Ինչո՞ւ առաքինութիւն մշակել

ԳՈՒՆԻՀԻԹՕ անունով միջին տարիքի Ճափոնցի մարդ մը, վերջերս Միացեալ Նահանգներ գաղթեց։a Իր ժամանումէն քանի մը շաբաթ ետք, ան դէմ յանդիման գտնուեցաւ կացութեան մը հետ, որ կրնար իր ասպարէզը քանդել։ Գունիհիթոն կը պատմէ. «Երբ վերակացուս ինծի հարցուց թէ կրնայի՞ որոշ պատասխանատուութիւն մը ստանձնել, ես ինքնավստահութիւն ունենալով զայն ընդունելու պատրաստ էի։ Այսուհանդերձ, ստացած կրթութեանս համաձայն համեստութիւնը առաքինութիւն նկատելով, պատասխանեցի. ‘Վստահ չեմ թէ կրնամ զայն գլուխ հանել, բայց պիտի ջանամ լաւագոյնս ընել’։ Ամերիկացի վերակացուիս համար, այնպէս թուեցաւ թէ ես անատակ եմ եւ ինքնավստահութեան պակասը ունիմ։ Ասիկա նշմարելով, անդրադարձայ որ կարգ մը բարեճշդումներ ընելու կարիքը ունէի»։

Մարիան, որ Նիւ Եորք քաղաքին մէջ կ’ապրի, ուշիմ աշակերտուհի մըն էր եւ միշտ պատրաստակամ՝ իր դասընկերներուն օգնելու։ Մարիայի մէկ դասընկերը՝ Խուանը, երբեմն իրմէ օգնութիւն կը խնդրէր։ Բայց ան նաեւ զգացումներ ունէր իրեն հանդէպ եւ փորձեց տպաւորել զինք։ Ի հեճուկս բարոյապէս մաքուր մնալու իր փափաքին, Մարիան Խուանի անբարոյ առաջարկներուն տեղի տուաւ եւ անբարոյ վարմունքի միջամուխ եղաւ։

Տարբեր մշակոյթներ ունեցող եւ բարոյապէս ապականած ներկայ աշխարհին մէջ, առաքինութիւն ցուցաբերելը արդարեւ դժուար է։ Ուստի, ինչո՞ւ առաքինութիւն մշակել։ Քանի որ առաքինի վարքը Աստուած կը հաճեցնէ, եւ վստահաբար մեզմէ շատեր կը փափաքին իր հաճութիւնը ունենալ։

Աստուծոյ Խօսքը՝ Աստուածաշունչը, իր ընթերցողները կը յորդորէ որ առաքինութիւն մշակեն։ Օրինակի համար, Պօղոս առաքեալ կը գրէ. «Ինչ առաքինութիւն եւ ինչ գովութիւն որ կայ, անոնց մասին խորհեցէք»։ (Փիլիպպեցիս 4։8) Իսկ Պետրոս առաքեալ մեզ կը յորդորէ որ ‘բոլոր ջանքերնիս դրած՝ մեր հաւատքին վրայ առաքինութիւն աւելցնենք’։ (Բ. Պետրոս 1։5) Սակայն, ի՞նչ է առաքինութիւնը։ Կրնա՞նք դպրոցներուն մէջ զայն սորվեցնել։ Զայն ի՞նչպէս կրնանք մշակել։

[Ստորանիշ]