ քաղաքներու ալ Աստուծոյ թագաւորութիւնը քարոզեմ»։ (Ղուկաս 4։44) Դարձեալ, երբ կը խօսէր թագաւորական հեղինակութեամբ իր վերադարձին ատեն երկրի վրայ իր աշակերտներուն կատարելիք գործունէութեան մասին, Յիսուս ըսաւ. «Արքայութեան այս աւետարանը բովանդակ աշխարհի մէջ պիտի քարոզուի՝ բոլոր ազգերուն վկայութիւն ըլլալու։ Անկէ յետոյ վերջը պիտի գայ»։—Մատթէոս 24։14

2. (ա) Ինչո՞ւ այդքան կարեւոր է որ Թագաւորութեան պատգամը լայնատարած կերպով ծանուցանուի։ (բ) Իւրաքանչիւրս ի՞նչ հարցումներ պէտք է ընենք մեր անձին։

² Աստուծոյ Թագաւորութեան այս լուրը ինչո՞ւ այսքան կարեւոր է։ Թագաւորութիւնը ինչո՞ւ այսքան լայնածաւալ ծանուցում կը պահանջէ։ Քանի որ անիկա Մեսիական Թագաւորութիւնն է, որ Եհովայի տիեզերական գերիշխանութիւնը պիտի ջատագովէ։ (Ա. Կորնթացիս 15։24–28) Անոր միջոցաւ, Եհովա դատաստան ի գործ պիտի դնէ սատանայական ներկայ դրութեան վրայ եւ երկրի բոլոր ընտանիքները օրհնելու իր խոստումը պիտի կատարէ։ (Ծննդոց 22։17, 18. Դանիէլ 2։44) Թագաւորութեան մասին տրուած վկայութեան շնորհիւ, Եհովա գտած է անոնք՝ զորոնք հետագային ան օծած է իր Որդւոյն հետ ժառանգակիցներ ըլլալու համար։ Թագաւորութեան ծանուցման շնորհիւ, զատումի գործ մըն ալ կատարուած է մեր օրերուն։ (Մատթէոս 25։31–33) Եհովա կ’ուզէ որ իր նպատակը բոլոր ազգերուն ուշադրութեան յանձնուի։ Ան կը փափաքի որ անոնք կեանքը ընտրելու պատեհութիւն ունենան որպէս իր Թագաւորութեան հպատակները։ (Յովհաննու 3։16. Գործք 13։47) Այս Թագաւորութիւնը քարոզելու մէջ լման մասնակցութիւն կը բերէ՞ք։

Հեթանոսաց Ժամանակներուն Վախճանին Ակնկալութիւնը

3. (ա) Տեղին ըլլալով, Ռասըլ ի՞նչ նիւթի մասին խօսեցաւ Աստուածաշունչի ուսումնասիրութեան խումբեր կազմակերպելու համար իր կատարած շրջագայութեան սկիզբը։ (բ) Աստուածաշունչի նախկին Աշակերտները գիտակցեցան որ Աստուծոյ Թագաւորութիւնը իրենց կեանքին մէջ ի՞նչ տեղ պէտք էր գրաւէր։

³ Դիտարան պարբերաթերթին առաջին հրատարակիչը՝ Չարլզ Թէյզ Ռասըլ՝ 1880–ին, Միացեալ Նահանգներու ամբողջ հիւսիս–արեւելքը շրջագայեցաւ Աստուածաշունչի ուսումնասիրութեան խումբեր կազմակերպելը քաջալերելու համար։ Տեղին ըլլալով, ան խօսեցաւ «Աստուծոյ Թագաւորութեան Պատկանող Բաներ» նիւթին շուրջ։ Ինչպէս պարզուած էր Դիտարանի առաջին թիւերուն մէջ, Աստուածաշունչի Աշակերտները (այդ ատեն այսպէս կը կոչուէին Եհովայի Վկաները) հասկցան որ, Աստուծոյ Թագաւորութեան մասնակից ըլլալու մէջ արժանի գտնուելու համար, իրենց գլխաւոր հետաքրքրութիւնը Թագաւորութիւնը պէտք էր ըլլար, իրենց կեանքը, կարողութիւններն ու եկամուտը ուրախութեամբ գործածելով անոր ի սպաս։ Անոնց կեանքին մէջ որեւէ բան երկրորդական տեղ մը պէտք էր գրաւէր։ (Մատթէոս 13։44–46) Անոնց պատասխանատուութեան մաս կը կազմէր Աստուծոյ Թագաւորութեան բարի լուրի մասին ուրիշներու խօսիլը։ (Եսայեայ 61։1, 2) Անոնք ի՞նչ տարողութեամբ ըրին ասիկա, 1914–էն՝ Հեթանոսաց Ժամանակներուն վախճանէն՝ առաջ։

