Եհովայի օրուան համար պատրա՞ստ ես
«Տէրոջը մեծ օրը մօտ է։ Մօտ է ու խիստ կ’արտորայ»։—ՍՈՓՈՆԻԱ 1։14
1-3. (ա) Աստուածաշունչը Եհովայի օրուան մասին ի՞նչ կ’ըսէ։ (բ) Եհովայի ո՞ր «օր»ը կը դիմագրաւենք։
ԵՀՈՎԱՅԻ մեծ օրը 24 ժամ տեւող օր մը չէ։ Անիկա աւելի երկար ժամանակ մըն է, որուն ընթացքին ամբարիշտներուն վրայ Աստուծոյ դատաստանը կը գործադրուի։ Անբարեպաշտները անկէ սոսկալու պատճառ ունին, որ խաւարի, սրտմտութեան, սաստիկ բարկութեան, նեղութեան ու կործանումի օր է։ (Եսայի 13։9. Ամովս 5։18-20. Սոփոնիա 1։15) Յովէլի մարգարէութիւնը կ’ըսէ. «Աւա՜ղ այն օրուան համար։ Քանզի Տէրոջը օրը մօտ է, ու Ամենակարողէն եկած աւերումին պէս պիտի գայ»։ (Յովէլ 1։15) Սակայն այդ մեծ օրը, Աստուած «սրտով ուղիղները» պիտի փրկէ։—Սաղմոս 7։10
2 ‘Եհովայի օրը’ արտայայտութիւնը կը կիրարկուի աստուածային դատաստանի գործադրութեան, տարբեր ժամանակներու մէջ։ Օրինակ, Հ.Դ.Ա. 607–ին Երուսաղէմի բնակիչներուն վրայ ‘Եհովայի օր’ մը եկաւ Բաբելոնացիներուն ձեռքով։ (Սոփոնիա 1։4-7) Աստուծոյ դատաստանին նման գործադրում մը տեղի ունեցաւ Հ.Դ. 70–ին, երբ Աստուած Հռովմէացիները գործածեց՝ իր Որդին մերժող Հրեայ ազգին վրայ իր դատաստանը գործադրելու համար։ (Դանիէլ 9։24-27. Յովհաննէս 19։15) Աստուածաշունչը նաեւ կը նախագուշակէ ‘Եհովայի օր’ մը, երբ ան բոլոր «ազգերուն հետ պիտի պատերազմի»։ (Զաքարիա 14։1-3) Ներշնչման ներքեւ, Պօղոս առաքեալ այդ օրը առնչեց Քրիստոսի ներկայութեան, որ սկսաւ 1914–ին՝ երբ Յիսուս թագադրուեցաւ երկինքի մէջ։ (Բ. Թեսաղոնիկեցիս 2։1, 2) Եհովայի օրը հորիզոնին վրայ ըլլալով, Եհովայի Վկաներու 2007–ի տարուան համարը յատկապէս պատշաճ էր։ Անիկա առնուած էր Սոփոնիա 1։14–էն, որ կ’ըսէ. «Տէրոջը մեծ օրը մօտ է»։
3 Քանի որ Աստուծոյ մեծ օրը մօտ է, հիմա է ժամանակը որ պատրաստ ըլլաս։ Ի՞նչպէս կրնաս այդ օրուան համար պատրաստուիլ, իսկ յաւելեալ քայլեր առնելու կարիք ունի՞ս։
Պատրաստ եղիր
4. Յիսուս ի՞նչ մեծ փորձի մը համար նախապատրաստուեցաւ։
4 Իրերու դրութեան վախճանին վերաբերեալ իր մարգարէութեան մէջ, Յիսուս Քրիստոս իր աշակերտներուն ըսաւ. «Պատրաստ կեցէք»։ (Մատթէոս 24։44) Երբ Յիսուս այս խօսքը ըսաւ, ինք պատրաստ էր մեծ փորձ մը դիմագրաւելու,– որպէս փրկանքի զոհ մեռնիլ։ (Մատթէոս 20։28) Յիսուսի նախապատրաստութեան կերպէն ի՞նչ կրնանք սորվիլ։
5, 6. (ա) Աստուծոյ ու մարդոց հանդէպ սէրը ի՞նչպէս կ’օգնէ որ Եհովայի օրուան համար պատրաստ ըլլանք։ (բ) Դրացիական սիրոյն նկատմամբ՝ Յիսուս ի՞նչ օրինակ հանդիսացաւ։
