Ձեր ընտանիքին մէջ Աստուած առաջին տեղը կը գրաւէ՞
«Քու Տէր Աստուածդ [պէտք է] սիրես քու բոլոր սրտովդ»։—ՄԱՐԿՈՍ 12։29, 30
1. Որքա՞ն կարեւոր է որ մենք Եհովան սիրենք։
«Ո՞ՐՆ է բոլոր պատուիրանքներուն առաջինը», հարցուցած էր դպիր մը Յիսուսի։ Փոխանակ իր անձնական տեսակէտը տալու, Յիսուս անոր հարցումին պատասխանեց Աստուծոյ Խօսքէն հատուած մը՝ Բ. Օրինաց 6։4, 5–ը՝ մէջբերելով։ Ան պատասխանեց. «Բոլոր պատուիրանքներուն առաջինը այս է. ‘Լսէ՛, ո՛վ Իսրայէլ, մեր Տէր Աստուածը մէկ Տէր է. եւ քու Տէր Աստուածդ [պէտք է] սիրես քու բոլոր սրտովդ եւ քու բոլոր անձովդ ու քու բոլոր մտքովդ եւ քու բոլոր զօրութիւնովդ’»։—Մարկոս 12։28–30
2. (ա) Յիսուս ի՞նչ հակառակութիւն պէտք էր դիմագրաւէր։ (բ) Երբեմն ի՞նչ պարագայ կրնայ Եհովան հաճեցնելը դժուարացնել։
2 Յիսուսի առաջին՝ ամենակարեւոր՝ կոչած պատուիրանին հնազանդիլը կը պահանջէ որ մենք Եհովան միշտ հաճեցնող բաներ ընենք։ Յիսուս այսպէս վարուեցաւ, հակառակ անոր որ, առիթով մը, Պետրոս առաքեալ Յիսուսի ընթացքին համար առարկութիւն ըրաւ եւ ուրիշ առիթով մը, իր մտերիմ ազգականներն ալ նոյնը ըրին։ (Մատթէոս 16։21–23. Մարկոս 3։21. Յովհաննու 8։29) Ի՞նչ պիտի ընէք, եթէ նոյնանըման պարագայի մը մէջ գտնուիք։ Ենթադրենք որ ձեր ընտանիքի անդամները ուզեն որ դուք Աստուածաշունչի ձեր ուսումնասիրութիւնը եւ Եհովայի Վկաներուն հետ ձեր ընկերակցութիւնը դադրեցնէք։ Աստուած առաջին տեղը պիտի դնէ՞ք, զինք հաճեցնող բաներ ընելով։ Աստուած առաջին տեղը կը գրաւէ՞, նոյնիսկ երբ ձեր ընտանիքի անդամները իրեն ծառայելու համար ձեր ջանքերուն հակառակին։
Ընտանեկան Հակառակութեան Որոգայթը
3. (ա) Յիսուսի ուսուցումները ի՞նչ հետեւանքներ կրնան ունենալ ընտանիքին վրայ։ (բ) Ընտանիքի անդամները ինչպէ՞ս կրնան ցոյց տալ թէ իրենք որո՛ւ աւելի կը սիրեն։
3 Յիսուս թեթեւի չառաւ այն դժուարութիւնները որոնք կրնան յարուցանուիլ, երբ ընտանիքի անդամներ հակառակին իր ուսուցումները ընդունողին։ «Մարդուն թշնամիները իր ընտանիքը պիտի ըլլան», ըսաւ Յիսուս։ Սակայն, հակառակ այդ տխուր հետեւանքին, Յիսուս ցոյց տուաւ որ ո՛վ առաջին տեղը պէտք էր գրաւէր, ըսելով. «Ան որ հայրը կամ մայրը ինծմէ աւելի կը սիրէ, ինծի արժանի չէ եւ ան որ տղան կամ աղջիկը ինծմէ աւելի կը սիրէ, ինծի արժանի չէ»։ (Մատթէոս 10։34–37) Մենք Եհովա Աստուած առաջին տեղը կը դնենք, «[Աստուծոյ] էութեան՝ բուն պատկերը» եղող իր Որդւոյն՝ Յիսուս Քրիստոսի՝ ուսուցումներուն հետեւելով։—Եբրայեցիս 1։3. Յովհաննու 14։9