4. Աստուածաշունչի Աշակերտներուն փոքր խումբը ո՞ր տարողութեամբ Աստուածաշունչի գրականութիւններ բաշխեց 1914–էն առաջ։

⁴ 1870–էն մինչեւ 1914, Աստուածաշունչի Աշակերտները յարաբերաբար սակաւաթիւ էին։ 1914–ին, միայն 5,000–ի չափ անհատներ գործօն մասնակցութիւն կը բերէին հանրային վկայութեան։ Բայց ի՜նչ արտակարգ վկայութիւն մըն էր։ 1881–ին, Դիտարանի առաջին հրատարակութենէն միայն երկու տարի ետք, անոնք սկսան բաշխել 162 էջնոց գրականութիւն մը, որու խորագիրն էր՝ Կերակուր՝ Մտածող Քրիստոնեաներու Համար։ Քանի մը ամսուան մէջ, անոնք 1,200,000 օրինակներ բաշխեցին։ Քանի մը տարուան մէջ, տարեկան տասնեակ միլիոնաւոր թղթիկներ բաշխուեցան շատ մը լեզուներով։

5. Որո՞նք էին շրջավաճառները, եւ անոնք ի՞նչ հոգի ցուցաբերեցին։

⁵ Դարձեալ 1881–էն սկսեալ, ոմանք իրենք զիրենք մատչելի ըրին որպէս շրջավաճառ քարոզիչներ։ Ասոնք ներկայ ռահվիրաներուն (լիաժամ քարոզիչներ) նախակարապետներն էին։ Այս շրջավաճառներէն ոմանք, հետիոտն կամ հեծանիւով, իրենց բնակած երկրին գրեթէ ամէն մասին մէջ վկայութիւն տուին։ Ուրիշներ մինչեւ օտար դաշտերու հասան եւ առաջինները եղան բարի լուրը Ֆինլանտայի, Պարպատոսի եւ Պուրմայի (ներկայիս՝ Միյանմար) նման շրջաններ տանելու մէջ։ Անոնք Յիսուս Քրիստոսի եւ իր առաքեալներուն նման միսիոնարական եռանդ ցոյց տուին։—Ղուկաս 4։43. Հռովմայեցիս 15։23–25

6. (ա) Աստուածաշունչի ճշմարտութիւնները տարածելու համար, Եղբայր Ռասըլ որքա՞ն ճամբորդեց։ (բ) Հեթանոսաց Ժամանակներուն վախճանէն առաջ, ուրիշ ի՞նչ կատարուեցաւ բարի լուրի քարոզչութիւնը աւելցնելու համար։

⁶ Եղբայր Ռասըլ անձամբ շա՜տ ճամբորդեց ճշմարտութիւնը տարածելու համար։ Ան բազմիցս Գանատա գնաց. Փանամայի, Ճամայիքայի եւ Քուպայի մէջ դասախօսեց։ Ան տասնեակ ճամբորդութիւններ կատարեց դէպի Եւրոպա. աւետարանչական շրջապտոյտ կատարեց երկրագունդին շուրջ։ Ան նաեւ օտար դաշտեր մարդիկ ուղղարկեց, որպէսզի անոնք բարի լուրի քարոզչութեան նախաձեռնեն եւ զայն գլխաւորեն։ Ատոլֆ Ուէպէր, 1890–ական տարիներու կիսուն, Եւրոպա ղրկուեցաւ, որ իր ծառայութիւնը Զուիցերիայէն սկսելով, հասաւ Ֆրանսա, Իտալիա, Գերմանիա եւ Պելճիքա։ Ի. Ժ. Գաուըրտ Ղարիպեան կղզիներ ղրկուեցաւ։ Ռապըրթ Հալիսթըր, 1912–ին, Արեւելք երթալու նշանակում ստացաւ։ Մասնաւոր թղթիկներ պատրաստուեցան տասնեակ լեզուներով եւ տեղացիներու միջոցով միլիոնաւոր օրինակներ բաշխուեցան Հնդկաստանի, Չինաստանի, Ճաբոնի եւ Քորէայի մէջ։ Եթէ այն ատեն ապրած ըլլայիք, ձեր սիրտն ալ պիտի մղէ՞ր ձեզի որ ձեր համայնքի մարդոց եւ այլուր բարի լուրը հասցնելու համար անխոնջ ջանք թափէիք։

