Ուրիշներուն օգնեցէք որ Եհովային արժանի կերպով քալեն

«Չենք դադարիր ձեզի համար աղօթելէ ու խնդրանք մատուցանելէ, . . . որպէս զի դուք Տէրոջը արժանի կերպով քալէք եւ ամէն բանի մէջ զինք հաճեցնէք, բարի գործերով պտղաբերիք»։—ԿՈՂՈՍԱՑԻՍ 1։9, 10

1, 2. Մասնաւորաբար ի՞նչ բան ուրախութեան ու գոհունակութեան աղբիւր մը կրնայ ըլլալ։

«ԱԳԱՐԱԿԻ մը հողին վրայ սայլատան մը մէջ կ’ապրինք։ Մեր կեանքը պարզունակ պահելով, շատ աւելի ժամանակ ունինք բարի լուրով մարդոց հասնելու։ Շատ մեծ օրհնութիւն կը վայելենք, օգնելով շատերու որ իրենց կեանքը Եհովայի նուիրեն»։—Հարաւային Ափրիկէի մէջ լիաժամ ծառայութեան մէջ եղող ամոլ մը

² Չէ՞ք համաձայնիր որ ուրիշներուն օգնելը ուրախութիւն կը պատճառէ։ Ոմանք կը փորձեն կանոնաւորաբար օգնել հիւանդ, զրկուած կամ առանձին անհատներու եւ ասկէ գոհունակութիւն կը զգան։ Ճշմարիտ Քրիստոնեաները վստահ են որ Եհովա Աստուծոյ եւ Յիսուս Քրիստոսի մասին գիտութիւնը ուրիշներուն հետ բաժնելը մեծագոյն օգնութիւնն է որ կրնան մատուցանել։ Միայն ասիկա է որ կրնայ մարդիկը ուղղել որ Յիսուսի փրկանքը ընդունին, Աստուծոյ հետ լաւ յարաբերութիւն մը մշակեն, ապա յաւիտենական կեանքի արժանի եղողներուն շարքին մէջ մտնեն։—Գործք 3։19-21. 13։48

3. Ի՞նչպիսի օգնութիւն մեր ուշադրութեան արժանի է։

³ Սակայն, ի՞նչ կարելի է ըսել անոնց մասին, որոնք արդէն Աստուծոյ կը ծառայեն, որոնք ‘ճամբուն’ մէջ են։ (Գործք 19։9) Անոնց հանդէպ ձեր հետաքրքրութիւնը անկասկած որեւէ ատենէ աւելի մեծ եղած է, բայց թերեւս չէք գիտեր թէ ի՛նչպէս կրնաք աւելին ընել, կամ շարունակաբար օգնութիւն մատուցանել։ Կամ ձեր պարագաները թերեւս չեն ներեր որ ձեր ուզած չափով անոնց օգնէք եւ ասիկա ձեր գոհունակութիւնը կը սահմանափակէ։ (Գործք 20։35) Երկու պարագային ալ, Կողոսացիս գրքէն կրնանք սորվիլ։

4. (ա) Պօղոս ի՞նչ պայմաններու ներքեւ գրեց Կողոսացիներուն։ (բ) Եպափրաս ի՞նչպէս պարփակուած էր։

