Ձեր ընտանեկան կեանքէն ներս աստուածային խաղաղութիւն հետապնդեցէք
«Տէրոջը տուէ՛ք, ո՛վ ժողովուրդներու տոհմեր, Տէրոջը տուէք փառք ու զօրութիւն»։—ՍԱՂՄՈՍ 96։7
1. Եհովան ընտանեկան կեանքին ի՞նչպիսի սկիզբ մը տուաւ։
ԵՀՈՎԱ ընտանեկան կեանքին խաղաղ եւ ուրախ սկզբնաւորութիւն մը տուաւ, երբ առաջին մարդն ու առաջին կինը ամուսնութեամբ միացուց։ Իրականութեան մէջ Ադամ ա՛յնքան ուրախ էր, որ զայն արտայայտեց արձանագրուած առաջին բանաստեղծութեամբ. «Հիմա ասիկա ոսկորէս ոսկոր ու մարմինէս մարմին է. ասիկա կին կոչուի, քանզի իր այրէն առնուեցաւ»։—Ծննդոց 2։23
2. Իր երկրային որդիներուն ուրախութիւն պատճառելէ զատ, Եհովա ի՞նչ ի մտի ունէր ամուսնութեան նկատմամբ։
2 Երբ Աստուած ամուսնութիւնը եւ ընտանեկան կարգադրութիւնը հաստատեց, անոր միակ նպատակը իր երկրային որդիներուն ուրախութիւն պատճառել չէր։ Ան կ’ուզէր որ անոնք իր կամքը կատարէին։ Աստուած առաջին զոյգին ըսաւ. «Աճեցէք ու շատցէք ու երկիրը լեցուցէք եւ անոր տիրեցէք ու ծովու ձուկերուն ու երկնքի թռչուններուն եւ երկրի վրայ սողացող բոլոր կենդանիներուն իշխեցէք»։ (Ծննդոց 1։28) Արդարեւ, վարձահատոյց նշանակում մը։ Ադամ, Եւա եւ իրենց ծնելիք զաւակները որքա՜ն ուրախ պիտի ըլլային, եթէ առաջին զոյգը հնազանդութեամբ Եհովայի կամքը կատարէր։
3. Ընտանիքներէ ի՞նչ պահանջուած է, որպէսզի աստուածպաշտութեամբ ապրին։
3 Նոյնիսկ ներկայիս, ընտանիքներ աւելի ուրախ կ’ըլլան, եթէ միասնաբար Աստուծոյ կամքը կատարեն։ Իսկ այսպիսի հնազանդ ընտանիքներ, ի՜նչ հոյակապ ակնկալութիւններ ունին։ Պօղոս առաքեալ հետեւեալը գրեց. «Աստուածպաշտութիւնը ամէն բանի օգտակար է, որ թէ՛ ներկայ եւ թէ՛ ապագայ կեանքին խոստումը ունի»։ (Ա. Տիմոթէոս 4։8) Իրապէս աստուածապաշտ ընտանիքներ, Եհովայի Խօսքին սկզբունքներուն կը հետեւին եւ իր կամքը կը կատարեն։ Անոնք աստուածային խաղաղութիւն կը հետապնդեն եւ ‘ներկայ կեանքին’ մէջ ուրախութիւն կը գտնեն։
Ընտանեկան Կեանքը Վտանգուած
4, 5. Ինչո՞ւ կրնանք ըսել որ ներկայիս ընտանեկան կեանքը վտանգուած է համայն աշխարհի մէջ։
