Ուրիշներու Հետ Հոգեւոր Հարստութիւն Բաժնենք
1 Հաւատարիմ Մովսէսի նման, Եհովայի այժմու վկաները գիտեն թէ հոգեւոր հարստութիւնը արժէքով կը գերազանցէ այս աշխարհի նիւթական գանձերը։ (Եբր. 11։26) Դրամը կրնայ ծախու առնել տուներ, ինքնաշարժներ եւ այլ ստացուածքներ, բայց չի կրնար գնել կեանք, մտքի խաղաղութիւն, կամ Եհովա Աստուծոյ հաճութիւնն ու օրհնութիւնը։
2 Աստուծոյ Խօսքին ու նպատակին մասին գիտութիւն ու հասկացողութիւն ձեռք ձգելը իսկական հոգեւոր հարստութիւն է։ (Կող. 2։3) Այս անզուգական հարստութիւնը կրնայ հարազատ ուրախութիւն բերել ներկայիս, ինչպէս նաեւ՝ ապագայի համար հաստատ յոյս մը։ Որքա՜ն առանձնաշնորհեալ ենք որ այսպիսի հոգեւոր հարստութիւն ստացած ենք։
3 Ուրիշները Ի՛նչպէս Հարստացնել. Կրնանք ուրիշներու օգնել որ հոգեւորապէս հարստանան, իրենց ներկայացնելով Դիտարան–ը, որ կրնայ զիրենք առաջնորդել աստուածային իմաստութեան «ծածուկ գանձերուն»։ (Առ. 2։4) Ապրիլ ու Մայիս ամիսներու ընթացքին, ամէն յարմար առիթով պիտի ներկայացնենք Դիտարան–ը։ Եթէ ի մտի ունենանք թէ Դիտարան–ը ի՛նչպէս մեր կեանքը ճոխացուցած է, պիտի մղուինք կերպեր փնտռելու, որպէսզի կարելի եղածին չափ շատ մարդոց ներկայացնենք զայն։ (Առ. 3։27) Պարբերաթերթեր եւ գրքոյկներ ստացող անհատներուն հասցէները նոթագրեցէք, որպէսզի անոնց վերայցելէք ու կանոնաւորաբար պարբերաթերթերը ներկայացնէք։
4 Հոգեւոր առումով, ի՞նչպէս կրնանք նմանիլ Սաղմոս 112–ի մէջ յիշուած աստուածավախ մարդուն, որ իր հարստութիւնը առատապէս բաշխեց։ (Սաղմ. 112։1, 3, 9) Պէտք է փնտռենք ոչխարանման մարդիկը եւ անոնց օգնենք որ իրենց հոգեւոր կարիքները լեցնեն։ (Մատթ. 5։3) Ասիկա կը պահանջէ որ ամէն յարմար առիթ օգտագործենք, պաշտօնապէս եւ անպաշտօն կերպով վկայելու համար։
5 Կարգ մը շրջաններու մէջ, երեկոյեան վկայութիւնը շատ արդիւնաբեր եղած է, քանի որ մարդիկ յաճախ տուն կը գտնուին։ Փորձա՞ծ էք տունէ տուն ծառայել ձեր Ժողովքի Գրքի Ուսումնասիրութենէն շուրջ մէկ ժամ առաջ կամ շաբթուան ուրիշ երեկոյ մը։ Ինչո՞ւ ասիկա ընելու հաստատ կարգադրութիւններ չընէք։ Անիկա ձեզի համար կրնայ շատ վարձահատոյց ըլլալ։
6 Կրնա՞ք յարմար ժամանակներ գտնել վկայելու համար ձեր աշխատավայրին մէջ։ Քոյր մը մի քանի պարբերաթերթեր դրաւ իր գրասեղանին վրայ, այնպէս որ իր գործակիցները կրնային տեսնել զանոնք։ Կէսօր չեղած, ան արդէն բոլոր պարբերաթերթերը բաշխած էր։ Անոր գործակիցներէն շատեր հարազատ հետաքրքրութիւն ցուցաբերեցին, եւ 18 հոգի սկսան պարբերաթերթերը կանոնաւորաբար ստանալ։
7 Արծաթը, ոսկին եւ այլ նիւթական գանձերը կարելի չէ բաղդատել այն գիտութեան ու հասկացողութեան հոգեւոր հարստութեան հետ, զոր ձեռք ձգած ենք Եհովայի կազմակերպութեան եւ Աստուածաշունչի մեր ուսումնասիրութեան միջոցաւ։ Հոգեւոր հարստութիւն փնտռողներուն համար մատչելի են հարազատ ուրախութիւն, հաճոյական ճամբաներ, խաղաղութիւն եւ «օրերու երկայնութիւն»՝ նոյնիսկ յաւիտենական կեանք։ (Առ. 3։13-18) Ուրիշներու հետ մեր հոգեւոր հարստութիւնը բաժնելով, մեր ունեցածին հանդէպ մեր գնահատութիւնը ցոյց կու տանք եւ Եհովայի յարատեւ օրհնութիւնը կը շահինք։—Առ. 19։17