⁴ Երբ Պօղոս առաքեալ Կողոսայի Քրիստոնեաներուն գրեց, ան Հռովմի մէջ կալանաւոր մըն էր, բայց կրնար այցելուներ ընդունիլ։ Ինչպէս կ’ակնկալուէր, Պօղոս այս սահմանափակ ազատութիւնը գործածեց Աստուծոյ Թագաւորութեան մասին քարոզելու համար։ (Գործք 28։16-31) Քրիստոնեայ հաւատակիցներ կրնային Պօղոսի այցելել եւ երբեմն կը պատահէր որ անոնցմէ ոմանք իրեն հետ բանտարկուած ըլլային։ (Կողոսացիս 1։7, 8. 4։10) Անոնցմէ մէկն էր նախանձախնդիր աւետարանիչ Եպափրասը, սարահարթ երկրի մը՝ Փռիւգիայի, Կողոսա քաղաքէն, որ Փոքր Ասիոյ (արդի Թուրքիոյ) Եփեսոսի արեւելքը կը գտնուէր։ Եպափրաս Կողոսայի մէջ ժողովք մը հաստատուելուն մեծապէս նպաստած էր եւ ան մօտակայ Լաւոդիկէ եւ Յերապոլիսի ժողովքներուն համար ալ աշխատած էր։ (Կողոսացիս 4։12, 13) Ան ինչո՞ւ Հռովմ գնաց Պօղոսը տեսնելու եւ Պօղոսի ընդառաջումէն ի՛նչ կը սորվինք։

Կողոսացիներուն Տրուած Ազդու Օգնութիւն

5. Պօղոս ինչո՞ւ Կողոսացիներուն այս բաները գրեց։

⁵ Կողոսայի ժողովքի վիճակին մասին Պօղոսի հետ խորհրդակցելու համար Եպափրաս յանձն առաւ մինչեւ Հռովմ դժուար ճամբորդութիւնը կատարել։ Ան այդ Քրիստոնեաներուն հաւատքին, սիրոյն եւ քարոզելու ջանքերուն մասին տեղեկագրութիւն մը ներկայացուց։ (Կողոսացիս 1։4-8) Բայց հաւանաբար Կողոսացիներուն հոգեւորականութեան սպառնացող բացասական ազդեցութիւններուն մասին ալ իր մտահոգութիւնը բաժնած ըլլալու էր։ Պօղոս առ ի պատասխան ներշնչեալ նամակ մը գրեց, կեղծ ուսուցիչներուն տարածած կարգ մը տեսակէտները հերքելու համար։ Ան մասնաւորաբար իր ուշադրութիւնը կեդրոնացուց Յիսուս Քրիստոսի խաղցած հիմնական դերին վրայ։a Արդեօք միմիայն Աստուածաշունչի հիմնական ճշմարտութիւնները ընդգծելով իր տուած օգնութեամբ գոհացա՞ւ։ Ան ուրիշ ի՞նչ կերպով կրնար օգնել Կողոսացիներուն, իսկ ուրիշներուն օգնելու մասին ասկէ ի՞նչ դասեր կը սորվինք։

6. Կողոսացիներուն գրած իր նամակին մէջ, Պօղոս ի՞նչ բան շեշտեց։

⁶ Իր նամակին սկիզբը, Պօղոս օգնութեան կերպի մը մասին այնպիսի հասկացողութիւն մը տուաւ որ թերեւս մենք նկատի չենք առներ։ Անիկա հեռուէն օգնութիւն տալու ազդեցիկ միջոց մըն էր, քանի որ Պօղոս եւ Եպափրաս Կողոսայէն շատ հեռու կը գտնուէին։ Պօղոս նշեց. «Ամէն ատեն ձեզի համար աղօթք ընելով՝ կը գոհանանք Աստուծմէ ու մեր Տէր Յիսուս Քրիստոսին Հօրմէն»։ Այո, ասոնք Կողոսայի Քրիստոնեաներուն համար մասնայատուկ աղօթքներ էին։ Պօղոս աւելցուց. «Անոր համար մենք ալ, այն օրէն երբ լսեցինք, չենք դադարիր ձեզի համար աղօթելէ ու խնդրանք մատուցանելէ, որպէս զի կատարեալ ըլլաք անոր կամքին [«ճշգրիտ», ՆԱ] գիտութիւնովը, լեցուիք իմաստութիւնով ու հոգեւոր հանճարով»։—Կողոսացիս 1։3, 9