4 Անշուշտ, ամէն ընտանիքի մէջ խաղաղութիւն եւ ուրախութիւն չենք գտներ։ Բնակչութեան Խորհուրդ կոչուած ժողովրդագրական հաստատութեան մէկ ուսումնասիրութիւնը մէջբերելով, Տը Նիւ Եորք Թայմզ–ը կը նշէ. «Թէ՛ աղքատ եւ թէ հարուստ երկիրներու մէջ, ընտանեկան կեանքը հիմնական փոփոխութեան կ’ենթարկուի»։ Այս ուսումնասիրութեան մէկ հեղինակին խօսքերը մէջբերուած են, որ կ’ըսէ. «Առասպել դարձած է ընտանիքը կայուն եւ շաղկապուած միաւոր մը ըլլալուն գաղափարը, ուր հայրը կը ծառայէ որպէս դրամ հայթայթող, իսկ մայրը՝ զգացական հարցերուն հոգ տանող։ Իրողութիւնը այն է որ ամուրի մայրերու, ամուսնալուծման տոկոսի բարձրացումի եւ աւելի պզտիկ ընտանիքներ ունենալու հոսանքը . . . համայն աշխարհի մէջ . . . տարածուած է»։ Այսպիսի հոսանքներու պատճառաւ, միլիոնաւոր ընտանիքներ անկայուն են ու խաղաղութենէ եւ ուրախութենէ զուրկ, իսկ շատեր ալ կը քայքայուին։ Սպանիոյ մէջ, քսաներորդ դարու վերջին տասնամեակին, միջին հաշուով 8 ամուսնութիւններէն մէկը ամուսնալուծումով կը վերջանար. հսկայական վերելք մը 25 տարի առաջուընէ, երբ միջինը՝ 100–էն 1 էր։ Եւրոպայի մէջ, ամուսնալուծման բարձրագոյն տոկոսը ունի Անգլիան, ուր 10 ամուսնութենէն 4–ը կը ձախողի։ Դարձեալ այդ երկրին մէջ մէկ ծնողով ընտանիքներուն թիւը մեծ վերելք մը արձանագրած է։
5 Այնպէս կը թուի որ ոմանք անհամբեր կը սպասեն որ ամուսնալուծուին։ Ճափոնի Թոքիօ քաղաքին մէջ շատեր կը խուժեն՝ «Կապերը Խզելու Սրբավայրը»։ Շինթոյական այս տաճարը կ’ընդունի ամուսնալուծման եւ ուրիշ անփափաքելի փոխյարաբերութիւններ խզելու համար կատարուած խնդրանքները։ Իւրաքանչիւր երկրպագու փայտէ բարակ սալիկի մը վրայ կը գրէ իր խնդրանքը, զայն կը կախէ սրբավայրի շրջապատին վրայ, եւ պատասխանի համար աղօթք կը մատուցանէ։ Թոքիոյի մէջ օրաթերթ մը կ’ըսէ, որ երբ մէկ դար առաջ այս սրբավայրը հիմնուեցաւ, «հարուստ վաճառականներու կիներ կու գային եւ աղօթքներ կը գրէին, խնդրելով որ իրենց ամուսինը իրենց սիրուհիները ձգեն եւ իրենց վերադառնան»։ Սակայն ներկայիս, խնդրագրերէն շատերը ամուսնալուծման համար են եւ ո՛չ թէ՝ հաշտութեան։ Կասկած չկայ որ համայն աշխարհի մէջ ընտանեկան կեանքը վտանգուած է։ Ասիկա պէտք է զարմացնէ՞ Քրիստոնեաները։ Ո՛չ. քանի որ Աստուածաշունչը ընտանեկան կեանքի ներկայ տագնապին պատճառները կու տայ մեզի։
Ընտանեկան Տագնապին Պատճառը Ի՞նչ Է
6. Ընտանեկան ներկայ տագնապը ի՞նչ կապակցութիւն ունի Ա. Յովհաննու 5։19–ի հետ։
