Աստուածային Իմաստութեան Գերազանց Արժէքը
1 Ոմանք կը խորհին թէ Եհովայի Վկաները գլխաւորաբար պէտք է ջանան մարդկութեան դիմագրաւած ներկայ խնդիրները մեղմացնել։ Այսպիսի անհատներ չեն տեսներ մեր Աստուածաշունչի դաստիարակչական գործին գերազանց արժէքը, ինչպէս Պօղոս առաքեալ գրեց. «Խաչին քարոզութիւնը կորսուածներուն յիմարութիւն է, բայց մեզի փրկուածներուս Աստուծոյ զօրութիւնն է»։ (Ա. Կորն. 1։18) Արդարեւ գիտենք թէ քրիստոնէական ծառայութիւնը ներկայիս երկրի վրայ ամենակարեւոր գործունէութիւնն է։
2 Ներկայիս Աւելի Լաւ Կեանք մը. Մարդկութեան խնդիրները լուծելու համար մարդկային ջանքերը շատ սահմանափակ արդիւնքներ տուած են։ Օրէնսդրութիւնը ոճիրի ուռճացումը չէ կասեցուցած։ Խաղաղութեան դաշնագրերը եւ խաղաղութիւն պահպանող զօրքերը պատերազմին վերջ չեն դրած։ Ընկերային ծրագիրները չեն կրցած աղքատութիւնը արմատախիլ ընել։ (Սաղմ. 146։3, 4. Երեմ. 8։9) Միւս կողմէ, Թագաւորութեան պատգամը միլիոնաւորներու կեանքը փոխակերպած է, անոնց օգնելով որ Աստուծոյ ընդունելի եղող նոր անձնաւորութիւնը հագնին։ (Հռովմ. 12։2. Կող. 3։9, 10) Ասիկա ընելով, անոնք հիմա իսկ բարելաւուած կեանք մը կը վայելեն։—Ա. Տիմ. 4։8
3 Փայլուն Ապագայ մը. Կեանքի անմիջական դժուարութիւնները ձեռք առնելու մէջ մեզի օգնելէ զատ, աստուածային իմաստութիւնը մեզ կարող կը դարձնէ որ ապագային համար ազդուօրէն ծրագրենք։ (Սաղմ. 119։105) Անիկա մեզ կը խնայէ իրերու ներկայ դրութիւնը բարեկարգելու համար ունայն ջանքեր թափելէ։ (Ժող. 1։15. Հռովմ. 8։20) Որքա՜ն երախտապարտ ենք որ մեր կեանքը չենք վատներ, հետապնդելով նպատակակէտեր որոնք միայն պատրանք մըն են։ Փոխարէն, մեր ջանքերը կը կեդրոնացնենք արդար «նոր երկնքի ու նոր երկրի մը» նկատմամբ Եհովայի ստոյգ խոստումին վրայ։ Երբ Եհովայի դատաստանի օրը ժամանէ, անվիճելիօրէն բացայայտ պիտի ըլլայ թէ աստուածային իմաստութեան ապաւինողները շիտակ ընտրութիւնը ըրած էին։—Բ. Պետ. 3։10-13. Սաղմ. 37։34
4 Թէեւ աստուածային իմաստութիւնը կրնայ «աշխարհային իմաստութեամբ» վարժուած անհատներուն աչքին անգործնական թուիլ, սակայն իրականութեան մէջ, անիկա հետեւելիք միակ գործնական ընթացքն է։ (Ա. Կորն. 1։21. 2։6-8) Հետեւաբար, կը շարունակենք համայն երկրի մէջ ծանուցանել Աստուծոյ տուած պատգամը, որ «ի՛նք միայն իմաստուն է»։—Հռովմ. 16։27, Անթիլիաս