7, 8. Մեր անձնական եւ ժողովքային աղօթքները յաճախ ի՞նչ կը պարփակեն։

⁷ Գիտենք որ Եհովա «աղօթքի լսող» է, ուստի իր կամքին համաձայն եղած մեր աղօթքները լսելու իր պատրաստակամութենէն կրնանք վստահ ըլլալ։ (Սաղմոս 65։2. 86։6. Առակաց 15։8, 29. Ա. Յովհաննու 5։14) Ուստի, երբ ուրիշներուն համար կ’աղօթենք, մեր աղօթքները ի՞նչպէս են։

⁸ Թերեւս ‘համայն աշխարհի մեր եղբայրներու ընկերակցութեան’ մասին յաճախ կը մտածենք եւ կ’աղօթենք։ (Ա. Պետրոս 5։9, ՆԱ) Կամ կրնանք Եհովայի մօտենալ շրջանի մը մէջ աղէտի կամ ողբերգութեան հանդիպած Քրիստոնեաներուն եւ ուրիշներուն համար։ Առաջին դարուն, երբ ուրիշ տեղեր ապրող աշակերտները լսեցին Հրէաստանի սովին մասին, իրենց նիւթական օգնութիւնները ղրկելէն առաջ վստահաբար իրենց եղբայրներուն համար բազմաթիւ աղօթքներ մատուցանեցին։ (Գործք 11։27-30) Ներկայիս, համայն եղբայրակցութեան կամ եղբայրներուն մեծ խումբի մը մասին յաճախ աղօթքներ կը մատուցուին քրիստոնէական ժողովներու մէջ, ուր շատեր հասկնալով պէտք է «Ամէն» ըսեն։—Ա. Կորնթացիս 14։16

Աղօթքի Մէջ Մասնայատուկ Եղէք

9, 10. (ա) Ո՞ր օրինակները ցոյց կու տան թէ մասնայատուկ անհատներու համար աղօթելը տեղին է։ (բ) Պօղոս ի՞նչպէս մասնայատուկ աղօթքներու նիւթ դարձաւ։

⁹ Սակայն, Աստուածաշունչը ուրիշներու ի նպաստ աղօթքներու նմոյշներ կու տայ, որոնք շատ աւելի մասնայատուկ եւ անհատականացուած են։ Մտաբերեցէք Ղուկաս 22։31, 32–ի մէջ արձանագրուած Յիսուսի խօսքերը։ Ան շրջապատուած էր իր 11 հաւատարիմ առաքեալներով։ Բոլորն ալ իրենց դիմաց եղող դժուար ժամանակներուն համար Աստուծոյ օգնութեան կարիքը ունէին եւ Յիսուս աղօթեց անոնց համար։ (Յովհաննու 17։9-14) Սակայն, անոնց մէջէն Յիսուս զատեց Պետրոսը եւ այդ աշակերտին համար յատուկ աղաչանք ներկայացուց։ Ուրիշ օրինակներ. Եղիսէ աղօթեց որ Աստուած օգնէր մասնայատուկ անձի մը, իր ծառային։ (Դ. Թագաւորաց 6։15-17) Յովհաննէս առաքեալ աղօթեց որ Գայիոս ֆիզիքապէս եւ հոգեւորապէս շարունակէր լաւ ըլլալ։ (Գ. Յովհաննու 1, 2) Իսկ ուրիշ աղօթքներ մասնայատուկ խումբերու ի նպաստ եղած են։—Յոբայ 42։7, 8. Ղուկաս 6։28. Գործք 7։59. Ա. Տիմոթէոս 2։1, 2

¹⁰ Պօղոսի նամակները շատ մասնայատուկ աղօթքներու հարցը կ’արծարծէ։ Ան խնդրեց որ իրեն, կամ իրեն եւ իր ընկերակիցներուն համար աղօթք մատուցուի։ Կողոսացիս 4։2, 3–ի մէջ կը կարդանք. «Շարունակ աղօթքի ետեւէ եղէք, անոր մէջ արթուն մնալով գոհութեամբ։ Աղօթք ըրէք նաեւ մեզի համար, որպէս զի Աստուած խօսքին դուռը բանայ մեզի Քրիստոսին խորհուրդը յայտնելու, որուն համար կապուած ալ եմ»։ Նկատի առէք նաեւ հետեւեալ օրինակները. Հռովմայեցիս 15։30, Ա. Թեսաղոնիկեցիս 5։25, Բ. Թեսաղոնիկեցիս 3։1, եւ Եբրայեցիս 13։18–ն։