6 Ընտանեկան ներկայ տագնապին պատճառներէն մէկը հետեւեալն է. «Բոլոր աշխարհ չարին մէջ [«զօրութեան ներքեւ», ՆԱ] է»։ (Ա. Յովհաննու 5։19) «Չար»էն՝ Բանսարկու Սատանայէն՝ ի՞նչ կրնանք ակնկալել։ Ան ամբարիշտ, անբարոյ ստախօս մըն է։ (Յովհաննու 8։44) Չենք զարմանար որ իր աշխարհը խաբկանքի ու անբարոյութեան մէջ կը թաւալի, ինչ որ կը քանդէ ընտանեկան կեանքը։ Աստուծոյ կազմակերպութենէն դուրս, սատանայական ազդեցութիւնը կը սպառնայ ոչնչացնել Եհովայի ամուսնական հաստատութիւնը եւ վերջ դնել ընտանեկան խաղաղ կեանքին։
7. Ընտանիքներ ի՞նչպէս կրնան ազդուիլ այս վերջին օրերուն շատերուն ցուցաբերած նկարագրի գծերէն։
7 Ներկայիս մարդկութիւնը հարուածող ընտանեկան խնդիրներուն ուրիշ մէկ պատճառը կը գտնենք Բ. Տիմոթէոս 3։1-5–ի մէջ։ Հոն արձանագրուած Պօղոսի մարգարէութիւնը ցոյց կու տայ որ մենք «վերջին օրեր»ուն մէջ կ’ապրինք։ Ընտանիքներ չեն կրնար խաղաղութեան մէջ եւ ուրախ ըլլալ, երբ իրենց անդամները «անձնասէր, արծաթասէր, անբարտաւան, հպարտ, հայհոյիչ, ծնողներու անհնազանդ, ապերախտ, անսուրբ, անգութ, անհաշտ, բանսարկու, անժուժկալ, դաժանաբարոյ, բարին չսիրող, մատնիչ, յանդուգն, գոռոզ, աւելի հեշտասէր քան թէ աստուածասէր [են]. որոնք աստուածպաշտութեան կերպարանքը ունին, բայց անոր զօրութիւնը ուրացած են»։ Ընտանիք մը չի կրնար ամբողջովին ուրախ ըլլալ, երբ նոյնիսկ անդամներէն մէկը սէր չունենայ կամ անհաւատարիմ ըլլայ։ Ընտանեկան կեանքը ի՞նչպէս կրնայ խաղաղ ըլլալ երբ տան մէջ մէկը դաժանաբարոյ ու անհաշտ է։ Աւելի վատ, ինչպէ՞ս խաղաղութիւն եւ ուրախութիւն կրնայ ըլլալ, երբ ընտանիքի անդամները աւելի հեշտասէր քան թէ աստուածասէր են։ Ասոնք Սատանայի կողմէ ղեկավարուած աշխարհի մարդոց նկարագրի գծերն են։ Զարմանալի չէ որ այս վերջին օրերուն, ընտանեկան ուրախութիւնը պատրանք մը դարձած է։
8, 9. Զաւակներուն վարքը ի՞նչ ազդեցութիւն կրնայ ունենալ ընտանեկան ուրախութեան վրայ։
8 Շատ մը ընտանիքներու մէջ խաղաղութեան եւ ուրախութեան պակասին պատճառը կրնայ ըլլալ նաեւ զաւակներուն վարքը։ Երբ Պօղոս վերջին օրերու իրավիճակին մասին կը խօսէր, ան մարգարէացաւ որ շատ զաւակներ ծնողներու անհնազանդ պիտի ըլլային։ Եթէ դուք պատանի մըն էք, ձեր վարուելակերպը ձեր ընտանիքը աւելի խաղաղ եւ ուրախ կը դարձնէ՞։