4. (ա) Ըստ Յիսուսի, իր հետեւորդը ըլլալը ի՞նչ կը պարփակէ։ (բ) Քրիստոնեաները ի՞նչ առումով իրենց ընտանիքի անդամները պէտք է ատեն։
4 Ուրիշ առիթով մը, երբ կը խօսէր թէ իր ճշմարիտ հետեւորդը ըլլալը իրապէս ի՛նչ կը պարփակէ, Յիսուս ըսաւ. «Եթէ մէկը ինծի գայ, բայց չատէ իր հայրը եւ մայրը ու կինը եւ զաւակները ու եղբայրները եւ քոյրերը, նաեւ իր կեանքն ալ, չի կրնար իմ աշակերտս ըլլալ»։ (Ղուկաս 14։26) Բացայայտ է որ Յիսուս ըսել չէր ուզեր որ իր հետեւորդները բառացիօրէն պէտք էր ատէին իրենց ընտանիքի անդամները, քանի որ ան կը պատուիրէր մարդոց որ նոյնիսկ իրենց թշնամիները սիրեն։ (Մատթէոս 5։44) Այլ, Յիսուս հոս ըսել կ’ուզէր որ իր հետեւորդները իրենց ընտանիքի անդամները Աստուծմէ նուազ պէտք էր սիրէին։ (Բաղդատել Մատթէոս 6։24։) Այդ հասկացողութեան հետ համաձայն, Աստուածաշունչը կ’ըսէ որ Յակոբ Լիան ‘կ’ատէր’ եւ Ռաքէլը կը սիրէր, ուրիշ խօսքով, ան Լիան անոր քրոջ՝ Ռաքէլի՝ չափ չէր սիրեր։ (Ծննդոց 29։30–32) Յիսուս ըսաւ որ նոյնիսկ մեր «կեանք»ը պէտք է ատենք, կամ զայն Եհովայէ նուազ սիրենք։
5. Սատանան ինչպէ՞ս ընտանեկան կարգադրութիւնը խորամանկօրէն կը շահագործէ։
5 Ստեղծիչը եւ Կենսատուն ըլլալով, Եհովա իր բոլոր ծառաներուն ամբողջական նուիրումին արժանի է։ (Յայտնութիւն 4։10) «Ծունկի վրայ [կու գամ] ... Հօրը առջեւ», գրեց Պօղոս առաքեալ, «ուրկէ ամէն ազգատոհմ երկնքի մէջ ու երկրի վրայ անուն կ’առնէ»։ (Եփեսացիս 3։14, 15) Եհովա ընտանեկան կարգադրութիւնը այնպիսի սքանչելի կերպով ստեղծեց որ ընտանիքի անդամները իրար հանդէպ բնական սէր ունենան։ (Գ. Թագաւորաց 3։25, 26. Ա. Թեսաղոնիկեցիս 2։7, 8) Բանսարկու Սատանան, սակայն, կը շահագործէ մեր սիրելիները հաճեցնելու փափաքը՝ որ ընտանեկան բնական սիրոյ արդիւնքն է։ խորամանկօրէն կը շահագործէ։ Ան ընտանեկան հակառակութիւնը կը բոցավառէ եւ ասոր ի տես շատեր Աստուածաշունչի ճշմարտութեան կառչած մնալը դժուար կը գտնեն։—Յայտնութիւն 12։9, 12
Դժուարութիւնը Դիմագրաւեցէք
6, 7. (ա) Մեր ընտանիքի անդամներուն ինչպէ՞ս կարելի է օգնել, որ Աստուածաշունչի ուսումնասիրութեան եւ Քրիստոնէական ընկերակցութեան կարեւորութիւնը գնահատեն։ (բ) Ինչպէ՞ս կրնանք ցոյց տալ որ մեր ընտանիքի անդամները իրապէս կը սիրենք։
