Մեր անաչառ Աստուածը՝ Եհովան՝ ընդօրինակենք

«Աստուծոյ քով աչառութիւն չկայ»։—ՀՌՈՎՄԱՅԵՑԻՍ 2։11

1, 2. (ա) Ընդհանուր Քանանացիներու նկատմամբ Եհովայի նպատակը ի՞նչ էր։ (բ) Եհովա ի՞նչ ըրաւ, եւ ասիկա ի՞նչ հարցումներ կը յարուցանէ։

ՄԻՆՉ Մովաբի դաշտագետինը բանակած էր Հ.Դ.Ա. 1473–ին, Իսրայէլ ուշի–ուշով Մովսէսի մտիկ ըրաւ։ Յորդանան գետին միւս կողմը անոնց մարտահրաւէր մը կը սպասէր։ Մովսէս անոնց հաղորդեց Եհովայի նպատակը. Իսրայէլ Խոստացեալ Երկրին մէջ բնակող Քանանացի եօթը զօրաւոր ազգերը պիտի նուաճէր։ Մովսէսի խօսքերը որքա՜ն սրտապնդիչ էին. «Քու Տէր Աստուածդ զանոնք քու ձեռքդ տայ, զանոնք զա՛րկ»։ Իսրայէլ անոնց հետ ուխտ պիտի չընէր, եւ անոնք ողորմութեան արժանի չէին։—Բ. Օրինաց 1։1. 7։1, 2

² Այսուհանդերձ, Իսրայէլի նուաճած առաջին քաղաքին մէջ Եհովա ընտանիք մը խնայեց։ Ասկէ զատ, չորս այլ քաղաքներու մէջ մարդիկ վայելեցին Աստուծոյ պաշտպանութիւնը։ Ինչո՞ւ։ Այս Քանանացիներուն վերապրումին հետ առնչուած յատկանշական դէպքերը, Եհովայի մասին ի՞նչ կը սորվեցնեն մեզի։ Եւ ի՞նչպէս կրնանք զինք ընդօրինակել։

Եհովայի Համբաւին Ձգած Ազդեցութիւնը

3, 4. Իսրայելացիներուն տարած յաղթանակներուն լուրերը ի՞նչ ազդեցութիւն ունեցան Քանանի կարգ մը բնակիչներուն վրայ։

³ Խոստացեալ Երկիրը մտնելէ առաջ, երբ Իսրայէլ անապատին մէջ 40 տարի թափառեցաւ, Եհովա իր ժողովուրդը պաշտպանեց եւ անոնց համար պատերազմեցաւ։ Խոստացեալ Երկրին հարաւը, Իսրայէլ դէմ յանդիման եկաւ Արադի Քանանացի թագաւորին հետ։ Եհովայի օգնութեամբ, Հօրմայի մէջ Իսրայելացիները անոր եւ իր ժողովուրդին վրայ յաղթանակ տարին։ (Թուոց 21։1-3) Հետագային, Իսրայէլ Եդովմի եզերքէն անցաւ ու դէպի հիւսիս՝ Մեռեալ Ծովու հիւսիս–արեւելեան կողմը չուեց։ Այդ շրջանին մէջ, ուր նախապէս Մովաբացիներ կը բնակէին, այժմ Ամօրհացիներ կային։ Ամօրհացի Սեհոն Թագաւորը թոյլ չտուաւ որ Իսրայելացիները իր երկրամասէն անցնին։ Յասսայի մէջ պատերազմ եղաւ, որ ըստ երեւոյթին Առնոն ձորին հիւսիսը կը գտնուէր, ուր Սեհոն սպաննուեցաւ։ (Թուոց 21։23, 24. Բ. Օրինաց 2։30-33) Աւելի հիւսիսը՝ Բասանի մէջ, Ովգ կ’իշխէր ուրիշ Ամօրհացիներու վրայ։ Թէեւ Ովգ հսկայ մըն էր, բայց չկրցաւ Եհովայի դէմ դնել։ Ովգ Եդրայիի մէջ սպաննուեցաւ։ (Թուոց 21։33-35. Բ. Օրինաց 3։1-3, 11) Այս յաղթանակներուն լուրերը եւ Եգիպտոսէ Իսրայէլի Ելքին պատմութիւնները, Քանանի կարգ մը բնակիչներուն վրայ զօրաւոր ազդեցութիւն ունեցան։a