9 Կարգ մը զաւակներու վարքը օրինակելի չէ։ Օրինակ, պատանի մը իր հօրը հետեւեալ անհաճելի ու անազնիւ նամակը գրեց. «Եթէ ինծի Աղեքսանդրիա չտանիս, քեզի այլեւս նամակ պիտի չգրեմ, հետդ պիտի չխօսիմ եւ մնաք բարով պիտի չտամ, իսկ եթէ առանց ինծի երթաս Աղեքսանդրիա, այլեւս բնաւ ձեռքդ չեմ բռներ եւ բարեւ չեմ տար քեզի։ Եթէ ինծի չտանիս ասիկա պիտի պատահի . . . Բայց կ’աղաչեմ, ինծի [քնար] մը ղրկէ։ Եթէ չղրկես, պիտի չուտեմ եւ պիտի չխմեմ։ Ա՛յսքան»։ Ասիկա այժմէական կը հնչէ՞։ Սակայն այդ նամակը, տղեկ մը գրած է իր հօրը՝ հին Եգիպտոսի մէջ, աւելի քան 2,000 տարիներ առաջ։
10. Պատանիներ ի՞նչպէս կրնան իրենց ընտանիքներուն օգնել որ աստուածային խաղաղութիւն հետապնդեն։
10 Եգիպտացի այդ տղեկին կեցուածքը ընտանեկան խաղաղութեան չի նպաստեր։ Այս վերջին օրերուն, ասկէ աւելի լուրջ բաներ կը պատահին ընտանիքներու մէջ։ Բայց դուք, ո՛վ պատանիներ, կրնաք օգնել որ ձեր ընտանիքը աստուածային խաղաղութիւն հետապնդէ։ Ի՞նչպէս։ Աստուծոյ Խօսքին այս պատուէրին հնազանդելով. «Ո՛րդիներ, ամէն բանի մէջ հնազանդ եղէք ձեր ծնողներուն, վասն զի այն է Տէրոջը առջեւ հաճելի»։—Կողոսացիս 3։20
11. Ծնողներ ի՞նչպէս կրնան իրենց զաւակներուն օգնել որ Եհովայի հաւատարիմ ծառաներ ըլլան։
11 Իսկ ի՞նչ կրնայ ըսուիլ ձեր մասին, ո՛վ ծնողներ։ Ձեր զաւակներուն սիրալիր կերպով օգնեցէք որ Եհովայի հաւատարիմ ծառաներ ըլլան։ Առակաց 22։6–ը կ’ըսէ. «Կրթէ՛ մանուկը իր ճամբան սկսած ատենը՝ որպէս զի իր ծերութեան ատենն ալ անկէ չխոտորի»։ Սուրբ գրային լաւ ուսուցումով եւ ծնողական օրինակով, շատ տղաք եւ աղջիկներ երբ մեծնան՝ չեն խոտորիր շիտակ ճամբէն։ Անշուշտ, շատ բան սուրբ գրային մարզումին որակէն եւ տարողութենէն, ինչպէս նաեւ մանուկին սրտէն կախեալ է։
12. Քրիստոնեայ տուն մը ինչո՞ւ խաղաղ պէտք է ըլլայ։
12 Եթէ մեր ընտանիքի բոլոր անդամները կը ջանան Աստուծոյ կամքը կատարել, պէտք է աստուածային խաղաղութիւն վայելենք։ Քրիստոնեայի մը տունը լեցուն պէտք է ըլլայ ‘խաղաղութեան բարեկամներով’։ Ղուկաս 10։1-6–ը ցոյց կու տայ որ Յիսուս այսպիսի անհատներ ի մտի ունէր, երբ իր 70 աշակերտները որպէս քարոզիչներ ղրկեց եւ անոնց ըսաւ. «Ո՛րմէկ տուն որ մտնէք՝ առաջ ըսէք. ‘Բարեւ այս տանը’։ Եթէ հոն բարեւի արժանի մարդ [«խաղաղութեան բարեկամ մը», ՆԱ] կայ, ձեր բարեւը պիտի հանգչի անոր վրայ»։ Երբ Եհովայի ծառաները խաղաղութեամբ տունէ տուն կ’երթան ‘խաղաղութեան բարի լուրով’, անոնք խաղաղութեան բարեկամներ կը փնտռեն։ (Գործք 10։34-36. Եփեսացիս 2։13-18) Վստահաբար, խաղաղութեան բարեկամներէ բաղկացած քրիստոնեայ տուն մը՝ խաղաղութիւն պէտք է ունենայ։