6 Ի՞նչ պիտի ընէք, եթէ պարտաւորուիք Աստուած կամ ընտանիքի անդամ մը հաճեցնելու միջեւ ընտրութիւն մը ընել։ Պիտի պատճառաբանէ՞ք որ Աստուած չ’ակնկալեր որ մենք իր Խօսքը ուսումնասիրենք եւ անոր սկզբունքները կիրարկենք, եթէ ատիկա ընտանեկան երկպառակութիւն կը ստեղծէ։ Բայց պահ մը խորհեցէք. եթէ տեղի տաք եւ Աստուածաշունչի ձեր ուսումնասիրութիւնը կամ Եհովայի Վկաներուն հետ ընկերակցութիւնը դադրեցնէք, ձեր սիրելիները ինչպէ՞ս պիտի ըմբռնեն թէ Աստուածաշունչի ճշգրիտ գիտութիւնը մահու կենաց հարց է։—Յովհաննու 17։3. Բ. Թեսաղոնիկեցիս 1։6–8
7 Կրնանք պարագան հետեւեալ կերպով պատկերացնել. Թերեւս ընտանիքի մէկ անդամը ոգելից ըմպելիներու մոլի է։ Իր մոլութիւնը անտեսելը կամ անոր հանդուրժելը իսկական օգուտ պիտի ըլլա՞յ իրեն համար։ Աւելի նախընտրելի՞ պիտի ըլլայ խաղաղութիւնը պահելու համար տեղի տալ եւ բան մը չընել։ Ոչ, հաւանաբար կը համաձայնիք որ լաւագոյն կերպն է փորձել իրեն օգնել որ իր մոլութիւնը յաղթահարէ, նոյնիսկ երբ բարկութեան ու սպառնալիքներու պիտի արժանանաք։ (Առակաց 29։25) Նոյնպէս, եթէ ձեր ընտանիքի անդամները իրապէս կը սիրէք, Աստուածաշունչի ձեր ուսումնասիրութիւնը դադրեցնելու անոնց ջանքերուն տեղի պիտի չտաք։ (Գործք 5։29) Միմիայն հաստատ դիրք բռնելով է որ կրնաք օգնել անոնց որ գնահատեն թէ Քրիստոսի ուսուցումներով ապրիլը մեր իսկ կեանքը կը նշանակէ։
8. Ինչպէ՞ս կ’օգտուինք այն իրողութենէն թէ Յիսուս հաւատարմութեամբ Աստուծոյ կամքը ըրաւ։
8 Երբեմն Աստուած առաջին տեղը դնելը շատ դժուար կրնայ ըլլալ։ Բայց յիշեցէք որ Սատանան Յիսուսի համար ալ Աստուծոյ կամքը ընելը դժուարացուց։ Այսուհանդերձ, Յիսուս բնաւ տեղի չտուաւ. ան մինչեւ տանջանքի ցիցի մը վրայ տառապանքներու տոկաց մեզի համար։ ‘Յիսուս Քրիստոս մեր Փրկիչ’ն է, կ’ըսէ Աստուածաշունչը։ Ան «մեզի համար մեռաւ»։ (Տիտոս 3։6. Ա. Թեսաղոնիկեցիս 5։10) Երախտապարտ չե՞նք որ Յիսուս հակառակութեան տեղի չտուաւ։ Իր զոհաբերական մահը մեր առջեւ բացաւ արդարութեան եւ խաղաղութեան նոր աշխարհի մը մէջ յաւիտենական կեանքի հեռանըկարը, պայմանաւ որ իր թափած արեան վրայ հաւատք գործադրենք։—Յովհաննու 3։16, 36. Յայտնութիւն 21։3, 4
Հաւանական Ճոխ Վարձատրութիւն մը
9. (ա) Քրիստոնեաները ինչպէ՞ս կրնան ուրիշները փրկելու մէջ բաժին բերել։ (բ) Տիմոթէոսի ընտանեկան պարագան ի՞նչ էր։