11. Երբ Հռովմի մէջ էր, Եպափրաս որո՞նց համար կ’աղօթէր։

¹¹ Նոյնն էր պարագան Հռովմի մէջ եղող Պօղոսի ընկերակիցին։ «Բարեւ կ’ընէ ձեզի Եպափրաս, . . . որ ձեզմէ մէկն է, ամէն ատեն աղօթքի մէջ ձեզի համար ջանալով»։ (Կողոսացիս 4։12) Հոս «ջանալ» թարգմանուած բառը կրնայ թելադրել «պայքարիլ», ճիշդ ինչպէս որ վաղեմի խաղերուն մէջ մարզիկ մը կ’ընէր։ Արդեօք Եպափրաս պարզապէս հաւատացեալներու համաշխարհային խումբի՞ն, կամ՝ ամբողջ Փոքր Ասիոյ մէջ գտնուող ճշմարիտ երկրպագուներո՞ւն համար ջերմեռանդօրէն կ’աղօթէր։ Պօղոս նշեց որ Եպափրաս Կողոսա՛յի մէջ եղողներուն համար մասնայատուկ աղօթք կը մատուցանէր։ Եպափրաս գիտէր անոնց կացութիւնը։ Մենք անոնց բոլորին անունները չենք գիտեր, ոչ ալ գիտենք իրենց դիմագրաւած խնդիրները, բայց կարգ մը կարելիութիւններ երեւակայեցէք։ Թերեւս երիտասարդ Լինոսը կը պայքարէր այն ատեն տիրող փիլիսոփայական ազդեցութեանց դէմ, իսկ Ռուփոսը՝ թերեւս զօրութեան կարիքը ունէր դէմ դնելու համար նախապէս Հրէականութեան մէջ իր ունեցած վարժութիւններու հրապոյրին։ Անհաւատ ամուսին մը ունենալով, արդեօք Պերսիդէն իր զաւակները Տէրոջմով մեծցնելու համար համբերութեան ու իմաստութեան կարի՞ք ունէր, իսկ մահացու հիւանդութենէ տառապող Ասինկրիտոսը յաւելեալ մխիթարութեա՞ն պէտք ունէր։ Այո, Եպափրաս նոյն ժողովքէն ըլլալով զիրենք կը ճանչնար եւ անոնց համար ջերմեռանդ աղօթք մատուցանեց, քանի որ ինք եւ Պօղոս կը փափաքէին որ այս նուիրուած անհատները Եհովայի արժանի կերպով քալէին։

12. Մեր անձնական աղօթքներուն մէջ ի՞նչպէս կրնանք աւելի որոշակի ըլլալ։

¹² Ասոր մէջ օրինակ մը, ուրիշներուն օգնելու կերպ մը կը տեսնէ՞ք։ Ինչպէս նշուեցաւ, քրիստոնէական ժողովներուն հանրային աղօթքները յաճախ աւելի ընդհանրական են, նկատի ունենալով այլազան ունկնդիրները։ Բայց մեր անձնական եւ ընտանեկան աղօթքները կրնան աւելի մասնայատուկ ըլլալ։ Մինչ երբեմն Աստուծմէ կրնանք խնդրել որ բոլոր ճամբորդող տեսուչները կամ հոգեւոր հովիւները առաջնորդէ եւ օրհնէ, չե՞նք կրնար երբեմն աւելի որոշակի ըլլալ։ Օրինակ, կրնաք ձեր ժողովքը այցելող շրջանային տեսուչին, կամ ձեր Ժողովքի Գրքի Ուսումնասիրութեան վարիչին ուղղակի անունը յիշել ձեր աղօթքին մէջ։ Փիլիպպեցիս 2։25-28–ն եւ Ա. Տիմոթէոս 5։23–ը ցոյց կու տան Պօղոսի մասնայատուկ մտահոգութիւնը Տիմոթէոսի ու Եպափրոդիտոսի առողջութեան մասին։ Մենք ալ կրնա՞նք մեզի ծանօթ եղող հիւանդներուն հանդէպ այսպիսի հետաքրքրութիւն ցոյց տալ, իրենց անունները յիշելով։