⁴ Երբ Իսրայէլ Յորդանանը կտրելով առաջին անգամ Քանան մտաւ, անոնք Գաղգաղայի մէջ բանակեցան։ (Յեսուայ 4։9-19) Քիչ մը անդին պարսպապատ Երիքով քաղաքը կը գտնուէր։ Եհովայի արարքներուն մասին Քանանացի Ռախաբի լսածները, զինք մղեցին որ հաւատքով գործէ։ Որպէս արդիւնք, երբ Եհովա Երիքովը կործանեց, ան Ռախաբը եւ իր տան մէջ եղողները խնայեց։—Յեսուայ 2։1-13. 6։17, 18. Յակոբու 2։25

5. Ի՞նչ բան Գաբաւոնացիները մղեց որ խորամանկութեամբ վարուին։

⁵ Անկէ ետք, Իսրայէլ գետին մօտակայ դաշտավայրերէն շրջանին կեդրոնական բլուրները բարձրացաւ։ Եհովայի ուղղութեան հետեւելով, Յեսու դարան գործածելու ռազմավարութիւնը կիրարկեց Գայի քաղաքին դէմ։ (Յեսուայ, գլուխ 8) Աղիտալի պարտութեան լուրը պատճառ եղաւ որ Քանանի թագաւորներէն շատեր պատերազմելու համար հաւաքուին։ (Յեսուայ 9։1, 2) Խեւացիներու մօտակայ Գաբաւոն քաղաքին բնակիչները տարբեր կերպով հակազդեցին։ Յեսուայ 9։4–ը կ’ըսէ. «Իրենք ալ վարպետութիւն մը բանեցուցին»։ Ռախաբի նման, անոնք լսած էին թէ Եհովա իր ժողովուրդը ի՛նչպէս ազատագրած էր Ելքի ատեն եւ անոնց յաղթանակ տուած էր Սեհոնի ու Ովգի վրայ։ (Յեսուայ 9։6-10) Գաբաւոնացիները գիտակցեցան թէ դիմադրելը ի զուր էր։ Ուստի Գաբաւոնի եւ մօտակայ երեք քաղաքներուն՝ Կեփիրայի, Բերովթի ու Կարիաթարիմի՝ կողմէ, անոնք պատուիրակութիւն մը ղրկեցին Յեսուի, որ Գաղգաղա կը գտնուէր։ Պատուիրակութիւնը ծպտուեցաւ որպէս թէ հեռու երկրէ մը կու գար։ Այս հնարքը յաջողեցաւ։ Յեսու անոնց հետ ուխտ մը կնքեց, որ իրենց կեանքը կ’ապահովէր։ Երեք օր ետք, Յեսու եւ Իսրայելացիները գիտցան թէ խաբուեցան։ Բայց անոնք ուխտին կառչեցան, քանի որ Եհովայի անունով երդում ըրած էին որ ուխտը պահեն։ (Յեսուայ 9։16-19) Եհովա համաձայն գտնուեցա՞ւ։

6. Եհովա ի՞նչպէս նկատեց Գաբաւոնացիներուն հետ Յեսուի կնքած ուխտը։

⁶ Գաբաւոնացիներուն թոյլատրուեցաւ որ Իսրայելացիներուն համար փայտահատներ ու ջրկիրներ ըլլան, նոյնիսկ՝ խորանին մէջ, «Տէրոջը սեղանին համար»։ (Յեսուայ 9։21-27) Ասկէ աւելի, երբ Ամօրհացի հինգ թագաւորներ ու իրենց բանակները Գաբաւոնացիներուն սպառնացին, Եհովա հրաշալիօրէն միջամտեց։ Կարկուտէն մեռնող թշնամիները, Յեսուի զօրքին սրով մեռնողներէն շատ էին։ Եհովա նոյնիսկ թշնամիին վրայ ամբողջական յաղթանակ տանելու առնչութեամբ Յեսուի աղաչանքը լսեց, արեւն ու լուսինը կայնեցնելով։ Յեսու նշեց. «Անոր պէս օր մը չեղաւ՝ ո՛չ առաջ ու ո՛չ ետքը՝ երբ Տէրը մարդու ձայնը լսեց. քանզի Տէրը Իսրայէլի համար պատերազմեցաւ»։—Յեսուայ 10։1-14