9 Կ’անդրադառնա՞ք որ դուք ալ կրնաք ուրիշները, մէջը ըլլալով ձեր սիրելի ազգականները, փրկելու մէջ բաժին բերել։ Պօղոս առաքեալ Տիմոթէոսը յորդորեց. «[Սորված բաներուդ] մէջ կեցիր. քանզի այդպէս ընելով՝ քեզ ալ պիտի ապրեցնես ու զանոնք ալ, որոնք քեզի մտիկ կ’ընեն»։ (Ա. Տիմոթէոս 4։16) Տիմոթէոս բաժնուած ընտանիքի մը մէջ կ’ապրէր. իր Յոյն հայրը անհաւատ մըն էր։ (Գործք 16։1. Բ. Տիմոթէոս 1։5. 3։14) Թէեւ չենք գիտեր թէ Տիմոթէոսի հայրը հաւատացեալ մը եղաւ թէ ոչ, սակայն անոր կնոջ՝ Եւնիկէի՝ եւ Տիմոթէոսի հաւատարիմ վարքը մեծապէս քաջալերած ըլլալու էին զինք։
10. Քրիստոնեաները ի՞նչ կրնան ընել ի նպաստ իրենց անհաւատ կողակիցներուն։
10 Սուրբ Գրութիւնները կը յայտնեն որ Աստուածաշունչի ճշմարտութեան հաստատ կերպով կառչող ամուսիններն ու կիները կրնան իրենց ոչ–Քրիստոնեայ կողակիցներուն փրկութեան պատճառ ըլլալ անոնց օգնելով որ հաւատացեալներ ըլլան։ Պօղոս առաքեալ գրեց. «Եթէ եղբայր մը անհաւատ կին ունենայ ու անոր հաճելի ըլլայ իրեն հետ բնակիլ, թող չձգէ զանիկա։ Եւ կին մը որ անհաւատ այր ունենայ ու անոր հաճելի ըլլայ իրեն հետ բնակիլ, թող չձգէ զանիկա։ Քանզի ի՞նչ գիտես դուն, ո՛վ կին, թերեւս քու այրդ պիտի ապրեցնես [փրկես (ՆԱ)]. կամ դուն ի՞նչ գիտես, ո՛վ այր, թերեւս քու կինդ պիտի ապրեցնես [փրկես (ՆԱ)]»։ (Ա. Կորնթացիս 7։12, 13, 16) Պետրոս առաքեալ բացատրեց թէ կիները ի՛նչպէս, կերպով մը, կրնան իրենց ամուսինները փրկել, երբ յորդորեց. «Կիները հնազանդ պէտք է ըլլան իրենց այրերուն, որպէսզի եթէ ոմանք խօսքին հնազանդ չըլլան ալ, առանց խօսքի շահուին իրենց կիներուն վարուելակերպովը»։—Ա. Պետրոս 3։1
11, 12. (ա) Հազարաւոր Քրիստոնեաներ ի՞նչ վարձատրութիւն ստացած են, եւ անոնք ի՞նչ ըրած են զայն ստանալու համար։ (բ) Իր հաւատարիմ համբերութեան համար վարձատրուած ընտանիքի մը մէկ անդամին փորձառութիւնը պատմեցէք։
11 Վերջին տարիներուն, հազարաւոր անհատներ Եհովայի Վկաներ եղած են, իրենց Վկայ ազգականներուն Քրիստոնէական գործունէութեան ամիսներ եւ նոյնիսկ տարիներ հակառակելէ ետք։ Ասիկա ի՜նչ վարձատրութիւն մըն է այն Քրիստոնեաներուն համար, որոնք հաստատ մնացած են, իսկ ի՜նչ օրհնութիւն մը՝ նախկին հակառակորդներուն համար։ 74 տարեկան Քրիստոնեայ երէց մը յուզումով պատմեց. «Յաճախ շնորհակալութիւն կը յայտնեմ կնոջս ու զաւակներուս որոնք ճշմարտութեան կառչած մնացին տարիներու ընթացքին, երբ ես անոնց հակառակեցայ»։ Ան ըսաւ որ ինք երեք տարի յամառօրէն մերժած էր, նոյնիսկ թոյլ չէր տուած որ իր կինը Աստուածաշունչին մասին խօսի իրեն։ «Բայց ան հոգեբանութիւն գործածեց», ըսաւ ան, «եւ ան սկսաւ ինծի վկայել, մինչ ոտքերս կը մարձէր։ Որքա՜ն երախտապարտ եմ որ հակառակութեանս տեղի չտուաւ»։
