Անոնք Եհովայի կամքը կատարեցին

Յօժարակամ նուիրատուութիւններ՝ ճշմարիտ պաշտամունքը յառաջացնելու համար

ԻՍՐԱՅԵԼԱՑԻՆԵՐԸ Եհովայի փրկարար զօրութեան ականատես եղան։ Անոնք տեսան Կարմիր Ծովու ջուրերուն հրաշալիօրէն բաժնուիլը, կարելի դարձնելով որ անոնք չոր ճամբով անցնին եւ եգիպտական բանակին ձեռքէն ազատին։ Երբ միւս կողմը անցան, անոնք ապահով հեռաւորութենէ մը դիտեցին, մինչ այդ միեւնոյն ջուրերը զիրենք հալածողները ծածկեցին։ Եհովա անոնց կեանքը փրկեց։—Ելից 14։21-31

Սակայն, դժբախտաբար, Իսրայելացիներէն ոմանք, իրենց ի նպաստ Աստուծոյ ըրածները թեթեւի առին։ Երբ Մովսէս Սինա Լերան վրայ էր, անոնք իրենց ոսկեղէնները Ահարոնի տուին եւ պահանջեցին որ պաշտամունքի համար իրենց կուռք մը շինէ։ Երբ Մովսէս վերադարձաւ, այս ըմբոստներու ամբոխը ուտելով, խմելով, պարելով եւ ոսկիէ հորթի մը երկրպագելով զբաղած գտաւ։ Եհովայի հրամանով, շուրջ 3,000 հոգի՝ հաւանաբար ըմբոստութիւնը հրահրողները՝ մահուան դատապարտուեցան։ Այդ օրը, Աստուծոյ ժողովուրդը կարեւոր դաս մը՝ Եհովայի բացարձակ պաշտամունք տալու կարիքը սորվեցաւ։—Ելից 32։1-6, 19-29

Այս միջադէպէն քիչ ետք, Մովսէս գործի լծուեցաւ, որպէսզի պաշտամունքի համար փոխադրական խորան մը՝ տաղաւար մը՝ շինելու Աստուծոյ հրամանը գործադրէ։ Շինարարական այս ծրագիրը արժէքաւոր նիւթեր եւ վարպետ աշխատաւորներ կը պահանջէր։ Ասոնք ուրկէ՞ պիտի բերուէին, եւ Աստուածաշունչի այս դէպքէն ի՞նչ կրնանք սորվիլ։

Նիւթական Բաներու Նուիրատուութիւն եւ Հմտութիւններ

Մովսէսի միջոցաւ Եհովա Իսրայելացիներուն պատուիրեց. «Ձեր մէջէն ընծայ առէ՛ք Տէրոջը։ Ով որ սրտով կը յօժարի, թող անիկա Տէրոջը ընծայ բերէ»։ Ի՞նչպիսի ընծայ։ Մովսէսի յիշած ընծաներուն մէջ կային՝ ոսկի, արծաթ, պղինձ, դերձան, հիսուածեղէն, կաշիներ, փայտեր եւ թանկարժէք քարեր։—Ելից 35։5-9

Իսրայելացիները այսպիսի առատաձեռն նուիրատուութիւն մը ընելու ի վիճակի էին։ Յիշեցէք թէ, երբ անոնք Եգիպտոսը ձգեցին, իրենց հետ ոսկեղէններ ու արծաթեղէններ եւ շատ հանդերձներ առին։ Արդարեւ, «անոնք կողոպտեցին Եգիպտացիները»։a (Ելից 12։35, 36) Նախապէս, Իսրայելացիները իրենց զարդեղէնները յօժարակամօրէն մատուցանեցին սո՛ւտ պաշտամունքի նուիրուած կուռք մը շինելու համար։ Անոնք ճշմարիտ պաշտամունքին յառաջացման համար նոյն խանդավառութեամբ նուիրատուութիւններ պիտի ընէի՞ն։

Նկատի առէք թէ Մովսէս չսահմանեց թէ իւրաքանչիւր անհատ ո՛րքան պէտք էր տար, ո՛չ ալ զիրենք մեղադրեց կամ ամչցուց, որպէսզի տալու մղուէին։ Ընդհակառակը, ան պարզապէս ‘սրտով յօժար եղողներուն’ կոչ ուղղեց։ Բացայայտօրէն, Մովսէս Աստուծոյ ժողովուրդին վրայ ճնշում բանեցնելու հարկը չզգաց։ Ան վստահ էր որ իւրաքանչիւր անհատ իր կրցածին չափ պիտի տար։—Համեմատել՝ Բ. Կորնթացիս 8։10-12

Սակայն, շինարարական ծրագիրը նիւթական նուիրատուութիւններէն աւելին կը պահանջէր։ Եհովա նաեւ Իսրայելացիներուն ըսաւ. «Ձեր մէջ ամէն սրտով իմաստուն եղողները թող գան ու Տէրոջը բոլոր պատուիրած բաները շինեն»։ Այո, շինարարական այս ծրագիրը հմուտ աշխատանք կը պահանջէր։ Արդարեւ, «ամէն կերպ ճարտարութեան», ի ներառեալ՝ ատաղձագործութեան, երկաթագործութեան եւ ոսկերչութեան՝ կարիքը կար այս ծրագիրը ամբողջացնելու համար։ Անշուշտ, Եհովա աշխատաւորներուն ձիրքերը պիտի ուղղէր եւ տեղին ըլլալով, ծրագրին յաջողութեան վարկը իրեն պիտի երթար։—Ելից 35։10, 30-35. 36։1, 2

Իսրայելացիները ոգեւորութեամբ ընդառաջեցին այս հրաւէրին, իրենց նիւթականը եւ հմտութիւնները մատուցանելով։ Աստուածաշունչի արձանագրութիւնը կ’ըսէ. «Յօժարասիրտ եղողներն ու բոլոր հոգիով կամեցողները եկան ու վկայութեան խորանին գործին համար եւ անոր բոլոր պաշտամունքին համար ու սուրբ զգեստներուն համար Տէրոջը ընծայ բերին։ Եկան այրեր ու կիներ, որչափ որ սրտով կամեցող կային»։—Ելից 35։21, 22

Մեզի Համար Դաս մը

Ներկայիս, Աստուծոյ Թագաւորութեան բարի լուրը քարոզելու վիթխարի գործը կը կատարուի յօժարակամ նուիրատուութիւններու միջոցաւ։ Յաճախ ասոնք դրամական նուիրատուութիւններ են։ Ուրիշ պարագաներուն, Քրիստոնեայ եղբայրներ ու քոյրեր իրենց տարիներու փորձառութիւնը կը գործածեն Թագաւորութեան Սրահներու, Համաժողովի Սրահներու եւ մասնաճիւղի շէնքերու կառուցման նպաստելու համար։ Կայ նաեւ աշխարհի չորս տարածքին աւելի քան հարիւր Պէթէլներու մէջ կատարուած աշխատանքը, որ զանազան հմտութիւններ կը պահանջէ։ Այսպիսի նուիրատուութիւններ ըրած բոլոր յօժարասիրտ անհատները կրնան վստահ ըլլալ թէ Եհովա իրենց ծանր աշխատանքը պիտի չմոռնայ։—Եբրայեցիս 6։10

Միեւնոյնը կը կիրարկուի քրիստոնէական ծառայութեան մէջ իւրաքանչիւրիս բերած մասնակցութեան։ Բոլորիս յորդոր կը տրուի, որ քարոզչութեան մէջ մեր նախանձախնդիր մասնակցութիւնը բերելու համար ժամանակը ծախու առնենք։ (Մատթէոս 24։14. Եփեսացիս 5։15-17) Ոմանք ասիկա կ’ընեն որպէս լիաժամ աւետարանիչներ, կամ՝ ռահվիրաներ։ Պարագաներու բերմամբ, ուրիշներ չեն կրնար որպէս ռահվիրաներ ծառայութեան մէջ այսքան շատ ժամանակ յատկացնել։ Բայց եւ այնպէս, անոնք ալ Եհովան կը հաճեցնեն։ Տաղաւարին համար եղած նուիրատուութիւններուն նման, ներկայիս ալ Եհովա իւրաքանչիւր անհատի տալիք գումարը չի սահմաներ։ Բայց ան կը պահանջէ որ իւրաքանչիւրս իրեն ծառայենք մեր բոլոր սրտով, անձով, մտքով եւ զօրութեամբ։ (Մարկոս 12։30) Եթէ ասիկա արդէն կ’ընենք, կրնանք վստահ ըլլալ թէ ան մեզ պիտի վարձատրէ ճշմարիտ պաշտամունքին յառաջացման ի նպաստ մեր ըրած յօժարակամ նուիրատուութիւններուն համար։—Եբրայեցիս 11։6

[Ստորանիշ]