13. Ի՞նչպիսի կացութիւններ մեր անձնական աղօթքներուն մէջ պարփակելիք յարմար նիւթեր են։

¹³ Ճիշդ է որ ուրիշներուն անձնական հարցերուն միջամուխ ըլլալէն պէտք է զգուշանանք, բայց լաւ է որ մեր աղօթքները անկեղծ հետաքրքրութիւն ցուցաբերեն մեր գիտցած ու մեզի համար կարեւորութիւն ունեցող անհատներուն հանդէպ։ (Ա. Տիմոթէոս 5։13. Ա. Պետրոս 4։15) Կրնայ ըլլալ որ եղբայր մը իր գործը կորսնցուցած է եւ մենք կարող չենք իրեն ուրիշ գործ մը հայթայթել։ Բայց մեր անձնական աղօթքներուն մէջ կրնանք իր անունը յիշել եւ իր դժուարութեան վրայ ուշադրութիւն դարձնել։ (Սաղմոս 37։25. Առակաց 10։3) Արդեօք կը ճանչնա՞նք ամուրի քոյր մը, որ տարիքը առած է եւ ո՛չ ամուսին ունի ու ո՛չ զաւակներ, քանի որ որոշած է «միայն թէ Տէրոջմով» ամուսնանալ։ (Ա. Կորնթացիս 7։39) Ձեր անձնական աղօթքներուն մէջ, ինչո՞ւ Եհովայէ չխնդրէք որ օրհնէ զինք եւ օգնէ որ կարենայ իր ծառայութեան մէջ հաւատարմաբար շարունակել։ Կամ, թերեւս երկու երէցներ մոլորած եղբօր մը խրատ տուած են։ Ինչո՞ւ երկուքն ալ իրենց անձնական աղօթքներուն մէջ երբեմն զինք իր անունով չյիշեն։

14. Մասնայատուկ աղօթքները ի՞նչպէս կրնան ուրիշներուն օգնել։

¹⁴ Շատ կարելիութիւններ կան ձեր անձնական աղօթքներուն մէջ պարփակելու ձեզի ծանօթ անհատներ, որոնք Եհովայի օգնութեան, մխիթարութեան, իմաստութեան եւ սուրբ հոգիին կամ անոր մէկ պտուղին կարիքը ունին։ Հեռաւորութեան կամ ուրիշ պարագաներու բերմամբ, թերեւս անոնց նիւթական կամ անմիջական օգնութիւն տալու մէջ կաշկանդուած զգաք։ Բայց մի՛ մոռնաք ձեր եղբայրներուն ու քոյրերուն համար աղօթել։ Գիտէք որ անոնք կը փափաքին Եհովայի արժանի կերպով քալել, բայց ասիկա շարունակական կերպով ընելու համար իրապէս օգնութեան կը կարօտին։ Անոնց օգնելու բանալիներէն մէկը ձեր աղօթքներն են։—Սաղմոս 18։2. 20։1, 2. 34։15. 46։1. 121։1-3