5 Յիսուս Եհովայի ու անոր արդար չափանիշներուն հանդէպ սրտագին սէր ունէր։ Յիսուսի ակնարկելով, Եբրայեցիս 1։9–ն կ’ըսէ. «Արդարութիւնը սիրեցիր ու անօրէնութիւնը ատեցիր. անոր համար . . . քու Աստուածդ ուրախութեան իւղով օծեց քեզ քու ընկերներէդ աւելի»։ Որովհետեւ իր երկնաւոր Հայրը սիրեց, Յիսուս անոր հանդէպ իր ուղղամտութիւնը պահեց։ Եթէ Աստուծոյ հանդէպ նոյնանման սէր ունինք եւ անոր պահանջներուն համաձայն ապրինք, ան մեզ պիտի պաշտպանէ։ (Սաղմոս 31։23) Այս սէրն ու հնազանդութիւնը մեզի պիտի օգնէ որ Եհովայի մեծ օրուան համար պատրաստ ըլլանք։
6 Մարդոց սէրը՝ Յիսուսի անձնաւորութեան ուշագրաւ մէկ երեսակն էր։ Արդարեւ ան «անոնց վրայ խղճաց, վասն զի յոգնած ու ցիրուցան եղած էին հովիւ չունեցող ոչխարներու պէս»։ (Մատթէոս 9։36) Հետեւաբար Յիսուս բարի լուրը քարոզեց մարդոց, ինչպէս որ սէրը մեզ կը մղէ Թագաւորութեան պատգամը մեր դրացիներուն ծանուցանելու։ Աստուծոյ ու մեր ընկերին հանդէպ սէրը մեզ գործունեայ կը պահէ որպէս Քրիստոնեայ քարոզիչներ, եւ այսպէս կ’օգնէ որ Եհովայի մեծ օրուան համար պատրաստ ըլլանք։—Մատթէոս 22։37-39
7. Մինչ Եհովայի օրուան կը սպասենք, ինչո՞ւ կրնանք ուրախ ըլլալ։
7 Յիսուս Եհովայի կամքը գործադրելէն ախորժեցաւ։ (Սաղմոս 40։8) Եթէ նոյն կեցուածքը ունենանք, Աստուծոյ սրբազան ծառայութիւն մատուցանելու մէջ ուրախութիւն պիտի գտնենք։ Յիսուսի նման, անձնուրաց տուողներ պիտի ըլլանք, եւ ասիկա մեզ իրապէս պիտի երջանկացնէ։ (Գործք 20։35) Այո, «Տէրոջը ուրախութիւնը [մեր] զօրութիւնն է», եւ անով ա՛լ աւելի պատրաստ պիտի ըլլանք Աստուծոյ մեծ օրուան համար։—Նէեմիա 8։10
8. Ինչո՞ւ Եհովայի աւելի պէտք է մօտենանք աղօթքով։
8 Աստուծոյ ուղղուած ջերմեռանդ աղօթքները օգնեցին Յիսուսի որ հաւատքի փորձերուն համար նախապատրաստուի։ Ան կ’աղօթէր երբ Յովհաննէսի կողմէ մկրտուեցաւ։ Իր առաքեալները ընտրելէ առաջ, Յիսուս ամբողջ գիշերը աղօթք ընելով անցուց։ (Ղուկաս 6։12-16) Իսկ իր երկրային կեանքին վերջին գիշերը Յիսուսի մատուցած սրտագին աղօթքները, Աստուածաշունչի ո՞ր ընթերցողը չեն տպաւորեր։ (Մարկոս 14։32-42. Յովհաննէս 17։1-26) Յիսուսի նման՝ աղօթասէ՞ր անհատ մըն ես։ Եհովայի յաճախ մօտեցիր, աղօթքդ կարճ մի՛ պահեր, սուրբ հոգիին ուղղութիւնը հայցէ եւ զայն անմիջապէս ընդունէ, երբ բացայայտ ըլլայ։ Մեր երկնաւոր Հօր հետ զօրաւոր յարաբերութիւնը կենսական է այս ճակատագրական ժամանակներուն, երբ Աստուծոյ մեծ օրը արագօրէն կը մօտենայ։ Հետեւաբար, ամէն գնով՝ Եհովայի աւելի մօտեցիր աղօթքով։—Յակոբոս 4։8
9. Եհովայի անուան սրբացումով հետաքրքրուիլը ո՞րքան կարեւոր է։