7. Պետրոսի ընդունած ո՞ր ճշմարտութիւնը յայտնի դարձաւ կարգ մը Քանանացիներու պարագային։

⁷ Քանանացի Ռախաբն ու իր ընտանիքը, նաեւ Գաբաւոնացիները, Եհովայէ վախցան եւ ըստ այնմ վարուեցան։ Ինչ որ անոնց պատահեցաւ, բացայայտօրէն կ’ապացուցանէ ճշմարտութիւն մը, որ հետագային Քրիստոնեայ Պետրոս առաքեալ նշեց. «Աստուծոյ քով աչառութիւն չկայ։ Ոեւէ ազգէ, ոեւէ մարդ որ անկէ կը վախնայ ու արդարութիւն կը գործէ, իրեն ընդունելի է»։—Գործք 10։34, 35

Գործառնութիւններ՝ Աբրահամի ու Իսրայէլի Հետ

8, 9. Եհովայի անաչառութիւնը ի՞նչպէս կը ցուցաբերուի Աբրահամի ու Իսրայէլ ազգին հետ իր գործառնութեանց մէջ։

⁸ Յակոբոս աշակերտ ուշադրութիւն հրաւիրեց՝ Աբրահամի ու իր սերունդին հետ Իր գործառնութեանց մէջ Աստուծոյ ցուցաբերած անարժան ողորմութեան վրայ։ Աբրահամի հաւատքը, եւ ո՛չ թէ իր ազգային ծագումն էր որ զինք «Աստուծոյ բարեկամ»ը ըրաւ։ (Յակոբու 2։23) Եհովայի հանդէպ Աբրահամի հաւատքն ու սէրը, իր սերունդին վրայ օրհնութիւններ բերաւ։ (Բ. Մնացորդաց 20։7) Եհովա Աբրահամի խոստացաւ. «Քեզ օրհնելով պիտի օրհնեմ ու քու սերունդդ երկնքի աստղերուն ու ծովեզերքը եղող աւազին պէս խիստ պիտի շատցնեմ»։ Բայց նկատի առէք յաջորդ համարին մէջ յիշուած խոստումը. «Երկրի բոլոր ազգերը քու սերունդովդ պիտի օրհնուին»։—Ծննդոց 22։17, 18. Հռովմայեցիս 4։1-8

⁹ Փոխանակ աչառութիւն ցուցաբերելու, Իսրայէլի հետ իր գործառնութեամբ Եհովա ապացուցանեց թէ իրեն հնազանդ եղողներուն ի՛նչ կրնար ընել։ Այս գործառնութիւնները օրինակ են թէ Եհովա իր հաւատարիմ ծառաներուն հանդէպ ի՛նչպէս հաւատարիմ սէր կ’արտայայտէ։ Թէեւ Իսրայէլ Եհովայի «սեպհական ժողովուրդ»ն էր, բայց ասիկա չնշանակեց թէ Աստուած միւս ազգերուն բարիք չէր գործեր։ (Ելից 19։5. Բ. Օրինաց 7։6-8) Ճիշդ է որ Եհովա Իսրայէլը Եգիպտոսի գերութենէն վերագնեց եւ հետեւաբար ըսաւ. «Երկրի բոլոր ազգատոհմներէն միայն քեզ ճանչցայ»։ Սակայն, Ամովս մարգարէին եւ ուրիշներու միջոցաւ, Եհովա հոյակապ հեռանկար մըն ալ խոստացաւ «բոլոր ազգեր»ուն։—Ամովսայ 3։2. 9։11, 12. Եսայեայ 2։2-4