Ուրիշները Զօրացնելու Աշխատեցէք

15. Կողոսացիս գրքին եզրափակութիւնը ինչո՞ւ պէտք է հետաքրքրէ մեզ։

¹⁵ Անշուշտ, ջերմեռանդ ու մասնայատուկ աղօթքները ուրիշներուն՝ մանաւանդ ձեզի մօտիկ ու սիրելի եղողներուն՝ օգնելու միակ կերպը չեն։ Կողոսացիս գիրքը ասիկա շատ յստակ կ’ընէ։ Շատ ուսումնականներ այն կարծիքի են որ Պօղոս վարդապետական ուղղութիւն եւ գործնական խրատներ տալէ ետք, պարզապէս կարգ մը բարեւներ կամ անձնական ողջոյններ աւելցուցած է։ (Կողոսացիս 4։7-18) Ընդհակառակը, արդէն տեսանք որ գրքին այս վերջին մասը ուշագրաւ խրատներ կը պարունակէ, եւ այս հատուածէն շատ բան կրնանք սորվիլ։

16, 17. Կողոսացիս 4։10, 11–ի մէջ յիշուած եղբայրներուն մասին ի՞նչ կրնանք ըսել։

¹⁶ Պօղոս գրեց. «Բարեւ կ’ընէ ձեզի Արիստարքոսը, իմ գերութեան ընկերս եւ Մարկոս՝ Բառնաբասի եղբօրորդին, (որուն համար պատուէր առիք. եթէ ձեզի գալու ըլլայ, ընդունեցէ՛ք զանիկա,) եւ Յիսուս՝ որ Յուստոս կ’անուանուի, որոնք թլփատութենէն են. ասոնք միայն՝ ինծի գործակից եղան Աստուծոյ թագաւորութեանը մէջ եւ ինծի մխիթարութիւն [«զիս տոգորող ոյժ մը եղան», ՆԱ]»։—Կողոսացիս 4։10, 11

¹⁷ Պօղոս կարգ մը եղբայրներ նշեց, որոնք մասնայատուկ ուշադրութեան արժանի էին։ Ան ըսաւ որ անոնք հրէական ծագում ունենալով՝ թլփատուած էին։ Հռովմի մէջ շատ թլփատուած Հրեաներ կային եւ անոնցմէ ոմանք այժմ Քրիստոնեայ եղած էին։ Իսկ իր յիշած անհատները իրեն օգնութեան հասած էին։ Հաւանաբար, անոնք հեթանոսական ծագում ունեցող Քրիստոնեաներու հետ ընկերակցելու չէին վարանած, եւ ուրախութեամբ Պօղոսի հետ հեթանոսներուն քարոզելու մասնակցած ըլլալու էին։—Հռովմայեցիս 11։13. Գաղատացիս 1։16. 2։11-14

18. Պօղոս իրեն հետ եղողներէն ոմանք ի՞նչպէս գովեց։

¹⁸ Պօղոսի բացատրութիւնը նկատի առէք. «Ասոնք միայն . . . զիս տոգորող ոյժ մը եղան»։ Ան Յունարէն բառ մը գործածեց որ Աստուածաշունչին մէջ միայն հոս կ’երեւնայ։ Շատ թարգմանիչներ զայն «մխիթարութիւն» թարգմանած են։ Սակայն սովորաբար «մխիթարութիւն» թարգմանուած բառին համար Յունարէն տարբեր բառ մը կայ (բա·րա·գա·լէօ)։ Պօղոս այս նոյն նամակին մէջ ուրիշ տեղ ասիկա գործածեց, բայց ոչ՝ Կողոսացիս 4։11–ին մէջ։—Մատթէոս 5։4. Գործք 4։36. 9։31. Բ. Կորնթացիս 1։4. Կողոսացիս 2։2. 4։8

19, 20. (ա) Հռովմի մէջ իրեն օգնող եղբայրներուն համար Պօղոսի գործածած արտայայտութեան իմաստը ի՞նչ է։ (բ) Այդ եղբայրները ի՞նչ կերպերով թերեւս օգնեցին Պօղոսի։