13, 14. (ա) Նոեմին ի՞նչ ցանկաց Որփայի եւ Հռութի համար։ (բ) Քրիստոնեայ տուն մը ի՞նչպիսի հանգստավայր մը պէտք է ըլլայ։
13 Տուն մը, խաղաղութեան ու հանգստութեան վայր մը պէտք է ըլլայ։ Տարեց այրի Նոեմին մաղթեց որ Աստուած իր երկու այրի հարսերուն՝ Որփայի եւ Հռութի՝ հանգստութիւն եւ մխիթարութիւն տար, որ յառաջ կու գար լաւ ամուսին մը եւ տուն մը ունենալէն։ Նոեմի ըսաւ. «Տէրը ձեզի տայ, որ ամէն մէկդ իր էրկանը տունը հանգստութիւն գտնէ»։ (Հռութայ 1։9) Նոեմիի մաղթանքին առնչութեամբ, ուսումնական մը գրեց թէ այսպիսի տուներու մէջ, Հռութ եւ Որփա «անհանգստութենէ եւ մտահոգութենէ զերծ պիտի ըլլային։ Անոնք հանգստութիւն պիտի գտնէին։ Անիկա վայր մը պիտի ըլլար, ուր անոնք պիտի բնակէին եւ ուր անոնց ամենէն նուրբ զգացումները եւ ամենէն վեհ ցանկութիւնները գոհացում եւ հանգիստ պիտի գտնէին։ Եբրայերէնին [բառին] իւրայատուկ ուժգնութիւնը . . . գեղեցիկ կերպով նկարագրուած է [Եսայեայ 32։17, 18–ի] ընկերակցող արտայայտութիւններուն մէջ»։
14 Հաճեցէք նկատի առնել Եսայեայ 32։17, 18–ն, որու ակնարկեցինք։ Հոն կը կարդանք. «Արդարութեան գործը՝ խաղաղութիւն ու արդարութեան արդիւնքը հանգիստ ու ապահովութիւն պիտի ըլլայ յաւիտեան։ Իմ ժողովուրդս խաղաղաւէտ բնակութեան մէջ ու ապահով վրաններու մէջ եւ կատարեալ հանգստութեան մէջ պիտի բնակի»։ Քրիստոնեայի մը տունը արդարութեան, հանդարտութեան, ապահովութեան եւ աստուածային խաղաղութեան հանգստավայր մը պէտք է ըլլայ։ Բայց եթէ փորձութիւններ, թիւրիմացութիւններ կամ ուրիշ խնդիրներ յարուցուին. . .։ Այն ատեն մասնաւորաբար կարիքը ունինք ընտանեկան ուրախութեան գաղտնիքը գիտնալու։
Չորս Կենսական Սկզբունքներ
15. Ընտանեկան ուրախութեան գաղտնիքը ի՞նչպէս կը սահմանէք։
15 Երկրի վրայ իւրաքանչիւր ընտանիք իր անունը կը պարտի Եհովա Աստուծոյ՝ ընտանիքներու Ստեղծիչին։ (Եփեսացիս 3։14, 15) Ուստի, ընտանեկան ուրախութիւն փափաքողները պէտք է իր առաջնորդութիւնը փնտռեն եւ զինք գովաբանեն, սաղմոսերգուին նման. «Տէրոջը տուէ՛ք, ո՛վ ժողովուրդներու տոհմեր, Տէրոջը տուէք փառք ու զօրութիւն»։ (Սաղմոս 96։7) Ընտանեկան խաղաղութեան գաղտնիքը կը գտնուի Աստուածաշունչի էջերուն եւ անոր սկզբունքները գործադրելու մէջ։ Այն ընտանիքը որ այս սկզբունքները կը կիրարկէ, ուրախ պիտի ըլլայ եւ աստուածային խաղաղութիւն պիտի վայելէ։ Հիմա այդ կարեւոր սկզբունքներէն չորսը նկատի առնենք։