Յիսուս՝ Անաչառ Ուսուցիչը

10. Յիսուս անաչառութիւն ցուցաբերելու մէջ ի՞նչպէս իր Հայրը ընդօրինակեց։

¹⁰ Իր Հօրը բուն պատկերը ըլլալով, Յիսուս իր երկրային ծառայութեան ընթացքին Եհովայի անաչառութիւնը ընդօրինակեց։ (Եբրայեցիս 1։3) Այդ ժամանակ իր գլխաւոր հետաքրքրութիւնն էր՝ «Իսրայէլի տանը կորսուած ոչխարներ»ը գտնել։ Այսուհանդերձ, ան ետ չկեցաւ ջրհորի մը քով Սամարացի կնոջ մը վկայելէ։ (Մատթէոս 15։24. Յովհաննու 4։7-30) Ան նաեւ, ըստ երեւոյթին Հրեայ չեղող հարիւրապետի մը խնդրանքին ընդառաջելով, հրաշք մը կատարեց։ (Ղուկաս 7։1-10) Ասոնց կողքին, ան Աստուծոյ ժողովուրդին հանդէպ իր սէրը ցուցաբերեց արարքներով։ Յիսուսի աշակերտներն ալ ամէնուրեք քարոզեցին։ Բացայայտ դարձաւ թէ Եհովայի օրհնութիւնը ստանալը կախեալ էր ո՛չ թէ ազգութենէն, այլ՝ կեցուածքէն։ Խոնարհ, պարկեշտ սիրտ ունեցող անհատներ, որոնք անօթութիւն ունէին ճշմարտութեան, Թագաւորութեան բարի լուրին ընդառաջեցին։ Միւս կողմէ, հպարտներն ու ամբարտաւանները Յիսուսը ու իր պատգամը արհամարհեցին։ Յիսուս ըսաւ. «Շնորհակալ եմ քեզմէ, ո՛վ Հայր, Տէր երկնի եւ երկրի, որ այս բաները ծածուկ պահեցիր իմաստուններէն եւ գիտուններէն ու տղոց յայտնեցիր։ Այո՛, ո՛վ Հայր, վասն զի քու առջեւդ այսպէս հաճելի եղաւ»։ (Ղուկաս 10։21) Երբ ուրիշներու հետ սիրոյ ու հաւատքի հիման վրայ վարուինք, անաչառութեամբ գործած կ’ըլլանք, գիտնալով թէ ասիկա Եհովայի հաճած կերպն է։

11. Նախկին քրիստոնէական ժողովքին մէջ ի՞նչպէս անաչառութիւն ցուցաբերուեցաւ։

¹¹ Նախկին քրիստոնէական ժողովքին մէջ, Հրեաներն ու ոչ–Հրեաները համահաւասար էին։ «Փառք ու պատիւ եւ խաղաղութիւն այն ամենուն, որ բարի են», բացատրեց Պօղոս, «առաջ՝ Հրեային ու ետքը՝ Յոյնին։ Վասն զի Աստուծոյ քով աչառութիւն չկայ»։b (Հռովմայեցիս 2։10, 11) Անոնց ազգային ծագումը չէր որ կ’որոշէր թէ Եհովայի անարժան ողորմութենէն պիտի օգտուին կամ ոչ, այլ՝ անոնց հակազդեցութիւնը, Եհովայի ու իր Որդւոյն փրկանքին ներկայացուցած ակնկալութիւններուն մասին սորվելէ ետք։ (Յովհաննու 3։16, 36) Պօղոս գրեց. «Հրեայ չէ ան որ դուրսէն է եւ թլփատութիւն չէ այն որ դուրսէն՝ մարմնով է. հապա ա՛ն Հրեայ է որ ներսէն է եւ իսկական թլփատութիւնը՝ սրտին թլփատութիւնն է հոգիով ու ո՛չ թէ գրով»։ Ապա «Հրեայ» արտայայտութեան հետ կապ ունեցող բառերու վրայ խաղալով (որ կը նշանակէ՝ «Յուդայէն», այսինքն՝ գովաբանուած), Պօղոս աւելցուց. «Որուն գովեստը ո՛չ թէ մարդոցմէ է, հապա՝ Աստուծմէ»։ (Հռովմայեցիս 2։28, 29) Եհովա անաչառօրէն կը գովաբանէ։ Նոյնը կ’ընե՞նք։