12 Իր ընտանիքին հակառակած ուրիշ ամուսին մը գրեց. ‘Կինս ճշմարտութիւնը ընդունելէ ետք, ես իր ամենագէշ թշնամին եղայ. իրեն կը սպառնայի եւ ամէն օր կը կռուէինք. այսինքն, միշտ ես կը սկսէի կռիւը։ Բայց ի զուր. կինս Աստուածաշունչին կառչած կը մնար։ Այսպիսով, տասներկու տարիներ անցան, որոնց ընթացքին, ես ճշմարտութեան դէմ եւ կնոջս ու զաւկիս դէմ վայրագօրէն պայքարեցայ։ Երկուքին համար, ես մարմնաւորուած Բանսարկուն էի’։ Վերջապէս, այս մարդը սկսաւ իր վարքը վերլուծել։ ‘Անդրադարձայ որ որքա՜ն նողկալի էի’, բացատրեց ան։ ‘Աստուածաշունչը կարդացի եւ իր խրատին շնորհիւ, այժմ մկրտուած Վկայ մըն եմ’։ Պահ մը խորհեցէք իր կնոջ մեծ վարձատրութեանը մասին, այո, իր ամուսնոյն հակառակութեան 12 տարի հաւատարմօրէն համբերելով, ան օգնեց որ ‘իր այրը փրկուի’։
Յիսուսէ Սորվինք
13. (ա) Ամուսիններ ու կիներ Յիսուսի կենցաղէն ի՞նչ մեծ դաս մը պէտք է սորվին։ (բ) Աստուծոյ կամքին ենթարկուիլը դժուար գտնող անհատներ ինչպէ՞ս կրնան Յիսուսի օրինակէն օգտուիլ։
13 Գլխաւոր դասը զոր ամուսիններ ու կիներ Յիսուսի կենցաղէն պէտք է սորվին, Աստուծոյ հանդէպ հնազանդութեան դասն է։ «Ես միշտ անոր հաճելի եղած բաները կ’ընեմ», ըսաւ Յիսուս։ «Ես իմ կամքս չեմ փնտռեր, հապա անոր կամքը որ զիս ղրկեց»։ (Յովհաննու 5։30. 8։29) Նոյնիսկ երբ անգամ մը, Աստուծոյ կամքին մասնայատուկ մէկ երեսակը անախորժ գտաւ, Յիսուս հնազանդեցաւ։ «Եթէ կ’ուզես, այս գաւաթը ինծմէ անցուր», աղօթեց ան։ Բայց ան շուտով աւելցուց. «Բայց ոչ թէ իմ կամքս՝ հապա քուկդ թող ըլլայ»։ (Ղուկաս 22։42) Յիսուս Աստուծմէ չխնդրեց որ Իր կամքը փոխէ. ան ցոյց տուաւ որ իրապէս Աստուած կը սիրէր, հնազանդութեամբ ենթարկուելով իրեն հանդէպ Աստուծոյ կամքը ի՛նչ ալ ըլլար։ (Ա. Յովհաննու 5։3) Յիսուսի նման, Աստուծոյ կամքը միշտ առաջին տեղը դնելը շատ կարեւոր է ո՛չ միայն ամուրիութեան մէջ յաջողելու համար, այլ նաեւ՝ ամուսնական ու ընտանեկան կեանքին մէջ։ Նկատի առնենք թէ ի՛նչու։
14. Կարգ մը Քրիստոնեաներ ինչպէ՞ս անպատշաճ կերպով կը պատճառաբանեն։