16. Ժուժկալութիւնը ի՞նչ դեր պէտք է խաղայ ընտանեկան կեանքին մէջ։
16 Առաջին սկզբունքը հետեւեալ կէտը կը շեշտէ. Ժուժկալութիւնը կենսական է ընտանեկան կեանքէն ներս աստուածային խաղաղութեան համար։ Սողոմոն Թագաւորը ըսաւ. «Իր ոգին չզսպող մարդը՝ փլած ու անպարիսպ քաղաքի պէս է»։ (Առակաց 25։28) Մեր ոգին զսպելը՝ ժուժկալ ըլլալը՝ կենսական է, եթէ կը փափաքինք խաղաղ եւ ուրախ ընտանիք մը ունենալ։ Թէեւ անկատար ենք, բայց պէտք է ժուժկալ ըլլանք, որ Աստուծոյ հոգիին պտուղներէն մէկն է։ (Հռովմայեցիս 7։21, 22. Գաղատացիս 5։22, 23) Սուրբ հոգին մեր մէջ ժուժկալութիւն յառաջ պիտի բերէ, եթէ այս յատկութիւնը ունենալու համար աղօթենք, այդ մասին Աստուածաշունչի խրատները կիրարկենք, եւ զայն ցուցաբերողներու հետ ընկերակցինք։ Այս ընթացքը պիտի օգնէ որ ‘պոռնկութենէ փախինք’։ (Ա. Կորնթացիս 6։18) Ժուժկալութիւնը նաեւ պիտի օգնէ որ բռնութիւնը մերժենք, ալքոլամոլութենէ խուսափինք կամ զայն յաղթահարենք, եւ դժուար պարագաներու հետ աւելի հանդարտութեամբ վարուինք։
17, 18. (ա) Ա. Կորնթացիս 11։3–ը ի՞նչպէս կը կիրարկուի քրիստոնէական ընտանեկան կեանքին։ (բ) Գլխաւորութեան գիտակցութիւնը ի՞նչպէս ընտանիքէն ներս աստուածային խաղաղութեան կը նպաստէ։
17 Կենսական ուրիշ սկզբունք մը հետեւեալ կերպով կարելի է նշել. Գլխաւորութեան գիտակցութիւնը պիտի օգնէ որ մեր ընտանիքին մէջ աստուածային խաղաղութիւն հետապնդենք։ Պօղոս գրեց. «Կ’ուզեմ որ գիտնաք թէ ամէն այր մարդու գլուխը Քրիստոսն է ու կնոջ գլուխը՝ այր մարդը եւ Քրիստոսին գլուխը՝ Աստուած»։ (Ա. Կորնթացիս 11։3) Ասիկա կը նշանակէ որ ընտանիքին մէջ այր մարդը առաջնորդութիւնը կը ստանձնէ, կինը հաւատարմաբար թիկունք կը կանգնի եւ զաւակները կը հնազանդին իրենց ծնողներուն։ (Եփեսացիս 5։22-25, 28-33. Եփեսացիս 6։1-4) Այսպիսի վարք մը վստահաբար ընտանիքին մէջ աստուածային խաղաղութեան պիտի նպաստէ։
18 Քրիստոնեայ ամուսին պէտք է յիշէ որ սուրբ գրային գլխաւորութիւնը բռնակալութիւն չէ։ Ան պէտք է ընդօրինակէ Յիսուսը, որ իր Գլուխն է։ Թէեւ ան ‘բոլոր բաներու վրայ որպէս գլուխ դրուեցաւ’, բայց եկաւ ոչ թէ «սպասաւորութիւն ընդունելու՝ հապա սպասաւորութիւն ընելու»։ (Եփեսացիս 1։22. Մատթէոս 20։28) Նմանապէս, քրիստոնեայ ամուսին մը սիրալիր կերպով կը կատարէ իր գլխաւորութիւնը, կարող ըլլալով իր ընտանիքին լաւագոյն օգտին ծառայել։ Անշուշտ, քրիստոնեայ կին մը ուրախութեամբ կ’ուզէ համագործակցիլ իր ամուսնոյն հետ։ Որպէս իր «օգնական»ը եւ «լրացուցիչ»ը, ան իր ամուսնոյն չունեցած յատկութիւնները կը հայթայթէ եւ այսպիսով անոր պէտք եղած օգնութիւնը կու տայ։ (Ծննդոց 2։20, ՆԱ. Առակաց 31։10-31) Գլխաւորութիւնը պատշաճ կերպով գործադրելը, կ’օգնէ ամուսիններուն եւ կիներուն, որ զիրար յարգեն եւ ասիկա կը մղէ որ զաւակներն ալ իրենց հնազանդ ըլլան։ Այո, գլխաւորութիւնը ընդունիլը ընտանեկան կեանքէն ներս աստուածային խաղաղութեան կը նպաստէ։
19. Լաւ հաղորդակցութիւնը ինչո՞ւ անհրաժեշտ է ընտանեկան խաղաղութեան եւ ուրախութեան համար։
19 Երրորդ կարեւոր սկզբունք մը կարելի է արտայայտել հետեւեալ բառերով. Լաւ հաղորդակցութիւն մը կենսական է ընտանեկան խաղաղութեան եւ ուրախութեան համար։ Յակոբու 1։19–ը կ’ըսէ. «Ամէն մարդ թող արագ ըլլայ լսելու մէջ եւ ծանր՝ խօսելու եւ ծանր՝ բարկանալու մէջ»։ Ընտանիքի անդամները իրարու հետ պէտք է խօսին եւ իրարու ըսածը մտիկ ընեն, քանի որ ընտանեկան հաղորդակցութիւնը երկկողմանի ճամբայ մըն է։ Նոյնիսկ երբ մեր ըսածը ճիշդ է, երբ զայն կոշտութեամբ, հպարտութեամբ կամ անզգայ կերպով ըսենք, անիկա աւելի վնաս կը հասցնէ, քան օգուտ կ’ընէ։ Մեր խօսակցութիւնը պէտք է շնորհալի, «աղով համովցած» ըլլայ։ (Կողոսացիս 4։6) Այն ընտանիքները որ սուրբ գրային սկզբունքներու կը հետեւին եւ լաւ կը հաղորդակցին, աստուածային խաղաղութիւն կը հետապնդեն։
20. Ըստ ձեզի, սէրը ինչո՞ւ կենսական է ընտանեկան խաղաղութեան համար։
20 Չորրորդ սկզբունքը հետեւեալն է. Սէրը անհրաժեշտ է ընտանեկան խաղաղութեան եւ ուրախութեան համար։ Ռոմանթիկ սէրը կարեւոր դեր մը կը խաղայ ամուսնութեան մէջ եւ խոր գուրգուրանքը կրնայ մշակուիլ ընտանիքի անդամներուն միջեւ։ Բայց ասոնցմէ աւելի կարեւոր է այն սէրը որ Յունարէն ա·կաբէ բառով ներկայացուած է։ Ասիկա այն սէրն է որ Եհովայի, Յիսուսի եւ մեր ընկերներուն հանդէպ կը մշակենք։ (Մատթէոս 22։37-39) Աստուած այս սէրը ցոյց տուաւ մարդկութեան հանդէպ, ‘իր միածին Որդին տալով, որպէս զի ով որ անոր հաւատայ չկորսուի, հապա յաւիտենական կեանք ունենայ’։ (Յովհաննու 3։16) Ի՜նչ սքանչելի է, երբ մեր ընտանիքի անդամներուն հանդէպ նոյնանման սէր կը ցուցաբերենք։ Այս վեհ սէրը ‘միութեան կատարեալ կապն է’։ (Կողոսացիս 3։14, ՆԱ) Անիկա ամուսնացած զոյգը իրարու կը կապէ եւ կը մղէ որ անոնք իրարու եւ իրենց զաւակներուն համար լաւագոյնը ընեն։ Երբ դժուարին պարագաներ ծագին, սէրը անոնց կ’օգնէ որ միասնաբար հարցը լուծեն։ Ասկէ կրնանք վստահ ըլլալ, քանի որ «սէրը . . . իրենը չի փնտռեր . . . ամէն բանի կը զիջանի, ամէն բանի կը հաւատայ, ամէն բանի կը յուսայ, ամէն բանի կը համբերէ։ Սէրը բնա՛ւ չիյնար»։ (Ա. Կորնթացիս 13։4-8) Արդարեւ, ուրախ են այն ընտանիքները, ուր իրարու հանդէպ սէրը շաղախուած է Եհովայի սիրոյն հետ։
Շարունակեցէք Աստուածային Խաղաղութիւն Հետապնդել
21. Ի՞նչ բան հաւանաբար ձեր ընտանիքին խաղաղութիւնը եւ ուրախութիւնը կրնայ աւելցնել։
21 Աստուածաշունչէն առնուած վերոյիշեալ սկզբունքները եւ տակաւին ուրիշներ, գրականութիւններու մէջ ուրուագծուած են, զորս Եհովա կը հայթայթէ «հաւատարիմ ու իմաստուն ծառայ»ին միջոցաւ։ (Մատթէոս 24։45) Օրինակ, այսպիսի տեղեկութիւններ կը գտնուին 192 էջնոց գրքի մը մէջ, որու խորագիրն է՝ Ընտանեկան Ուրախութեան Գաղտնիքը, որ լոյս տեսաւ Եհովայի Վկաներու «Աստուածային Խաղաղութեան Պատգամաբերներ» Նահանգային Համաժողովներուն, որոնք 1996-1997–ին, համայն աշխարհի մէջ տեղի ունեցան։ Այսպիսի գրականութեան մը միջոցաւ Աստուածաշունչի անձնական եւ ընտանեկան ուսումնասիրութիւն մը կրնայ օգտաշատ ըլլալ։ (Եսայեայ 48։17, 18) Այո, սուրբ գրային խրատներ կիրարկելը շատ հաւանաբար ձեր ընտանիքին խաղաղութիւնը եւ ուրախութիւնը պիտի աւելցնէ։
22. Մեր ընտանեկան կեանքը ի՞նչ բանի վրայ պէտք է կեդրոնացնենք։
22 Եհովա հոյակապ բաներ վերապահած է իր կամքը կատարող ընտանիքներուն եւ ան մեր փառաբանութեան ու ծառայութեան արժանի է։ (Յայտնութիւն 21։1-4) Ուստի, թող որ ձեր ընտանիքն ալ, իր կեանքը կեդրոնացնէ ճշմարիտ Աստուծոյ պաշտամունքին վրայ։ Իսկ կը մաղթենք որ մեր սիրալիր երկնաւոր Հայրը՝ Եհովան՝ ձեզի ուրախութիւն շնորհէ, մինչ կը շարունակէք ձեր ընտանեկան կեանքին մէջ աստուածային խաղաղութիւն հետապնդել։
Ի՞նչպէս պիտի պատասխանէիք
◻ Որպէսզի ընտանիքներ աստուածպաշտութեամբ ապրին, իրենցմէ ի՞նչ պահանջուած է։
◻ Ներկայիս ինչո՞ւ ընտանեկան տագնապ կայ։
◻ Ընտանեկան ուրախութեան գաղտնիքը ի՞նչ է։
◻ Ի՞նչ են կարգ մը սկզբունքներ, որոնք ընտանեկան կեանքէն ներս խաղաղութեան եւ ուրախութեան կը նպաստեն։
[Նկար՝ էջ 30]
Լաւ հաղորդակցութիւնը կ’օգնէ որ ընտանեկան կեանքի մէջ աստուածային խաղաղութիւն հետապնդենք