7. (ա) Աւելի լայնածաւալ վկայութիւն տալու համար, օրաթերթերը ինչպէ՞ս գործածուեցան։ (բ) Ի՞նչ էր «Ստեղծագործութեան Լուսատրաման», եւ տարուան մը մէջ միայն, քանի՞ հոգիներ դիտեցին զայն։

⁷ Մինչ Հեթանոսաց Ժամանակները իրենց վախճանին կը մօտենային, օրաթերթեր գործածուեցան Եղբայր Ռասըլի տուած քարոզները արտատպելու համար։ Անոնք շեշտը գլխաւորաբար 1914–ին վրայ չէին դներ, այլ՝ Աստուծոյ նպատակին եւ անոր վստահ կատարման վրայ։ Միեւնոյն ատեն, գրեթէ 2,000 օրաթերթեր կանոնաւորաբար կ’արտատպէին այդ քարոզները, 15,000,000 ընթերցողներու հասնելով։ Ապա 1914–ի սկիզբը, Ընկերութիւնը սկսաւ «Ստեղծագործութեան Լուսատրաման» հանրութեան ցուցադրել։ Իւրաքանչիւրը երկու ժամ տեւող չորս ներկայացումներով, անիկա ստեղծագործութենէն մինչեւ Հազարամեան Աստուածաշունչի ճշմարտութիւններ ներկայացուց։ Տարուան մը մէջ միայն, Հիւսիսային Ամերիկայի, Եւրոպայի, Աւստրալիոյ եւ Նոր Զելանտայի մէջ, ինը միլիոնէ աւելի անհատներ դիտեցին զայն։

8. 1914–ին, Աստուածաշունչի Աշակերտները քանի՞ երկիրներու հասած էին բարի լուրով։

⁸ Ըստ մեր ունեցած արձանագրութիւններուն, 1914–ի վերջին ատենները, աւետարանիչներու այս նախանձախնդիր խումբը Աստուծոյ Թագաւորութիւնը քարոզելը հասցուցած էր 68 երկիրներու։a Բայց անիկա միայն սկիզբ մըն էր։

Հաստատուած Թագաւորութիւնը Նախանձախնդրութեամբ Ծանուցանել

9. Սիտըր Փոյնթի համաժողովներուն, ինչպէ՞ս մասնաւոր թափ մը տրուեցաւ Թագաւորութիւնը վկայելուն։

⁹ 1919–ին, երբ Աստուածաշունչի Աշակերտները Օհայոյի Սիտըր Փոյնթ քաղաքին մէջ հաւաքուած էին, Ժոզէֆ Ռատըրֆորտ, որ այն ատեն Դիտարանի Ընկերութեան նախագահն էր, ըսաւ. «Մեր կոչումն էր եւ տակաւին է Մեսիայի մօտալուտ փառաւոր թագաւորութիւնը ծանուցանել»։ 1922–ին, Սիտըր Փոյնթի երկրորդ համաժողովին, Եղբայր Ռատըրֆորտ շեշտեց այն իրողութիւնը թէ 1914–ին՝ Հեթանոսաց Ժամանակներու վախճանին՝ ‘փառաւորեալ Թագաւորը, իր մեծ զօրութիւնը առած, սկսած է թագաւորել’։ Ապա, ան իր ունկնդիրներուն շեշտակի հարցուց. «Կը հաւատա՞ք որ փառաւորեալ Թագաւորը սկսած է իշխել։ Եթէ այո, ուրեմն դաշտ վերադարձէք, դուք, ո՛վ Բարձրեալ Աստուծոյ որդիներ։ ... Ամենուրէք ծանուցանեցէք պատգամը։ Աշխարհ պէտք է գիտնայ թէ Եհովա Աստուած է եւ թէ Յիսուս Քրիստոս՝ թագաւորներուն Թագաւորը եւ տէրերուն Տէրը։ Ասիկա ամենէն կարեւոր օրն է։ Ահաւասիկ, Թագաւորը կ’իշխէ։ Դուք իր մունետիկներն էք»։