12. Յայտնութիւն 7։9–ն ի՞նչ ակնկալութիւն կը ներկայացնէ, եւ որո՞նց։

¹² Հետագային, տեսիլքի մը մէջ Յովհաննէս առաքեալ տեսաւ հաւատարիմ օծեալ Քրիստոնեաները որպէս 144,000 հոգիներէ բաղկացած հոգեւոր ազգ մը, ‘կնքուած՝ Իսրայէլի որդիներուն բոլոր ցեղերէն’։ Անկէ ետք, Յովհաննէս տեսաւ «մեծ բազմութիւն մը, . . . բոլոր ազգերէն ու ցեղերէն եւ ժողովուրդներէն ու լեզուներէն, որոնք աթոռին առջեւ ու Գառնուկին առջեւ կեցեր էին՝ ճերմակ հանդերձներ հագած եւ ձեռքերնին արմաւենիներ բռնած»։ (Յայտնութիւն 7։4, 9) Հետեւաբար, ազգատոհմային ո՛չ մէկ խումբ կամ լեզու այժմու քրիստոնէական ժողովքէն դուրս ձգուած է։ Ամէ՛ն ենթահողէ անհատներ մօտալուտ ‘մեծ նեղութենէն’ վերապրելու եւ նոր աշխարհին մէջ «կենդանի ջուրերու աղբիւրներ»էն խմելու ակնկալութիւնը ունին։—Յայտնութիւն 7։14-17

Դրական Ազդեցութիւններ

13-15. (ա) Ի՞նչպէս կրնանք ցեղային եւ մշակութային տարբերութիւնները յաղթահարել։ (բ) Բարեկամական մօտեցում ցուցաբերելուն օգուտները ցոյց տուող օրինակներ յիշեցէք։

¹³ Եհովա մեզ լաւ կը ճանչնայ, ինչպէս բարի հայր մը՝ իր զաւակները։ Նմանապէս, երբ ուրիշները հասկնանք, անոնց մշակոյթին ու ենթահողին նկատմամբ հետաքրքրութիւն ցուցաբերելով, տարբերութիւնները աննշան կը դառնան։ Ազգատոհմային արգելքները կը վերցուին, իսկ բարեկամական ու սիրոյ կապերը կ’ամրապնդուին։ Միութիւնը կը հաստատուի։ (Ա. Կորնթացիս 9։19-23) Ասիկա շատ լաւ կերպով ցոյց տրուած է օտար երկիրներու մէջ ծառայող միսիոնարներու գործունէութեամբ։ Անոնք տեղացիներուն հանդէպ հետաքրքրութիւն ցոյց կու տան, եւ որպէս արդիւնք, միսիոնարները շուտով կ’անդրադառնան թէ տեղական ժողովքին մէկ մասը եղած են։—Փիլիպպեցիս 2։4

¹⁴ Անաչառ ըլլալուն դրական ազդեցութիւնները բազմաթիւ երկիրներու մէջ ուշագրաւ են։ Եթովպիացի Աքլիլուն Բրիտանիոյ մայրաքաղաքին՝ Լոնտոնի՝ մէջ առանձին էր։ Առանձնութեան իր զգացումը սաստկացաւ, օտար երկիրներէ եկած անհատներու հանդէպ ցուցաբերուած անբարեկամական կեցուածքին պատճառաւ, ինչ որ կարելի է նկատել մերօրեայ Եւրոպայի մեծ քաղաքներէն շատերուն մէջ։ Աքլիլու որքա՜ն տարբեր զգաց, երբ Եհովայի Վկաներու Թագաւորութեան Սրահին մէջ քրիստոնէական ժողովի մը ներկայ գտնուեցաւ։ Ներկաները բարի գալուստ մաղթեցին իրեն, եւ շատ չանցած ինքզինք իր տան մէջ զգաց։ Ստեղծիչին հանդէպ իր գնահատութիւնը շուտով խորացուց։ Ապա սկսաւ պատեհութիւններ փնտռել, որ այդ նահանգին մէջ Թագաւորութեան բարի լուրը ուրիշներու տարածէ։ Արդարեւ, օր մը երբ քարոզչութեան մէջ Աքլիլուի ընկերակցող եղբայրը հարցուց թէ ներկայիս իր կեանքին մէջ ի՛նչ նպատակակէտեր ունէր, Աքլիլու անմիջապէս պատասխանեց թէ կը յուսար ժողովքի մը մէկ անդամը ըլլալ, որ իր լեզուն՝ Ամհարիգերէն՝ կը խօսէր։ Երբ տեղական անգլիախօս ժողովքին երէցները ասիկա իմացան, անոնք ուրախութեամբ կարգադրութիւն ըրին որ Աքլիլուի մայրենի լեզուով՝ Աստուածաշունչի վրայ հիմնուած հանրային դասախօսութիւն մը ներկայացուի։ Ներկայ գտնուելու հրաւէրին ընդառաջելով, բազմաթիւ օտարներ ու տեղացիներ հաւաքուեցան, Բրիտանիոյ մէջ գումարուող առաջին Ամհարիգերէն հանրային ժողովին թիկունք կանգնելու համար։ Այսօր, այդ շրջանին մէջ Եթովպիացիներ ու այլ ամհարիգախօսներ միացած են ուռճացող ժողովքի մը մէջ։ Հոն, շատեր գտած են թէ ոչինչ զիրենք ետ կը պահէ Եհովայի կողմը դիրք բռնելէ եւ ասիկա քրիստոնէական մկրտութեամբ խորհրդանշելէ։—Գործք 8։26-36