9 Եհովայի սուրբ անուան սրբացումով հետաքրքրուիլն ալ Յիսուսի օգնեց որ իր դիմագրաւած փորձութիւններուն համար պատրաստ ըլլայ։ Իրականութեան մէջ, ան իր հետեւորդներուն սորվեցուց թէ Աստուծոյ մատուցուած իրենց աղօթքները պէտք է պարփակեն սա խնդրանքը. «Քու անունդ սուրբ ըլլայ»։ (Մատթէոս 6։9) Եթէ խորապէս կը փափաքինք որ Եհովայի անունը սուրբ ըլլայ, պիտի ջանանք չընել բաներ, որոնք կրնան անոր նախատինք բերել։ Որպէս արդիւնք, Եհովայի մեծ օրուան համար աւելի լաւ պատրաստուած պիտի ըլլանք։
Կարգ մը փոփոխութիւններ պէ՞տք է ընես
10. Ինչո՞ւ մեր կեանքը քննելը պատշաճ է։
10 Եթէ Եհովայի օրը վաղը գայ, անոր համար իրապէս պատրա՞ստ ես։ Իւրաքանչիւր անհատ իր կեանքը պէտք է քննէ, տեսնելու համար թէ հարկ կա՞յ որեւէ արարք կամ կեցուածք ճշդելու։ Մարդկային կեանքին կարճատեւութեան ու անորոշութեան ի տես, իւրաքանչիւրս ամէն օր հոգեւորապէս արթուն պէտք է ըլլանք։ (Ժողովող 9։11, 12. Յակոբոս 4։13-15) Հետեւաբար նկատի առնենք կարգ մը ազդակներ, որոնք մեր ուշադրութեան արժանի են։
11. Աստուածաշունչը ընթերցելու ի՞նչ նպատակակէտ դրած ես։
11 Բանալի ազդակ մըն է՝ ամէն օր Աստուածաշունչը կարդալու ‘հաւատարիմ ծառային’ յորդորը։ (Մատթէոս 24։45) Կրնաս նպատակակէտ դնել՝ տարին անգամ մը ամբողջ Աստուածաշունչը խոկալով կարդալ։ Օրական շուրջ չորս գլուխ կարդալով, կրնաս մէկ տարուան մէջ Աստուածաշունչի 1,189 գլուխները կարդալ։ Իսրայէլի իւրաքանչիւր թագաւոր Եհովայի Օրէնքը պէտք էր կարդար «իր կեանքին բոլոր օրերուն մէջ»։ Ակներեւօրէն, Յեսու նման բան մը ըրաւ։ (Բ. Օրինաց 17։14-20. Յեսու 1։7, 8) Ո՜րքան կարեւոր է որ հոգեւոր հովիւները Աստուծոյ Խօսքը ամէն օր կարդան, քանի որ ասիկա իրենց կ’օգնէ «ողջամիտ վարդապետութիւն» հաղորդելու։—Տիտոս 2։1
12. Եհովայի օրուան մօտալուտ ըլլալը քեզ պէտք է մղէ ի՞նչ ընելու։
12 Եհովայի օրուան մօտալուտ ըլլալը քեզ պէտք է մղէ քրիստոնէական ժողովներուն կանոնաւորաբար ներկայ գտնուելու եւ անոնց մէջ լրիւ բաժին բերելու։ (Եբրայեցիս 10։24, 25) Ասիկա քեզի պիտի օգնէ հմտութիւններդ սրելու որպէս Թագաւորութիւնը ծանուցանող, որ կը ջանայ ուղղաբարոյ անհատներուն օգտակար դառնալ։ (Գործք 13։48) Թերեւս կրնաս ժողովքին մէջ այլ կերպերով ալ գործունեայ ըլլալ, ինչպէս՝ տարեցներուն օգնել ու դեռատիները քաջալերել։ Այս ջանքերը ո՜րքան գոհացուցիչ կրնան ըլլալ։
Ուրիշներու հետ յարաբերութիւնդ
13. Նոր անձնաւորութիւնը հագնելու նկատմամբ մենք մեզի ի՞նչ հարցումներ կրնանք ուղղել։