10, 11. Թագաւորութեան ճշմարտութիւնը մարդոց հասցնելու համար ձայնասփիւռը, բարձրախօսներով կառքերը եւ ծանուցագիրները ինչպէ՞ս ազդու կերպով գործածուեցան։

¹⁰ Սիտըր Փոյնթի համաժողովներէն աւելի քան 70 տարիներ անցած են. իսկ շուրջ 80 տարիներէ ի վեր, Եհովա իր գերիշխանութիւնը սկսած է յայտնաբերել իր Որդւոյն Միսիական իշխանութեան միջոցաւ։ Եհովայի Վկաները ո՞ր տարողութեամբ կատարած են Աստուծոյ Խօսքին մէջ իրենց յանձնուած գործունէութիւնը։ Դուք անձնապէս ի՞նչ բաժին կը բերէք անոր մէջ։

¹¹ 1920–ական տարիներուն սկիզբը, ձայնասփիւռը գործածուեցաւ որպէս մատչելի գործիք մը Թագաւորութեան պատգամը լայնօրէն ծանուցանելու համար։ 1930–ական թուականներուն, կարճ եւ երկար ալիքներու վրայ, ինչպէս նաեւ երկրագունդը շրջապատող հեռաձայնային գծերու վրայ, համաժողովի դասախօսութիւններ ձայնասփռուեցան, որոնք Թագաւորութիւնը կը ներկայացնէին որպէս աշխարհի յոյսը։ Բարձրախօսներով սարքաւորուած կառքեր ալ գործածուեցան հանրավայրերու մէջ Աստուածաշունչի ձայնագրուած դասախօսութիւններ լսել տալու համար։ Ապա, 1936–ին, Սկովտիոյ Կլասկօ քաղաքին մէջ, մեր եղբայրները ծանուցագիրներ հագած աշխատանքի վայրերու մէջ շրջագայեցան հանրային դասախօսութիւններ ծանուցանելու համար։ Այդ ատեն, երբ մենք սակաւաթիւ էինք, այս բոլորը շատերուն վկայութիւնը հասցնելու ազդու կերպեր էին։

12. Ինչպէս ցոյց կը տրուի Սուրբ Գրութիւններուն մէջ, անհատապէս վկայութիւն տալու ամենէն ազդու կերպը ո՞րն է։

¹² Անշուշտ, Աստուածաշունչը պարզօրէն ցոյց կու տայ որ մենք՝ Քրիստոնեաներս՝ անհատապէս վկայութիւն տալու պատասխանատուութիւնը ունինք։ Չենք կրնար այս գործունէութիւնը վստահիլ պարզապէս լրագրի յօդուածներուն եւ ձայնասփռումներուն։ Հազարաւոր հաւատարիմ Քրիստոնեաներ՝ այրեր, կիներ ու երիտասարդներ՝ այդ պատասխանատուութիւնը ընդունած են։ Որպէս արդիւնք, տունէ տուն ծառայութիւնը Եհովայի Վկաները յատկորոշող նշան մը եղած է։—Գործք 5։20. 20։20

Ամբողջ Բնակուած Երկրին Հասնիլ

13, 14. (ա) Կարգ մը Վկաներ ինչո՞ւ ուրիշ քաղաքներ կամ երկիրներ փոխադրուեցան իրենց ծառայութիւնը շարունակելու համար։ (բ) Ծննդավայրին մէջ մարդոց հանդէպ սիրալիր հետաքրքրութիւն ունենալը բարի լուրի տարածման ինչպէ՞ս նպաստեց։

¹³ Գիտնալով որ Թագաւորութեան պատգամը ամբողջ բնակուած երկրին մէջ պէտք է քարոզուի, կարգ մը Եհովայի Վկաներ լրջօրէն նկատի առած են թէ անձնապէս ի՛նչ կրնան ընել իրենց համայնքէն դուրս գտնուող շրջաններուն հասնելու համար։