¹⁵ Յատկանիշներն ու ենթահողերը իրարմէ կը տարբերին։ Անոնք գերադասութեան կամ ստորադասութեան չափանիշներ չեն. անոնք պարզապէս տարբերութիւններ են։ Մալթա կղզիին վրայ Եհովայի նոր նուիրուած ծառաներուն մկրտութիւնը դիտելու ժամանակ, տեղացի Վկաները չափազանց կ’ուրախանային, մինչ Բրիտանացի այցելուներու աչքերէն ուրախութեան արցունքներ կը հոսէին։ Թէ՛ մալթախօս եւ թէ անգլիախօս խումբերը իրենց զգացումները արտայայտեցին՝ բայց տարբեր կերպերով, իսկ Եհովայի հանդէպ իրենց զօրաւոր սէրը, քրիստոնէական ընկերակցութեան կապերը ամրապնդեց։—Սաղմոս 133։1. Կողոսացիս 3։14

Կանխադատութիւնը Յաղթահարել

16-18. Փորձառութիւն մը պատմեցէք, որ ցոյց կու տայ թէ քրիստոնէական ժողովքին մէջ կանխադատութիւնը ի՛նչպէս կարելի է յաղթահարել։

¹⁶ Մինչ Եհովայի ու մեր Քրիստոնեայ եղբայրներուն հանդէպ մեր սէրը կը խորանայ, կրնանք աւելի սերտօրէն Եհովան ընդօրինակել ուրիշները դիտելու մեր կերպին մէջ։ Որոշ ազգութիւններու, ցեղերու կամ մշակոյթներու հանդէպ նախապէս մեր ունեցած կանխադատութիւնը կրնանք յաղթահարել։ Օրինակ, նկատի առէք Ալպերթի պարագան, որ Բ. Համաշխարհային Պատերազմին Բրիտանական Բանակին մէջ կը ծառայէր եւ Ճափոնցիներուն ձեռքը գերի ինկաւ 1942–ին, երբ Սինկաբուր նուաճուեցաւ։ Հետագային, ան շուրջ երեք տարի «մահուան երկաթուղի»ին վրայ աշխատեցաւ, Քուաի գետի վրայ գտնուող ներկայ կամուրջին մօտ։ Երբ պատերազմի աւարտին ազատ արձակուեցաւ, ան 32 քիլօկրամ կը կշռէր, քիթն ու ծնօտը կոտրուած էին, եւ թանչէ, օղաճճիէ ու ջերմախտէ կը տառապէր։ Իր բանտակիցներէն հազարաւորներու կացութիւնը շատ աւելի վատ էր. անոնցմէ շատեր չվերապրեցան։ Իր տեսած գազանային արարքներուն պատճառաւ, Ալպերթ դառնութեամբ լեցուած իր հայրենիքը վերադարձաւ 1945–ին, չուզելով որեւէ կապ ունենալ Աստուծոյ կամ կրօնքին հետ։

¹⁷ Ալպերթի կինը՝ Իրին, Եհովայի Վկայ մը եղաւ։ Զինք հաճեցնելու համար, Ալպերթ քանի մը անգամ Եհովայի Վկաներու տեղական ժողովքին ժողովներուն ներկայ գտնուեցաւ։ Փօլ անունով երիտասարդ լիաժամ ծառայ մը Ալպերթին այցելութիւն տուաւ, անոր հետ Աստուածաշունչը ուսումնասիրելու համար։ Շատ չանցած, Ալպերթ անդրադարձաւ որ Եհովա անհատներուն կը նայի իրենց սրտի վիճակին համաձայն։ Ան իր կեանքը Եհովայի նուիրեց ու մկրտուեցաւ։