13 Եհովայի օրը մօտալուտ ըլլալով, պէ՞տք է աւելի ջանաս ‘նոր մարդը հագնելու, որ Աստուծոյ պատկերին պէս արդարութիւնով ու ճշմարիտ սրբութիւնով ստեղծուած է’։ (Եփեսացիս 4։20-24) Մինչ բարեպաշտ յատկութիւններ կը մշակես, հաւանաբար ուրիշներ տեսնեն թէ դուն ‘Աստուծոյ հոգիով կը քալես’ եւ անոր պտուղը կը ցուցաբերես։ (Գաղատացիս 5։16, 22-25) Կրնա՞ս որոշ արարքներ մատնանշել, որոնք ցոյց կու տան թէ դուն ու ընտանիքդ նոր անձնաւորութիւնը հագած էք։ (Կողոսացիս 3։9, 10) Օրինակ, ճանչցուա՞ծ ես որ հաւատակիցներու եւ ուրիշներու ի նպաստ քաղցր արարքներ կ’ընես։ (Գաղատացիս 6։10) Սուրբ Գրութիւններու կանոնաւոր ուսումնասիրութիւնը քեզի պիտի օգնէ բարեպաշտ յատկութիւններ մշակելու, Եհովայի օրուան առ ի պատրաստութիւն։
14. Անհատ մը ինչո՞ւ աղօթքով սուրբ հոգին պէտք է խնդրէ, մինչ կը ջանայ ժուժկալութիւն մշակել։
14 Ի՞նչ կրնաս ընել եթէ բարկացկոտ ես եւ ինքնազսպումի կարիք ունիս։ Այս յատկութիւնը մաս կը կազմէ այն պտուղին, զոր Աստուծոյ սուրբ հոգին կրնայ մէջդ զարգացնել։ Հետեւաբար, աղօթքով սուրբ հոգին խնդրէ, ինչպէս Յիսուս ըսաւ. «Խնդրեցէք եւ պիտի տրուի ձեզի, փնտռեցէք ու պիտի գտնէք, դուռը զարկէք եւ պիտի բացուի ձեզի։ . . . Եթէ դուք որ չար էք՝ ձեր զաւակներուն աղէկ ընծաներ տալ գիտէք, որչա՜փ աւելի ձեր Հայրը երկնքէն Սուրբ Հոգին պիտի տայ անոնց որ իրմէ կը խնդրեն»։—Ղուկաս 11։9-13
15. Ի՞նչ քայլ պէտք է առնուի, եթէ քու եւ հաւատակիցի մը միջեւ լարուածութիւն կայ։
15 Եթէ քու եւ հաւատակիցի մը միջեւ լարուածութիւն կայ, ամէն ջանք թափէ խրամատը գոցելու, ժողովքին խաղաղութիւնն ու միութիւնը յառաջացնելով։ (Սաղմոս 133։1-3) Մատթէոս 5։23, 24–ի կամ Մատթէոս 18։15-17–ի մէջ արձանագրուած Յիսուսի խրատը կիրարկէ։ Եթէ նախապէս թոյլ կու տայիր որ արեւը մայր մտնէր քու բարկացած վիճակիդ վրայ, այժմ շուտով հարցը շտկէ։ Յաճախ պահանջուածը՝ ներելու կամեցողութիւնն է։ Պօղոս գրեց. «Իրարու հետ քաղցր եղէք, գթած, ներելով իրարու, ինչպէս Աստուած Քրիստոսով ներեց ձեզի»։—Եփեսացիս 4։25, 26, 32
16. Ամուսնութեան մէջ կարեկցութիւնը ի՞նչ կերպերով պահանջուած է։
16 Ամուսնութեան մէջ կարեկցութիւն կը պահանջուի, եւ երբեմն՝ ներողամտութիւն։ Եթէ հարկ կայ որ կողակիցիդ հանդէպ աւելի սիրալիր ու գթասիրտ ըլլաս, ջանա՛ այս նպատակին հասնիլ՝ Աստուծոյ եւ իր Խօսքին օգնութեամբ։ Ա. Կորնթացիս 7։1-5–ի խօսքերուն համաձայն, քու կողմէդ ընելիք բան մը կա՞յ, ճնշուածութիւնը նուազեցնելու եւ անհաւատարմութենէ խուսափելու համար։ Վստահաբար կեանքի այս մարզը կը պահանջէ ամուսինէն կամ կնոջմէն որ «գթած» ըլլայ։
17. Եթէ անհատ մը լրջօրէն մեղանչած է, ի՞նչ պէտք է ընէ։