¹⁴ Շատեր ճշմարտութիւնը սորված են իրենց ծննդավայրէն դուրս։ Թէեւ անոնք նիւթական առաւելութիւններու համար փոխադրուած են, սակայն աւելի արժէքաւոր գտած են եւ մղուած՝ ճշմարտութիւնը ուրիշներու հետ բաժնեկցելու համար իրենց ծննդավայրը վերադառնալու։ Այս կերպով, այս դարուն սկիզբը, բարի լուրի քարոզչութիւնը տարածուած է Սքանտինավիա, Յունաստան, Իտալիա, Արեւելեան Եւրոպայի երկիրները եւ շատ մը ուրիշ շրջաններ։ Նոյնիսկ հիմա, 1990–ական թուականներուն, Թագաւորութեան պատգամը նոյն կերպով կ’ընդլայնի։

15. 1920–ական եւ 1930–ական թուականներուն, Եսայեայ 6։8–ի կեցուածքը ունեցողներէն ոմանք ի՞նչ իրագործեցին։

¹⁵ Աստուծոյ Խօսքին խրատները իրենց կեանքին մէջ կիրարկելով, ոմանք իրենք զիրենք մատչելի ըրած են ծառայելու համար հո՛ն ուր բնաւ չեն ապրած։ Ուիլիըմ Պրաուն (յաճախ կոչուած՝ ‘Աստուածաշունչ Պրաուն’), անոնցմէ մէկն էր։ 1923–ին, աւետարանելու գործունէութեան յառաջացման համար, ան Թրինիտատէն գնաց Արեւմտեան Ափրիկէ։ 1930–ական թուականներուն, Ֆրանք եւ Կրէյ Սմիթ, Ռապըրթ Նիսպէթ եւ Տէյվիտ Նորմըն մաս կազմեցին Թագաւորութեան պատգամը մինչեւ Ափրիկէի արեւելեան ծովափը տանողներուն։ Ուրիշներ Հարաւային Ամերիկայի մէջ քարոզչութեան օգնեցին։ 1920–ական տարիներու սկիզբը, Ճորճ Եանկ, Գանատացի մը, Արժանթինի, Պրազիլիոյ, Պոլիվիոյ, Չիլիի եւ Փէրուի մէջ այս գործունէութեան մասնակցեցաւ։ Խուան Միւնյիշ, որ Սպանիոյ մէջ ծառայած էր, Արժանթինի, Չիլիի, Փարակուէի եւ Ուրուկուէի մէջ ալ շարունակեց իր ծառայութիւնը։ Այս բոլորը Եսայեայ 6։8–ի հոգին ցուցաբերեցին. «Ահաւասիկ ես. զի՛ս ղրկէ»։

16. Նախապատերազմեան տարիներուն, բնակչութեան մեծ կեդրոններէն զատ, ո՞ւր վկայութիւն կը տրուէր։

¹⁶ Բարի լուրի քարոզչութիւնը հեռաւոր մասերու ալ կը հասնէր։ Վկաներուն կողմէ քշուած նաւեր այցելեցին Նիուֆաունտլէնտի արտանաւահանգիստները, Հիւսիսային Բեւեռի մէջ Նորվէկեան ծովափը, Խաղաղականի կղզիները, Ասիոյ Հարաւ–արեւելեան նաւահանգիստները։

17. (ա) Մինչեւ 1935, Վկաները քանի՞ երկիրներու մէջ կը քարոզէին։ (բ) Գործունէութիւնը ինչո՞ւ այդ ատեն վերջ չգտաւ։

¹⁷ 1935–ի ատենները, Եհովայի Վկաները արդէն 115 երկիրներու մէջ քարոզելով զբաղած էին, իսկ անոնք 34 ուրիշ երկիրներու ալ հասած էին կա՛մ վկայութիւն տալու համար եղած ճամբորդութիւններով եւ կամ թղթատարական միջոցներով գրականութիւն ղրկելով։ Սակայն, գործունէութիւնը տակաւին չէր վերջացած։ Այդ տարի, Եհովա անոնց աչքերը բացաւ, որպէսզի անոնք նոր աշխարհ մտնելիք «մեծ բազմութիւն մը» հաւաքելու առնչութեամբ իր նպատակը հասկնային։ (Յայտնութիւն 7։9, 10, 14) Տակաւին շա՜տ վկայութիւն պէտք էր տրուէր։

18. Թագաւորութիւնը ծանուցանելու գործունէութեան մէջ, Գաղաադու Դպրոցը եւ Ծառայութեան Մարզումի Դպրոցը ի՞նչ դեր ունեցան։