14 Ինչպէս նախապէս նշեցինք, երբ Աստուած առաջին տեղը դնեն, հաւատացեալները կը ջանան իրենց անհաւատ կողակիցներուն հետ մնալ եւ յաճախ կը կարողանան օգնել անոնց որ փրկութեան ճամբան բռնեն։ Նոյնիսկ երբ երկու կողակիցներն ալ հաւատացեալներ են, անոնց ամուսնութիւնը կրնայ իտէալական ըլլալէ շատ հեռու ըլլալ։ Մեղաւոր հակումներու պատճառաւ, ամուսիններ ու կիներ իրար հանդէպ միշտ սիրալիր խորհուրդներ չունին։ (Հռովմայեցիս 7։19, 20. Ա. Կորնթացիս 7։28) Ոմանք նոյնիսկ ուրիշ կողակից մը փնտռելու կը նային, ամուսնալուծուելու համար սուրբ գրային հիմ չունենալով հանդերձ։ (Մատթէոս 19։9. Եբրայեցիս 13։4) Անոնք կը խորհին որ ասիկա իրենց համար լաւագոյն բանն է եւ որ ամուսիններ ու կիներ իրարու հետ մնալու Աստուծոյ կամքը շատ դժուար է։ (Մաղաքեայ 2։16. Մատթէոս 19։5, 6) Ասիկա անկասկած մարդկային մտածելակերպ մըն է եւ ոչ թէ Աստուծոյ խորհուրդը։
15. Աստուած առաջին տեղը դնելը ինչո՞ւ պաշտպանութիւն մըն է։
15 Աստուած առաջին տեղը դնելը ի՜նչ պաշտպանութիւն մըն է։ Այսպէս ընող ամուսնացած զոյգեր պիտի ջանան միացած մնալ եւ իրենց խնդիրները լուծել Աստուծոյ Խօսքին խրատները կիրարկելով։ Այսպիսով, անոնք ամէն տեսակ սրտացաւէ կը խուսափին, որ յառաջ կու գայ, երբ իր կամքը անտեսուի։ (Սաղմոս 19։7–11) Ասիկա կը պատկերացուի ամուսնալուծուելու սեմին գտնուած երիտասարդ զոյգի մը պարագայով, որ որոշեց Աստուածաշունչի խրատին հետեւիլ։ Տարիներ ետք, երբ իր ամուսնութեան մէջ վայելած ուրախութեան մասին կը մտածէր, կինը ըսաւ. «Երբ նստիմ ու խորհիմ որ այս ամբողջ տարիներուն ընթացքին ամուսինէս զատուած պիտի ապրէի, չեմ կրնար արցունքներս զսպել։ Ապա Եհովա Աստուծոյ կ’աղօթեմ եւ շնորհակալութիւն կը յայտնեմ իրեն իր խրատներուն ու առաջնորդութեանը համար, որոնք այսպիսի ուրախ յարաբերութեան մէջ միացուցին մեզ»։
Ո՛վ Ամուսիններ եւ Կիներ—Քրիստոսը Ընդօրինակեցէք
16. Յիսուս ի՞նչ օրինակ հանդիսացաւ թէ՛ ամուսիններուն եւ թէ կիներուն։
16 Յիսուս, որ Աստուած միշտ առաջին տեղը կը դնէր, հոյակապ օրինակ հանդիսացաւ թէ՛ ամուսիններուն եւ թէ կիներուն, իսկ անոնք լաւ կ’ընեն, եթէ խոր ուշադրութիւն ընծայեն անոր։ Ամուսիններուն հրաւէր կը տրուի, որ Յիսուսի քնքուշ գլխաւորութիւնը ընդօրինակեն, զոր ան ի գործ կը դնէ Քրիստոնէական ժողովքին անդամներուն վրայ։ (Եփեսացիս 5։23) Իսկ Քրիստոնեայ կիները կրնան Աստուծոյ ենթարկուելու Յիսուսի անթերի օրինակէն սորվիլ։—Ա. Կորնթացիս 11։3
17, 18. Յիսուս ի՞նչ կերպերով լաւ օրինակ հանդիսացաւ ամուսիններուն։