17 Իսկ եթէ կերպով մը լուրջ մեղք մը գործած ես, կացութիւնը սրբագրելու համար քայլեր առ՝ կարելի եղածին չափ շուտ։ Ամէն գնով, Քրիստոնեայ երէցներու օգնութիւնը հայցէ։ Անոնց աղօթքներն ու խրատը պիտի օգնեն հոգեւոր առողջութիւնդ վերահաստատելու։ (Յակոբոս 5։13-16) Զղջում յայտնելով Եհովայի աղօթէ։ Եթէ այսպէս չվարուիս, պիտի շարունակես յանցապարտութեան զգացում ու խիղճի խայթ ունենալ։ Դաւիթ այս փորձառութիւնը ունեցաւ, բայց ո՜րքան հանգստացաւ երբ Եհովայի խոստովանեցաւ։ Ան գրեց. «Երանի՜ անոր, որուն յանցանքներուն թողութիւն եղաւ ու անոր մեղքերը ծածկուեցան։ Երանի՜ այն մարդուն՝ որուն՝ Տէրը անօրէնութիւն չի սեպեր ու անոր հոգիին մէջ նենգութիւն չկայ»։ (Սաղմոս 32։1-5) Եհովա անկեղծօրէն զղջացող մեղաւորներուն կը ներէ։—Սաղմոս 103։8-14. Առակաց 28։13
Շարունակէ աշխարհէն անջատ մնալ
18. Աշխարհը ի՞նչպէս պէտք է նկատես։
18 Անտարակոյս, անձկագին կը սպասես մեր երկնաւոր Հօր կողմէ խոստացուած հոյակապ նոր աշխարհին։ Ուստի ի՞նչպէս կը նկատես աշխարհը,– Աստուծմէ օտարացած անարդար մարդկային ընկերութիւնը։ Սատանան՝ «այս աշխարհին իշխանը», Յիսուս Քրիստոսի վրայ բան մը չունէր։ (Յովհաննէս 12։31. 14։30) Վստահաբար չես ուզեր որ Բանսարկուն եւ իր աշխարհը քու վրադ բան մը ունենան, ուստի Յովհաննէս առաքեալի սա խօսքերը լրջօրէն նկատի առ. «Մի՛ սիրէք աշխարհը, ոչ ալ ինչ որ աշխարհի մէջ է»։ Ասիկա իմաստուն ընթացքն է, քանի որ «աշխարհս ալ կ’անցնի, անոր ցանկութիւնն ալ. բայց ան որ Աստուծոյ կամքը կը կատարէ, յաւիտեան պիտի մնայ»։—Ա. Յովհաննէս 2։15-17
19. Քրիստոնեայ պատանիներուն յորդոր կը տրուի որ ի՞նչպիսի նպատակակէտեր ունենան։
19 Զաւակներուդ կ’օգնե՞ս որ ‘իրենց անձը անարատ պահեն աշխարհէն’։ (Յակոբոս 1։27) Սատանան կ’ուզէ զաւակներդ որսալ, ինչպէս մարդիկ ձուկ կ’որսան։ Զանազան ակումբներ եւ այլ կազմակերպութիւններ այնպէս մը ծրագրուած են որ պատանիները մղեն Սատանայի աշխարհին յարմարելու։ Բայց Եհովայի ծառաները արդէն կը պատկանին այն միա՛կ կազմակերպութեան, որ իրերու այս չար դրութեան վախճանէն պիտի վերապրի։ Ուստի Քրիստոնեայ պատանիներուն քաջալերութիւն պէտք է տրուի որ ‘Տէրոջը գործին մէջ աւելնան’։ (Ա. Կորնթացիս 15։58) Բարեպաշտ ծնողներ իրենց զաւակներուն պէտք է օգնեն նպատակակէտեր դնելու, որոնք երջանիկ ու վարձահատոյց կեանքի մը կ’առաջնորդեն, որ Աստուած կը պատուէ եւ կ’օգնէ Եհովայի օրուան համար պատրաստ ըլլալու։
Եհովայի մեծ օրուընէ անդին նայէ
20. Ինչո՞ւ յաւիտենական կեանքը մեր մտքին մէջ թարմ պէտք է պահենք։