¹⁹ Պօղոսի յիշած անհատները բերանացի սփոփանք տալէն աւելին ըրած ըլլալու էին։ Կողոսացիս 4։11–ի մէջ ‘տոգորող ոյժ’ թարգմանուած Յունարէն բառը երբեմն աշխարհիկ գրութիւններու մէջ գործածուած էր որպէս ընկճուածութիւնը ապաքինող դեղ։ Նիու Լայֆ Վըրժըն–ը կ’ըսէ. «Անոնք մեծ օգուտ եղան ինծի»։ Մերօրեայ Անգլերէն Թարգմանութիւն–ը կը գործածէ՝ «Անոնք մեծ օգնութիւն եղան ինծի» նախադասութիւնը։ Պօղոսի մօտ եղող այդ Քրիստոնեայ եղբայրները ի՞նչ ըրած էին իրեն օգնելու համար։

²⁰ Պօղոս կրնար այցելուներ ընդունիլ, բայց շատ բաներ չէր կրնար ընել. օրինակ՝ չէր կրնար ուտելիքի կամ ձմեռուան համար հագուելիքի նման հիմնական բաներ գնել։ Ի՞նչպէս կրնար մագաղաթներ ձեռք ձգել կամ գրելու համար պիտոյքներ գնել։ (Բ. Տիմոթէոս 4։13) Չէ՞ք խորհիր որ Պօղոսին օգնող եղբայրները այս հիմնական կարիքները՝ իր գնումները կամ իր յանձնարարութիւնները կ’ընէին։ Թերեւս ան ուզէր որոշ ժողովքի մը մասին տեղեկութիւն ստանալ կամ զայն կերտել։ Արգելափակուած ըլլալով ինք չէր կրնար ասիկա ընել, ուստի այդ եղբայրները իր տեղ այցելութիւններ կու տային, պատգամներ կը տանէին, տեղեկութիւններ կը բերէին։ Որքա՜ն տոգորիչ էր։

21, 22. (ա) Կողոսացիս 4։11–ի խօսքերը ինչո՞ւ պէտք է հետաքրքրեն մեզ։ (բ) Ո՞ր կերպերով կրնանք Պօղոսի հետ եղողներուն օրինակը գործադրել։

²¹ Ինչ որ Պօղոս գրեց ‘տոգորելու’ մասին, կրնայ մեզի ներատեսութիւն տալ թէ ի՛նչպէս կրնանք ուրիշներուն օգնել։ Թերեւս անոնք Եհովայի արժանի կերպով կը քալեն իր բարոյական չափանիշները պահելով, քրիստոնէական ժողովներու կը յաճախեն եւ քարոզչութեան կը մասնակցին։ Այս բաներուն համար անոնք մեր գնահատական խօսքերուն արժանի են։ Բայց կրնա՞նք աւելի ‘տոգորիչ’ ըլլալ, Պօղոսի մօտ եղողներուն նման։

²² Եթէ կը ճանչնաք քոյր մը որ իմաստութեամբ կառչած է Ա. Կորնթացիս 7։37–ի, բայց մօտ ընտանիքի անդամներ չունի, կրնա՞ք զինք ձեր ընտանեկան կարգ մը գործունէութիւններուն մէջ պարփակել. թերեւս ճաշի մը, կամ բարեկամներով կամ ազգականներով պզտիկ հաւաքոյթի մը հրաւիրելով։ Իսկ մտածա՞ծ էք զինք հրաւիրել ձեր ընտանիքին հետ համաժողովի կամ արձակուրդի երթալու։ Կամ՝ յարմար ժամանակ երբ ուտելիք գնելու կ’երթաք, իրեն ըսէք որ ձեզի միանայ։ Նոյնը կարելի է ըսել այրիներուն մասին՝ ըլլան կին թէ տղամարդ, կամ ինքնաշարժ վարելու անկարող եղողներուն մասին։ Անոնց փորձառութիւնները լսելով, կամ պտուղ զատելու կամ երախաներու հագուստ ընտրելու նման սովորական բաներու մասին իրենց ունեցած գիտութենէն՝ պիտի օգտուիք։ (Ղեւտացւոց 19։32. Առակաց 16։31) Ասիկա բնականաբար աւելի մտերմութիւն պիտի յառաջացնէ։ Այս կերպով աւելի ազատ պիտի զգան ձեզմէ օգնութիւն խնդրելու, երբ դեղարանէն դեղի մը կամ նման բանի մը պէտք ունենան։ Հռովմի մէջ Պօղոսին հետ եղող եղբայրները գործնական ու տոգորիչ օգնութիւն մատուցանեցին. դուք ալ նոյնը կրնաք ընել։ Այն ժամանակ եւ հիմա ասիկա սիրոյ կապը կը զօրացնէ եւ միասնաբար հաւատարմօրէն Եհովայի ծառայելու աւելի հաստատ ու վճռակամ կը դարձնէ։