17 Աստուածաշունչը կը պատուիրէ. «Այրե՛ր, սիրեցէ՛ք ձեր կիները, ինչպէս Քրիստոս ալ սիրեց եկեղեցին ու իր անձը մատնեց անոր համար»։ (Եփեսացիս 5։25) Յիսուս իր հետեւորդներէն բաղկացած իր ժողովքին հանդէպ իր սէրը գլխաւորաբար ցոյց տուաւ անոնց մտերիմ բարեկամը ըլլալով։ «Ես ձեզ բարեկամ անուանեցի», ըսաւ Յիսուս, «վասնզի այն ամէն բաները որոնք իմ Հօրմէս լսեցի, ձեզի իմացուցի»։ (Յովհաննու 15։15) Խորհեցէք թէ Յիսուս իր աշակերտներուն հետ խօսելու համար որքա՜ն ժամանակ յատկացուց, անոնց հետ բազմաթիւ խօսակցութիւններ ունենալով, եւ թէ որքա՜ն մեծ վստահութիւն ունէր անոնց վրայ։ Ատիկա սքանչելի օրինակ մը չէ՞ ամուսիններուն համար։
18 Յիսուս իր աշակերտներով իրապէս կը հետաքրքրուէր եւ անոնց հանդէպ անկեղծ սէր ունէր։ (Յովհաննու 13։1) Երբ անոնք իր ուսուցումները լաւ չըմբռնէին, ան համբերութեամբ անոնց առանձին ժամանակ կը տրամադրէր, հարցերը պարզելու համար։ (Մատթէոս 13։36–43) Ո՛վ ամուսիններ, ձեր կնոջ հոգեւոր բարօրութիւնը նոյնքան կարեւո՞ր է ձեզի համար։ Անոր հետ ժամանակ կ’անցընէ՞ք, վստահ ըլլալով որ ձեր երկուքին մտքին ու սրտին մէջ Աստուածաշունչի ճշմարտութիւնները յստակ են։ Յիսուս իր առաքեալներուն կ’ընկերակցէր ծառայութեան մէջ, թերեւս իւրաքանչիւրը մարզելով։ Դուք ալ ձեր կնոջ կ’ընկերակցի՞ք ծառայութեան մէջ, տունէ–տուն այցելելով եւ Աստուածաշունչի ուսումնասիրութիւններ վարելով։
19. Իր առաքեալներուն յաճախակի տկարութիւններուն հետ Յիսուսի վարուած կերպը ինչպէ՞ս օրինակ կը հանդիսանայ ամուսիններուն։
19 Մանաւանդ իր առաքեալներուն անկատարութիւնները ձեռք առնելու մէջ է որ Յիսուս իրական օրինակ հայթայթեց ամուսիններուն։ Իր առաքեալներուն հետ իր ըրած վերջին ընթրիքի ընթացքին, ան տակաւին անոնց մէջ մրցակցութեան հոգի մը նշմարեց։ Յիսուս կոպտօրէն քննադատե՞ց զանոնք։ Ոչ, այլ խոնարհաբար իւրաքանչիւրին ոտքերը լուաց։ (Մարկոս 9։32–36. 10։35–45. Յովհաննու 13։2–17) Այսպիսի համբերութիւն կը ցուցաբերէ՞ք ձեր կնոջ հանդէպ։ Փոխանակ կրկնուող տկարութեան մը մասին գանգատ յայտնելու, համբերութեամբ կը փորձէ՞ք անոր օգնել եւ անոր սրտին հասնիլ ձեր օրինակով։ Առաքեալներուն նման, կիները հաւանաբար վերջապէս ընդառաջեն այսպիսի սիրալիր կարեկցութեան։
20. Քրիստոնեայ կիները ի՞նչ բան բնաւ պէտք չէ մոռնան, եւ ո՞վ օրինակ կը հանդիսանայ անոնց։
20 Կիներն ալ օրինակ պէտք է առնեն Յիսուսը, որ բնաւ չմոռցաւ որ «Քրիստոսին գլուխը՝ Աստուած» է։ Ան միշտ իր երկնաւոր Հօրը կ’ենթարկուէր։ Նոյնպէս, կիները պէտք չէ մոռնան որ «կնոջ գլուխը՝ այր մարդ»ն է, այո, որ իրենց ամուսինը իրենց գլուխն է։ (Ա. Կորնթացիս 11։3. Եփեսացիս 5։23) Պետրոս առաքեալ Քրիստոնեայ կիները յորդորեց որ նկատի առնեն նախկին ժամանակներու «սուրբ կիներ»ու օրինակը, յատկապէս Սառայի օրինակը, որ «հնազանդ էր Աբրահամին եւ զանիկա տէր կը կոչէր»։—Ա. Պետրոս 3։5, 6