¹⁸ Նոյնիսկ երբ երկիրը Բ. Աշխարհամարտին մէջ թաղուեցաւ եւ Եհովայի Վկաներուն գրականութեան եւ գործունէութեան վրայ արգելքներ դրուեցան բազմաթիւ երկիրներու մէջ, Դիտարանի Գաղաադու Դպրոցը իր դռները բացաւ ապագացու միսիոնարներ մարզելու համար, որպէսզի անոնք Թագաւորութիւնը հրատարակելու միջազգային աւելի մեծ գործունէութիւն մը կատարեն։ Ցարդ, Գաղաադու շրջանաւարտներ աւելի քան 200 երկիրներու մէջ ծառայած են։ Անոնք միայն գրականութիւն տեղաւորած եւ մեկնած չեն։ Այլ, Աստուածաշունչի ուսումնասիրութիւններ վարած, ժողովներ կազմակերպած եւ մարդիկը մարզած են, որպէսզի անոնք աստուածպետական պատասխանատուութիւններ ստանձնեն։ Վերջերս, Ծառայութեան Մարզումի Դպրոցէն շրջանաւարտ երէցներ եւ օգնական ծառաներ ալ այս ուղղութեամբ կարեւոր կարիքներ լեցնելու օգնած են վեց ցամաքամասերուն մէջ։ Հաստատուն հիմ մը նետուած է յաւելեալ աճումի համար։—Բաղդատել Բ. Տիմոթէոս 2։2։

19. Եհովայի ծառաները ո՞ր տարողութեամբ ընդառաջեցին աւելի մեծ կարիք ունեցող շրջաններու մէջ ծառայելու հրաւէրին։

¹⁹ Ուրիշներ կրնայի՞ն օգնութեան ձեռք մը երկարել չաշխատցուած կարգ մը թաղամասերու հոգ տանելու համար։ 1957–ին, համայն աշխարհի համաժողովներուն, Եհովայի հասուն Վկաներ, անհատներ թէ ընտանիքներ, քաջալերութիւն ստացան աւելի մեծ կարիք ունեցող շրջաններ փոխադրուելու եւ հոն բնակելով իրենց ծառայութիւնը շարունակելու համար։ Հրաւէրը շատ նման էր այն հրաւէրին զոր Աստուած տուաւ Պօղոս առաքեալին, երբ ան տեսիլքի մը մէջ մարդ մը տեսաւ, որ իրմէ կ’աղաչէր. «Մակեդոնիա՛ անցիր եւ օգնէ՛ մեզի»։ (Գործք 16։9, 10) Ոմանք 1950–ական թուականներուն փոխադրուեցան, իսկ ուրիշներ՝ աւելի ետք։ Շուրջ հազար Վկաներ գացին Իրլանտա եւ Գոլոմպիա. հարիւրաւորներ ճամբորդեցին ուրիշ տեղեր։ Տասնեակ հազարաւորներ իրենց երկրին մէջ աւելի մեծ կարիք ունեցող շրջանները փոխադրուեցան։—Սաղմոս 110։3

20. (ա) Մինչեւ 1935, ի՞նչ իրագործուած էր առ ի կատարում Մատթէոս 24։14–ին մէջ Յիսուսի մարգարէութեան։ (բ) Անցեալ քանի մը տարիներուն ընթացքին, ինչպէ՞ս նոր թափ մը տրուեցաւ գործունէութեան։

²⁰ Իր ժողովուրդին վրայ Եհովայի օրհնութիւնը ըլլալով, Թագաւորութիւնը ծանուցանելու գործունէութիւնը կը շարունակէ յառաջ ընթանալ արտակարգ արագութեամբ։ 1935–էն ի վեր, հրատարակիչներու թիւը գրեթէ ութ անգամ աւելցած է, իսկ ռահվիրաներու շարքերը, հրատարակիչներու յաւելումի միջինին հետ համեմատած, 60 առ հարիւր աւելցած են։ Տան Աստուածաշունչի ուսումնասիրութիւնը սկսաւ 1930–ական թուականներուն։ Ներկայիս, աւելի քան չորսուկէս միլիոն ուսումնասիրութիւններ կը վարուին ամէն ամիս։ 1935–էն ի վեր, աւելի քան 15 միլիառ ժամեր յատկացուած են Թագաւորութիւնը քարոզելուն։ Հիմա Թագաւորութեան բարի լուրը կանոնաւորաբար կը քարոզուի 231 երկիրներու մէջ։ Քանի որ Արեւելեան Եւրոպայի եւ Ափրիկէի թաղամասերուն մէջ հիմա աւելի ազատ է քարոզչութիւնը, միջազգային համաժողովները ազդու կերպով տեղի ունեցան հանրութեան դիմաց Թագաւորութեան պատգամը աչքառու կերպով ցուցադրելու համար։ Ինչպէս Եհովա շատոնց խոստացած էր Եսայեայ 60։22–ին մէջ, վստահաբար ան ‘կ’արագացնէ գործունէութիւնը իր ժամանակին’։ Մեզի համար ի՜նչ մեծ առանձնաշնորհում մըն է անոր մէջ բաժին ունենալ։

