«Խնդրեցէք եւ պիտի տրուի ձեզի»

Յիսուսի աշակերտներէն մէկը խնդրեց. «Տէ՛ր, մեզի աղօթք ընել սորվեցուր» (Ղուկաս 11։1)։ Պատասխանին մէջ, Յիսուս երկու առակներ պատմեց, որոնք մեզի կը սորվեցնեն ինչպէ՛ս աղօթել եւ Աստուծոյ կողմէ լսուիլ։ Եթէ երբեք հարց տուած ես թէ արդեօք Աստուած աղօթքներդ կը լսէ՛, Յիսուսին պատասխանը քեզ պիտի հետաքրքրէ (կարդա՛ Ղուկաս 11։5-13)։

Առաջին առակը կը կեդրոնանայ աղօթք մատուցանողին վրայ (Ղուկաս 11։5-8)։ Պատմութեան մէջ, տղամարդ մը ուշ գիշեր հիւր մը ընդունելով, հրատապ հարց կ’ունենայ. հիւրասիրելիք ուտելիք չունի։ Թէեւ ժամը ուշ է, բայց ան իր բարեկամին տունը կ’երթայ՝ հաց խնդրելու։ Սկիզբը, բարեկամը կը վարանի ելլելու, քանի որ ընտանեօք մէկտեղ քնացած են։ Բայց հիւրընկալը համարձակ հաստատամտութեամբ կը շարունակէ հաց խնդրել, մինչեւ որ բարեկամը կ’ելլէ ու հարկ եղածը իրեն կը մատակարարէa։

Այս առակով Յիսուս մեզի կը սորվեցնէ, թէ աղօթքի մէջ պէտք է յարատեւենք,– շարունակե՛նք խնդրել, փնտռել ու դուռը զարնել (Ղուկաս 11։9, 10)։ Ինչո՞ւ։ Արդեօք Յիսուս ըսել կ’ուզէ՞ թէ երբ կ’աղօթենք, կարծես թէ վարանող Աստուծոյ մը դուռը կը զարնենք։ Ո՛չ։ Յիսուսի միտք բանին այն է՝ թէ առակին մէջի վարանող բարեկամին հակառակը, Աստուած պատրաստ է հաւատքով աղօթողներուն պատշաճ խնդրանքները շնորհելու։ Եւ մենք մեր յարատեւութեա՛մբ այսպիսի հաւատք կը ցուցաբերենք։ Կրկին անգամ խնդրելով, ցոյց կու տանք թէ իրապէս մեր խնդրանքին պէտք ունինք եւ թէ իսկապէս կը հաւատանք թէ Աստուած կրնա՛յ զայն շնորհել,– եթէ իր կամքին համաձայն է (Մարկոս 11։24. Ա. Յովհաննէս 5։14)։

Երկրորդ առակը կը կեդրոնանայ «աղօթքի լսող»ին՝ Եհովայի՝ վրայ (Սաղմոս 65։2)։ Յիսուս հարցուց. «Ձեզմէ ո՞վ է այն հայրը, որմէ իր որդին հաց ուզէ, քար տայ անոր. կամ եթէ ձուկ ուզէ, ձուկին տեղ օձ տայ անոր. կամ եթէ հաւկիթ ուզէ, կարիճ տայ անոր»։ Պատասխանը բացայայտ է. ո՛չ մէկ սիրառատ հայր վնասակար բաներ կու տայ իր զաւակներուն։ Ապա, Յիսուս առակին իմաստը բացատրեց. եթէ անկատար հայրեր «աղէկ ընծաներ» կու տան իրենց զաւակներուն, «որչա՜փ աւելի. . . Հայրը երկնքէն Սուրբ Հոգին [լաւագոյն ընծան] պիտի տայ [իր երկրային զաւակներուն] որ իրմէ կը խնդրեն» (Ղուկաս 11։11-13. Մատթէոս 7։11)b։

Այս առակը Եհովայի՝ «աղօթքի լսող»ին՝ մասին ի՞նչ կը սորվեցնէ մեզի։ Յիսուս մեր ուշադրութեան կը յանձնէ Եհովան որպէս հոգատար Հայր, որ կը փափաքի իր զաւակներուն կարիքները գոհացնել։ Ուստի, Եհովայի երկրպագուները կրնան ազատ զգալ իրեն մօտենալու եւ իրենց սրտին խնդրանքները ներկայացնելու։ Իսկ գիտնալով թէ ան իրենց համար լաւագոյնը կ’ուզէ, անոնք իսկոյն կ’ընդունին անոր պատասխանը, նոյնիսկ եթէ ատիկա իրենց ակնկալածին պէս չըլլայc։