23. Լաւ պիտի ըլլայ որ իւրաքանչիւրս ի՞նչ ընելու համար ժամանակ տրամադրենք։

²³ Ամէն մէկս կրնանք այս յօդուածին մէջի պարագաներուն մասին մտածել։ Անոնք պարզապէս օրինակներ են, բայց ասոնք կրնան մեզի յիշեցնել իրական կացութիւններ, երբ կրնանք իրապէս ‘տոգորող ոյժ’ մը ըլլալ մեր եղբայրներուն ու քոյրերուն համար։ Հոս կէտը այն չէ որ մենք մարդասէրները կ’ուզենք ընդօրինակել։ Կողոսացիս 4։10, 11–ին մէջ յիշուած եղբայրներուն նպատակը այդ չէր։ Անոնք ‘գործակից էին Աստուծոյ թագաւորութեանը մէջ’։ Տոգորելը ուղղակիօրէն այս մարզին մէջ էր։ Կը փափաքինք որ մեր պարագային ալ նոյնը ըլլայ։

24. Ուրիշներուն համար աղօթելու եւ զանոնք զօրացնել ջանալուն մեր բուն նպատակը ի՞նչ է։

²⁴ Մենք հետեւեալ պատճառով ուրիշները իրենց անուններով մեր անձնական աղօթքին մէջ կը յիշենք եւ ջանք կը թափենք զիրենք զօրացնելու. Կը հաւատանք որ մեր եղբայրներն ու քոյրերը կը փափաքին ‘Եհովայի արժանի կերպով քալել եւ ամէն բանի մէջ զինք հաճեցնել’։ (Կողոսացիս 1։10) Այս իրողութիւնը ուրիշ բանի մը հետ կապուած է զոր Պօղոս յիշեց, երբ կը գրէր Կողոսացիներուն համար Եպափրասի ըրած աղօթքներուն մասին, այսինքն, թէ անոնք «կատարեալ եւ հաստատօրէն համոզուած կենա[յին] Աստուծոյ բոլոր կամքին մէջ»։ (Կողոսացիս 4։12, ՆԱ) Անձնապէս ի՞նչպէս կրնանք իրագործել ասիկա։ Տեսնե՛նք։

[Ստորանիշ]

Նկատի առի՞ք

• Մեր անձնական աղօթքներուն մէջ ի՞նչպէս կրնանք աւելի օգտակար ըլլալ։

• Ի՞նչ առումով կարգ մը Քրիստոնեաներ ‘տոգորող ոյժ’ մըն էին Պօղոսի համար։

• Ի՞նչպիսի կացութիւններու մէջ կրնանք ‘տոգորող ոյժ’ մը ըլլալ։

• Մեր եղբայրներուն ու քոյրերուն համար աղօթելուն ու զանոնք զօրացնել ջանալուն ետին եղող նպատակը ի՞նչ է։

[Նկար՝ էջ 18]

Կրնա՞ք ուրիշ Քրիստոնեայ մը պարփակել ձեր ընտանեկան զբօսանքներուն մէջ

[Նկարին աղբիւրը]

Courtesy of Green Chimney’s Farm