Կարելի Եղածին Չափ Ամենուն Հասնիլ Բարի Լուրով

21, 22. Անձնապէս ի՞նչ կրնանք ընել մեր ծառայած շրջանին մէջ աւելի ազդու Վկաներ ըլլալու համար։

²¹ Տէրը տակաւին չէ ըսած որ գործունէութիւնը վերջացած է։ Տակաւին հազարաւորներ ճշմարիտ պաշտամունքը կ’ընդունին։ Հետեւաբար կը հարցնենք. Մեր ամէն կարելին կ’ընե՞նք լաւ կերպով գործածելով այն ժամանակը զոր Եհովայի համբերութիւնը թոյլատրած է այս գործունէութեան համար։—Բ. Պետրոս 3։15

²² Ամէն մարդ չի կրնար փոխադրուիլ քիչ աշխատցուած թաղամաս մը։ Բայց լիովին կ’օգտագործէ՞ք ձեր առջեւ դրուած առիթները։ Ձեր գործակիցներուն, ուսուցիչներուն, դասընկերներուն կը վկայէ՞ք։ Ձեր թաղամասի փոփոխութիւններուն համար բարեճշդումներ կ’ընէ՞ք։ Եթէ իրենց գործունէութեան պատճառաւ քիչեր տունը կը գտնուին օրուան ընթացքին, ձեր յայտագիրը փոխա՞ծ էք երեկոյեան այցելելու համար անոնց։ Եթէ անսպասելի այցելուներու մուտքը արգիլուած է կարգ մը շէնքերու մէջ, հեռաձայնով կամ նամակագրութեամբ վկայութիւն կ’ընէ՞ք։ Լաւ կերպով կը հետեւի՞ք ցոյց տրուած հետաքրքրութեան, Աստուածաշունչի ուսումնասիրութիւններ առաջարկելով։ Ձեր ծառայութիւնը լիակատար կերպով կը կատարէ՞ք։—Բաղդատել Գործք 20։21. Բ. Տիմոթէոս 4։5։

23. Երբ Եհովա դիտէ ի՛նչ որ կ’ընենք իր ծառայութեան մէջ, ի՞նչ բան բացայայտ պէտք է ըլլայ մեր պարագային։

²³ Բոլորս ալ մեր ծառայութիւնը կատարենք այնպիսի կերպով մը որ յստակօրէն ցոյց տայ թէ մենք կը գնահատենք այս յիշատակելի օրերուն մէջ իր Վկաները ըլլալը։ Թող որ առանձնաշնորհումը ունենանք ականատես ըլլալու ապականած հին դրութեան վրայ Եհովայի դատաստան ի գործ դնելուն եւ Յիսուս Քրիստոսի փառաւոր Հազարամեայ Իշխանութիւնը բերելուն։

[Ստորանիշ էջ 13]

Վերաքաղ

◻ Թագաւորութեան պատգամը քարոզելը ինչո՞ւ այսքան կարեւոր է։

◻ Բարի լուրը ո՞ր տարողութեամբ քարոզուեցաւ մինչեւ 1914։

◻ Թագաւորութեան հաստատուելէն ի վեր, ի՞նչ լայնատարած վկայութիւն տրուած է։

◻ Ծառայութեան մէջ ի՞նչ բան մեր մասնակցութիւնը արդիւնաբեր կը դարձնէ։

[Նկար՝ էջ 15]

Նոյնիսկ երբ Վկաները սակաւաթիւ էին, Թագաւորութեան պատգամը շատերու հասաւ