20 Յաւիտենական կեանքի հեռանկարը մտքիդ մէջ թարմ պահելով, պիտի կարենաս հանդարտ սրտով Եհովայի օրուան սպասել։ (Յուդա 20, 21) Յոյս ունիս որ Դրախտին մէջ երիտասարդական կենսունակութիւնդ պիտի վերանորոգուի եւ անսահման ժամանակ պիտի ունենաս՝ օգտակար նպատակակէտեր հետապնդելու եւ Եհովայի մասին աւելի սորվելու։ Իրականութեան մէջ, կրնաս շարունակել Աստուծոյ մասին սորվիլ յաւիտեան, քանի որ մարդիկ ներկայիս միայն «անոր ճամբաներուն ծայրերը» գիտեն։ (Յոբ 26։14) Ի՜նչ հետաքրքրաշարժ հեռանկարներ։
21, 22. Ի՞նչ տեղեկութեանց փոխանակում կրնայ տեղի ունենալ քու եւ յարուցեալներու միջեւ։
21 Դրախտին մէջ, յարուցեալները պիտի կարենան անցեալի վերաբերեալ մեր գիտութիւնը ամբողջացնել։ Ենովք պիտի բացատրէ թէ ի՛նչպէս հարկ եղած քաջութիւնը հաւաքեց՝ անբարեպաշտ մարդոց Եհովայի պատգամը յայտարարելու համար։ (Յուդա 14, 15) Նոյ վստահաբար պիտի պատմէ թէ տապանը ի՛նչպէս շինեց։ Աբրահամ ու Սառա պիտի յայտնեն թէ ի՛նչ զգացին՝ Ուր քաղաքին հանգստաւէտութիւնը ձգելով ու վրաններու տակ ապրելով։ Իսկ Եսթեր մանրամասնօրէն պիտի պատմէ թէ ի՛նչպէս իր ժողովուրդին շահերը պաշտպանեց ու Համանի դաւը խափանեց։ (Եսթեր 7։1-6) Երեւակայէ թէ Յովնան կը պատմէ մեծ ձուկին փորին մէջ իր անցուցած երեք օրերուն մասին, կամ Յովհաննէս Մկրտիչ կը նկարագրէ իր զգացումները երբ Յիսուսը մկրտեց։ (Ղուկաս 3։21, 22. 7։28) Ի՜նչ հետաքրքրաշարժ տեղեկութիւններ։
22 Քրիստոսի Հազարամեայ Իշխանութեան ընթացքին, թերեւս առանձնաշնորհում ունենաս յարուցեալներուն օգնելու որ «Աստուծոյ գիտութիւնը» ձեռք ձգեն։ (Առակաց 2։1-6) Ներկայիս, ի՜նչ հաճելի է տեսնել մարդիկ Եհովա Աստուծոյ գիտութիւնը կը ստանան եւ անոր համաձայն կը գործեն։ Բայց պահ մը խորհէ այն ուրախութեանդ մասին, երբ Եհովայի օրհնութեամբ ուսուցանես վաղեմի դարերէ եղող անհատներ եւ անոնք երախտապարտ սրտով ընդառաջեն։
23. Ի՞նչ պէտք է վճռենք ընել։
23 Որպէս Եհովայի ժողովուրդը՝ ներկայիս մեր վայելած օգուտները համրելը կամ արժեւորելը, մեր անկատար ջանքերէն գերիվեր է։ (Սաղմոս 40։5) Մանաւանդ Աստուծոյ հոգեւոր հայթայթումներուն համար երախտապարտ ենք։ (Եսայի 48։17, 18) Մեր պարագաները ի՛նչ որ ալ ըլլան, թող ամբողջ սիրտով սրբազան ծառայութիւն մատուցանենք, մինչ Եհովայի մեծ օրուան կը սպասենք։
Ի՞նչպէս պիտի պատասխանես
• ‘Եհովայի օրը’ ի՞նչ է։
• Ի՞նչպէս կրնաս Եհովայի օրուան համար պատրաստ ըլլալ։
• Աստուծոյ մեծ օրը մօտալուտ ըլլալով, ի՞նչ փոփոխութիւններ ընելու կարիք կրնանք ունենալ։
• Եհովայի օրը վերջ գտնելէ յետոյ, ի՞նչ բաներու անձկագին կը սպասես։
[Նկար՝ էջ 4]
Յիսուս փորձութիւններ դիմագրաւելու պատրաստ էր