21. Աբրահամի եւ Սառայի ամուսնութիւնը ինչո՞ւ յաջողութիւն մըն էր, իսկ Ղովտի եւ իր կնոջ ամուսնութիւնը՝ ձախողութիւն մը։
21 Սառան ակներեւաբար բարգաւաճ քաղաքի մը մէջ հանգստաւէտ տուն մը լքեց օտար երկրի մը մէջ վրաններու տակ ապրելու համար։ Ինչո՞ւ։ Քանի որ ան այդ ապրելակե՞րպը կը նախընտրէր։ Հաւանաբար ո՛չ։ Քանի որ իր ամուսի՞նը խնդրած էր իրմէ որ երթայ։ Անտարակոյս ասիկա ազդակ մըն էր, քանի որ Սառա կը սիրէր ու կը յարգէր Աբրահամը, անոր բարեպաշտ յատկութիւններուն համար։ (Ծննդոց 18։12) Բայց իր ամուսինին ընկերակցելուն գլխաւոր պատճառներն էին Եհովայի հանդէպ իր սէրը եւ Աստուծոյ առաջնորդութեան հետեւելու իր սրտանց փափաքը։ (Ծննդոց 12։1) Ան Աստուծոյ հնազանդելուն մէջ հաճոյք կը գտնէր։ Միւս կողմէն, Ղովտին կինը Աստուծոյ կամքը ընելու մէջ վարանեցաւ եւ հետեւաբար, ան Սոդոմի իր բնակավայրին մէջ իր ետին ձգած բաներուն կարօտով նայեցաւ։ (Ծննդոց 19։15, 25, 26. Ղուկաս 17։32) Աստուծոյ հանդէպ իր անհնազանդութեան պատճառաւ, այդ ամուսնութիւնը ի՜նչ եղերական վախճան մը ունեցաւ։
22. (ա) Ընտանիքի անդամները իմաստունօրէն ի՞նչ անձնաքննութիւն պէտք է կատարեն։ (բ) Մեր յաջորդ ուսումնասիրութեան մէջ ի՞նչ նիւթ նկատի պիտի առնենք։
22 Ուստի, որպէս ամուսին կամ կին, կենսական է որ դուք ձեզի հարց տաք. ‘Մեր ընտանիքին մէջ Աստուած առաջին տեղը կը գրաւէ՞։ Իրապէս կը ջանա՞մ կատարել այն ընտանեկան դերը զոր Աստուած վստահած է ինծի։ Անկեղծ ջանք կը թափե՞մ կողակիցս սիրելու եւ անոր օգնելու, որ Եհովայի հետ լաւ յարաբերութիւն ձեռք ձգէ կամ պահպանէ’։ Շատ մը ընտանիքներու մէջ զաւակներ ալ կան։ Յաջորդ ուսումնասիրութեան մէջ, ծնողներու դերը եւ անոնց ու անոնց զաւակներուն համար Աստուած առաջին տեղը դնելու կարիքը նկատի պիտի առնենք։
Կը յիշէ՞ք
◻ Յիսուսի ուսուցումները ի՞նչ հետեւանքներ կրնան ունենալ շատ մը ընտանիքներու վրայ։
◻ Հազարաւոր հաստատամիտ Քրիստոնեաներ ի՞նչ վարձատրութիւն ստացած են։
◻ Ի՞նչ բան պիտի օգնէ կողակիցներուն որ անբարոյութենէ ու ամուսնալուծումէ խուսափին։
◻ Ամուսիններ Յիսուսի օրինակէն ի՞նչ կրնան սորվիլ։
◻ Կիներ ինչպէ՞ս կրնան ուրախ ամուսնութեան մը նպաստել։
[Նկար՝ էջ 8]
Սառա իր ամուսնութեան յաջողութեան ինչպէ՞ս նպաստեց։