¹⁸ Հետագային Փօլ Լոնտոն փոխադրուեցաւ, Ճափոներէն սորվեցաւ եւ ճափոնախօս ժողովքի մը հետ ընկերակցեցաւ։ Երբ ան առաջարկեց որ կարգ մը այցելու Ճափոնցի Վկաներ իր նախկին ժողովքը տանի, հոն գտնուող եղբայրները մտաբերեցին Ալպերթի զօրաւոր կանխադատութիւնը այդ ենթահողին պատկանող անհատներուն դէմ։ Բրիտանիա վերադառնալէն ի վեր, Ալպերթ խուսափած էր ոեւէ Ճափոնցիի հետ երես–երեսի գալէ, ուստի եղբայրները հարց տուին թէ ան այս կացութիւնը ի՛նչպէս ձեռք պիտի առնէր։ Անոնք մտահոգուելու հարկ չունէին. Ալպերթ այցելուները անվերապահ եղբայրասիրութեամբ ընդունեց։—Ա. Պետրոս 3։8, 9

«Լայն Բացէք Ձեր Սրտերը»

19. Պօղոս առաքեալի ո՞ր խրատը կրնայ մեզի օգնել, եթէ աչառութեան որեւէ հակում ունինք։

¹⁹ «Աչառութիւն ընելը աղէկ չէ», գրեց իմաստուն Սողոմոն Թագաւոր։ (Առակաց 28։21) Դիւրին է մօտիկ զգալ անոնց որ լաւ կը ճանչնանք։ Սակայն երբեմն, հակումը կ’ունենանք նուազ հետաքրքրուելու անոնցմով, որոնց լաւ չենք ճանչնար։ Այս աչառութիւնը Եհովայի ծառայի մը չի վայելեր։ Վստահաբար լաւ կ’ընենք անսալով Պօղոսի յստակ խրատին որ ‘մեր սրտերը լայն բանանք’։ Այո, տարբեր ենթահողի պատկանող Քրիստոնեայ հաւատակիցներուն հանդէպ մեր սէրը լայնցնենք։—Բ. Կորնթացիս 6։13

20. Կեանքի ո՞ր մարզերուն մէջ մեր անաչառ Աստուածը՝ Եհովան՝ պէտք է ընդօրինակենք։

²⁰ Ունենանք երկնային կոչումին առանձնաշնորհումը թէ երկրի վրայ յաւիտեան ապրելու հեռանկարը, մեր անաչառ ըլլալը կարելի կը դարձնէ որ մէկ հօտի մէջ եւ մէկ Հովիւի ներքեւ միութիւնը վայելենք։ (Եփեսացիս 4։4, 5, 16) Մեր անաչառ Աստուածը՝ Եհովան՝ ընդօրինակելու մեր ջանքերը կրնան մեզի օգնել մեր քրիստոնէական ծառայութեան, ընտանիքին եւ ժողովքին մէջ, արդարեւ կեանքի բոլոր մարզերուն մէջ։ Ի՞նչպէս։ Յաջորդ յօդուածը այս նիւթը պիտի քննարկէ։

[Ստորանիշներ]

Ի՞նչպէս պիտի պատասխանէիք

• Եհովա Ռախաբի եւ Գաբաւոնացիներուն հանդէպ ի՞նչպէս անաչառութիւն ցուցաբերեց։

• Յիսուս իր ուսուցումին մէջ ի՞նչպէս անաչառութիւն ցուցաբերեց։

• Ի՞նչ բան կրնայ մեզի օգնել որ որեւէ մշակութային ու ցեղային կանխադատութիւն յաղթահարենք։

[Նկար՝ էջ 9]

Իսրայէլ կը սկսի Քանանը նուաճել

[Նկար՝ էջ 11]

Յիսուս ետ չկեցաւ Սամարացի կնոջ մը վկայելէ

[Նկար՝ էջ 12]

Ամհարիգերէն լեզուով հանրային ժողով մը Բրիտանիոյ մէջ

[Նկար՝ էջ 12]

Եհովայի հանդէպ Ալպերթի սէրը իրեն օգնեց որ կանխադատութիւնը յաղթահարէ